Misy Fagnahy Tsy Mete Mate vao ty Agnate o Ndatio Ao?

Vale’e ara-baiboly

Adika ty Baiboly ila’e tihoe “fagnahy” i rehake hebreo tihoe nefesh naho i rehake grike tihoe psykè-y.a “Raha managne aigne” ty dika o rehake rehoe naho ara-bakiteny. I raha managne aigney areke o atao tihoe fagnahio fa tsy tihoe raha agnate’e ao mbe velogne ndra tie fa mate aza i vata’ey. Dineho tie akore ty ampisehoa ty Baiboly fa ty vata tegna o ndatio o atao tihoe fagnahio.

• Naho fa namboatse i Adama, i lahilahy voaloha’ey ty Jehovah Andrianagnahare, le rehafe ty Baiboly tie “nanjare fagnahy velogne o ndatio.” (Genesisy 2:7, Dikan-dreha ty Mpanjaka Jacques) Tsy tihoe nimeigne fagnahy ty Adama, fa ireke ro nanjare fagnahy velogne ndra ndaty.

• Mirehake ty Baiboly tie mete keré, maran-drano o fagnahio. Afake mihinagne, mete rokake, ndra kivy, ndra matahotse, sady mahazo famelombelomagne ka o fagnahio naho fa minogne rano manintsy. (Deoteronomia 12:20, Dikan-dreha ty Protestanta; Salamo 107:9 naho Ohabolana 15:13, Dikan-dreha ty Katolika; Ohabolana 17:22 naho 25:25 vaho Ezekiela 21:12, Prot.) Ndaty velogne ty afake manao ireo.

Mete mate vao o nefesh-o naho o psykè-o?

Eka. Maro ty andinin-teny amy Baiboly ao mirehake tie mete mate o nefesh-o naho o psykè-o. Intoagne misy ohatse:

• “Ho mate ze fagnahy (nefesh) manota.”​—Ezekiela 18:4, 20, Prot.

• ‘Namono ty fagnahy (nefesh) tsy toko’e hovonoegne o mpaminany sandoke talohao.’​—Ezekiela 13:19, Kat.

• Nadika tihoe “ndaty mate” ndra “fate” ty rehake tihoe nefesh mate amy ty Baiboly maro.​—Levitikosy 21:11; Nomery 6:6.

Midika tihoe “aigne” ka ty rehake tihoe nefesh ndra psykè

Mampiasa ty rehake tihoe “aigne” ka ty Baiboly mba hirehafagne tihoe nefesh ndra psykè. Izay ohatse ty trea amy Joba 33:22 ao. Ampitovie’e amy ty “aigne” i rehake hebreo tihoe nefesh-y. Aseho ty Baiboly fa tsy azo atao ty manao raha magnoho-doza o aigneo (nefesh ndra psykè), sady mete afoe ka io.​—Eksodosy 4:19; Mpitsara 9:17; Filipianina 2:30.

I rehake tihoe nefesh ndra psykè-y ka ro ampiasaegne amy ty fomba firehake tihoe “miala aigne”, i trea amy Genesisy 35:18 aoy.

Akore ty niatomboha ty fampianaragne tihoe misy fagnahy tsy mete mate ty amo o ndatio ao?

Ampianare o antokom-pivavahagne Kristianao fa managne fagnahy o ndatio sady tsy mete mate o fagnahy iohoe. Faie tsy boake amy Baiboly ao ty nangalagne ze fampianaragne zay fa boake amo o filozofia grikeo. Mirehake ty Encyclopædia Britannica tie naho fa mirehake fagnahy (nefesh ndra psykè) ty Baiboly, le ampifandrambese’e amy ty fofonaigne sady tsy ambaha’e tie hafa ty fagnahy le hafa ty vatagne. O Grike talohao o nahavy o Kristianao hino tie hafa ty vatagne le hafa ty fagnahy.

Tsy ekén’Andrianagnahare naho afangaro ty fampianara’e naho o filozofiao. Agnisa ze filozofia zay, ohatse, ty finoagne tie tsy mete mate o fagnahio. Mampitao hoe izao ty Baiboly: ‘Mitaoa tsy mone hisy hamandrike anareo amo o filozofiao naho o hevetse mamitake poakateo. Boake amy ty fampianaragne nifandovà o ndatio i raha rey.’​—Kolosianina 2:8.