Tena Misy vao o Afobeio? Ino ty Atao Tihoe Afobey Naho ty Baiboly ro Henteagne?

Vale’e ara-baiboly

Misy Baiboly fa ela maromaro mampiasa ty rehake tihoe “helo” ndra afobey, amy ty andinin-teny ila’e. (Salamo 16:10; Asan’ny Apostoly 2:27 a) Atoro i sare amy ty lahatsoratse toy ato io ty raha inoa ty ndaty maro miomba ty afobey. Toeragne misy afo mirehetse nainai’e zao io sady agne ty agnasazeagne ze raty fagnahy. Faie izay vao ty raha ampianare ty Baiboly?

Hotrea amy ty lahatsoratse toy ato

Toeragne fampijaleagne nainai’e vao o afobeio?

Aha’a. Midika tihoe “Kibory”, ty dika izay, kibory misy ze mate iaby, i rehake tam-boaloha’e nadika ty Baiboly fa haehae ila’e tihoey “helo” ndra afobey (Hebreo: “Sheôl”; Grike: “Haides”). Rehafe ty Baiboly fa tsy misy sasa o ndatio naho fa amo o “Kibory” iohoe agne.

Tsy mahafantatse ndra ino ndra ino ty mate, le tsy mahatsapa fanaintaignagne. “Tsy misy afake miasa, ndra magniry hanao raha, ndra mahazo fahalalagne, ndra maneho fahendreagne, ty an-Kibory handenà’o agne.” (Mpitoriteny 9:10) Tsy toeragne ahareizagne feo o ndaty maro mitoreo areke i afobeỳ. Rehafe ty Baiboly tie: “Lonike abey ty raty fagnahy halam-baraka, sady hatao tsy maharehake sasa an-Kibory ao!”—Salamo 31:17; 115:17.
Arake ty nisaontsien’Andrianagnahare, le fahafatezagne ty saze atera ty fahotagne fa tsy fampijalejaleagne agnate afobey. Nisaontsy tamy i Adama, i lahilahy voaloha’ey ty Andrianagnahare tie fahafatezagne ty ho saze’e naho tsy mankatò reke. (Genesisy 2:17) Tena tsy nisaontsy miomba i fampijaleagne nainai’e agn’afobey agney reke. Naho fa nanota ty Adama naho fa tafara tatoy, le izao ty saze nisaontsien’Andrianagnahare tama’e: “Lemboke rehe le hiheregne ho lemboke indraike.” (Genesisy 3:19) Hanjare tsy hisy sasa ty Adama. Naho tena tsy maintsy nalefan’Andrianagnahare tagn’afobey agne vata’e ty Adama, le tsy maintsy ho nisaontsy izay reke. Tsy miova ty saze mean’Andrianagnahare ze tsy magnorike ty lalà’e. Izao ty nampanorate’e ty mpanoratse Baiboly raike, ela bey tafara ty nanotà i Adama: “O fateo ro vale ty ota.” (Romanina 6:23) Tsy misy anto’e toko’e hagnomezagne saze hafa sasa satria “ze mate le afake maliolio amy ty fahota’e.”—Romanina 6:7.
Mampangorigne an’Andrianagnahare i tihoey fampijaleagne nainai’e. (Jeremia 32:35) Mifanohetse amy ty raha ampianare ty Baiboly zay. Rehafe ty Baiboly fa “Andrianagnahare hatea.” (1 Jaona 4:8) Tea’e naho hatea ty anto’e anompoantikagne aze, fa tsy tahotse tie ke hampijalegne nainai’e.—Matio 22:36-38.
Nisy ndaty soa fagnahy nandeha agn’afobey agne. Rehafe i Baiboly mampiasa ty rehake tihoe “helo” ndra afobeỳ fa nisy mpanompon’Andrianagnahare tsy nivalike nagniry ty ho agne. Agnisa izay ty Jakoba naho i Joba. (Genesisy 37:35; Joba 14:13) Ndra i Jesosy Kristy aza rehafegne fa tagn’afobey agne, tagnelagnela ty fotoagne nimateza’e naho namelomagne aze tamy ty mate. (Asan’ny Apostoly 2:31, 32) Mazava areke fa naho fa mampiasa ty rehake tihoe “helo” ndra afobey i Baiboly rey, le Kibory ty tea’e ho rehafegne.b

Ino ty dika i fagnohara i Jesosy miomba i lahilahy mpagnarivo naho i Lazarosỳ?

Fagnoharagne nirehafe i Jesosy io sady trea amy Lioka 16:19-31 ao. Natao mba hampianaragne miomba ty findesam-batagne naho ty fomba fiheven’Andrianagnahare o fagnoharagne iohoe. Tsy tihoe tantara tena nisy i fagnoharagne miomba i lahilahy mpagnarivo naho i Lazarosỳ. (Matio 13:34) Naho te hahafantatse soa o fagnoharagne iohoe rehe, le henteo ty lahatsoratse tihoe “Ia i Lahilahy Mpagnarivoy Naho i Lazarosy?”

Midika tihoe tafasarake aman’Andrianagnahare vao tihoe afobey?

Aha’a. Mifanohetse amy ty Baiboly i fampianaragne tihoey tie mbe afake mahatsapa ho tafasarake aman’Andrianagnahare o mateo. Rehafe ty Baiboly fa tsy mahafantatse ndra ino ndra ino o mateo.—Salamo 146:3, 4; Mpitoriteny 9:5.

Fa nisy ndaty navotagne boake agn’afobey agne vao?

Ie. Misy ndaty sive tantarae ty Baiboly fa tan-Kibory agne (adika ty Baiboly ila’e tihoe “helo” ndra “afobey” ), faie nivelomegne tamy ty mate le nivelogne indraike.c Naho nisy raha nitadidy iareo tie tagne, le tsy maintsy ho nitantarae iareo ze raha niaigna’e tagne. Faie tsy nisy tamy iareo nitantara fampijaleagne ndra nitantara raha hafa. Ino ty anto’e? Satria naho henteagne ty fampianara ty Baiboly, le tsy mahafantatse ndra ino ndra ino iareo, fa hoe ndaty “niroro” avao.—Jaona 11:11-14; 1 Korintianina 15:3-6.

a Tsy mampiasa ty rehake tihoe “helo” ty ankamaroa ty Baiboly amy izao, amy Asan’ny Apostoly 2:27 ao. Misy mampiasa tihoe “toera ty mate” ohatse ty ila’e (Dikan-drehake Iombognagne a Madagasikara Etoa), “fitoboha ty mate” (Dikan-drehake Katolika), na “fiaignan-tsi-hita.”—Dikan-drehake Protestanta.

b Henteo i efajoro tihoey “I rehake tam-boaloha’e tagney.”

c Henteo ty 1 Mpanjaka 17:17-24; 2 Mpanjaka 4:32-37; 13:20, 21; Matio 28:5, 6; Lioka 7:11-17; 8:40-56; Jaona 11:38-44; Asan’ny Apostoly 9:36-42; 20:7-12.

Andinin-teny miomba ty afobey, ndra Kibory

Joba 14:13: “Naho mba magnetake ahy an-Kibory agne rehe, ... Sady naho mba misy fotoagne fa nifera’o ho ahy, mba hahatsiarovagne ahy!”

Ty dika’e: Fanta i lahilahy tsy nivalike atao tihoe Jobay, fa hijanogne i fanaintaigna’ey naho fa agn’afobey (Kibory) agne reke. Fanta’e ka fa mbe afake magneregne aze boake agne ty Andrianagnahare le ho velogne indraike reke.

Salamo 145:20: “Miaro ze tea aze ty Jehovah, faie hovonovonoe’e o raty fagnahio iaby.”

Ty dika’e: Hovonovonoen’Andrianagnahare o raty fagnahio, ty dika izay hatao’e tsy misy sasa. Tsy tihoe henga’e ho velogne agn’afobey agne iareo mba hampijalégne.

Mpitoriteny 9:10: “Tsy misy afake miasa, ndra magniry hanao raha, ndra mahazo fahalalagne, ndra maneho fahendreagne, ty an-Kibory handenà’o agne.”

Ty dika’e: Tsy mahafantatse ndra ino ndra ino ze mandeha an-Kibory agne, le tsy afake hahatsapa ho mijale. Ankoatse izay, le mibaribary tie natao hoahy ty ndaty soa fagnahy o saontsim-pahendreagne sinora i mpanoratse Baibolỳ rehoe.

Asan’ny Apostoly 2:31: “Hatsangagne amy ty mate ty Kristy, sady fa nirehake ty miomba izay reke. Nirehafe’e tie tsy nengagne tan-Kibory tao ty Jesosy.”

Ty dika’e: Nandeha tagn’afobey (Kibory) agne ty Jesosy Kristy naho fa nimate reke.

Romanina 6:23: “O fateo ro vale ty ota.”

Ty dika’e: Fahafatezagne ty saze boake amo otao fa tsy fampijaleagne agn’afobey agne.

Apokalypsy 20:13: “Nagnakatse ze nimate tama’e tao ty fahafatezagne naho o Kiborio.”

Ty dika’e: Mate o ndaty agn’afobey agneo. Mbe ho velogne indraike iareo naho fa hovelomegne amy ty mate.

Apokalypsy 20:14: “Natorake mafe tamy ty antara ty afo ty fahafatezagne naho ty Kibory.”

Ty dika’e: Tsy hisy ndaty sasa ty agn’afobey (Kibory) agne naho fa hovelomegne ty mate. Hofoagnagne nainai’e io naho fa avy eo, le hoe niforototoe ty afo. Tsy hisy sasa areke afara izay tihoe ho mate boake amy ty fahota i Adama.—Romanina 5:12.

I rehake tam-boaloha’e tagney

Atoro o lisitse ambaneo iohoe fa mampivali-doha o ndatio ty raha natao ty mpandika Baiboly ila’e. Sambe managne ty heve’e i rehake tam-boaloha’e tagney faie nadika iareo mitovy avao tihoe “helo.” Kindraike le trea fa hoe raha atao iareo ty hinoa o ndatio tie tsy horingagne o raty fagnahio fa hampijalégne nainai’e.

Gehenna (Grike γέεννα)

Ty dika’e: Fandringanagne nainai’e.—Matio 5:30.

Ty fomba nandikagne aze: ‘Gehen’afo’ (Dikan-drehake Katolika); ‘lohasahan’afo’ (Dikan-drehake Iombognagne a Madagasikara Etoa); ‘helo’ (Dikan-drehake Protestanta)
Tartara (Grike ταρταρόω)

Ty dika’e: Natao amy ty toeragne ambane i anjely raty fagnahy atao tihoe demonia rey.—2 Petera 2:4.

Ty fomba nandikagne aze: Toera ty mate (Dikan-drehake Iombognagne a Madagasikara Etoa); helo (Dikan-drehake Protestanta)

Ty tantara i afobeỳ

Boake amy ty mpanompo sampy: Nino o Ejipsiana talohao fa misy o afobeio. Rehafe ty Boke Ȧm-Ṭuat, i rehafe o mpahay tantarao tie sinoratse tamy ty taonjato faha-16 T.K., fa hisy ndaty “hatorake agnate ty lavake mirehetse, sady ... tsy ho afake hilay i lelan’afo aoy.”—The Egyptian Heaven and Hell.

Tsy nampianare o Kristiana voaloha’eo: “Soa homarehegne fa tsy treantikagne amy T[estamenta] V[aovao] ao tihoe agnisa ty fitoriagne natao o Kristiana tam-boaloha’e tagneo i afobey mirehetsey.”—A Dictionary of Christian Theology.

Nanomboke nisy voka’e tamy ty fampianara ty fivavahagne o filozofia grikeo: “Nanomboke nampiasa filozofia grike ty Kristiana ila’e nahay io, mba hagnazavagne ty raha inoa ty Kristiana. Tantegnategna ty taonjato faharoe zay ro nanomboke. ... Ty fampianara i Platon ty trea iareo fa mete soa mba hanoagne izay.” (Encyclopædia Britannica) Agnisa o fampianaragne iohoe tihoe ampijalejalegne agnate afo ao o ndatio naho fa mate. “Amo o filozofa grike reo iaby, le i Platon ty tena nahavy ty ndaty maro hino o Afobey io.”—Histoire des enfers.

Natao mba hagnamarenagne tie mete ty fampijaleagne ndaty: Noroagne tamy i oren-kataey eo ze nimelohegne ho nivalim-pinoagne, tamy i vanim-potoagne atao tihoey Fitsarà ty Katolika ze Nivalim-pinoagne ta Espaigne Agne. Amy izay tsapa i ndatỳ soa zao tie “manao akore ze o afobey mirehetse nainai’e zao”, le hibebake reke aloha ty himateza’e. (The Spanish Inquisition, sinora i Jean Plaidy) Protestanta 300 eo ho eo ka ty noroa i Marie I, mpanjakavave i Angletera, tamy ty oren-katae. Nao zao reke nirehake tie: “I raha toe horoagne nainai’e agn’afobey agne avao ty fagnahy i mpivalim-pinoagne reỳ amy ty hoavy, le treako fa mete soa naho mitsikombe ty fomba handilovan’Andrianagnahare o raty fagnahio raho, le magnoro iareo, amy iareo mbe an-tane etoay.”—Universal History, sinora i Alexander Tytler.

Fiovagne tafara tatoy: Nagnalefake ty fampianara’e miomba ty afobey ty fivavahagne ila’e satria te hampifale ty mpivavake ama’e ao, fa tsy tihoe te hisintake amy ty fampianaran-diso. (2 Timoty 4:3) “Andrianagnahare soa fagnahy naho mora iharineagne zao ty paliave o ndatio ... Fa tsy malaza sasa ze o rehake miomba ty fahotagne naho heloke zao.”—Professor Jackson W. Carroll.