Akore ty Ampiofagnagne o Vavolombelo i Jehovah-o amy ty Fanompoagne Atao Iareo?

Mahazo fampiofagnagne tsy tapake amy ty lafi’e iaby mifandrambe amy ty fiaigna ty Kristiana o Vavolombelo i Jehovah-o. Agnisa izay ty fanompoagne atao iareo. Tsy inogne o fanompoagne iohoe fa i asa nandilia i Jesosy o mpanonjohy ty lia’eoy, zane hoe ty fitoriagne naho fampianaragne miomba i talily soa i Fanjakàn’Andrianagnahareỳ. (Matio 24:14; 28:19, 20) Amy ty fivoriagne fanoe’ay isan-keregnandro naho amy ty havoriambey faritse vaho vondrom-paritse fatao’ay isan-taogne ty ahazoa’ay o fampiofagnagne iohoeke. Ze Vavolombelo i Jehovah managne andraikitse agnivo ty fiangonagne eo naho agnivo ty fandaminagne eo ka, le mahazo fampiofagnagne manokagne amy ty alala ty sekoly Ara-baiboly.

Ty hotrea amy ty lahatsoratse toy ato

Ino ty fampiofagnagne azo o Vavolombelo i Jehovah-o?

Fivoria ty fiangonagne. Magnatreke fivoriagne roe zahay isan-keregnandro amy ty toeram-pivavahagne atao tihoe Anjomba i Fanjakagney. Atao andavanandro ty raike amo o fivoriagne iohoe, le ty raike amy ty fara ty heregnandro. Afake magnatreke aze ze kila ndaty sady tsy misy raketse ka ty agne.

Fivoriagne andavanandro. Ianara’ay amo o fivoriagne iohoe ty fomba hagnasoa’ay ty fahaia’ay mamaky teny, ty fahaia’ay manombo-drehake, ty fahaia’ay mirehake agnatreha ty ndaty maro, vaho ty fahaia’ay mitory naho mampianatse. Amy ty alala ty lahajaka, fiharoagne midineke, fampisehoagne naho video ty agnomeagne i fampiofagnagney. Magnampe anay hahatrea vokatse o fampiofagnagne iohoe naho fa mitory amo o ndatio zahay ndra naho fa mampianatse Baiboly ze ndaty liagne. Mandrambe soa amo o fampiofagnagne iohoeke iaby ze magnatreke fivoriagne. Fa ty tena lahibey le tihoe magnatanjake ty finoa’ay an’Agnahare vaho mampitombo ty hatea’ay aze naho ty hatea’ay ty mpiharo finoagne ama’ay ty fivoriagne atao’ay.
Fivoriagne amy ty fara ty heregnandro. Mizara roe o fivoriagne iohoe. Lahajaka Ara-baiboly hoahy ty ndaty maro ty tapa’e voaloha’e, le ty tapa’e faharoe fiharoagne midineke ty lahatsoratse raike amy ty Fitalakesan-davitsea fianaragne. Magnazava foto-kevetse Ara-baiboly sady mirehake toro lalagne magnampe anay amy ty fanompoa’ay vaho amy ty fiaigna’ay manokagne i lahatsoratse rey.

Havoriambey faritse naho vondrom-paritse. Manao havoriambey telo zahay isan-taogne, le fiangonagne maro ty miarake mivory ty amy io. Mifantoke amy ty foto-kevetse manokagne nalaegne boake agnate Baiboly ao o fandaharagne mahafale iohoe, sady misy lahajaka, fampisehoagne, fagnadikadignagne vaho video maromaro. Manahake ty fivoria ty fiangonagne atao’ay avao ka, le mampitombo ty fahatakara’ay o Baibolio sady magnampe anay hagnasoa ty fomba fitori’ay naho ty fomba fampianara’ay ty havoriambey faritse naho vondrom-paritse. Mbe azo ze kila ndaty atrehegne avao ka io sady tsy misy raketse.

Sekoly Ara-baiboly hoahy o Vavolombelo i Jehovah-o

Mba hahazoagne fampiofagnagne fagnampe’e, le misy Vavolombelo i Jehovah ila’e asaegne hagnatreke sekoly Ara-baiboly sambe karaza’e. Inogne iaby o sekoly reo? Ino ty tanjogne ama’e sady manao akore ty fahareta’e? Ia ty afake magnatreke aze?

Sekoly ty Fanompoa ty Mpisava Lalagne

Ty tanjogne: Hagnampeagne o mpanompo marain-tsy hariva atao tihoe mpisava lalagneob mba ho vao mainke hahatrea vokatse amy ty asa fitoriagne naho fampianaragne. Misy fiharoagne midineke, fampisehoagne, lahajaka vaho fagnazaran-tegna o sekoly iohoe.
Ty fahareta’e: Enegn’andro.
Ty magnatreke aze: Ze fa tao’e raike nanoagne mpisava lalagne ty asaegne hagnatreke aze. Va’e hasaegne hagnatreke indraike ze mpisava lalagne fa ela, tsy nagnatreke tagnate ty dime taogne.

Mpianatse roe amy ty Sekoly ty Mpisava Lalagne manao fampisehoagne. Mifantoke soa i mpianatse ila’e rey.

Sekoly ty Mpitory i Fanjakagney

Ty tanjogne: Hagnomezagne fampiofagnagne manokagne o mpanompo marain-tsy hariva fa za-drahao. Vao mainke magnasoa ty fahaia iareo mitory naho mampianatse iareo amo o sekoly iohoe sady mandaligne Baiboly. Alefa amy ze toeragne mbe ilagne mpitory maro agne ty ankamaroa ze mahazo diploma amy io.
Ty fahareta’e: Roe volagne.
Ty magnatreke aze: Afake manao fangatahagne ze mpisava lalagne mahafeno fepetse sady managne fahafahagne handeha amy ze toeragne mbe ilagne mpitory maro.

Sekoly ty Androanavi-pagnahy

Ty tanjogne: Hagnampeagne o androanavi-pagnahioc hahavita soa ty andraiki’e agnivo fiangonagne eo. Agnisa izay ohatse ty fampianaragne, ty fanoagne ty asa ty mpiarake, ty fampitomboa iareo ty hatea iareo i Jehovah naho ty mpiharo finoagne amy iareo.—1 Petera 5:2, 3.
Ty fahareta’e: Dime andro.
Ty magnatreke aze: Ze androanavi-pagnahy vaovao naho ze androanavi-pagnahy fa za-draha tsy nagnatreke tagnate ty dime taogne ty asaegne magnatreke aze.

Sekoly ty Mpiandraikitse ty Faritse Naho ty Vali’e

Ty tanjogne: Hampiofagnagne o mpiandraikitse mpitety faritane atao tihoe mpiandraikitse ty faritseod mba hahavita soa ty andraiky iareo. (1 Timoty 5:17) Magnampe iareo naho ty vali’e vao mainke hahatakatse soa ty Soratse Masigne ka i fampiofagnagney.
Ty fahareta’e: Vola’e raike.
Ty magnatreke aze: Ze mpiandraikitse ty faritse vaovao ty asaegne magnatreke aze miarake amy ty vali’e, tao’e raike afara ty anendreagne iareo. Afara izay, le mbe asaegne indraike iareo isake tie afake dime taogne eo ho eo.

Sekoly ty Fanompoagne i Fanjakagney

Ty tanjogne: Hagnampeagne o androanavi-pagnahio naho o mpagnampe amy ty fiangonagneoe mba hahavita soa ty andraiky iareo agnivo fiangonagne eo mifagnarake amy ty raha misy naho ty raha ilaegne. (2 Timoty 3:1) Isake ty roe ndra telo taogne ty isia o sekoly iohoeke.
Ty fahareta’e: Miovaova faie mateteke le atao agnate ty andro raike.
Ty magnatreke aze: Mpiandraikitse ty faritse, androanavi-pagnahy naho mpagnampe amy ty fiangonagne.

Sekoly ty Fanompoagne amy Betela Ao

Ty tanjogne: Hagnampeagne o Betelitaof mba hahavita soa ty asa’e naho hampitomboagne ty hatea iareo an’Andrianagnahare. Natao ka o sekoly iohoe mba hagnampeagne iareo sambe iareo hifankatea.
Ty fahareta’e: Dime andro miampe tapak’andro.
Ty magnatreke aze: Ze Betelita vaovao. Asaegne hagnatreke indraike ka ze Betelita fa ela, tsy nagnatreke tagnate ty dime taogne.

Sekoly Ara-baiboly i Gileada

Ty tanjogne: Hagnampeagne ty mpianatse ao vao mainke ho tea naho hahatakatse soa ty Baiboly sady hagnampeagne iareo hampihatse ze raha nianara’e. (1 Tesalonianina 2:13) Ty Kristiana matotse ara-pagnahy magnatreke ty sekoly i Gileada, le manjare tena ilaegne agnivo ty fandamina i Jehovah eo naho amy ty asa fampianaragne Baiboly atao magneran-tane. Va’e ho tendregne hiasa amy faritane ey ndra amy ty birò i sampagne amy ty tane misy aze ndra amy ty tane hafa agne ze nahazo diploma.
Ty fahareta’e: Dime volagne.
Ty magnatreke aze: Ze mpanompo marain-tsy hariva asae ty birò i sampagne hameno fangatahagne. A Etazonia agne ty anoagne o sekoly iohoe, zane hoe amy ty Foibey Fampianara ty Tilikambo Fiambenagne a Patterson, a New York agne.

Sekoly ty Komity i Sampagne Naho ty Vali’e

Ty tanjogne: Hampiofagnagne o Komity i Sampagneog mba hahavita hiandraikitse ty asa atao amy birò i sampagne ao naho ty asa fanompoagne atao ty Vavolombelo i Jehovah an-toeragne eo ndra amy ty tane maromaro iandraiketa i sampagne misy iareoy.
Ty fahareta’e: Roe volagne.
Ty magnatreke aze: Ty Komity i Sampagne naho ty vali’e. Ty Foibey ty Vavolombelo i Jehovah Magneran-tane ty mijobogne ze hagnatreke amy iareo, le amy ty Foibey Fampianara ty Tilikambo Fiambenagne a Patterson, a New York agne ty anoagne aze.

Mioregne amy ty ino ty fampiofagnagne omeagne o Vavolombelo i Jehovah-o?

Lava mioregne amy ty Baiboly avao ty fampiofagnagne omeagne o Vavolombelo i Jehovah-o. Inoa’ay fa boake amy ty hery ty fagnahy masin’Andrianagnahare o Baibolio sady misy toro lalagne maro tena fanjaka mifandrambe amy ty fiaigna ty Kristiana.—2 Timoty 3:16, 17.

Mandoa vola vao o Vavolombelo i Jehovah-o naho fa ampiofagnegne?

Aha’a, tsy andoavam-bola i fianaragney! Tohanagne amy ty alala ty fagnomezagne an-tsitrapo ty asa iaby anoe o Vavolombelo i Jehovah-o.—2 Korintianina 9:7.

a Misy Baiboly, fitaovagne fianaragne Baiboly naho video ty amy tragnom-poraro’ay jw.org ao.

b Vavolombelo i Jehovah vita badisa ze o mpisava lalagne zao sady fitsikombe soa. Afake manao aze ndra lahilahy ndra ampela. Magnatratse lera manokagne iareo isam-bolagne mba hitoriagne ty hafatse boake amy Baiboly ao amy ty hafa.

c Lahilahy Kristiana matotse mampianatse ty Soratse Masigne sady manao ty asa ty mpiarake, le magnampe naho mampahery o vahoa i Jehovah-o. Tsy karamaegne iareo.

d Mpanompo marain-tsy hariva o mpiandraikitse faritseo. Mitilike fiangonagne sambe hafa amy ty faritse iandraiketa’e iareo isan-keregnandro. Manao lahajaka Ara-baiboly naho miarake manompo amy i fiangonagne tilihe’ey reke mba hampaherezagne iareo.

e O mpagnampe amy ty fiangonagneo, le manao asa maro sambe hafa mba hagnampeagne o rahalahy naho o rahavaveo. Voka izay, le manjare manam-potoagne soa hampianaragne naho hanoagne ty asa ty mpiarake o androanavi-pagnahio.

f Tokavegne tihoe Betela ty birò ty sampa ty Vavolombelo i Jehovah. Ty mpanompo marain-tsy hariva miasa agne, le manohagne ty asa atao ty Vavolombelo i Jehovah amy ty toeragne iandraiketa i sampagney eo.

g Lahilahy matotse telo ndra mihoatse izay ty mahaforogne ty Komity ty Sampagne.

Ino ty soa rambese o Vavolombelo i Jehovah-o boake amy ty fampiofagnagne azo iareo?

Izao ty nirehafe i Natasha boake a Etazonia agne: “Ndaty saro-kegnatse raho, le nisarotse amako ty nirehake miomba ty Baiboly amy ty ndaty tsy fantako. Faie nagnampe ahy hatoky tegna naho hagnasoa ty fahaiako mampianatse ty fampiofagnagne niazoko amy i fivoriagne andavanandro rey. Nanjare nahay nifampirehake soa amy ty ndaty amo o fiangonagneo eo vaho amy ty ndaty am-piasako agne ka raho.”
Hoe ty Stephen boake a Nizeria agne: “Ty fagnatrehako ty Sekoly ty Mpitory i Fanjakagney, le nagnampe ahy hitsikombe i toetse soa i Jehovah rey. Vao mainke nanjare nibey hatea, nanam-paharetagne naho nisoa fagnahy raho. Voka izay, le nahatsapa raho fa vao mainke nihamatotse, nanjare ragnetse soa sady nahay niara-monegne amy ty hafa. Nianarako tamy i sekolỳ ka ty atao naho fa hikaroke foto-kevetse Ara-baiboly vaho ty fomba hanohinagne ty fo o ndatio naho fa magnazava ty Saontsin’Andrianagnahare amy iareo.”
Hoe ty Luca boake a Italỳ agne: “Ty Sekoly ty Androanavi-pagnahy, le nagnampe ahy vao mainke hiambane. Tena ilaeko o toetse iohoe mba hahavitako ty andraikiko amy ty maha androanavi-pagnahy ahy. Nasongady ty lahajaka tao fa ilaegne ty mitsikombe ty ohatse nenga i Jesosy.”
Hoe ty Samuel boake a Royaume-Uni agne: “Ty Sekoly ty Fanompoagne i Fanjakagney, le nampianatse ahy fa toko’e ho mora hatognegne raho, ho soa fagnahy vaho haneho hatea amy ty fo naho fa mifandrambe amy ty hafa. Nianarako ka fa toko’e ho ty hatea ty mandrisike ahy hanao raha hoahy ty hafa, fa tsy tihoe raha tsy maintsy atao avao zay.”
Hoe ty Elnathan naho i Princess boake a Filipiny agne: “Ty Sekoly i Gileada, le nagnampe anay handinen-tegna amy ty alala i hetsoro agn’ohatsey, tsy inogne zay fa ty Saontsin’Andrianagnahare. (Jakoba 1:22-25) Voka’e, nanjare nitrea’ay tie ino amy ty toetse’ay naho ty asa fanompoagne atao’ay ro mila ovagne ndra hasoaegne. Nianara’ay ka fa mila mipay ze hahasoa ty hafa zahay sady toko’e ho ty hatea ty mandrisike anay hirehake ndra hanao raha.”