Tsy Mete Lany Date ty Fampianara ty Baiboly

ERETSERETO ZAO: Andao atao tihoe mitilike tragno fagnajariagne tantara fa ela rehe. Fa hambo’e naho fa simba ty ankamaroa i tsangambatoy. Ty ila’e fa tsy eo sasa ty pila’e. Faie misy raike mbe soa ty ao. Trea soa iaby ty sokitsokitse ama’e. Le hoe rehe tamy i ndaty ninday azo hitilike azey tie: “Mbe vaovao vao ty raike toio?” Nirehake reke fa tena “fa ela io naho ampitahaegne amo o ila’e reo sady mbe tsy nihavaozegne.” Le hoe rehe “nisy fomba niarovagne aze vao?” Faie nirehake reke fa tsy nisy. Fa niazo ty oram-bey naho ty tio-bey reke sady fa maro ty nagnandragne namoteke aze. Nieretseretse areke rehe tie: ‘Vita amy ty ino ty raha toio?’

Manahake o tsangambato miambake iohoe ty Baiboly. Fa hambo’e reke naho oharegne amy ty boke hafa. Maro ty boke fa hambo’e faie nanjare hoe “simba” naho fa nandeha ty fotoagne. Ty anto’e, mifanohetse amy ty raha voaporofo afara atoy naho ty raha rehafe o siansao ty raha rehafe’e. Mateteke magnoho-doza aza ty torohevetse mei’e miomba ty fitsaboagne. Misy asa soratse fa ela ka ty ao, le ty tapa’e avao ty eo satria fa nisimba ndra nimontso ty tapa’e ama’e.

Faie hafa ty Baiboly, ndra tie fa 3 500 taogne mahery aza ty nanoratagne aze. Natao ty hamoagnagne aze, le noroagne naho rinara sady niharatiratiegne faie mbe tsy niova avao ty raha rehafe’e. Tsy lany date o boke iohoe, satria mifagnarake soa amy ty raha afara atoy ty fagnazavagne agnate’e ao.

TORO LALAGNE ILAENTIKAGNE AMY IZAO

Faie va’e hirehake rehe tie: ‘Tena mbe ilaegne amo o ze andro zao vao ty raha ampianare’e?’ Dineho zao: ‘Inogne ty olagne lahibey atrehe o ndatio? Ia amy raha rey ty tena mampatahotse?’ Va’e ho aly ty avy an-tsai’o ao, ndra fandotoagne ty tontolo iaignagne, aferafera naho hampiarotegne. Dineho boake amy ty toro lala ty Baiboly toagne tihoe: ‘Tsy ho soa vao ty fiaignagne naho mampihatse ireo ze kila ndaty?’

TEA FILONGOAGNE

“Sambatse ze mpampilongo fa ‘anak’Andrianagnahare’ ty ho fanognonagne aze.” (Matio 5:9) “Naho azo atao, sady naho mbe miankigne ama’areo avao, le milongoa amy ze ndaty iaby.”—Romanina 12:18.

MAMINDRA FO NAHO MAMELA HELOKE

“Sambatse ze mamindra fo, satria hamindragne fo ka reke.” (Matio 5:7) “Mifakantateza lognandro sady mahaia mifamela heloke tanterake, naho misy managne anto’e hitaraignagne miomba ty ila’e. Namela tanterake ty helo’areo ty Jehovaha, le mba mifamelà heloke ka nareo.”—Kolosianina 3:13.

TSY MAGNAVAKAVAKE

“Boake amy ty ndaty raike ty nanoan’Andrianagnahare ty ndaty amy ty firenena iaby mba hitoboke magneneke ty tane toy iaby.” (Asan’ny Apostoly 17:26) “Tsy magnavakavake ty Andrianagnahare, fa amy ty firenena iaby, ze ndaty matahotse aze le manao ty maregne ro ankasitraha’e.”—Asan’ny Apostoly 10:34, 35.

KO MANIMBA TY TANE TOY

“Le nalae i Jehovah Andrianagnahare i lahilahỳ sady natobo’e tamy i tonda i Edenay ao amy izay hiasa naho hikolokolo i tonday.” (Genesisy 2:15) Hovonovonoen’Andrianagnahare “ze manimba o taneo.”—Apokalypsy 11:18.

MALAIGNE TY HATEA MENA NAHO TY FINDESAM-BATAGNE RATY

“Mitaoa amy ty hatea mena, fa tsy miankigne amy ty halàko ty fanagna’e ty fiay o ndatio.” (Lioka 12:15) “Ao tsy ho tognonegne ama’areo eo ty rehake miomba ty fijangajangagne naho ze kila raha va’e ho fahalotoagne ndra hatea mena, fa tsy fagneva ty ndaty masigne zay.”—Efesianina 5:3.

MANAO TY MAREGNE NAHO MIASA MAFE

“Te hanao ty maregne amy ze kila raha” zahay. (Hebreo 13:18) ‘Ko mangalatse sasa ze mpangalatse fa toko’e hanao asa soa.’—Efesianina 4:28.

MAGNAMPE ZE SAHIRAGNE

“Hanao rehake mampahery ty kivy, hanohagne ty maleme, naho hahatindry fo amy ze kila ndaty.” (1 Tesalonianina 5:14) “Mikarakara ty bode naho ty ampela vantotse amy ty haorea’e.”—Jakoba 1:27.

Tsy tihoe rehafe ty Baiboly avao o toro lalagne rehoe. Ampea’e ka tika hahatrea fa tena ilaegne reo sady atoro’e antika ty fomba hampiharagne aze. Hihegne ty olagne naho maro ty mampihatse o toro lalagne reo. Tena mahasoa antika ty toro lala ty Baiboly sady tsy mete lany date. Faie ino ty soa ho azo’o naho mampihatse ireo rehe manomboke amy izao?

MAHASOA AZO MANOBOKE AMY IZAO TY FAMPIANARA TY BAIBOLY

Hoe ty Matio 11:19: ‘Ty fahendrea o ndatio hamaregne ty raha atao’e’ ndra ty voka ty raha atao’e. Tena maregne zay! Naho manam-pahendreagne ty ndaty raike le ho trea amy ty fiaigna’e ty voka’e. Va’e hieretseretse areke rehe tie: ‘Naho toe azo ampiharegne vata’e ty Baiboly, tsy toko’e hisy voka’e amy ty fiaignako vao zay? Tena magnampe ahy hiatreke olagne vata’e vao ty Baiboly?’ Dineho moa ty ohatse toy:

Maro raha atao ty Soatsarab sady nahafa-po aze ty fiaigna’e. Faie tampoke teo, le nimate ty anak’ampela’e, nirava ty tokatragno’e sady nanjare sahiragne ara-bola ka reke. Hoe reke: ‘Niova tanterake ty fiaignako. Tsy eo sasa i anak’ampelakoy naho i valiko. Tsy nanan-tragno sasa ka raho. Le hoe tsy nanagne ty maha ie ahy zay raho, tsy nanagne hery sady tsy nisy dika’e sasa ty fiaignako.’

Trea i Soatsara fa tena maregne ty rehafe ty Salamo 90:10 toy: “Fitopolo taogne ty androm-piaigna’ay, sady naho matanjake zahay, le mahavy valopolo taogne, faie mahaferenaigne fa feno raha sarotse naho fijaleagne zay! Mitsibaogne avao ty taogne iaigna’ay, le manjare mitiligne zahay.”—Salamo 90:10.

Inogne ty nagnampe i Soatsara? Ty Baiboly. Miambake ty raha natao’e ho aze. Ho trea’o amy ty lahatsoratse telo magnarake, fa ndaty maro ka ty mahatsapa tie tena magnampe aze hiatreke olagne ty toroheve ty Baiboly. Tsapa iareo fa manahake i tsangambato nirehafegne tam-boaloha’e tagney ty Baiboly. Tena tsy mitovy amo o boke maro hafa, i aze lane date rey reke. Ty fomba nanoratagne ty Baiboly vao ty nahavy izay? Va’e ho heven’Andrianagnahare vao ty ao fa tsy heve o ndaty?—1 Tesalonianina 2:13.

Va’e tsapa’o varagne fa fohe avao ty andro iaigna’o sady feno olagne. Inogne ty afake mampahery naho manohagne azo naho fa feno olagne ndra kivy rehe? Aia ty misy torohevetse mahasoa?

Andao tika handineke fomba telo hahatreavantikagne tie azo ampiharegne soa amy ty fiaignagne ty Baiboly. Afake mampianatse azo mba

1. hiatreke olagne naho mbe azo atao.

2. hamaha olagne naho fa miseho zay.

3. hiaretse ty raha tsy azo’o ovagne.

Hirehake ty miomba ireo ty lahatsoratse telo magnarake.