Famelomagne ty mate amy ty hoavy, ndaty manalaka ty nama’e naho i ndaty tsy foen-tro’e rey velomegne amy i paradisa an-tane etoay

Ino ty Atao Tihoe Famelomagne ty Mate?

Vale’e ara-baiboly

Boake amy ty rehake Grike tihoe a·naʹsta·sis, ty rehake nadika tihoe “famelomagne ty mate” amy Baiboly ao. Midika tihoe “mitsangagne” ndra “miongake indraike” o rehake iohoe. Miongake sady miaigne indraike manahake ty taloha ty ndaty raike velomegne amy ty mate.—1 Korintianina 15:12, 13.

Maregne fa tsy trea amy ty Soratse Hebreo ao, i atao tihoe Testamenta Talohay, o rehake “famelomagne ty mate” iohoe. Faie misy fampianaragne miomba izay ty ao. Nampitamà hoe izao tamy ty alala i Hosea mpaminany ohatse ty Andrianagnahare tie: “Hovonjeko boake an-Kibory ao iareo sady hafahako amo o fahafatezagneo.”—Hosea 13:14; Joba 14:13-15; Isaia 26:19; Daniela 12:2, 13.

Hovelomegne mba hiaigne aia o ndatio? Hovelomegne hiaigne an-dagnitse agne ty ndaty ila’e mba ho mpanjaka hiarake amy i Kristy. (2 Korintianina 5:1; Apokalypsy 5:9, 10) Atao ty Baiboly tihoe “fitsanganagne voaloha’e” naho “fitsanganagne aloha” io. Izay ty ahatreavagne fa mbe hisy famelomagne amy ty mate hafa ankoatse io. (Apokalypsy 20:6; Filipianina 3:11) An-tane etoa ty hisy o famelomagne amy ty mate mbe ho afara iohoe. Ndaty maro ty hovelomegne amy ty mate an-tane etoa amy izay sady tena ho fale iareo.—Salamo 37:29.

Amy ty fomba akore ty hamelomagne o ndatio? Nimean’Andrianagnahare hery hamelomagne ty mate ty Jesosy. (Jaona 11:25) Hovelome i Jesosy iaby “ze an-kibory ao”, le hahere’e amy iareo ty mombamomba aze, ty toetse’e naho ty fitadidia’e. (Jaona 5:28, 29) Vatagne ara-pagnahy ty ho azo o hovelomegne mba hiaigne an-dagnitse agne reo. Vatagne salama soa ka ty ho azo ze hovelomegne mba hiaigne an-tane etoa.—Isaia 33:24; 35:5, 6; 1 Korintianina 15:42-44, 50.

Ia iaby ty hovelomegne amy ty mate? Mirehake ty Baiboly “fa hisy ty famelomagne ty maregne naho ty tsy maregne.” (Asan’ny Apostoly 24:15) Agnisa o ndaty maregne rehoe ty Noa, i Saraha naho i Abrahama. (Genesisy 6:9; Hebreo 11:11; Jakoba 2:21) Ze ndaty tsy nagnorike ty fitsipin’Andrianagnahare noho iareo tsy nanagne fahafahagne hianatse naho hagnorike i fitsipi’e rey o atao tihoe tsy maregne rehafe Baibolio.

Faie tsy hovelomegne ze ndaty tena raty fagnahy tsy mete miova. Le lia’e ho mate nainai’e i ndaty rey naho fa mate fa tsy hovelomegne sasa.—Matio 23:33; Hebreo 10:26, 27.

Ombia ro ho avy o famelomagne ty mate iohoe? Fa nirehafe ty Baiboly mialoha fa amy ty fagnatreha i Kristy, nanomboke tamy 1914, ty hanomboha i famelomagne ze ho an-dagnitse agne rey. (1 Korintianina 15:21-23) Le agnate ty Fanjakagne Arivo Tao i Jesosy Kristỳ ty hisia i famelomagne ze hiaigne an-tane etoa rey. Hiova ho paradisa tsikedetsikede ty tane toy tie amy izay.—Apokalypsy 20:6, 12, 13.

Nagnino ro azo antoke fa tena hisy i famelomagne ty matey? Mirehake amy ty pitsopitso’e ty miomba i ndaty sive nivelomegne amy ty mate rey ty Baiboly. Sambe nisy vavolombelogne nahatrea maso ty namelomagne iareo. (1 Mpanjaka 17:17-24; 2 Mpanjaka 4:32-37; 13:20, 21; Lioka 7:11-17; 8:40-56; Jaona 11:38-44; Asan’ny Apostoly 9:36-42; 20:7-12; 1 Korintianina 15:3-6) Tena miambake ty nameloma i Jesosy i Lazarosy satria fa nimate tagnate ty efatse andro reke. Tagnatreha o ndaty maro eo ka ty nanoa i Jesosy i fahagagagney. (Jaona 11:39, 42) Ndra i ndaty nanohetse i Jesosy rey aza nieke tie tena nisy o raha iohoe, le izay ty nahavy iareo hipay fomba hamonoagne i Jesosy naho i Lazarosy.—Jaona 11:47, 53; 12:9-11.

Famelomagne ty mate telo tantaraegne amy Baiboly ao: ty ana-dahy ty ampela raike vantotse, ampela raike mpanonjohy ty lia i Jesosy, i Lazarosy nama i Jesosy

Aseho ty Baiboly fa mahavita mamelogne o ndaty nimateo ty Andrianagnahare, ro magniry mafe ty hanao izay. Tompo ty hery reke, le tadidi’e amy ty pitsopitso’e iaby ty mombamomba ty tsikiraidraike amy i ndaty hovelome’e amy ty mate rey. (Joba 37:23; Matio 10:30; Lioka 20:37, 38) Vitan’Andrianagnahare ty mamelogne o ndaty nimateo sady magniry ty hanao izay reke! Izao ty rehafe ty Baiboly miomba an’Andrianagnahare naho ty famelomagne ty mate ro rehafegne: “Fa tsy ligne’o ty hahavazoho ty asa ty fità’o.”—Joba 14:15.

Heve-diso miomba ty famelomagne ty mate

Heve-diso: Mitambatse amy ty vata i ndaty fa nimatey indraike ty fagnahi’e naho fa ireke hovelomegne.

Maregne: Ampianare ty Baiboly fa manondro ty vatantikagne o fagnahio fa tsy tihoe raha agnate vatantikagne ao le misarake ama’e naho fa mate tika. (Genesisy 2:7, fagnamarehagne ambane peje; Ezekiela 18:4) Naho fa hovelomegne indraike ty ndaty raike fa nimate, le tsy tihoe miheregne ama’e ty fagnahi’e, fa ireke ro manjare raha managne aigne indraike.

Heve-diso: Misy ndaty ila’e hovelomegne indraike, ie afara izay iareo le avy le ringanegne.

Maregne: Rehafe ty Baiboly fa “ze zatse nanao raty, hovelomegne mba hotsaraegne.” (Jaona 5:29) Ty raha hatao iareo afara ty hamelomagne iareo ro hitsaràgne iareo fa tsy ty raha natao iareo taloha ty nimateza’e. Hoe ty Jesosy: ‘Haharey ty feo i Anak’Andrianagnaharey o mateo, le ho velogne ze mitsanogne.’ (Jaona 5:25) “Ze mitsanogne” ndra mankatò ze raha ianara’e afara ty hamelomagne aze, le ho voasoratse amy ty “horognam-boke i fiaignagney ao” ty agnara’e.—Apokalypsy 20:12, 13.

Heve-diso: Mbe ty vata i ndatỳ taloha ty nimateza’e ty mbe ho vata’e avao naho fa hovelomegne reke.

Maregne: Simba sady momoke ty vata ty ndaty raike naho fa mate.—Mpitoriteny 3:19, 20.