LESOGNE 8

Mampiasà Fagnoharagne Mahaliagne

Matio 13:34, 35

TY DIKA IZAY: Toko’e ho tsotra i fagnoharagney faie mahaliagne ka. Hagnampe i ndatỳ zay hitadidy ze hevetse tea’o horehafegne.

Mampiasà fagnoharagne tsotra. Manahafa i Jesosy naho fa hagnazava hevetse sarotse. Raha mahazatse o ndatio ty nirehafe’e naho fa nanao fagnoharagne reke. Ko mirehake pitsopitso’e tsy ilaegne hahavy i fagnoharagney ho sarotse. Ko mirehake raha tsy misy ifandrambesa’e amy i fagnoharagney ka, fa manjare tsy mazava amy i ndatỳ ty lesogne boake ama’e.

Tea’o hahaliagne vao ty fagnoharagne ampiasae’o? Dineho areke ty magnodidigne azo. Ampiasao ze fagnoharagne amy ty boke naho ty gazete naboa i fandaminagne. Tsanogno soa ty mpampianatse fa za-draha. Sorato agnate kariné, ndra amy ty fitaovagne elektronike ty fagnoharagne hita’o, sady ambino soa tsy ho montso.
Eretsereto ty fagnoharagne mete amy i ndatỳ. Dineho ty raha fatao i ndatỳ, ndra ty raha mahaliagne aze, le anò mifagnarake amy izay i fagnoharagney. Ko manao fagnoharagne mahamegnatse naho manafintohigne i ndatỳ.
Asongadigno ty hevetse lahibey. Mampiasà fagnoharagne naho fa hagnazava ty hevetse lahibey, fa tsy ze raha madinedineke. Anò azo antoke fa tsy i fagnoharagney avao ro ho tsiaro i ndatỳ fa ty lesogne nianara’e boake ama’e ka.