Nampiasa Evolisiona vao ty Andrianagnahare Naho fa Namorogne?

Vale’e ara-baiboly

Aha’a. Rehafe ty Baiboly mazava soa fa namorogne ndaty ty Andrianagnahare, sady namorogne biby naho raha mitiry sambe karaza’e.a (Genesisy 1:12, 21, 25, 27; Apokalypsy 4:11) Rehafe io ka fa i Adama naho i Eva ty razambey o ndatio iaby. (Genesisy 3:20; 4:1) Tsy mirehake ty Baiboly tie nampiasa evolisiona ty Andrianagnahare mba hamorognagne raha managne aigne sambe karaza’e. Akore ka areke i rehafe o mpahay siansao tie, kindraike le misy fiova’e kede o raha managne aigne ila’eo?b Tsy mirehake ty amy Baiboly ao tie diso zay.

• Ino ty inoa ty ndaty ila’e?

• Mifagnarake amy ty raha ampianare ty Baiboly vao o evolisionao?

• Kindraike, le misy fiova’e trea ty amo o raha mitirio ndra amo o bibio. Faie midika vao zay tie karazana evolisiona i fiovagne rey?

Ino ty inoa ty ndaty ila’e?

Mino ty ndaty ila’e fa nampiasa evolisiona ty Andrianagnahare mba hamorognagne o raha managne aigne sambe karaza’eo. Faie tsy mitovy hevetse iareo miomba tihoe akore ty nanoan’Andrianagnahare izay. Rehafe ty Encyclopædia Britannica fa mino ty ndaty ila’e tie karazan-draha managne aigne nahazaka ty fiaimpiaignagne tamy ty tane nitoboha’e tao ao avao ro ela velogne sady nanan-taranake. Andrianagnahare avao hoe ty asa iareo ro nanao i raha rey hoe izay.

Intoagne ka misy hevetse ila’e inoa o ndaty rehoe:

• Karazan-draha raike fa nisy taloha ela bey avao ro niavia ty raha managne aigne iaby.

• Va’e hivoatse erike ty karazan-draha managne aigne raike, le manjare raha managne aigne sambe karaza’e hafa. Izay ro atao tihoe evolisiona jabajaba.

• Fa nataon’Andrianagnahare hivoatse erike o raha finoro’eo, amy izay magnomey raha managne aigne sambe karaza’e.

Mifagnarake amy ty raha ampianare ty Baiboly vao o evolisionao?

Naho tena nampiasa evolisiona vata’e ty Andrianagnahare mba hamorognagne, le manjare tsy tena maregne ty raha tantaraegne amy Genesisy ao. Faie nirehake ty Jesosy tie raha tena nisy ro rehafegne fa tsy talily vande avao. (Genesisy 1:26, 27; 2:18-24; Matio 19:4-6) I Jesosy nahatrea ty namorognagne ze kila raha naho henteagne o Baibolio. Rehafe’e ao fa niarake taman’Andrianagnahare tan-dagnitse agne reke, taloha ty niavia’e an-tane etoy, sady nagnampe an’Andrianagnahare hamorogne “ze kila raha.” (Jaona 1:3) Tsy mifagnarake amy ty raha ampianare ty Baiboly areke tihoe nampiasa evolisiona ty Andrianagnahare mba hamorognagne raha managne aigne sambe karaza’e.

Kindraike, le misy fiova’e trea ty amo o raha mitirio ndra amo o bibio. Faie midika vao zay tie karazana evolisiona i fiovagne rey?

Tsy magnazava ty Baiboly tie manao akore ty fiovagne va’e ho trea amo o karazan-draha mitirio ndra amy ty biby raike. Tsy mandietse ka io tie va’e hisy fiovagne ty amy i raha finoron’Andrianagnahare rey naho fa managne taranake iareo, ndra naho fa miova ty toeragne itoboha’e. Misy ty mino tie karazana evolisiona i fiovagne rey. Faie tsy manjare karazan-draha managne aigne vaovao i raha mitirỳ, ndra i bibỳ, fa misy raha kede avao ty niova tama’e.