Ino ty Famantaragne i “Andro Fara’ey” ndra i “Fara Androy”?
Ty vale’e Ara-baiboly
Mirehake fisehoan-draha, naho ty toe-tsay o ndaty amantaragne “ty fara ty tontolo toy” ty Baiboly. (Matio 24:3) Tokave ty Baiboly tihoe “andro fara’e” naho “fotoa ty fara’e” o vanim-potoagne iohoe.—2 Timoty 3:1; Daniela 8:19.
Ino ty faminaniagne ila’e rehafe ty Baiboly miomba ty “andro fara’e”?
Nirehake mialoha miomba ty fisehoan-draha maro hiarake hiseho “amantaragne” ty andro fara’e ty Baiboly. (Lioka 21:7) Dineho ty ohatse retoagne:
Aly magneran-tane. Fa nirehake ty Jesosy tie: “Hisy firenena hialy amy ty firenena, sady hisy fanjakagne hialy amy ty fanjakagne.” (Matio 24:7) Mirehake miomba ty sovala agn’ohatse “hagnafake ty filaminagne an-tane etoy” ka ty Apokalypsy 6:4. Manondro aly o sovala iohoe.
Keré. Fa nirehake ty Jesosy tie: “Hisy keré.” (Matio 24:7) Nirehake mialoha ka ty boke Apokalypsy fa hisy sovala agn’ohatse hafa hahavy ty tane ila’e tena ho keré.—Apokalypsy 6:5, 6.
Horohoron-tane lahibey. Nirehake ty Jesosy fa hisy “horohoron-tane amy ty toeragne sambe hafa.” (Matio 24:7; Lioka 21:11) Manjare maro mandikoatse ty taloha ty mijale naho mate noho ty fisia o horohoron-tane magneran-tane rehoe.
Aretegne. Nirehafe i Jesosy fa hisy “arete-manjamagne.”—Lioka 21:11.
Hampiaro-tegne. Ndra tie fa nimpiarotegne aza o ndatio tagnate ty taonjato maro, le nirehake ty Jesosy fa ‘hitombo ty fandikan-dalàna’ amy ty andro fara’e.—Matio 24:12.
Fanimbagne ty tane toy. Nirehafe ty Apokalypsy 11:18 mialoha fa ‘hanimba o taneo” o ndatio. Maro ty fomba anoa iareo izay. Tsy amy ty voka-draty ty raha atao iareo avao fa amy ty fanimba iareo o tontolo iaignagneo ka.
Toe-tsaigne miharaty. Nirehafe ty Baiboly mialoha amy 2 Timoty 3:1-4 ao fa ty ankamaroa o ndatio, le “tsy hahay hankasitrake, ho mora mivalike, … tsy ho azo ifagnarahagne, tsy ho tea ty soa, ho mpifotetse, ho bey zizo, hirehareha.” Mibaribary amy ty toetse o ndatio o toe-tsaigne rehoe amo ze o “fotoan-tsarotse tsy mora atrehegne” zao.
Keleiagne tsy mifankatea. Nirehafe ty Baiboly mialoha amy 2 Timoty 3:2, 3 ao fa maro ty ndaty “tsy ho tea” ty keleia’e sady “tsy hankatò rae aman-drene” o ajajao.
Tsy ho tea an’Andrianagnahare. Fa nirehake ty Jesosy tie “hihamanintsigne ty hatea ty ndaty maro.” (Matio 24:12) Ty tea i Jesosy horehafegne le tihoe, hihamanintsigne ty hatea ty ndaty maro an’Andrianagnahare. Trea amy 2 Timoty 3:4 ao ka fa amy ty andro fara’e, o ndaty rehoe, le “ho tea raha mahafalefale fa tsy ho tea an’Andrianagnahare.”
Mpivavake manao soa miatreke. Fa nirehafe ty Baiboly mialoha amy 2 Timoty 3:5 ao fa manao sare manompo an’Andrianagnahare o ndatio, ie amy izao tsy mifagnarake amy ty fitsipi’e ty fomba fiaigna iareo.
Mitombo ty fahatakaragne ty faminania ty Baiboly. Nirehake mialoha ty boke Daniela fa “amy ty fotoa ty fara’e”, le vao mainke hitombo ty fahatakara ty ndaty maro ty hamarenagne amy Baiboly ao, agnisa izay ty fahatakaragne i faminaniagne nirehafegne teo iaby rey.—Daniela 12:4
Fitoriagne magneran-tane. Nirehake ty Jesosy tie “hotoriegne magneran-tane ty talily soa i Fanjakagney toy.”—Matio 24:14.
Maro ty tsy midare sady mitsikike. Nirehafe i Jesosy mialoha fa maro ty ndaty tsy hidare tie fa marine i fara’ey. (Matio 24:37-39) Rehafegne amy 2 Petera 3:3, 4 ao aza fa tsy hidare i porofo rey iareo sady nao tsy hampiova ndra ino ndra ino zao rey.
Tanterake iaby i faminaniagne rey. Nirehafe i Jesosy fa hiarake ho tanterake o faminaniagne rehoe. Izay ty amantaragne ty andro fara’e.—Matio 24:33.
Fa miaigne amy ty “andro fara’e” vao tikagne?
Ie. Trea amy ty raha miseho magneran-tane naho ty fotoagne rehafegne amy Baiboly ao fa nanomboke tamy 1914 i andro fara’ey, i taogne nanomboha i Aly Lahibey Voaloha’eỳ. Naho tea’o ho hay ty raha miseho magneran-tane mampiseho tie fa miaigne amy ty andro fara’e vata’e tikagne, le henteo ty video toy:
Nanomboke nanjaka tan-dagnitse agne i Fanjakàn’Andrianagnaharey tamy 1914. Sady le avy le nandroake i Satana Devoly naho i demonia’e rey boake an-dagnitse agne tsy ela tafara izay. Ambone tane etoy avao tie amy izao ty ahafaha iareo manao ty asa’e. (Apokalypsy 12:7-12) Ino ty voka izay amo o ndatio? Manjare maro ty ndaty managne toe-tsaigne raty sady manao raha raty. Ireo ty anto’e mahavy i andro fara’ey ho “fotoan-tsarotse tsy mora atrehegne.”—2 Timoty 3:1.
Maro ty ndaty mivali-doha amo ze o fotoan-tsarotse zao. Mampinekoneko iareo ty tsy fahaia o ndatio miara-miaigne sasa. Ty ila’e ka matahotse tie hifamonovono o ndatio indraike andro agne.
Misy ndaty ila’e ka kivy noho ty raha miseho magneran-tane, faie mitamà iareo fa mbe ho soa ty hoavy. Rese lahatse iareo fa tsy ho ela i Fanjakàn’Andrianagnaharey, le hagnafake ty olagne miseho amy ty tontolo toy. (Daniela 2:44; Apokalypsy 21:3, 4) Manam-paharetagne iareo mandigne an’Andrianagnahare hagnatanterake i fampitamà’e rey. Mampahery iareo ty reha i Jesosy tihoe toy tie: “Ze miaretse hatrake am-para’e ro hovonjegne.”—Matio 24:13; Mika 7:7.