Magnampe Antika amy i Asa Fitoriagney ty Asa Fagnoregnagne Ataontika

Tea o Filan-keve-pitantanagneo hampiasaegne amy ty asa fagnoregnagne ty vola fagnomezagne ila’e mba hagnatanterahagne ty asa fitoriagne miomba i Fanjakagney. Tamy ty taom-panompoagne 2023, ohatse, le nanokagne vola mihoatse 500 tapetrisa dolara ty fikambanagne ara-dalàna ampiasae ty birò ty sampa ty Vavolombelo i Jehovah mba hiviliagne, hagnoregnagne, hagnavaozagne naho hikojakojagne ty Anjomba i Fanjakagney naho ty Anjomba Fanoagne Havoriambey magneran-tane.a Mbe miampe ty vola lanie ty fiangonagne magneran-tane mba hikojakojagne ty Anjomba i Fanjakagney o vola iohoe.

Ampiasaegne mba hagnoregnagne naho hikarakaragne ty tragno ampiasae i sampagne ka o vola fagnomezagneo. I birò i sampagne rey ty magnampe amy ty fandaminagne naho ty fanohagnagne ty asa fitoriagne magneran-tane. Nihatsotragne ty asa amo o sampagneo agne amy izay ty ila’e amy i vola fagnomezagne rey afake ampiasaegne mba hagnoregnagne naho hagnavaozagne ty Anjomba i Fanjakagney ila’e naho ty Anjomba Fanoagne Havoriambey. Faie ndra tie eo zay, le mbe vola bey ty ilaegne mba hagnarenagne ze simba naho hagnavaozagne ndra hamindragne ty tragno i sampagne. Nagnino o tetik’asa reo ro ilaegne? Akore ty atao ty sampagne mba hanohagnagne ty asa fitoriagne amy i faritaney ey? Andao tika handineke izay.

“Mba ho Azo Ampiasaegne Agnate ty Fotoagne Maharetse”

Birò ty sampagne maro ty fa mihoatse ty 30 ndra 40 taogne ty nagnoregnagne aze. Hoe ty Nicholas, miasa amy ty Sampan-draharaha ty Fagnoregnagne Magneran-tane: “Ndra tie voakarakara soa aza ty tragno raike, le mihantetse naho mihasimba avao naho fa mandeha ty fotoagne. Naho fa boake nihavaozegne o tragnò, le azo ampiasaegne agnate ty fotoagne maharetse.”

Mba hahavy ty asa amy Betela ao hifagnarake amy ze fagnovàgne atao i fandaminagne, le ilae iareo ty vognogne hanao fagnovàgne. Nitombo bey ty isa ty mpitory magneran-tane nanomboke tamy ty nagnoregnagne o birò sampagneo. Noho ze fitomboagne zay, le maro ty mpiasa an-tsitrapo nilaegne mba hiasa amo o birò i sampagneo agne. Faie tsy ombe sasa i toeragney satria maro loatse i mpiasa rey.

Agnisa ty raha tena lahibey ka o fiarovagneo. Maro ty loza arake ty natiora atrehentikagne noho itika miaigne amy ty tapa’e fara’e amy ty andro fara’e. (Lioka 21:11) Mampiasa ze teknike niboake fara’e areke tika naho fa magnavao anjomba. Miaro ze mandrambe anjara amy i asay ty fampiharagne i teknike vaovao rey. Naho misy loza arake ty natiora ka miseho, le tsy sarotse amo o rahalahio ty mandamigne ty fagnampeagne hoahy ze zoen-draha satria afake atao amy i anjomba boake nihavaozegney ao avao zay. Afake manohy manohagne ty asa fitoriagne amy i faritaney ey ka iareo afara i lozay.

“Nitahie i Jehovah i Fanapahan-kevetse Nirambesegney”

Neké o Filan-keve-pitantanagneo ty hanoagne asa fagnoregnagne maromaro amy ty sampagne 43, tagnate i taom-panompoagne 2023-y. Midika zay tie, fa ho ty an-tsasa ty tragno i Betela magneran-tane ty nanoagne o asa fagnoregnagne rehoe. Mareho amy ty ohatse tsiampeampe retoa moa ajafady ty hasarobily o asa iohoe.

Angola. Izao ty nirehafe i Matt, agnisa ty Komity ty Sampa i Angola: “Tombotsoa ho anay ty mahita ty fahatanteraha ty Hagay 2:7 amy ty fomba miambake. Tagnate ty folo taogne avao, le nitombo 60 isan-jato ty isa o mpitorio! Mba hanohagnagne o mpitory rehoe, le nila nampitomboegne ty isa ty Betelita fa eo. Faie voafetra avao ty isa ty ndaty tokavegne hiasa eto satria tsy ombe i tragnoy. Voka’e, Betelita maro ty miasa mafe sady miasa avao ndra tie amy ty lera tsy fiasagne aza.”

Nisy rahalahy maromaro tinendre mba handineke ty raha azo atao mba hagnitaragne ty birò i sampagne. Nieretseretse iareo fa ty fagnavaozagne ty anjomba ampiasae i sampagne ty vahaolagne tsotra sady azo ampiharegne. Faie tafara ty fikarohagne natao iareo, le nitaka iareo fa mbe tsy izay heike ty fomba mete soa hampiasagne i vola fagnomezagne rey. Nahatrea hevetse areke iareo, le ty hivily naho hagnavao ze tragno raike marine eo zay. Hoe ty Matt: “Naho fa natoro i rahalahy rey anay i hevetse manao tihoe hivily naho hagnavao tragnoy, le somare ninekoneko hey zahay tie le hitovy amy ty tragno aorentika vao i tragno hoviliegney. Faie nitrea’ay fa tena nimete ze hevetse zay. Tena nitahie i Jehovah i fanapahan-kevetsey.”

Va’e mbe hipay fagnitaragne ty sampa i Angola naho fa afarafara agne. Faie ndra tie eo zay, le mbe ampiasae ty birò i sampagne mba hanohagnagne ty fitomboagne misy an-tonda ey, i tragnobey vaovaoy, naho ze tragno ila’e amy i Betela ao ndra ty tragno ahofa ivela i Betela.

Japon. Fa ho 40 taogne lasa zay ty nagnoregnagne ty tragno i sampagne voaloha’e agne sady mbe tsy nisy fagnavaozagne lahibey natao tama’e. Maro ty asa natao mba hikolokoloagne i tragnoy faie ndra tie eo ze kezake mafe natao zay, le fa ela loatse ty nampiasantika o tragno iohoe. Izay ty anto’e mila agnavaozagne aze tanterake.

Niova ty fiaignagne tamy Betela ao tagnate ze taogne maromaro lasa zay. Taloha ty 2015 zao, le nikarakaraegne avao ty hane o keleia i Betelao. Faie amy izao le fa sambe mahandro ty hane’e o Betelitao. Nasiagne “lakozỳ” tena mete soa areke ty tamy ty tragno o Betelitao tamy i fagnavaozagney, amy izay iareo mahazo aigne soa naho fa mahandro ty hane’e. Izao ty reha i Kumiko, rahavave manompo amy ty sampa i Japon agne: “Tena mahazo aigne soa raho naho fa nanomboke nahandro amy i efetse misy ahikey ao. Naho fa iraho mampiasa i lakozỳ, le manoro tie magnorike ze lamigne vaovao atao amy i Betela eto.”

Agnisa ty asa lahibey atao magneran-tane ty asa atao a Japon agne. (Matio 28:19, 20) Misy sampagne roe manao pirinty ty Baiboly feno, le agnisa izay ty Japon. Nasiagne fitaovagne famotepotehagne taratasy naho famoriagne lemboke ty tamy i tragno fanoagne pirintỳ ao. Mba ho fiarovagne ty fahasalamà ze ndaty miasa ao ty anto’e nanoagne izay. Eo amy ty ray tapetrisa dolara ty niviliagne i fitaovagney naho ty nametahagne aze. Faie ndra tie eo zay, le natao ze raha zay mba hitohy avao ty asa fanoagne pirinty naho ty fandefasagne hanegne ara-pagnahy an-tane hafa agne.

Ndra tie eo aza i fagnoregnagney, le natao o rahalahy reo azo antoke tie mitohy avao ty fanoagne pirinty Baiboly. Hoe ty Trey agnisa ty Komity ty Sampa i Japon: “Tagnate i fagnoregnagney, le nampiboake Baiboly amy ty firehake maro ty fandaminantikagne, sady vao mainke nihamaro ty ndaty nipay Baiboly magneran-tane. Nipay fiaraha-miasa boake amy ty sampan’asa maromaro naho amy ty ekipa hafa ty fandaminagne ty fotoagne hametahagne i fitaovagne vaovao rey naho ty fampiboahagne i raha vita an-tsoratse rey.” Ndra tie teo ze raha rezay, le fa ho 220 000 ty Baiboly natao pirinty isam-bolagne, tagnelagnela ty Marsa hatrake Aogositra 2023. Ie amy izao tagnate ze fotoagne zay ty nanoagne i asa fagnoregnagne tamy i toeragne fanoagne pirintỳ aoy. Nivita soa iaby i asay faie tsy nandany vola bey.

Agnisa ty fagnasoagne tena lahibey ka ty fitsitsiagne courrant. Nanapa-kevetse ty hametake panneaux solaires vaovao tika mba hahafahagne mitsitsy vola eo ho eo amy ty 120 000 dolara isan-taogne. Hatao vitra telo sosogne ka ty lafinetentika mba ho fitsitsiagne courrant. Hihegne eo ho eo amy ty 10 000 dolara isan-taogne ty fandaniagne amy ty courrant noho ze raha zay. Ndra tie sarotse aza ty vily o fitaovagne reoheke, le mbe managne mihoatse ty 3,5 tapetrisa dolara eo ho eo tika noho ty fampiasagne i panneaux solaires naho lafinete vitra rey. Tsy le tena hanimba tontolo iaignagne ka ty fampiasagne iareo.

“Mbe Maro ty Raha Toko’e Hatao”

Trea boake amy ty tetik’asa natao amo o sampagne roe rehoeke fa mbe maro ty asa mila atao amy Betela ao mba hanohagnagne ty asa atao amy i faritaney ey. Faie mbe tsy tapetse eo i asay. Hoe ty Aaron, miasa amy ty Sampan-draharaha ty Fagnoregnagne Magneran-tane: “Maro ty asa fa nivita, faie mbe maro ka ty raha toko’e hatao.” Akore ty atao mba hamitagne ze asa rezay? Hoe indraike reke: “Ankoatse ty fagnomeagne vola fagnomezagne mba hanohagnagne i tetik’asa tena lahibey rey, le mankasitrake ty fahafoezan-tegna’areo niasa an-tsitrapo zahay. Misy ama’areo ka manao fagnovàgne amy ty fiaigna’e mba hahafaha’e handrambe anjara amy i asay. Ankasitraha’ay ze fahafoezan-tegna’areo zay. Porofo ty fitahia i Jehovah ty fahafoezan-tegna o rahalahio naho ty fanohagnagne ara-bola atao iareo.”​—Salamo 110:3.

Tohagnagne amy ty alala ty fagnomezagne an-tsitrapo iaby ty asa fagnoregnagne naho fagnavazaogne ataontikagne sady maro amy irey ty atao amy donate.jw.org ao. Tena mankasitrake anareo amy ty fatariha’areo.