Nagnino o Vavolombelo i Jehovah-o ro Tsy Manao Aniverisera?
Tsy mankalaza aniverisera o Vavolombelo i Jehovah-o satria mino iareo fa tsy mampifale an’Andrianagnahare io. Tsy mandrara mivantagne ty aniverisera ty Baiboly faie magnampe antika hahatakatse ty heven’Andrianagnahare miomba io ty raha voarehake ao. Andao hohenteantika ty efatse amy iareo naho ty toro lalagne amy Baiboly ao mifandrambe amy izay.
Boake amy ty mpanompo sampy ty nifotora o aniveriserao. Magnazava ty nifotora o fete iohoe ty diksionera tihoe Funk & Wagnalls Standard Dictionary of Folklore, Mythology, and Legend. Mino ty ndaty taloha fa naho fa miheregne zao ty date niterahagne ty ndaty raike le misy “fagnahy raty naho hery raty afake mampijale aze.” “Faie va’e ho voaro reke naho miarake amy ty nama’e sady mirare soa ho aze iareo.” Mirehake ty boke The Lore of Birthdays fa tamy ty andro taloha, le fa nianatse miomba ty astrolojia o ndatio, ty dika izay nianatse nampifandrambe ty raha amy i lagnitsey ey amy ty raha an-tane etoy. Nanao izay iareo mba hamorognagne vitagne, le tena raha lahibey tamy iareo ty nandrambe an-tsoratse ty andro niterahagne ty ndaty raike. Arake o boke iohoe, le “nino ty ndaty taloha fa misy hery mahagaga ty amy i labozỳ ampiasaegne amy i aniverisera reỳ, satria afake magnatanterake ty fagniria i ndatỳ.”
Tsy nankalaza aniverisera ty Kristiana voaloha’e. Hoe ty The World Book Encyclopedia: “Nihevetse iareo fa raha fanoe ty mpanompo sampy ty mankalaza aniverisera.” Aseho ty Baiboly fa toko’e horihe ze Kristiana iaby ty raha natao o Apostolio naho ty ndaty nampianare i Jesosy mivantagne.—2 Tesalonianina 3:6.
Ty nimateza i Jesosy avao ro nandilia’e hankalazae ty Kristiana fa tsy ty andro niterahagne aze ndra ty ahy ty ndaty hafa. (Lioka 22:17-20) Tsy mahagaga zay satria mirehake ty Baiboly tie “ndraleo ty andro imatezagne ta tie andro iterahagne.” (Mpitoriteny 7:1) Naho fa nimate ty Jesosy, le nahazo laza soa tagnatrehan’Andrianagnahare eo. I andro nimateza’ey areke ty tena lahibey ta tie i andro niteraha’ey.—Hebreo 1:4.
Tsy mitantara ty Baiboly tie nisy mpanompon’Andrianagnahare nankalaza aniverisera. Tsy tihoe sendra nihaligno avao ty tsy nitantara’e izay. Ty anto’e, misy fankalazagne andro nahaterahagne roe ty amy Baiboly ao faie sambe tsy mpanompon’Andrianagnahare o nanao aze reo. Sambe raty ty raha rehafe ty Baiboly miomba o fankalazagne roe reo.—Genesisy 40:20-22; Marka 6:21-29.
Mahatsiaro ho mate antoke vao ty ajaja ana o Vavolombelo i Jehovah-o satria tsy manao aniverisera?
Mitovy amo o rae aman-dreneo iaby avao o Vavolombelo i Jehovah-o satria agnate i taogney avao ka iareo ro mampiseho tie tea’e ty ana’e. Magnomey fagnomezagne hoahy ty ana’e iareo sady miarake mifalefale ama’e. Mikezake manahake an’Andrianagnahare iareo satria magnomey raha soa hoahy ty ana’e ka reke. (Matio 7:11) Tsy mahatsiaro ho mate antoke ty ana iareo. Mba eretsereto moa ty reha ty ajaja retoagne:
“Tena mahafinaritse ty mahazo fagnomezagne naho fa tsy ampoizentegnagne i rahay.”—Tammy, 12 taogne.
“Ndra tie tsy mahazo fagnomezagne aza raho amy i aniveriserakoy, le iviliana i baba naho i nene raha amy ty fotoagne hafa raho. Tena teako i rahay satria tsy nampoizeko.”—Gregory, 11 taogne.
“Ty anay tsy tihoe manao fete folo minitra avao, le homagne gatò kedekede, le mihira hira raike. Miavia ama’ay agne le hotrea’o tie akore ty atao’ay!”—Eric, 6 taogne.