Ino ty Atao Tihoe Badisa?

Vale’e ara-baiboly

Alimpotse tanterake agnate rano ao, le aboake boake ao naho fa avy eo ty ndaty raike atao badisa.a Izay ty nahavy i Jesosy natao badisa tamy ty renerano. (Matio 3:13, 16) Naho fa nangatake ty hatao badisa ze lahilahy etiopiana raike zay, le ‘nandeha tagnate rano ao’ iareo amy i Filipo.​—Asan’ny Apostoly 8:36-40.

Inogne ty dika tihoe badisa?

Ampitovie ty Baiboly amo o fandevegnagneo o badisao. (Romanina 6:4; Kolosianina 2:12) Naho fa atao badisa areke ty ndaty raike, le hoe mate reke naho amy i fomba fiaigna’e talohay, sady hanomboke fiaignam-baovao reke satria Kristiana nanokan-tegna ho an’Andrianagnahare. Fandaharagne nataon’Andrianagnahare o badisao naho ty dingagne iaby mila atao aloha ty badisa. Amy izay ty ndaty raike hanagne feo ty fieretseretagne malio, noho ireke mino ty solovoigne natao i Jesosy Kristy. (1 Petera 3:21) Izay ty nahavy i Jesosy hampianatse tie tsy maintsy atao badisa ty mpiana’e.​—Matio 28:19, 20.

Magnafake fahotagne vao ty badisa agnate rano?

Aha’a. Mampianatse ty Baiboly tie i lio i Jesosỳ avao ro magnalio antika ho afake amy ty ota. (Romanina 5:8, 9; 1 Jaona 1:7) Faie naho te handrambe soa boake amo o sorogne nanoe i Jesosy iohoe ty ndaty raike, le tsy maintsy mino i Jesosy heike naho magnova ty fomba fiaigna’e mba hifagnarake amy ty fampianara i Jesosy sady atao badisa.​—Asan’ny Apostoly 2:38; 3:19.

Mampianatse vao ty Baiboly tie toko’e hatao badisa o ajaja mbe kedekedeo?

Aha’a. Tsy misy rehake miomba ty ajaja mbe kedekede natao badisa ty agnate Baiboly ao. Misy fivavahagne ila’e manao badisa ajaja mbe kedekede, le fitsezagne ndra ilignagne rano ty loha i ajajay. Faie ty Kristiana atao badisa le ndaty fa mahazo soa sady mino “ty talily soa miomba i Fanjakàn’Andrianagnaharey.” (Asan’ny Apostoly 8:12) Midika zay tie fa naharey naho nagneke ty saontsin’Andrianagnahare reke, sady nibebake naho fa niavy eo. Afake manao ireo vao o ajajao?​—Asan’ny Apostoly 2:22, 38, 41.

Rehafe ty Baiboly tie masigne ndra malio agnatrehan’Andrianagnahare eo ty ana o Kristiana tsy mivalikeo. (1 Korintianina 7:14) Manjare tsy maregne o raha rehafe ty Baiboly iohoe naho ohatse toko’e hatao badisa o ajaja mbe kedekedeo.b

Heve-diso Miomba o Badisao

Heve-diso: Tsy voatere halimpotse agnate rano ty ndaty raike naho fa atao badisa fa ndra fitsezagne ndra ilignagne rano avao le fa mete.

Ty maregne: Nalimpotse tanterake agnate rano ao iaby i ndaty natao badisa rehafe ty Baiboly rey. Naho fa natao i Filipo badisa, ohatse, i lahilahy etiopianay, le sambe ‘nandeha agnate rano ao’ iareo, le ‘niakatse boake ao naho fa niavy eo.’​—Asan’ny Apostoly 8:36-39.c

Heve-diso: Mirehake ty Baiboly tie natao badisa ze ndaty raike zay naho ty keleia’e iaby. Midika zay tie natao badisa ka ndra ty ajaja aza. Izao, ohatse, ty rehafe ty Baiboly miomba i mpiambegne gadra raike ta Filipy agney: ‘Natao badisa reke naho ty keleia’e iaby.’​—Asan’ny Apostoly 16:31-34.

Ty maregne: Trea amy i fitantaragne miomba i mpiambegne gadraỳ tie natao badisa ze nahazo soa ty “saontsy i Jehovah” sady tena ‘nifale’ iareo naho fa niavy eo. (Asan’ny Apostoly 16:32, 34) Midika zay tie tsy natao badisa ty ajaja mbe kedekede tan-tragno i mpiambegne gadray tao, satria tsy nahazo ty saontsy i Jehovah iareo.

Heve-diso: Nampianatse miomba ty fanoagne badisa ajaja mbe kedekedeo ty Jesosy, satria nirehake reke tie ahy ze ndaty manahake o ajajao i Fanjakàn’Andrianagnaharey.​—Matio 19:13-15; Marka 10:13-16.

Ty maregne: Tsy nirehake miomba ty badisa ty Jesosy tamy io. Te hampianatse reke tie toko’e hiambane naho ho mora toroagne manahake o ajajao ty ndaty raike naho te hahazo i Fanjakàn’Andrianagnaharey.​—Matio 18:4; Lioka 18:16, 17.