Loharanon-kevetse amy ty Tari-dalagne hoahy ty Fiaignantika Naho ty Fanompoagne
3-9 JANVIE
HARENA AMY TY SAONTSIN’ANDRIANAGNAHARE | MPITSARA 15-16
“Raty Vata’e o Fivalihagneo!”
w12 15/4 9 § 4
“Famantaragne ty Andro Fara’e Tihoe Maro ty Ndaty Hivalike”
4 Voaloha’e, hodinehentikagne ty tantara i Delila, i ampela nanjare niteà i Samsonay, i mpitsara nialy tamo o Filistinaoy, mba hagnafahagne o vahoa i Jehovah-o. Faie tsy tena teà i Delila ty Samsona. Va’e fanta o ndaty ambone dime tamo o Filistinao eo zay, le nirahe iareo ty Delila mba hamantatse ty anto’e nampaozatse i Samsona, mba hahafaha iareo hamono aze. Nimey iareo vola bey ty Delila mba ho tambe ze raha hatao’e zay. Nagneke ty Delila, le namitake i Samsona intelo faie le ninaoke avao. “Tsy nado’e ty ontane” ty Samsona tafara izay, sady niresé’e lahatse mba hahavy aze hirehake ty anto’e nampaozatse aze. Tsy nitante i Samsona ze raha zay tamy ty fara’e, le ‘nagniry ty ho mate reke.’ Nirehafe’e tamy i Delila fa mbe lia i volo’ey naho tinapake. Naho io ro tapahegne, le tsy haozatse sasa reke. Nampiroroe i Delila tam-pe’e eo areke ty Samsona, le nisy ndaty napanapahe’e i volo i Samsonay naho fa niazon-droro reke. Natolo’e i fahavalo’e rey ty Samsona tafara izay, le nenga’e hanao ze tea’e tamy i Samsona iareo. (Mpits. 16:4, 5, 15-21) Tena raty vata’e ty raha natao i Delila! Vita’e ty nivalike tamy i ndaty tea azey, noho i reke tea vola.
w05 15/1 27 § 4
Hevetse Miambake amy ty Boke Mpitsara
14:16, 17; 16:16. Manimba filongoagne ty fampiasagne o ranomasò naho o filam-bane’eo mba hamoreseagne ndaty raike hanao raha.—Ohabolana 19:13; 21:19.
w12 15/4 11-12 § 15-16
“Famantaragne ty Andro Fara’e Tihoe Maro ty Ndaty Hivalike”
15 Ino ty raha azo o ndaty manambalio atao, mba hagnampe aze tsy hivalike amy ty vali’e ndra ombia ndra ombia? Hoe ty Baiboly: “Mifalea amy ty valy ty fahatanora’o”, le “ankamamio ty fiaignagne iaraha’o amy i vali’o tea’oy.” (Ohab. 5:18; Mpito. 9:9) Mila mikezake mafe areke ty mpivaly mba hifankatea avao naho fa mihantetse. Ty dika izay, mila manao raha hoahy i ampelay i lahilahỳ, le i ampelay ka hoe izay. Agnisa izay tihoe, mihevetse ze hahasoa aze, manokagne fotoagne hiarahagne ama’e, naho mifandrambe maifitse ama’e lognandro. Mila mikezake mafe areke iareo mba hiaro ty fanambalia iareo naho ty fifandrambesa iareo amy i Jehovah. Ho vita iareo zay, naho miarake mianatse Baiboly iareo, miarake manompo mateteke, naho miarake mivavake mba hahazoagne ty fitahia i Jehovah.
KO MIVALIKE AMY I JEHOVAH
16 Nanao fahotagne lahibey ty Kristiana ila’e, le tsy maintsy nanaregne mafe mba “haozatse amy ty finoagne.” (Tit. 1:13) Ty ila’e aza, tena nila niroahegne tsy ho agnisa ty fiangonagne. Faie hoe ‘nampiofagne’ iareo ze fandilovagne iareo zay, le nagnampe iareo hifandrambe soa amy i Jehovah indraike. (Heb. 12:11) Akore naho longo’o ndra ragne’o maifitse azo i ndaty voaroakey? Amy izay ro ahatreavagne tie ia ty tena tsy hivaliha’o: I ndatỳ sa i Andrianagnahare? Ko haligno fa i Jehovah ro mandily tihoe tsy azo atao ty mifandrambe amo o voaroakeo, ndra ia zay ndra ia. Le mivazoho antika ty Jehovah naho hankatò aze tika ndra tsy hankatò.—Vakio ty 1 Korintianina 5:11-13.
Vatosoa Ara-pagnahy
w05 15/3 27 § 6
Nandrese ty Samsona Noho ty Hery i Jehovah!
Ty hialy tamo o Filistinao avao ro nimasake tan-tsay i Samsona, satria izay ty tanjo’e. Nivantagne tan-tragno ze ampela makorely raike ta Gaza agne zay reke mba hahafaha’e hialy amy i fahavalon’Andrianagnahare rey. Tsy nisy tragno hiroroagne reke tamo o halegne iohoe, naho tsy tan-tragno o ampela makorely iohoe. Tan-tane o fahavalò agne reke tamy izay. Tsy nieretseretse ty haloto findesam-batagne reke. Niakatse hirike an-tragno o ampela iohoe ao reke naho fa nipetsak’ale. Nombota’e ty vavahady i tanàgney miarake amy i tokona’e roey, le nindese’e 60 kilometatse niala ty teo, tan-dengo ty vohitse raike marine i Hebrona agne. Nankasitrake ze raha natao’e zay ty Jehovah kanao nagnomey hery aze.—Mpitsara 16:1-3.
10-16 JANVIE
HARENA AMY TY SAONTSIN’ANDRIANAGNAHARE | MPITSARA 17-19
“Raty ty Voka’e Naho fa Tsy Orihegne ty Lilin’Andrianagnahare”
it Mika § 1
Mika
1. Lahilahy raike ta Efraima agne. Tsy nagnorike i lily fahavalo amy i Lily Foloy ty Mika (Ek 20:15), satria nalae’e ty volan-drene’e farantsa volafotsy 1100. Faie naho fa nirehafe’e taman-drene’e tie i reke ty nangalatse i volay sady nagneregne aze, le hoe ty rene’e: “Tsy maintsy hamasineko hoahy i Jehovah o volafotsy boake amako iohoe hoahy i anakoy, mba hanoagne sare sokitse naho hamboaragne sarevongagne. Ingo areke i volay ahereko ama’o.” Nangalan-drene’e 200 i volafotsy rey, le nimei’e ze mpanefe volafotsy zay. Le namboare i mpanefey sare sokitsey naho sarevongagney, le natao tan-tragno i Mika ao. Nanagne “tragno hoahy o andrianagnahareo” reke, le namboatse efoda naho terafima. Nimea’e fahefagne ty raike amo o ana-dahi’e reo mba ho mpisorogne. Maregne fa va’e natao’e mba hagnomeagne voninahitse i Jehovah o raha natao’e iohoe. Faie tsy fidareagne i lily mandrara ty fanompoan-tsampỳ ze raha zay (Ek 20:4-6), sady fanoagne tsinotsinogne i tragnolay masy i Jehovah-y naho ty asa o mpisoro’eo. (Mpts 17:1-6; De 12:1-14) Nalae i Mika ho an-tragno’e agne ty Jonatana tarana i Gersona ana i Mosesy, sady nikaramae’e mba ho mpisoro’e o Levita tanora iohoe. (Mpts 18:4, 30) Afa-po ty Mika, le nirehake tie: “Le vata’e inoako hinane zao fa hitahy ahy ty Jehovah.” Faie diso ze eretsere’e zay. (Mpts 17:7-13) Ankoatse izay, le tsy mete ty nanoa’e i Jonatana ho mpisorogne satria tsy tarana i Arona reke. Vao mainke nagnindra ty hadisoagne natao’e zay.—No 3:10.
it Mika § 3
Mika
Tafara kede izay ty Mika naho i lahilahy maro niarake ama’e rey, le nagneagne i Danita rey. Naho fa nitràtse iareo, le nagnontenea iareo ty Mika tie: ‘Ino agneagna’o anay io?’ Le namale ty Mika tie: “Nalae’areo i andrianagnahare namboarekoy, sady nindese’areo ka i mpisorogney, le nibiogne nareo, le ino zane ty mba ho fanagnako?” Nagnorohoro i Mika i tarana i Dana rey naho fa niavy eo tie: ‘Naho ihe mbe magnorike anay ndra manohetse anay, le atao’ay mitsapa ty kiho’o.’ Niheregne ty Mika satria trea’e tie matanjake ambone’e i Danita rey. (Mpts 18:22-26) Nitafihe o Danitao ty Laisy tafara izay sady noroa iareo. Nagnoregne tanàgne hoahy iareo teo iareo tafara izay. Natao o Danitao mpisorogne tamy iareo teo ty Jonatana naho ty ana-dahi’e, sady ‘nitamirie iareo i sare sokitse namboare i Mikay, le natao iareo hoahy iareo, tagnate ty fotoagne naha ta Silo tao i anjomba i Andrianagnahare maregney’ ndra i tragnolay masigney.—Mpts 18:27-31.
Vatosoa Ara-pagnahy
w15 15/12 10 § 6
Baiboly Mazava Soa Sady Manohigne Fo
6 Mihamaro ty porofo magnamaregne fa toko’e ho trea amy Baiboly ao ty tahinan’Andrianagnahare. Trea in-7210 o tahinagne iohoe amy ty Dikan-drehake Tontolo Vaovao naboake tamy 1984. Faie niampe enegne zay amy ty Dikan-drehake Tontolo Vaovao nihavaozegne (Angilé) tamy 2013. Ty dika izay nanjare ho 7216 ty iherekeregna o tahinagne iohoe amy izao. Amy 1 Samoela 2:25; 6:3; 10:26; 23:14, 16 ao ty dime ama’e. Ino ty anto’e nampidiragne o tahinagne iohoe ao? Tsy trea amo o andine’e rehoe i tahinagney amy Soratse Hebreo sinora o Masoretaoy, i nampiasaegne naho fa nandika ty Dikan-drehake Tontolo Vaovao tamy 1984. Faie naho fa henteagne ty Horognam-boke ty Riake Mate, le trea amo o andine’e rehoe ao i tahinagney, ie amy izao fa 1000 taogne taloha ty ahy o Masoretao ty nisia’e. Le nampidiregne amy Mpitsara 19:18 ao ka i tahinagney naho fa nidinehegne soa ty sora-tagnagne taolo.
17-23 JANVIE
HARENA AMY TY SAONTSIN’ANDRIANAGNAHARE | MPITSARA 20-21
“Ampitombò Lognandro ty Fahafantara’o i Jehovah”
Ry Androanavi-pagnahy, Tahafo ty Finehasa
Ahatreavagne izay ty tantara raike toy: Nivahora o Benjamita ta Gibea aò ty valy masay ze Levita raike zay, le nimate tamy ty fara’e. Nanapa-kevetse areke ze foko hafa tamo o Israelio eo fa hialy amo o Benjamitao. (Mpits. 20:1-11) Nivavake iareo taloha ty ho nandehana iareo hialy, faie indroe nirese iareo sady tena maro ka ty nimate tamy iareo. (Mpits. 20:14-25) Nieretseretse vao iareo tie tsy namale ty vavake nanoe iareo ty Jehovah? Tsy tea i Jehovah hovaleagne vao ty raha raty nanoe o Benjamitao?
Ry Androanavi-pagnahy, Tahafo ty Finehasa
Ino ty ianarantika boake amy izay? Tsy mete milamigne ty olagne amo o fiangonagneo eo kindraike ndra tie fa mikezake naho mivavake mateteke miomba izay aza o Androanavi-pagnahio. Toko’e hitadidy ty reha i Jesosy toy iareo amy izay: “Mangataha avao [mivavaha], le homeagne nareo, mipalia avao le hahatrea nareo, konkogno avao le hovohagne nareo.” (Lioka 11:9) Maregne fa elaela vaho mivale ty vavake ila’e. Faie matokia rehe fa hovalea i Jehovah avao i vavake nanoe’o igne amy ty fotoagne vazoho’e fa mete.
Vatosoa Ara-pagnahy
w14 1/5 11 § 4-6
Fanta’o Vao?
Akore ty nampiasagne o piletseo tie taloha?
Piletse ty nampiasae i Davida mba hamonoagne i Goliata, i lahilahy bey naho aboy. Va’e tamy i reke mbe ni-mpiarake agnondrỳ, tamy i reke mbe nikedey ty nianatse aze.—1 Samoela 17:40-50.
Ahatreavagne sare piletse ty asa tagnagne ta Ejipta naho Asiria agne taloha. Misy taly roe ty ama’e, le misy lamba ndra holitse kedekede afehe amy ty lengo i taly roe rey, manahake o tragnom-pilesio. Le amy i lambay eo ndra amy i holitsey eo ro asiagne vato boribory, manahake o voangio ty habei’e, sady va’e eo ho eo amy ty ampahefa’e ty lanja’e. Ahodikodigne i piletsey naho fa mampiasa aze, le avotsotse ty raike amy i taly rey naho fa avy eo, le mandeha amy izay i vatoy sady tsy miviombiogne.
Nahita piletse maro ta Israely agne naho amy ty magnodidigne agne o ndaty mpikaroke ty ambane tane agneo. Nampiasaegne i piletse rey tie taloha naho fa nialy. Naho nisy mpialy tena nahay nampiasa aze, le va’e eo ho eo amy 160 hatrake amy 240 kilometatse isan-dera ty falaky ty fandeha ty vato nalefa’e. Misy manam-pahaiagne ila’e mirehake tie mahavy lavitse manahake o bala folesidorio ty bala o piletseo, fa ty ila’e tsy magneke izay. Faie sambe magneke iareo iaby fa mahafate manahake o folesidorio o piletseo.—Mpitsara 20:16.
24-30 JANVIE
HARENA AMY TY SAONTSIN’ANDRIANAGNAHARE
“Manehoa Hatea Tsy Miovaova”
w16.02 14 § 5
Tahafo o Ndaty Nifandrambe Maifitse Tamy i Jehovah-o
5 Va’e ho nieretseretse ty Rota tie a Moaba agne ty rene’e naho ty longo’e, le ho afake hikarakara aze naho hagnomey ze raha paliae’e. Agne ty tanendraza’e, le fa nahazatse aze ty kolontsaigne naho ty firehake naho ty ndaty nitoboke tagne. Faie tsy hoe izay ty tamy ry Naomy agne. Nirehafe i Naomy aza reke mba hijanogne a Moaba agne avao. Ty anto’e, natahotse ty Naomy kera tsy ho afake hagnomey valy ndra tragno hoahy i vinanto’ey. Inogne areke ty hatao i Rota? Mareho fa ‘nandeha noly tamy i firene’ey agne naho amy i andrianagnahare’ey agne’ ty Orpa. (Rota 1:9-15) Faie i Rota nanapa-kevetse tie tsy hiheregne a Moaba agne naho tsy hanompo andrianagnahare diso sasa.
w16.02 14 § 6
Tahafo o Ndaty Nifandrambe Maifitse Tamy i Jehovah-o
6 Hoe fa nahafantatse miomba i Jehovah Andrianagnahare ty Rota. Va’e ho i vali’e ndra i Naomy ty nampianatse aze ty miomba i Jehovah. Hay i Rota fa tsy manahake o andrianagnahare ta Moaba agneo ty Jehovah, fa fagneva ty ho teagne naho hivavahagne. Faie tsy ampe zay. Nila nijobogne ka reke tie hanompo i Jehovah vao sa tsy hanompo aze. Nanao safidy soa ty Rota. Hoe reke tamy i Naomy: “Ty firene’o ro ho fireneko, le ty Andrianagnahare’o ro ho Andrianagnahareko.” (Rota 1:16) Tena tea i Rota ty Naomy. Faie mbe ambone ty hatea’e i Naomy ty hatea’e i Jehovah. Nideràe i Boaza ty Rota naho fa tafara tatoy, satria tambane ela i Jehovah eo reke ro nipay fitsolohagne. (Vakio ty Rota 2:12.) Va’e ana-borogne mialoke ambane elan-drene’eo varagne ty avy an-tsaintikagne ao naho fa maharey izay. Manao izay i ana-borogney, satria hai’e tie mahavita miaro aze ty rene’e. (Sal. 36:7; 91:1-4) Hoe izay ka ty Rota. Nino reke tie mahavita miaro aze ty Jehovah. Namale soa aze areke ty Jehovah, le tena tsy nanegnena’e ty safidy natao’e.
Vatosoa Ara-pagnahy
w05 1/3 27 § 2
Hevetse Miambake amy ty Boke i Rota
1:13, 21—I Jehovah vao o nahavy ty fiaigna i Naomy ho feno haoreagneo? Aha’a, sady tsy nanara an’Andrianagnahare ho nanao raha raty ty Naomy. Faie va’e i raha nahazo aze rey o nahavy aze nieretseretseo tie nanohetse aze ty Jehovah. Tena nidiso tamà reke. Tamy ze fotoagne zay ka, le nieretseretse o ndatio tie fitahiagne boake amy i Jehovah o anakeo, sady voaozogne ze tsy niterake. Tsy nanan-jafe ty Naomy, sady nimate ka i ana-dahi’e roe rey. Va’e ho nieretseretse areke ty Naomy tie rare’e ty aze naho mihevetse i Jehovah ho nanalatse aze.
31 JANVIE–6 FEVRIE
HARENA AMY TY SAONTSIN’ANDRIANAGNAHARE
“Mikezaha Hanagne Laza Soa Lognandro”
“Ampela Soa Vata’e” ty Rota
Nisoa fagnahy ty Boaza naho fa nirehake tamy i Rota, le azo antoke fa nampahery i Rota zay. Hoe ty Boaza: “Lonike abey rehe anake ho tahie i Jehovah. Fa soa ambone i tamy i voaloha’ey ze o fomba anehoa’o hasoa fagnahy feno hatea zao, satria rehe tsy nagnorike lahilahy, ndra mahantra reke ndra mpagnarivo.” (Rota 3:10) Tea i Rota ty Naomy, sady tsy mba nienga i Naomy zao reke fa niarake ama’e niheregne ta Israely agne naho nikarakara aze. Izay ty tea i Boaza horehafegne amy i tihoey “tamy i voaloha’ey.” Faie nirehake ka ty Boaza tie soa fagnahy ty Rota ‘amy izao.’ Mbe tanora ty Rota, le afake nanambaly ajalahy mbe tanora. Faie tsy nanao izay reke fa ndra aleo’e nanao soa tamy i Naomy naho amy i vali’e fa nimatey, mba hisy hinday ty agnara’e. Tsy nahagaga areke naho nanohigne ty fo i Boaza ty nahatrea tie tsy tea tegna ty Rota.
“Ampela Soa Vata’e” ty Rota
Tsy maintsy ho nahafale i Rota ty nieretseretse i reha i Boaza tihoey “tena ampela soa vata’e” reke. Azo antoke fa noho i reke nazoto nianatse ty miomba i Jehovah naho nanompo azey ro tena nahavy aze hanagne laza soa hoe izay. Soa fagnahy ty Rota sady te hagnampe i Naomy naho i longo’e rey, le nihajae’e ty fomba iareo ndra tie tsy nahazatse aze zay. Manam-pinoagne manahake i Rota tika naho tena magnaja ndaty naho ty fomba iareo. Hanagne laza soa ka tika naho manao izay.
“Ampela Soa Vata’e” ty Rota
Nivaly areke ty Boaza naho i Rota, sady ‘natao i Jehovah nanagne anake i ampelay, le niterake ana-dahy.’ Nitso-drano i Naomy ty ampela ta Betlehema tao sady nidera i Rota iareo tie soa ambone ty anake fito lahy reke. Nanjare razambey i Davida Mpanjaka o ana-dahy i Rota iohoe naho fa tafara tatoy. (Rota 4:11-22) Le i Davida indraike nanjare razambey i Jesosy Kristy.—Matio 1:1.
Vatosoa Ara-pagnahy
w05 1/3 29 § 4
Hevetse Miambake amy ty Boke i Rota
4:6—Nagnino ro va’e ho ‘nanimba’ ty lova i mpagnavotsey ty findesa’e loloha? Tsy maintsy nivily ty tane i ndaty nahantray heike aloha reke, naho navaro o ndaty iohoe ty tane’e. Faie faritagne arake ty isa ty taogne sisa hiavia i Jobilỳ ty vily i taney. (Levitikosy 25:25-27) Va’e hihegne bey areke ty fanagna i mpagnavotsey noho ze raha zay. Ty ho ana-dahy i Rota ka ty handova i tane vaho niviliegney fa tsy ty raike amy ty longo i ndaty nagnavotsey.
7-13 FEVRIE
HARENA AMY TY SAONTSIN’ANDRIANAGNAHARE | 1 SAMOELA 1-2
“Voraho amy i Jehovah ze Raha Am-po’o Ao”
ia 55 § 12
Nivorahe’e Tamy i Jehovah Iaby ze Raha Tam-po’e Tao
12 Modely ho antika iaby areke ty Hana. Tsy nisalasala nirehake tamy i Jehovah reke, sady toe izay ka ty raha risihe i Jehovah hataontikagne. Tea’e naho rehafentika ama’e iaby ze raha am-pontikagne ao, manahake ty ajaja raike mirehake amy ty baba’e tena tea’e, le matoky fa hitsanogne aze ty baba’e. (Vakio ty Salamo 62:8; 1 Tesalonianina 5:17.) Tena mampahery i reha i apostoly Petera tihoey: “Ankigno ama’e ze mampinekoneko anareo, satria mikarakara anareo reke.”—1 Pet. 5:7.
w07 15/3 16 § 4
Inogne ty Natao i Hana mba Hahavy aze Hanagne Fiadanan-tsaigne?
Inogne ty ianarantika boake amy ze raha zay iaby? Naho mirehake amy i Jehovah ty raha mampinekoneko antikagne tika, le azontikagne ampahafantaregne aze ty raha tsapantika sady azontika rehafegne ama’e ty fagniriantika. I Jehovah ro toko’e hengantikagne handamigne i raha manahiragne antikagney naho tsy misy raha azontika atao sasa. Izay ty raha tena fara izay ty soa azontika atao.—Ohabolana 3:5, 6.
Vatosoa Ara-pagnahy
w05 15/3 21 § 5
Hevetse Miambake amy ty Boke Samoela Voaloha’e
2:10—Nagnino ty Hana ro nivavake tamy i Jehovah mba “hagnomey hery i mpanjaka’ey”, ie amy izao mbe tsy nisy ndaty tinendre ho mpanjaka ty tamo o Israelio eo tamy izay? Fa nirehake mialoha ty Lalà i Mosesy tie hanagne mpanjaka o Israelitao. (Deoteronomia 17:14-18) Izao ty faminaniagne nirehafe i Jakoba, taloha kede ty nimateza’e: “Tsy hiala amy i Joda i doda-mpanjakagney [manondro ty fahefà o mpanjakao].” (Genesisy 49:10) Hoe ka ty Jehovah tamy i Saraha, razambey o Israelitao: “Hisy mpanjaka o firenenao iaby ty boake ama’e.” (Genesisy 17:16) Nivavake hoahy ze hanjare mpanjaka areke ty Hana.
14-20 FEVRIE
HARENA AMY TY SAONTSIN’ANDRIANAGNAHARE | 1 SAMOELA 3-5
“Sarobily amy i Jehovah Tikagne”
Mahery Fara Tampo’e Faie Soa Fagnahy
3 Mbe nikede ty Samoela le fa ‘nanompo i Jehovah’ tamy i tragnolay masigney tao. (1 Sam. 3:1) Naharey feo nitoka ty agnara’e reke tie indraike tamy i reke niroroy. (Vakio ty 1 Samoela 3:2-10.) Nihevetse ty Samoela tie i Ely Mpisorom-bey o nitoka azeo, hafara’e le avy le nilay mbama’e mbeo reke. Hoe ty Samoela: “Intoan-ndraho fa nitoka ahy rehe.” Faie nirehake ty Ely tie tsy nitoka aze reke. Mbe nisy hoe izay indroe tafara izay, le tamy izay vaho nihay i Ely tie i Jehovah o nitoka i Samoelao. Natoro i Ely aze areke ze toko’e havale’e naho mbe mitoka aze indraike i feoy, le norihe i Samoela zay. Azo i Jehovah natao ty le avy le nisaontsy tamy i Samoela tie i Reke o mitoka azeo. Faie nagnino reke ro tsy nanao izay? Tsy rehafe ty Baiboly ty anto’e. Faie hitantika amy ty tohy i tantaray fa tena lahibey tamy i Jehovah ty fihetseham-po i Samoela, le izay ty va’e nahavy aze tsy le avy le nampahafantatse i Samoela.
Mahery Fara Tampo’e Faie Soa Fagnahy
4 Vakio ty 1 Samoela 3:11-18. Rehafe ty Lalà i Jehovah fa toko’e hagnaja o ndaty beio ty ajaja, lohotsie naho managne andraikitse i ndaty beỳ. (Eks. 22:28; Lev. 19:32) Dineho heike areke zao: Ho vita i Samoela vao ty handeha amy i Ely mbeo maraindray, ie amy izao lilim-pitsaragne ty horehafe’e ama’e? Rehafe ty Baiboly tie “natahotse ty hirehake tamy i Ely” ze raha niseho ty Samoela. Faie natao i Jehovah nazava soa tamy i Ely tie i Reke o nitoka i Samoelao. Hoe areke ty Ely tama’e: ‘Ko misy aetake amako ze raha nisaontsie’e tama’o.’ Nankatò ty Samoela, le nambara’e i Ely iaby ‘ze kila raha.’
Vatosoa Ara-pagnahy
w05 15/3 21 § 6
Hevetse Miambake amy ty Boke Samoela Voaloha’e
3:3—Tena tamy i Masigne Vata’ey tao vao ty niroroa i Samoela? Aha’a. Levita tsy mpisorogne, Kehatita ty baba’e. (1 Tantara 6:18-23) Tsy azo’e natao areke ty ‘nizilike mba hagnente i raha masigne rey.’ (Nomery 4:17-20) Ty amy ty kiririsa i tragnolay masigney avao ro azo i Samoela nandehanagne tamy i toeragne masigney tao. Tsy maintsy ho tao reke ro niroro. Hoe niroro tamy i kiririsa i tragnolay tao ka ty Ely. Mazava areke fa ty rehake tihoe ‘tamy i nisy vata masin’Andrianagnaharey ao’, le manondro i tragnolaỳ amy ty ankapobei’e.
21-27 FEVRIE
HARENA AMY TY SAONTSIN’ANDRIANAGNAHARE
“Ia ty Mpanjakantikagne?”
it “Fanjakan’Andriamanitra”: “Nangataka mpanjaka olombelona” § 1
Fanjakàn’Andrianagnahare
Nangatake ndaty ho mpanjaka: Nangatake ndaty ho mpanjaka mba hitarike iareo o Israelitao, 400 taogne teo ho eo tafara ty nialà iareo boake i Ejipta agne, sady 800 taogne mahery ka tafara ty nanoan’Andrianagnahare fifagnekeagne tamy i Abrahama. Amy izay iareo, tasa iareo, mba mitovy amo o firenena hafao. Faie nidika zay tie niliere iareo tsy ho mpanjaka iareo ty Jehovah. (1Sa 8:4-8) Ara-dalàna aloha naho nitamà iareo tie hagnoregne fanjakagne ty Andrianagnahare, satria toe fa nampitamà izay tamy i Abrahama naho i Jakoba reke, arake i nirehafegne taloha tagney. Faie nisy anto’e hafa ka nahavy iareo nitamà izay. Teo ohatse i faminania i Jakoba miomba i Joday (Ge 49:8-10), i saontsy i Jehovah tamo o Israelitao tafara ty nialà iareo ta Ejipta agney (Ek 19:3-6), ty fifagnekea i Lalànay (De 17:14, 15), ndra ty ampaha’e amy i hafan’Andrianagnahare nampisaontsie’e i Balama mpaminanỳ (No 24:2-7, 17). Nirehake miomba o fanantenagne iohoe ka ty Hana rene i Samoela tamy ty vavake raike natao’e. (1Sa 2:7-10) Faie tsy tena nabaribary i Jehovah “i raha mietake masigne” miomba i Fanjakagneỳ, sady tsy nambara’e ty fotoagne fa tinondro’e hananganagne aze, naho tihoe akore ty ho firafi’e vaho tihoe ia ty ho mpitondra ao. Tsy nisaontsie’e ka tie ho an-tane eto ndra ho an-dagnitse agne o fanjakagne iohoe. Nanao raha tsy anagna iareo fahefagne areke o Israelitao naho fa nangatake ndaty mba ho mpanjaka iareo.
Tsy Nivalike Reke Ndra tie Nidiso Tamà Aza
Izao ty navale i Jehovah i Samoela naho fa nivavake miomba izay reke: “Tsanogno ze raha rehafe i vahoakey ama’o, satria tsy raha i rehe liere iareò, fa i raho o liere iareo tsy ho mpanjaka iareò.” Nampahery i Samoela zay. Faie nitrea tamy ty raha natao i vahoakey ka fa tena niteratera i Andrianagnahare Mahery Fara Tampo’ey iareo. Nampitaoe i Jehovah tamy ty alala i Samoela areke iareo tie hovilie iareo lafo ty fangataha iareo ndaty mba ho mpanjaka iareo. Le nirehafe i Samoela tamy iareo ze hafatse zay, faie hoe iareo: “Aha’a, ndra aleo’ay avao hisy mpanjaka hifehe anay.” Nankatò an’Andrianagnahare’e areke ty Samoela, le nihosora’e ho mpanjaka i ndaty tinendre i Jehovah-y.—1 Samoela 8:7-19.
Ty Fitondrà i Jehovah ro Fara’e Soa
9 Trea amy ty raha nisy amparake izay fa maregne ty raha nisaontsie i Jehovah. Nanjare nisy olagne lahibey ty tamo o Israelio eo, lohotsie naho fa tsy nankatò an’Andrianagnahare i mpanjakay. O Israelitao aza nanagne olagne naho fa nanagne mpanjaka ndaty, somandrake fa ty firenena hafa? Tsy ninday vokatsoa maharetse ty fitondrà o ndaty tsy mahafantatse i Jehovah-o. Maregne fa misy mpitondra mangatake aman’Andrianagnahare mba hagnampe aze hampisy fiadanagne naho filaminagne. Faie akore moa ty hitahian’Andrianagnahare aze, iareo aza tsy magneke ty fitondrà’e?—Sal. 2:10-12.
Vatosoa Ara-pagnahy
w02 1/4 12 § 13
Nagnino Tika ro Toko’e Hatao Badisa?
13 Tsy maintsy miova tanterake heike tika vaho izay azo atao badisa ho Vavolombelo i Jehovah. An-tsitrapo ty anoagne o fiovagne iohoe, fa tsy teregne. Naho fa tapa-kevetse amy ty fo’e ty hanonjohy ty lia i Kristy ty ndaty raike ro manao aze. Isintaha’e ty findesam-batagne raty natao’e taloha, sady tapa-kevetse reke ty hanao ze soa agnatrehan’Andrianagnahare eo. Misy hevetse tihoe miova ndra miheregne ty rehake hebreo naho grike mifandrambe amy tihoe fiovagne tanterake, amy Soratse Masigne ao. Midika io tie misintake amy ty raha raty natao, le mitolike aman’Andrianagnahare. (1 Mpanjaka 8:33, 34) O fiovagne iohoe, le mitake ty ‘hampisehoagne ty fibebahagne amy ty atao.’ (Asan’ny Apostoly 26:20) Také o fiovagne iohoe ty hisintahantikagne amy ty fivavahan-diso naho ty hagnorihantika ty lilin’Andrianagnahare vaho hipitehantikagne amy i Jehovah raike avao. (Deoteronomia 30:2, 8-10; 1 Samoela 7:3) Miova ka ty fomba fisaignagne naho ty tanjogne vaho ty toetsentikagne. (Ezekiela 18:31) “Miheregne” tika naho fa ovantikagne ho toetse vaovao i toetse ratintika taloha rey.—Asan’ny Apostoly 3:19; Efesianina 4:20-24; Kolosianina 3:5-14.
28 FEVRIE–6 MARSA
HARENA AMY TY SAONTSIN’ANDRIANAGNAHARE | 1 SAMOELA 9-11
“Niambane ty Saoly Tamy ty Voaloha’e”
Miambane vao Rehe Naho fa Miharo Lia Aman’Andrianagnahare?
11 Dineho ohatse ty raha nanjò i Saoly Mpanjaka. Tena niambane reke tamy i reke mbe nitanoray. Nitaka’e fa voafetra avao ty raha vita’e, le nisy fotoagne reke nieretseretse tie tsy fagneva ty hanao ty andraikitse lahibey nimeigne aze. (1 Sam. 9:21; 10:20-22) Faie tafara kede ty naha mpanjaka aze, le nanjare nirehareha reke sady nanao raha tsy nanagna’e fahefagne. Nasae i Jehovah nandigne i Samoela mpaminany ty Saoly tie indraike satria i Samoela ty hanolotse sorogne hoahy i Jehovah. Faie tsy nahalìgne ty niavia i Samoela reke fa le avy le nanolotse sorogne ndra tie tsy nanagne fahefagne hanao izay aza. Trea tie tsy niambane reke sady tsy natoky tie hanao raha hoahy ty vahoa’e ty Jehovah. Ty voka’e, tsy nankasitraha i Jehovah reke sady tsy neké’e ho mpanjaka sasa. (1 Sam. 13:8-14) Hendre areke tika naho mitao mba tsy hanahake i Saoly, le tsy manao ty raha tsy anagnantikagne fahefagne.
w14 15/3 9 § 8
Inogne ty Hagnampe Antika Hahafoe Tegna Avao?
8 Anatse ho antika ty raha nanjò i Saoly Mpanjaka. Hita tamy ty fiaigna’e fa va’e tsy hahafoe tegna sasa tika naho tea tegna. Niambane reke tamy i reke vaho nanjare mpanjakay. (1 Sam. 9:21) Tsy nimete nanaze o Israelita nanao tsinotsinogne ty fahefa’e reo ohatse reke, ndra tie nanagne zo hiaro ty fahefagne nimein’Andrianagnahare aze aza. (1 Sam. 10:27) Nagneke hotarihe ty fagnahy masin’Andrianagnahare ka reke, le nitarike o Israelitao hialy tamo o Amonitao sady nandrese iareo. Nagnomey voninahitse i Jehovah reke noho i fandreseagney, le trea tie niambane vata’e.—1 Sam. 11:6, 11-13.
w95 15/12 10 § 1
O Amonitao—Vahoake Raike Namale Fankalaignagne ty Hasoa Fagnahy Naseho Tama’e
Nivalea o Amonitao fankalaignagne indraike ty hasoa fagnahy naseho i Jehovah tamy iareo tamy izay. Tsy natao i Jehovah sare tsy vazoho’e ze fagnorohoroagne feno habibiagne natao iareo zay. ‘Nipoke tamy i Saoly ty fagnahin’Andrianagnahare, le nirehetse mafe ty haboseha i Saoly, naho vaho naharey ze reha i Nahasy zay reke.’ Nitarihe ty fagnahy masin’Andrianagnahare ty Saoly, le namory tafike nisy lahilahy mpialy 330000. Ireo ty namono naho nampiparitake o Amonitao. Nilay iareo, le “tsy nisy tamy iareo niharo lia ndra roe avao aza.”—1 Samoela 11:6, 11.
Vatosoa Ara-pagnahy
w05 15/3 22 § 8
Hevetse Miambake amy ty Boke Samoela Voaloha’e
9:9—Nagnino ro tena ilaegne ty rehake tihoe ‘mpahita ty nitokavagne o mpaminanio tie taloha’? Va’e hidika zay tie sinolo ty rehake tihoe “mpaminany” ty rehake tihoe “mpahita.” Ty anto’e, nanjare nisongadigne o mpaminanio tamy ty andro i Samoela naho tagnate ty fotoagne nisia ty mpanjaka tamo o Israelio eo. Va’e ho i Samoela ty voaloha’e tamo o mpaminany nifandimbeo.—Asan’ny Apostoly 3:24.