Ino ty Rehafe ty Baiboly Miomba ty Fikarakaragne Rae Aman-drene fa Antetse?

Vale’e ara-baiboly

Toko’e hatao ty ana’e azo antoke soa tie voakarakara soa ty rae aman-drene’e fa antetse. Mirehake ty Baiboly fa toko’e “hianatse hagnaja ty keleia’e” ty anake fa bey, sady “hamale babeagne ty rae aman-drene’e satria izay ty zoton’afon’Andrianagnahare.” (1 Timoty 5:4, Fandikan-tenin’ny Tontolo Vaovao Nohavaozina) Mandily ka ty Baiboly tie toko’e hagnaja rae aman-drene o anakeo ndra tie fa bey aza. Mankatò o lily iohoe iareo naho fa atao’e azo antoke tie voakarakara soa ty rae aman-drene’e fa antetse.​—Efesianina 6:2, 3.

Tsy misy toromareke mazava ty amy Baiboly ao tie akore ty toko’e hikarakaragne ty rae aman-drene fa antetse. Faie tantaraegne ao tie nisy mpanompon’Andrianagnahare fa nanao izay tie taloha. Misy torohevetse afake magnampe ze mikarakara rae aman-drene fa antetse ka ty ao.

• Akore ty nikarakara ty ndaty ila’e amy Baiboly ao ty rae aman-drene’e fa antetse?

• Inogne iaby ty torohevetse amy Baiboly ao afake magnampe ze mikarakara rae aman-drene fa antetse?

• Mirehake vao ty Baiboly tie tsy maintsy an-tragno agne avao ty ikarakaragne rae aman-drene fa antetse?

Akore ty nikarakara ty ndaty ila’e amy Baiboly ao ty rae aman-drene’e fa antetse?

Sambe managne ty fomba nanoa’e izay iareo, arakarake ty raha nisy tamy iareo.

• Josefa: Nitoboke lavitse i Jakoba baba’e reke, ie amy izao ty baba’e fa antetse. Nampifindra’e marine aze eo ty Jakoba, naho fa niafake nanao izay reke. Nantofe i Josefa ty tragno’e naho ty hane’e sady niaro aze reke.​—Genesisy 45:9-11; 47:11, 12.

• Rota: Nifindra tamy ty tanen-draza i rafoza’e ampelay agne reke, le niasa mafe mba hikarakaragne aze.​—Rota 1:16; 2:2, 17, 18, 23.

• Jesosy: Nanendre ndaty raike hikarakara i Maria rene’e reke, taloha kede ty nimateza’e. Azo antoke fa nimate valy ty Maria tamy izay.​—Jaona 19:26, 27.a

Inogne iaby ty torohevetse amy Baiboly ao afake magnampe ze mikarakara rae aman-drene fa antetse?

Misy fotoagne mandrerake naho mahakivy ty mikarakara o ndaty fa antetseo, faie misy toro lalagne afake magnampe mba hiatrehagne izay ty amy Baiboly ao.

• Hajao ty rae aman-drene’o.

  Ty rehafe ty Baiboly miomba izay: ‘Hajao ty rae aman-drene’o.’​—Eksodosy 20:12.

  Akore ty azo ampiharagne o toro lalagne iohoe? Hajao ty rae aman-drene’o, le oriho avao ze teà iareo. Engao hanapa-kevetse miomba ty ho fikarakaragne aze iareo, naho ohatse azo orihegne zay. Faie atorò ka tie magnaja iareo rehe, le anò ze vita’o mba hagnampeagne iareo.

• Mikezaha hahatakatse ty fihetseham-po’e naho hamela heloke aze.

  Ty rehafe ty Baiboly miomba izay: “Mahatindry ty fo’e ty ndaty mandine-draha sady voninahitse ho aze ty mamela fahadisoagne.”​—Ohabolana 19:11.

  Akore ty azo ampiharagne o toro lalagne iohoe? Naho mirehake raha mampalahelo azo reke, ndra hoe tsy mba mankasitrake ze raha atao’o, le dineho zao: ‘Naho izaho ro tamy ty toera’e, maro ty raha tsy vitako sasa naho ty raha mampivali-doha ahy, le ino ty ho tsapako?’ Mikezaha hahatakatse ty fihetseham-po’e naho hamela heloke aze. Amy izay i olagney tsy hitatse.

• Mangataha torohevetse.

  Ty rehafe ty Baiboly miomba izay: “Tsy tanterake ze kasaegne hatao naho tsy mangalake hevetse ama o ndaty, faie tanterake zay naho fa maro ty mpanoro hevetse.”​—Ohabolana 15:22.

  Akore ty azo ampiharagne o toro lalagne iohoe? Manoa fikarohagne miomba ty arete ty rae aman-drene’o, le henteo tie akore ty fomba azo ikarakaragne aze. Henteo ka kera misy fikambanagne afake magnampe azo hikarakara soa iareo. Mirehafa amy ze ndaty fa nikarakara rae aman-drene fa antetse. Mivoria miarake amy ty troke raike ama’o. Iharò’areo midineke tie inogne iaby ty ilae ty rae aman-drene’areo, akore ty hikarakaragne izay, sady akore ty hifampizaragne i andraikitsey.

  

• Mikezaha hiambane.

  Ty rehafe ty Baiboly miomba izay: “Ze miambane ro ho hendre.”​—Ohabolana 11:2.

  Akore ty azo ampiharagne o toro lalagne iohoe? Ekeo tie voafetra avao ty raha azo’o atao. Voafetra ohatse, ty fotoa’o naho ty heri’o, le va’e tsy ho arake ty eretsereta’o aze ty raha vita’o mba hagnampeagne ty rae aman-drene’o. Naho trea’o tie rerake loatse rehe, le mangataha fagnampeagne amy ty keleia’o hafa ndra amy ty ndaty fa zatse mikarakara ndaty fa antetse.

• Ko haligno ty mikarakara ze raha paliae’o.

  Ty rehafe ty Baiboly miomba izay: “Tsy misy ndaty malaigne ty nofo’e, kanao mamelogne aze naho tea aze.”​—Efesianina 5:29.

  Akore ty azo ampiharagne o toro lalagne iohoe? Ndra tie tsy maintsy mikarakara rae aman-drene fa antetse aza rehe, le tsy maintsy mikarakara ze ilae’o ka. Naho manambaly rehe, le tsy maintsy magnomey ze ilae ty keleia’o ka. Mila mihinagne soa naho mitofa ohatse rehe, sady toko’e ho ampe roro. (Mpitoriteny 4:6) Naho azo atao, le mba mangala aigne hey kindraike. Amy izay rehe hahavita hikarakara soa ty rae aman-drene’o.

Mirehake vao ty Baiboly tie tsy maintsy an-tragno agne avao ty ikarakaragne rae aman-drene fa antetse?

Tsy misy toromareke voafaritse ty amy Baiboly ao tie tsy maintsy karakarae ty ana’e an-tragno agne ty rae aman-drene’e. Ndra aleo ty keleiagne ila’e mikarakara ty rae aman-drene’e an-tragno ao naho mbe azo atao. Faie naho fa mandeha ty fotoagne, le va’e hahatsapa iareo tie ho voakarakara soa ty rae aman-drene’e naho amo o tragno fitezagne antetseo agne. Soa naho mivory i keleiagney, le miarake manapa-kevetse tie ino ty tena mete amy iareo iaby.​—Galatianina 6:4, 5.