Ia o Andrianagnahare Zao?

1, 2. Inogne ty raha agnontenea o ndatio?

MARO raha agnonteneagne ty ajaja. Ndra tie fa magnazava ama’e rehe, le mbe magnontane avao reke tie: ‘Nagnino?’ Fa mikezake magnomey ty vale’e rehe, faie le mbe magnontane avao reke tie: ‘Fa nagnino?’

² Sambe magnontane iaby tika, ndra ajaja ndra ndaty bey. Va’e hagnontane miomba ty raha ho hanegne, ndra ty akanjo hagnisiagne, ndra ty raha ho viliegne tikagne. Ndra misy raha lahibey teàntikagne hagnonteneagne miomba ty fiaignagne naho ty hoavy. Faie va’e tsy hipay ty vale’e sasa tikagne, naho tsy mahatrea ty vale’e mahafa-po.

3. Nagnino ty ankamaroa o ndatio ro mieretseretse tie tsy ho trea’e ty vale ty fagnontenea’e?

³ Valea ty Baiboly vao ty fagnonteneantikagne? Magneke izay ty ndaty ila’e, faie mbe mihevetse iareo tie sarotse ty mahazo ty raha rehafe ty Baiboly. Mieretseretse iareo fa ty ramosé, ndra ty mpitarike fivavahagne avao ro mahavale fagnonteneagne. Ty ila’e ka megnatse hirehake tie tsy fanta’e ty vale’e. Akore ty heve’o?

4, 5. Inogne iaby ty fagnonteneagne lahibey fa nieretserete’o, sady inogne ty anto’e toko’e hipaia’o ty vale’e?

⁴ Va’e teà’o ho fantatse ty vale ty fagnonteneagne retoa: Inogne ty anto’e namboaragne ahy? Hanao akore raho naho fa mate? Manao akore o Andrianagnahare zao? Hoe ty Jesosy, Mpagnanatse malaza: “Mangataha avao, le homeagne nareo. Mipalià avao, le hahatrea nareo. Kokogno avao, le hosokafegne nareo.” (Matio 7:7) Ko mitofa rehe ampara ty ahatreava’o ty vale’e maregne.

⁵ Ie zay, “naho tsy mitofa mipay aze” rehe, le hahatrea ty vale’e agnate Baiboly ao. (Ohabolana 2:1-5) Tsy sarotse fantaregne ty vale’e. Hagnampe azo ho sambatse amy ty fiaigna’o manomboke amy izao ty raha ianara’o, sady hahavy azo hanan-draha tamaegne amy ty hoavy. Andao tikagne handineke ty fagnonteneagne raike mampivali-doha ty ndaty maro.

MIDARE ANTIKAGNE VAO TY ANDRIANAGNAHARE SA RATY FAGNAHY?

6. Nagnino ro misy ndaty mieretseretse fa tsy midare ty fijalea’e ty Andrianagnahare?

⁶ Maro ty ndaty mieretseretse fa tsy midare antikagne ty Andrianagnahare. Feno aly, fankalaignagne, hararahagne ty magnodidigne antikagne amy hinane zao. Marare naho mijale sady mate ka o ndatio. Izay ty mahavy ty ndaty ila’e mieretseretse tie: ‘Tsy ho nisakagne o fijaleagneo vao ty Andrianagnahare naho nidare antikagne?’

7. a) Inogne ty raha tsy mete ampianare o mpitarike fivavahagneo? b) Nagnino tikagne ro matoky fa tsy i Andrianagnahare ty mahavy o raha ratio?

⁷ Ty mpitarike fivavahagne ty mahavy o ndatio hino tie raty fagnahy ty Andrianagnahare. Naho fa misy loza, le atao iareo tie lahan’Andrianagnahare. Mea iareo tsiny ty Andrianagnahare, fa nao zao boake ama’e i lozay. Faie ampianare ty Baiboly, fa tsy boake aman’Andrianagnahare o haratiagneo. Rehafe ty Jakoba 1:13 fa tsy mitsapa hevetse o ndatio amy ty raha raty ty Andrianagnahare. Hoe reke: “Naho fa misy tsapa hevetse, ao rehe tsy hanao tihoe tie: ‘Tsapa heven’Andrianagnahare ahy izao.’ Tsy tsapaentikagne hevetse amy ty raha raty ty Andrianagnahare naho tsy mitsapa hevetse antikagne amy izay ka.” Ty dika izay, tsy Andrianagnahare ty mahavy o raha ratio hiseho ndra tie tsy kalagna’e. (Vakio Joba 34:10-12.) Misy ohatse toy.

8, 9. Nagnino ro tsy mete ty hagnomean-tsiny an’Andrianagnahare naho fa misy raha manahiragne antikagne? Magnomea ohatse.

⁸ Dineho tie, misy ajalahy raike miharo toboke amy ty rae aman-drene’e. Tea aze ty rae’e sady nampianatse aze hahay hanapa-kevetse. Faie nanohetse an-drae’e reke, le nisintake ty an-tragno ao. Narengerenge tamy ty lia’e agne reke, le nizoen-draha. Tsy nisakagne aze ty rae’e. Hagnomey tsiny an-drae’e vao rehe? Azo antoke fa tsy hanao izay rehe! (Lioka 15:11-13) Mitovy amo o rae iohoe ty Andrianagnahare. Tsy nisakagne reke naho fa nisy ndaty nijobogne ty hanohetse aze naho hanao raty. Ko haligno areke, fa tsy Andrianagnahare ty mahavy o raha ratio. Tsy mete ty hagnomean-tsiny aze.

⁹ Mbe misy anto’e soa kanao mbe engàn’Andrianagnahare hisy o raha ratio. Hianara’o amy ty Toko faha-11 ao, ty raha rehafe ty Baiboly miomba izay. Matokisa rehe fa tea antikagne ty Andrianagnahare sady tsy boake ama’e ty raha manahiragne antikagne. Naho ty maregne, i Jehovah Raike avao ty tamaegne hagnafake ze raha manahiragne antikagne.—Isaia 33:2.

10. Nagnino tikagne ro matoky fa hagnafake ty raha tsy mete anoe ty ndaty raty fagnahy ty Andrianagnahare?

¹⁰ Masigne ty Andrianagnahare. (Isaia 6:3) Tsy misy tsiko’e, malio sady soa ze kila raha namboare’e. Azontikagne atokisagne reke. Tsy mitovy amy izay o ndatio fa manao raty. Ndra ty mpitondra manao ty maregne, tsy managne hery hagnarenagne ty raty anoe ty ndaty raty fagnahy. Tsy misy ndaty managne hery mitovy amy ty herin’Andrianagnahare. Vita’e ty magnaregne ty raha tsy mete anoe ty ndaty raty fagnahy, sady hanao izay reke. Hafaha’e tsy hisy sasa o haratiagneo.—Vakio Salamo 37:9-11.

MAMPANAHELO AN’ANDRIANAGNAHARE VAO O NDATY MIJALEO?

11. Manahelo vao ty Andrianagnahare naho fa misy raha mampijale azo?

¹¹ Manahelo vao ty Andrianagnahare naho fa misy raha raty miseho an-tane toy, ndra misy raha manjò azo? Ampianare ty Baiboly fa “tea raha vantagne” ty Andrianagnahare. (Salamo 37:28) Manohigne ty arofo’e ty raha miseho, ndra soa ndra raty. Mampanahelo aze ty fijalea o ndatio. Rehafe ty Baiboly fa “nikoretse ty arofo’e” naho fa nifeno raha raty ty tane toy taloha. (Genesisy 6:5, 6) Tsy miova ty Andrianagnahare. (Malakia 3:6) Rehafe ty Baiboly fa mikarakara azo ty Andrianagnahare.—Vakio 1 Petera 5:7.

12, 13. a) Inogne ty mahavy antikagne ho tea ndaty naho hanahelo aze, sady ino ty tsapantikagne naho fa mahatrea ndaty mijale? b) Inogne ty atokisantikagne fa hagnafake o fijaleagneo naho ty tsy rare’e ty Andrianagnahare?

¹² Rehafe ty Baiboly fa namboaren’Andrianagnahare manahake aze tikagne. (Genesisy 1:26) Ty dika izay, namboare’e hanagne toetse fanjaka mitovy amy ty aze tikagne. Kanao ihe manahelo naho fa mahatrea ndaty tsy manan-tsiny mijale, somandrake fa i Andrianagnahare! Akore ty ahafantarantikagne izay?

¹³ Ampianare ty Baiboly fa “Andrianagnahare hatea.” (1 Jaona 4:8) Ty hatea, ty mahavy aze hanao ze kila raha. Managne i hatea zay tikagne fa manahake an’Andrianagnahare. Ho nafaha’o vao ty fijalea o ndatio naho ty tsy rare’e magneneke ty tane toy, naho nanagne hery rehe? Azo antoke fa ho nanao izay rehe, fa tea ndaty. Akore ka ty aman’Andrianagnahare? Managne hery reke, sady tea antikagne. Hafaha’e ty fijaleagne naho ty tsy rare’e. Matokisa rehe, fa ho avy eo iaby i fampitamàn’Andrianagnahare am-piandohà ty boke toỳ! Faie soa naho mianatse ty miomba an’Andrianagnahare rehe, amy izay mino ty fampitamà’e.

TEÀN’ANDRIANAGNAHARE HAHAFANTATSE AZE REHE

14. Ia ty tahinan’Andrianagnahare, sady nagnino zay ro toko’e hampiasae’o?

¹⁴ Inogne ty ho rehafe’o voaloha’e amy ty ndaty raike teà’o ho ragnetse? Ty agnara’o. Managne agnaragne vao ty Andrianagnahare? Fivavahagne maro ty mirehake tie Andrianagnahare ndra Tompo ty tahina’e. Tsy izay ty tahina’e, fa agnaram-boninahitse mitovy amy tihoe “mpanjaka” ndra “porejidà” avao reo. Nisaontsien’Andrianagnahare amantikagne tie i Jehovah ty agnara’e. Hoe ty Salamo 83:18: “Mba ho fanta o ndatio fa ihe raike avao, i managne ty tahinagne tihoe Jehovah, ro Ambone Bey ambone tane etoy!” Fa mihoatse ty impito arivo ty nampiasà ty mpanoratse Baiboly ty tahinan’Andrianagnahare. Ty dika izay, teà i Jehovah hahafantatse naho hampiasa ty tahina’e rehe. Nampahafantare’e azo ty tahina’e soa tie hiragneta’o ama’e.

15. Inogne ty dika ty tahinagne tihoe Jehovah?

¹⁵ Misy dika’e ty tahinan’Andrianagnahare. Ty dika tihoe Jehovah, mahavita magnatò ze raha ampitamae’e naho ze raha safirie’e. Tsy misy ndaty mahasakagne aze amy ze raha teà’e hatao. I Jehovah avao ty fagneva o tahinagne iohoe.a

16, 17. Inogne ty dika ty tihoe a) “Tompo ty Hery”? b) “Mpanjaka nainai’e”? d) “Mpamboatse”?

¹⁶ Hoe ty Salamo 83:18 miomba i Jehovah “ihe raike avao ... ro Ambone Bey.” Hoe ka ty Apokalypsy 15:3: “Jabajaba sady mahaveregne ty asa’o, Jehovah Andrianagnahare, ihe ro Tompo ty Hery. Vantagne naho maregne ty lala’o, ihe Mpanjaka nainai’e.” Inogne ty dika tihoe “Tompo ty Hery”? Ty dika’e, tsy misy mahery ambone i Jehovah, fa ie ro managne hery fara’e ambone. Ty dika tihoe “Mpanjaka nainai’e”, le i Jehovah ro fa nisy ela bey. Mirehake ty Salamo 90:2 fa ela bey ty naha Andrianagnahare aze sady tsy hisy fara’e. Mahalatsa vata’e!

¹⁷ I Jehovah raike avao ro Mpamboatse. Hoe ty Apokalypsy 4:11: “Magneva handrambe ty voninahitse, ty asigne naho hery anio rehe, Jehovah, eka, ihe ro Andrianagnahare’ay, amy tie ihe ro namboatse ze kila raha iaby sady zoton’arofo’o ty naha eo naho ty namboaragne aze.” Ie zay! Tsy ho nisy ty anjely, ty vasiagne, ty voan-katae, ty fiagne an-driakey vaho ze kila raha naho tsy niforogne i Jehovah.

AZO ATAO RAGNETSE VAO TY JEHOVAH?

18. Inogne ty mahavy ty ndaty ila’e hieretseretse tie sarotse ty hiragnetse an’Andrianagnahare, faie inogne ty ampianare ty Baiboly?

¹⁸ Matahotse ty ndaty ila’e naho fa mahafantatse ty toetse fanjaka anagna i Jehovah. Mieretseretse iareo tie: ‘Mahery ty Andrianagnahare sady fara’e ambone ro mbe lavitse. Inogne ty hidarea’e ahy?’ Izay vao ty teàn’Andrianagnahare ho eretseretentikagne? Tsy izay. Te hagnarine antikagne ty Jehovah. Mirehake ty Baiboly fa “tsy lavitse antikagne tsikiraidraike” ty Andrianagnahare. (Asan’ny Apostoly 17:27) Teàn’Andrianagnahare hiharine aze rehe. Mampitamà reke tie: ‘Hagnarine azo reke.’—Jakoba 4:8.

19. a) Akore ty hahavy azo ho ragnen’Andrianagnahare? b) Ty toetse i Jehovah manao akore ro fara izay teà’o?

¹⁹ Akore ty hahavy azo ho ragnen’Andrianagnahare? Hoe ty Jesosy: “Soa tie mba hahazoa iareo havelogne nainai’e, le toko’e hianatse hahafantatse azo iareo, ihe Andrianagnahare maregne naho i Jesosy Kirisity nirahe’o.” (Jaona 17:3) Tohizo avao ty fianara’o, le hahafantatse i Jehovah naho i Jesosy rehe, sady hahazo i havelogne nainai’ey. Fa nianarantikagne tie “Andrianagnahare hatea.” (1 Jaona 4:16) Managne toetse fanjaka maro hafa ka reke. Rehafe ty Baiboly amantikagne ka fa Andrianagnahare “mitretré, soa fagnahy, tsy tsiela vignetse, feno hasoa fagnahy miharo hatea sady tea hamarenagne” ty Jehovah. (Eksodosy 34:6) “Tsy mitagne agn’arofo sady soa fagnahy” reke. (Salamo 86:5) Andrianagnahare manam-paharetagne naho tsy mivalike reke. (2 Petera 3:9; Apokalypsy 15:4) Hahafantatse ty toe i Jehovah fanjaka rehe naho fa mianatse ty miomba aze agnate Baiboly ao.

20, 21. Akore ty hiharineantikagne an’Andrianagnahare ndra tie tsy trea maso reke?

²⁰ Akore ty hagnarinea’o an’Andrianagnahare, ndra tie tsy trea maso reke? (Jaona 1:18; 4:24; 1 Timoty 1:17) Hino rehe tie misy vata’e ty Jehovah naho mamaky ty raha rehafegne miomba aze agnate Baiboly ao. (Salamo 27:4; Romanina 1:20) Naho fa maro ty raha fanta’o miomba i Jehovah, le hitombo ty hatea’o aze sady le hoe raha agnila’o eo reke.

²¹ Hazava ama’o tie Raentikagne ty Jehovah. (Matio 6:9) Nagnomey fiaignagne antikagne reke sady teà’e hanagne fiaignagne soa tikagne. Manahake ty rae bey hatea magniry raha soa hoahy ty ana’e reke. (Salamo 36:9) Maregne zay. Mampianatse ty Baiboly fa azo’o ragnetegne ty Jehovah. (Jakoba 2:23) Dineho tie, i Jehovah Mpamboatse ze kila raha ro magniry te hiragnetse ama’o!

22. Inogne ty toko’e hatao’o naho misy ndaty mandrara azo tsy hianatse Baiboly?

²² Va’e hisy ndaty handrara azo tsy hianatse Baiboly sasa. Matahotse iareo kera avao rehe hifindra finoagne. Faie ko engàgne hisy ndaty hisakagne azo tsy ho ragne i Jehovah. Ie ro Ragnetse fara’e soa azo’o anagnagne.

23, 24. a) Inogne ty anto’e mahavy azo toko’e hagnontane avao? b) Inogne ty hianarantikagne amy ty toko manonjohy itoy?

²³ Va’e hisy raha tsy hazava ama’o naho fa mitohy ty fianara’o Baiboly. Ko megnatse magnontane ndra mangataha fagnampeagne rehe. Nirehake ty Jesosy fa toko’e hiambane manahake o ajajao tikagne. (Matio 18:2-4) Tea magnontane o ajajao. Teàn’Andrianagnahare hahatrea ty vale ty fagnontenea’o rehe. Ianaro soa areke ty Baiboly, hahafantara’o soa ty maregne.—Vakio Asan’ny Apostoly 17:11.

²⁴ Ahafantaragne soa ty miomba i Jehovah ty fianaragne Baiboly. Hianaragne amy ty toko manonjohy itoy ty tsy mampitovy ty Baiboly amy ty boke hafa.