O Volao vao ty Foto ze Raha Raty Iaby?

Vale’e ara-baiboly

Aha’a. Tsy mirehake ty Baiboly tie raty o volao, ndra tihoe io ty mahavy ze hene raha raty. Fomba firehake mahazatse nalaegne boake amy Baiboly ao i tihoey ‘o hatea volao ro foto ty raty iaby.’a—1 Timoty 6:10, Fandikan-teny Katolika, izahay ro manao o soratse beventeo.

Ino ty rehafe ty Baiboly miomba o volao?

Mirehake ty Baiboly fa va’e hahasoa o volao naho ampiasaegne amy ty fomba soa, sady va’e ‘hiaro’ antikagne aza. (Mpitoriteny 7:12) Midera ty ndaty tea magnomey ka ty Baiboly, sady va’e ho agnisa ze fagnomezagne zay o volao.—Ohabolana 11:25.

Faie mampitao antikagne ka ty Baiboly tie tsy o volao ro toko’e ho fara’e lahibey amy ty fiaignantikagne. Izao ty rehafe’e: “Tsy toko’e hisy hatea vola ty fomba fiaigna’areo, fa toko’e hionogne amy ze fa eo.” (Hebreo 13:5) Mila mahay manahatsahatse amo o volao areke tikagne sady tsy toko’e hifofotse mafe hipay fanagnagne. Toko’e ho afa-po amy ze raha tena ilaentikagne tika, agnisa izay ty hanegne, akanjo naho tragno.—1 Timoty 6:8.

**Nagnino ty Baiboly ro mampitao antikagne mba tsy ho tea vola?**

Tsy hahazo havelogne nainai’e ze ndaty managne fagniriagne tsy mete afa-po. (Efesianina 5:5) Agnisa ty fanompoam-tsampy ndra fivavahan-diso ze raha zay. (Kolosianina 3:5) Mateteke tsy magnara-dalàna ka ze ndaty mikezake hahazo ze raha irie’e. Mirehake ty Ohabolana 28:20 fa ‘tsy hitoetse ho tsy manan-tsiny ... ze memeke te hanan-karena.’ Va’e ho azo ty tsapa hevetse hanao raha raty aza reke, ohatse hitavagne ndaty, ndra hamitake, ndra hagnorohoro, ndra hamono ndaty.

Ndra tie va’e tsy hahavy i ndatỳ hanao raty aza o hatea volao, le va’e hisy voka’e raty hafa avao. Mirehake ty Baiboly fa “ze tapa-kevetse ty ho mpagnarivo ro mijogne amy ty tsapa hevetse naho ty fandrike, vaho amy ty fagniriagne maro tsy misy dika’e sady manimba.”—1 Timoty 6:9.

Ino ty soa rambesentikagne naho magnorike ty toroheve ty Baiboly miomba ty vola tikagne?

Hagnaja tegna tikagne sady hahazo ty fankasitraha i Jehovah vaho ty fagnampea’e, naho tsy manao ty raha fa fantantikagne tie raty sady heje i Jehovah mba hipaliavagne vola. Izao ty ampitamaen’Andrianagnahare ze tena te hampifale aze: “Tsy hienga azo raho, sady tsy hahafoe azo.” (Hebreo 13:5, 6) Magnomey toky ka reke fa ‘hahazo fitahiagne maro ze ndaty atokisagne.’—Ohabolana 28:20.

Andinin-teny miomba o volao

Mpitoriteny 7:12: “Fiarovagne ... o volao.”

Ino ty dika izay? Va’e hahasoa o volao naho ampiasaegne amy ty fomba soa satria afake miaro antikagne.

Lioka 12:15: “Tsy miankigne amy ty hamaro ty fanagna’e ty fiay o ndatio.”

Ino ty dika izay? Tsy o volao ro fara’e lahibey amy ty fiaignagne sady tsy io ro hamonje antikagne.

1 Timoty 6:10: “O hatea volao anio ro agnisa ty ifotora ze karazan-karatiagne iaby. Le nikezake mafe ho amy izay ty ila’e, hafara’e nitsile niala tamy ty finoagne, naho nitsovoke ty vata’e tamy ty raha maro mampanaintaigne.”

Ino ty dika izay? Tsy o volao ro raty. Faie mahatrea olagne o ndatio naho fa tea vola, ty dika izay o volao ro tena fara’e lahibey amy ty fiaigna’e. Va’e ho rava ty tokantragno’e ndra harare reke satria miasa mafe loatse.

Hebreo 13:5: “Tsy toko’e hisy hatea vola ty fomba fiaigna’areo, fa toko’e hionogne amy ze fa eo.”

Ino ty dika izay? Hendre tikagne naho afa-po amy ze tena paliaentikagne, fa tsy mipay fomba hifoforagne hipaliagne harena.

Matio 19:24: “Mora ty hidira o ramevao amy ty lava o finjaitseo eo, noho ty hidira o mpagnarivò amy i Fanjakàn’Andrianagnaharey ao.”

Ino ty dika izay? Vaho boake nitaogne i ajalahy mpagnarivo raikey mba hanonjohy ty lia’e ty Jesosy. Tsy nagneke i ajalahỳ satria tsy foe’e i fanagna’ey. Nampitao areke ty Jesosy tie va’e tsy hahazo havelogne nainai’e ty ndaty raike naho harena ty fara’e lahibey ama’e tie aman’Andrianagnahare.

a Misy ka ty mandika o andinin-teny iohoe tihoe: “O hatea volao anio ro agnisa ty ifotora ze karazan-karatiagne iaby.”