Nagnino Nareo Vavolombelo i Jehovah-o ie Tsy Mankalaza Pakao?

Ty heve o ndatio

Heve-diso: Tsy mankalaza Paka iareo Vavolombelo i Jehovah satria tsy Kristiana.

Ty maregne: Mino zahay fa i Jesosy Kristy ro Mpamonje antikagne sady manao ze fara heri’ay zahay mba ‘hagnorihagne marine ty lia’e.’​—1 Petera 2:21; Lioka 2:11.

Heve-diso: Tsy mino iareo tie natsangagne tamy ty mate ty Jesosy.

Ty Maregne: Mino zahay tie natsangagne tamy ty mate ty Jesosy sady izay ty fototse ioregna o fivavahagne kristianao. Izahay aza mitory ty miomba izay.​—1 Korintianina 15:3, 4, 12-15.

Heve-diso: Tsy darea’areo ndra tie voa mafe ty ana’areo satria tsy mba mifalefale naho fa Paka.

Ty maregne: Tena tea’ay ty ana’ay sady manao ze azo’ay atao zahay mba hampiofagnagne naho hahasambatse iareo.​—Titosy 2:4.

Nagnino zahay Vavolombelo i Jehovah ro tsy mankalaza Paka?

• Tsy mifagnarake amy ty Baiboly ty fankalazagne Paka.

• Ty nimateza i Jesosy ro nandilia’e ho tsiarovegne fa tsy ty nitsangana’e tamy ty mate. Mahatsiaro ty nimateza’e zahay isan-taogne isake tie miheregne ze andro zay, mifagnarake amy ty kalandrie magnorike ty fihody i volagney.​—Lioka 22:19, 20.

• Boake amy ty fombafomba taloha mifandrambe amy ty fahavokaragne ty raha fatao isake Paka. Tsy tean’Andrianagnahare hankalaza Paka areke ty Kristiana. Mitake ty hanompoagne aze raike avao ty Andrianagnahare, le ho vignetse reke naho sady mivavake ama’e tikagne ro manao fombafomba tsy tea’e.​—Eksodosy 20:5; 1 Mpanjaka 18:21.

Mandrisike antikagne ty Baiboly mba hanagne “fahendreagne naho fahaiagne misaigne” fa tsy hagnorike avao ty fombafomba atao o ndatio. (Ohabolana 3:21; Matio 15:3) Mino areke zahay fa tena mifagnarake amy ty Baiboly ty safidy atao’ay mba tsy hankalazagne Paka. Rehafe’ay amo o ndatio zay naho fa magnontane anay iareo. Faie hajae’ay ka ty safidy o ndatio miomba izay.​—1 Petera 3:15.