Inogne i Talily Soa Boake Aman’Andrianagnahare Zay?

1. Talily soa inogne izaò?

Tean’Andrianagnahare ho sambatse ty ndaty ambone tane etoy. Tea antikagne reke kanao namboatse ty tane toy naho ze kila raha. Fa marine ty hagnafaha’e o fijaleagneo. Hiadagne iaby ty ndaty amy ty tane toy sady ho soa ty fiaignagne amy ty hoavy.​—Vakio Jeremia 29:11.

Mbe tsy nisy fitondragne nahavita nagnafake o hampiarotegneo naho o aretegneo vaho o fateo. Faie intoy misy talily soa: Hafahan’Andrianagnahare ze fitondrà o ndaty amy hinane zao, le i Fanjakà’ey avao ty hinday, soa tie hiadagne naho ho salama ty ndaty toy iaby.​—Vakio Isaia 25:8; 33:24; Daniela 2:44.

2. Talily inogne izao ie mekeo?

Fa hamonovono ze ndaty raty fagnahy ty Andrianagnahare, le tsy hisy fijaleagne sasa ty afara izay. (Zefania 2:3) Ombiagne ty hanoa’e izay? Fa marine kanao fa eo iaby ty famantaragne nirehafe ty Baiboly. Magnaporofo izay ty hamaro ty raha raty amy hinane zao.​—Vakio 2 Timoty 3:1-5.

3. Inogne ty toko’e hataontikagne?

Mianara Baiboly. Mitovy amy ty taratasy boake aman’Andrianagnahare nalefa’e ho antikagne o Baibolio. Hazavae’e ao ty toko’e hataontikagne mba hanagnagne fiaignagne soa naho hahazoagne havelogne nainai’e. Va’e hisy ndaty handrara azo tsy hianatse Baiboly. Faie ko kivy rehe, fa anò avao ze hahazoa’o i havelogne nainai’ey!​—Vakio Ohabolana 29:25; Apokalypsy 14:6, 7.