Mampivibìke o Keleiagneo vao o Vavolombelo i Jehovah-o?

Mikezake mifandrambe soa amy ty keleia’ay zahay Vavolombelo i Jehovah, sady magnampe ty hafa hanao hoe izay ka. Eké’ay fa Andrianagnahare ty namorogne o keleiagneo. (Genesisy 2:21-24; Efesianina 3:14, 15) Nagnampe ndaty maro magneran-tane mba hanagne tokatragno sambatse naho maharetse ty toro lala ty Baiboly.

Magnampe o keleiagneo hifankatea ty Vavolombelo i Jehovah

Mikezake mafe zahay mba hagnorike ty toroheve ty Baiboly satria magnampe anay ho valy naho ho rae aman-drene fanjaka zay. (Ohabolana 31:10-31; Efesianina 5:22-6:4; 1 Timoty 5:8) Ndra ty keleiagne tsy mitovy finoagne aza afake ty ho sambatse naho fa mampihatse ty toroheve ty Baiboly. (1 Petera 3:1, 2) Mareho ty reha ty ndaty tsy Vavolombelogne retoa naho fa nanjare Vavolombelo i Jehovah ty vali’e:

• “Nialy avao zahay tagnate ty enen-taogne voaloha’e nifanambalia’ay. Faie nanjare bey hatea naho nanam-paharetagne ty Ivete naho fa nanjare Vavolombelo i Jehovah. Nagnova ty tokatragno’ay ty fiovagne natao’e.”​—Clauir, boake a Brezily agne.

• “Nanohetse raho naho fa nanomboke nianatse Baiboly tamy ty Vavolombelo i Jehovah ty Chansa valiko. Nieretseretse raho fa hampisarake anay keleian-draike iareo. Faie nanjare nitsapako fa tena nagnampe ty tokatragno’ay ty Baiboly.”​—Agness, boake a Zambia agne.

Naho fa mitory zahay, le rehafe’ay amo o ndatio tie nagnino ty toroheve ty Baiboly ro afake magnampe aze mba

• Hahay hifily valy

• Hiatreke i taogne voaloha’e amy ty fanambaliagney

• Hifandrambe soa amy ty rafozagne

• Hahay hitantam-bola

• Tsy ho mora boseke

• Hahay hamela heloke

• Hahay hiteza ty ana’e

Mampisy olagne agnate ty tokatragno ao vao tihoe miova finoagne ty raike amo o mpivalio?

Ie aloha va’e hisy olagne kindraike. Tamy 1998 ohatse, le nirehake ty fikambanagne raike mpanao fikarohagne fa mpivaly 1 agnate ty 20 ro nanagne olagne lahibey naho fa nanjare Vavolombelo i Jehovah ty raike amy iareo mirovaly.

Fa nambara i Jesosy mialoha fa va’e hanagne olagne amy ty keleia’e ze mampihatse ty fampianara’e. (Matio 10:32-36) Nirehake ty mpahay tantara atao tihoe Will Durant fa “natao tihoe mampisaratsarake keleiagne ty Fivavahagne Kristiana” tamy ty andro ty fanjakagne Romana.a Mbe atao o ndatio manao hoe izay avao ka ty Vavolombelo i Jehovah ila’e amy hinane zao. Midika vao zay fa o keleiagne Vavolombelogneo ro foto i olagney?

Namoake lily ty Fitsaràgne Eropeana Miomba ty Zo o Ndatio naho fa nirehafegne tie nao mampisarake o keleiagneo o Vavolombelo i Jehovah-o. Nirehake reke fa keleiagne tsy Vavolombelogne ro mateteke mahavy i olagney satria “tsy eké’e naho tsy hajae’e tie managne zo hampihatse ty raha inoa’e i longo’ey.” Mbe hoe avao ka reke: “Tsy ty Vavolombelo i Jehovah avao ro tratse ze raha zay fa ze mpivaly tsy mitovy finoagne iaby.”b Faie ndra tie misy manohetse aza o Vavolombelo i Jehovah-o, le mikezake avao iareo mampihatse ty toroheve ty Baiboly tihoe toy: “Ko mamale raty ty raty ndra amy ia ndra amy ia. ... Naho azo atao, sady naho mbe miankigne ama’areo avao, le milongoa amy ze ndaty iaby.”​—Romanina 12:17, 18.

Nagnino ty Vavolombelo i Jehovah ro mino fa toko’e ho mpiara-mivavake ama’e avao ro ho valie’e?

Mirehake ty Baiboly fa toko’e hanambaly “amy i Tompo ao avao” ty Kristiana. Ty dika izay hanambaly ndaty mitovy finoagne ama’e. (1 Korintianina 7:39) Mampihatse izay ty Vavolombelo i Jehovah satria mifagnarake amy ty Baiboly zay sady mahasoa. Mirehake ohatse ty lahatsoratse raike naboa ty Journal of Marriage and Family, tamy 2010, fa vao mainke mifankatea o mpivalio “naho fa mitovy ty fivavaha’e, ty fombafomba’e naho ty raha inoa’e.”c

Faie tsy mandrisike ty mpivavake ama’ay ao hisarake amy ty vali’e tsy Vavolombelogne zahay. Hoe ty Baiboly: “Naho misy rahalahy manambaly faie tsy mpino i vali’ey, sady mbe te hiarake amy i lahilahỳ reke, le ao tsy haria’e reke. Naho eo ka ty ampela manambaly tsy mpino sady mbe te hiarake ama’e reke, le ao reke tsy hisintake ama’e.” (1 Korintianina 7:12, 13) Mankatò o lily iohoe ty Vavolombelo i Jehovah.