Loharanon-kevetse amy ty Tari-dalagne Hoahy ty Fiaignantika Naho ty Fanompoagne
2-8 MEY
HARENA AMY TY SAONTSIN’ANDRIANAGNAHARE | 1 SAMOELA 27-29
“Ty Fomba Fialy i Davida”
it “Akisy” § 2
Akisy
Indroe ty Davida ro nialokaloke tamy i Akisy Mpanjaka agne, tamy ireke nilay i Saolỳ. Somare nanao minegne reke tamy ty voaloha’e, satria natahoragne ho fahavalo. Tsy tsinepa i Akisy areke reke, satria nieretserete o ndatio ho minegne le tsy natahora’e. (1Sa 21:10-15; Sl 34:t.m.; 56:t.m.) Niarake tamy i maramila 600 reketse ty keleia’ey ty Davida, tamy ireke niavy tagne fagnindroe’ey. Nimey i Akisy iareo areke ty Ziklaga mba hipetraha’e. Nieretseretse ty Akisy fa nanafike tanàgne jodiana iareo, tagnate ty tao’e raike naho efa-bolagne nipetraha iareo tagne. Faie o Gesoritao naho o Girzitao vaho o Amalekitao ty tena rinava i Davida. (1Sa 27:1-12) Tena natoky i Davida ty Akisy, le natao’e mpiaro aze reke, naho fa niomagne hanafike i Saoly Mpanjaka o Filistinao. Fa handeha hialy iareo ro nandefa i Davida naho i maramila’e rey hiheregne ta Ziklaga agne ty Akisy, naho fa sinere o “roandria” o Filistinao. (1Sa 28:2; 29:1-11) Tsy vinono ty Akisy naho fa nanjare mpanjaka sady nialy tamy i Gata ty Davida. Mbe velogne reke tamy ty andro i Solomona Mpanjaka.—1Mp 2:39-41; henteo GATA.
Ry Rahalahy Tanora, Anò ze Hahavy Azo Hatokisa o Ndatio
8 Nisy olagne hafa ka natrehe i Davida. Naho fa tinendre ho mpanjaka ohatse reke, le nila nandigne tagnate ty taogne maro hey vaho izay nanomboke nanjaka ta Joda tao. (1 Sam. 16:13; 2 Sam. 2:3, 4) Ino ty nagnampe aze hanam-paharetagne tagnate ze fotoagne zay? Ndra aleo’e nifantoke tamy ze raha niazo’e natao ta tie ho kivy eo avao. Naho fa nilay tamo o faritane o Filistinao agne ohatse reke, le nihararaote’e o fotoagne iohoe mba hialiagne tamy i fahavalo o Israelitao rey. Niaro ty sisi-tane i Joda ty fanoa’e izay.—1 Sam. 27:1-12.
it “Lainga” § 7
Vande
Misy ndaty misatry raha mavande mba hahavoa ty hafa. Tena rarà ty Baiboly ze raha zay. Faie tsy midika zay tie tsy maintsy mirehake ty maregne amy ty ndaty tsy toko’e hahafantatse izay tikagne. Hoe ty Jesosy Kristy: “Ko meagne o amboao o raha masigneo sady ko atorake amo o lambò agne i perla ama’areo agney, tsy noho ho lialia’e avao le ndra inareo ka ro hifotera’e le ho riridririte’e.” (Mt 7:6) Izay ty nahavy i Jesosy tsy nirehake ze kila raha ndra tsy namale mivantagne ty fagnonteneagne ila’e kindraike, naho ohatse hisy voka-drati’e zay. (Mt 15:1-6; 21:23-27; Jn 7:3-10) Nanao hoe izay tamy ty ndaty tsy nanompo i Jehovah ka ty Abrahama, Isaka, i Rahaba naho i Elisa. Natao iareo ty hahavy i ndaty rey ho diso hevetse, ndra tsy nirehake tamy iareo ty maregne iaby iareo.—Ge 12:10-19; toko 20; 26:1-10; Js 2:1-6; Jk 2:25; 2Mp 6:11-23.
Vatosoa Ara-pagnahy
Afake Mitahy o Ndaty Velogneo vao ty Mate?
Dineho soa moa! Rehafe ty Baiboly fa “miheregne amo o taneo” o ndatio naho fa mate, sady “foagne ty eretsere’e.” (Salamo 146:4) Sambe nahafantatse ka ty Saoly naho i Samoela fa tsy tean’Andrianagnahare hagnatogne o mpamoha angatseo ty mpanompo’e. Taloha aza ty Saoly fa namonovono o mpamoha angatseo.—Levitikosy 19:31.
Eretsereto areke zao: Naho nanjare fagnahy vata’e ty Samoela mpaminany, le handika ty lalàn’Andrianagnahare vao reke, sady hagneke ho tokave o mpamoha angatseo mba hifampirehake amy i Saoly? I Jehovah ka fa tsy nimete nisaontsy tamy i Saoly. Ireke vao le hagneke ho seré o mpamoha angatseo hagnirake i Samoela hirehake amy i Saoly, ie amy izao reke Andrianagnahare Tena Mahery? Aha’a. Tsy i “Samoela” mpaminany areke i angatse nisehoy, fa demonia. Natao’e ty hahavy aze hanahake i Samoela.
9-15 MEY
HARENA AMY TY SAONTSIN’ANDRIANAGNAHARE | 1 Samoela 30-31
“Miantehera amy i Jehovah Andrianagnahare’o”
w06 1/8 28 § 12
Matahora i Jehovah le ho Sambatse Rehe!
12 Tsy vita tihoe nikalagne i Davida tsy hanao raty avao ty tahotse i Jehovah. Nampahery aze ka zay, mba handrambesa’e fanapahan-kevetse hentetse naho am-pahendreagne naho fa tendreke raha sarotse. Nilay i Saoly ta Ziklaga agne, tanà o Filistinao ty Davida naho i nama’e rey, tagnate ty tao’e raike naho efa-bolagne. (1 Samoela 27:5-7) Nisy fotoagne, nitafihe ty malaso amalekita i tanàgney naho fa tsy tao ze lahilahy tamy i tanàgney. Noroa iareo i tanàgney, sady nente’e ho ndevo iaby ze ajaja aman’ampela vaho ze biby haregne tao. Naho fa niheregne nahatrea izay ty Davida naho i lahilahy niarake tama’e rey le nitagny. Faie tsy ela tafara izay le nivalike ho habosehagne ty alahelo o lahilahy rehoe, le nite-hitora-bato i Davida iareo. Nalahelo ty Davida tamy izay, faie tsy namoe fo. (Ohabolana 24:10) Nipay fagnampeagne tamy i Jehovah reke satria natahotse aze. “Niantehetse tamy i Jehovah” reke. Nitrà i Davida naho i nama’e rey i Amalekita rey, noho ty fagnampean’Andrianagnahare, sady niazo indraike ze raha nandese iareo ho ndevo.—1 Samoela 30:1-20.
w12 15/4 30 § 14
Arova i Jehovah Tikagne mba ho Voavonje
14 Niatreke olagne maro nampijale aze ty Davida. (1 Sam. 30:3-6) Rehafe ty Baiboly fa fohy i Jehovah ty fihetseham-po’e tamy i fotoagne rey. (Vakio ty Salamo 34:18; 56:8.) Fohy i Jehovah soa ka ty fihetseham-pontikagne. Mampahery antikagne ty mahafantatse fa fanta’e tikagne naho fa “torotoro fo” ndra “kivy.” Nampahery i Davida zay, arake ty nirehafe’e tihoe: “Tena ho fale raho noho irehe bey hatea naho tsy mivalike, satria vazoho’o ty fijaleako. Fanta’o ty fijaleagne mafe manjò ahy.” (Sal. 31:7) Tsy tihoe mahavazoho ty fijaleantikagne avao ty Jehovah, fa mampahery antikagne ka. Fomba raike anoa’e izay o fivoriagneo.
Vatosoa Ara-pagnahy
w05 15/3 24 § 8
Hevetse Miambake amy ty Boke i Samoela voaloha’e
30:23, 24. Mioregne amy ty Nomery 31:27 o fanapahan-kevetse iohoe, sady mampiseho fa ankasitraha i Jehovah ze magnampe amo o fiangonagneo eo. Ndra ino ndra ino ataontikagne, le lonike ‘hanoegne amy ty fo hoe hoahy i Jehovah fa tsy ho an’o ndaty.’—Kolosianina 3:23.
16-22 MEY
HARENA AMY TY SAONTSIN’ANDRIANAGNAHARE | 2 SAMOELA 1-3
“Ino ty Lesogne Boake amy i Hira Tihoey i ‘Folesidoroy’?”
w00 15/6 13 § 9
Hajao ze Nimea i Jehovah Fahefagne
9 Nalahelo vao ty Davida naho fa nientegne tamy ty fomba raty? “Misy ndaty tsy mitsitsy te hamono ahy”, izay ty nitaraigne i Davida tamy i Jehovah. (Salamo 54:3) Nivorahe’e tamy i Jehovah ty fihetseham-po’e naho fa nirehake reke tie: “O Andrianagnahareko, rombaho amo o fahavalokò raho, ... O Jehovah, manafike ahy o lahilahy maherio, ie amy izao raho tsy mba nigoreve ndra nanota.” (Salamo 59:1-4) Mba fa nahatsapa raha hoe izay ka vao rehe? Tsy nanao raha raty tamy ty ndaty raike managne fahefagne vao rehe, ie amy izao reke te hialy ama’o avao? Nihajae i Davida lognandro ty Saoly. Tsy mba nifale ty Davida naho fa nimate ty Saoly, fa nanao ze o hira fisaognagne zao: “Teagne naho mahafinaritse ty Saoly naho i Jonatana tamy iareo mbe nivelogney, ... Mandikoatse o voromaherio ty falaky ty lia iareo, sady mahery noho o lionao.” (2 Samoela 1:23, 24) Ohatse tena fanjaka amy ty fagnajagne o ndaty nimea i Jehovah fahefagneo zay, ndra tie te hagnisy raty i Davida aza ty Saoly!
w12 15/4 10 § 8
Famantaragne ty Andro Fara’e Tihoe Ndaty Maro Hivalike
8 Misy tantara o ndaty maro tsy nivalike ka ty amy Baiboly ao. Handineke ty roe amy izay tikagne. Ty tantara ty lahilahy raike tsy nivalike tamy i Davida ro henteantikagne voaloha’e. Tsy ia zay fa i Jonatana, voalohan’ana i Saoly Mpanjaka. Ireke ty toko’e handimbe i baba’e faie i Davida ty finily i Jehovah ho mpanjaka. Faie tsy nialogne reke, fa nagnaja ty safidy i Jehovah. Nanjare “nifandrambe am-po tamy i Davida” reke, le nifanta fa tsy hivalike ama’e. Nimea’e i Davida iaby aza ty akanjo’e, i mesa’ey, i folesidoro’ey, vaho i sentira’ey mba ho fognomezam-boninahitse aze manahake o mpanjakao. (1 Sam. 20:30-34; 23:16, 17) Tsy mahagaga areke naho nanao hira fisaognagne ty Davida naho fa nimate ty Jonatana, mba hampisehoa’e fa tea naho nalahelo o ana i mpanjakay iohoe reke.—2 Sam. 1:17, 26.
Vatosoa Ara-pagnahy
it “Rahalahy, Anadahy” § 3
Mpirahalahy
Atao tihoe ‘mpirahalahy’ ty ndaty mitovy tanjogne naho raha safiriegne. Nitokave i Solomona Mpanjaka tihoe rahalahy ohatse ty Hirama mpanjaka i Tyro, satria sambe ndaty ambone iareo sady sambe mpanjaka. Faie va’e tsy izay avao fa va’e iareo sambe te hamory ze raha ilaegne hagnamboaragne i tempolỳ, ndra hatae zay ndra raha hafa. (1Mp 9:13; 5:1-12) Hoe ty Davida: “Fanjaka sady mahafinaritse naho fa ty mpirahalahy ro miara-monegne vaho miharo saigne!” (Sl 133:1) Trea boake amy izay fa tsy ty lio iharoagne avao ty mahavy ty mpirahalahy troke raike hilongo naho hiharo saigne. Nitokave i Davida tihoe rahalahy ohatse ty Jonatana, satria nifankatea naho nifagnampe iareo fa tsy tihoe mpilongo marine. (2Sa 1:26) Mete soa naho tokavegne tihoe mpirahalahy ty mpinamagne mitovy toetse, ndra tie raty aza ze toetse zay.—Oh 18:9.
23-29 MEY
HARENA AMY TY SAONTSIN’ANDRIANAGNAHARE | 2 SAMOELA 4-6
“Mikezaha Hatahotse ty Tsy Hampifale i Jehovah”
w05 5/15 17 § 7
Hevetse Miambake amy ty Boke Samoela Faharoe
6:1-7. Tsy nagnorike ty lilin’Andrianagnahare ty Davida naho fa ninday i Vatay tamy i saretey. Noho ze raha zay, le tsy nitomobagne ty raha natao’e ndra tie nanagne fikasagne soa aza reke. (Eksodosy 25:13, 14; Nomery 4:15, 19; 7:7-9) Ndra tie managne fikasagne soa tikagne, le tsy mampiova ty raha taken’Andrianagnahare zay. Trea zay tamy i Oza nandrombake i Vataỳ.
w05 1/2 27 § 20
Manao ty Rare’e Lognandro ty Jehovah
20 Tadidio fa toko’e ho nahafantatse o Lalànao ty Oza. Porofo ty fagnatreha i Jehovah i Vata ty fifagnekeagney. Rehafegne mazava amy i Lalànay ao fa ze ndaty mahazo alalagne avao ro afake mikasike io, sady ho mate ze mandika izay. (Nomery 4:18-20; 7:89) Tsy toko’e ho natao arake ze iteavagne aze areke ty famindragne o Vata masigne iohoe. Levita ty Oza, ndra tie tsy mpisorogne aza reke, le toko’e ho nahafantatse soa i Lalànay. Nafindra naho narovagne tan-tragno i baba’e tao ka i Vatay, taogne maromaro taloha izay. (1 Samoela 6:20–7:1) Najanogne tao tagnate ty 70 taogne teo ho eo io, amparake ty niavia ty fotoagne namindra i Davida aze. Ty dika izay, fa nahafantatse ty lalàna miomba i Vatay ty Oza nanomboke tamy ty naha kedekede aze.
w05 1/2 27 § 21
Manao ty Rare’e Lognandro ty Jehovah
21 Treantikagne taloha teo fa mahay mamantatse ty am-po o ndatio ao ty Jehovah. Rehafegne amy ty Saontsi’e ao fa nanao ‘hadisoagne’ ty Oza. Va’e fa nivoamare i Jehovah varagne fa nisy hatea tegna ty tagnate’e tao, ndra tie tsy voatantara aza zay. Niseho ho hendre vao ty Oza, le tsy tea nankatò? (Ohabolana 11:2) Sa nanjare nibohaboha reke, satria nitarike i Vatay tagnatreha ty maro eo, i narova ty keleia’e tan-tragno’e tagney? (Ohabolana 8:13) Tsy nanam-pinoagne vao reke, le nieretseretse tie tsy hahavita hiaro i Vata masigne porofo ty fagnatreha’ey ty Jehovah? Ndra inogn’ino anto’e, le afake matoky tikagne fa nanao ty rare’e ty Jehovah. Azo antoke fa nahavazoho ty raha tsy nimete tam-po i Oza tao reke, kanao le avy le namono aze.—Ohabolana 21:2.
Vatosoa Ara-pagnahy
w96 1/4 29 § 1
Apetraho amy i Jehovah Lognandro ze Magnavesatse Azo
Amy ty maha mpanjaka i Davida, le misy andraikitse toko’e hatao’e. Trea amy ty fihetse’e fa ndra o managne fifandrambesagne soa amy i Jehovah-o aza va’e tsy hahay hiatreke tsapa hevetse. Tamy ty voaloha’e, le niboseke ty Davida. Naho fa niavy eo reke nanjare natahotse. (2 Samoela 6:8, 9) Nitsapa ty fatokisa’e i Jehovah zay. Teto reke, le tsy nametrake ty raha magnavesatse aze tamy i Jehovah sady tsy nagnorike ty lili’e. Va’e hanao hoe izay ka vao tikagne kindraike? Fa nagnomey tsiny i Jehovah vao tikagne noho ty raha manahiragne nanjò antikagne amy ty tsy fidareagne ty toromareke nimei’e?—Ohabolana 19:3.
30 MEY–5 JONA
HARENA AMY TY SAONTSIN’ANDRIANAGNAHARE | 2 SAMOELA 7-8
“Nanao Fifagnekeagne Tamy i Davida ty Jehovah”
“Haharetse Nainai’e ty Fanjaka’o”
Nanohigne ty arofo i Jehovah ze fagniria i Davida zay. Noho ty hatea i Davida an’Andrianagnahare naho i faminaniagne nirehafegne taloha teoy, le nanao fifagnekeagne tama’e ty Andrianagnahare tie hanjaka nainai’e ty raike amy ty tarana’e. Hoe reke tamy ty alala i Natana: “Haharetse nainai’e ty tarana’o naho ty fanjaka’o. Sady ho mafe oregne nainai’e i sezan-droandria’oy.” (Andine’e 16) Ia areke o rehafegne amy i fifagnekeagne iohoe tie hanjaka nainai’e?—Salamo 89:20, 29, 34-36.
“Haharetse Nainai’e ty Fanjaka’o”
Tarana i Davida ty Jesosy boake a Nazareta agne. Hoe i anjely raikey naho fa nampahafantatse ty hiterahagne aze: “I Jehovah Andrianagnahare ty hagnomey aze ty sezan-droandria i Davida rae’e. Sady tena tsy hifaragna’e i Fanjakà’ey.” (Lioka 1:32, 33) Tanterake tamy i Jesosy areke i fifagnekeagne nataon’Andrianagnahare tamy i Daviday. Tsy safidy o ndaty ty nahavy aze ho mpitondra fa noho ty fampitamàn’Andrianagnahare. Naho izay areke, le managne zo hinday nainai’e reke. Tadidio fa tanterake avao ze raha ampitamàen’Andrianagnahare.—Isaia 55:10, 11.
w14 15/10 10 § 14
Anò Mafe Oregne ty Finoa’o i Fanjakagney
14 Dineho ty raha nampitamae i Jehovah i Davida mpanjaka o Israelio, amy i fifagnekeagne tamy i Daviday. (Vakio ty 2 Samoela 7:12, 16.) Tamy i Davida nanjaka ta Jerosalema taoy ty Jehovah ro nanao o fifagnekeagne iohoe. Nampitamà reke tamy izay fa ho boake amy ty tarana i Davida ty Mesia, le nanjare nibaribary tie ia ty hiboaha i taranakey. (Lioka 1:30-33) Nisaontsie i Jehovah fa ‘hanan-jò ara-dalàna’ ho Mpanjaka i Fanjakà i Mesia ty raike amy ty tarana i Davida. (Ezek. 21:25-27) I Jesosy o tarana’e iohoe. “Haharetse nainai’e” reke sady ‘haharetse manahake o masoandrò ty sezan-droandria’e.’ Naho izay areke, le “ho mafe oregne agnate ty fotoagne tsy misy fara’e” ty fanjaka i Davida. (Sal. 89:34-37) Tsy ombia hanjare ho raty areke ty fitondra i Mesia, sady haharetse nainai’e ty soa hindese’e.
Vatosoa Ara-pagnahy
it “Andro Farany”: “Faminanian’i Balama” § 1
Andro Fara’e
Faminania i Balama. Hoe ty Balama mpaminany tamy i Balaka mpanjaka i Moaba, taloha ty nidira o Israelitao tamy i Tane Nampitamaegney tao: “Avia areke fa horehafeko ama’o ze hatao o firenena [Israely] iohoe tamy i firene’oy afara agne. ... Hisy kintagne hiboake boake amy i Jakoba, sady hisy dodam-panjakagne hiboake boake amy Israely. Tena hovakie’e ty handry i Moaba, naho ty harakan-doha o anake mpiarotegneo iaby.” (No 24:14-17) I Davida mpanjaka i “kintagney”, satria nirese’e o Moabitao. (2Sa 8:2) Nanomboke areke i “afara agney” naho fa nanjare mpanjaka ty Davida. Faie mifagnitsy amy i Davida i Mesia Mpanjakay, le ho tanterake amy i Jesosy o faminaniagne iohoe naho fa handrese i fahavalo’ey reke.—Is 9:7; Sl 2:8, 9.
6-12 JONA
HARENA AMY TY SAONTSIN’ANDRIANAGNAHARE | 2 SAMOELA 9-10
“Natoro i Davida fa Nanagne Hatea Tsy Miovaova Reke”
w06 15/6 14 § 6
Afake ty ho Sambatse Rehe
Hoe ka ty Davida: “Sambatse ze mikarakara o madinekeo; satria hamonje aze amy ty fotoan-tsarotse ty Jehovah. Hiaro aze naho handrombake ty fiai’e ty Jehovah. Horehafegne tie sambatse” reke. (Salamo 41:1, 2) Nikarakara aman-katea i Mefiboseta manan-kandra, ana i Jonatana ty Davida. Agnisa ty fomba tena soa indesagne o ndaty madinekeo zay.—2 Samoela 9:1-13.
w05 15/5 17 § 12
Hevetse Miambake amy ty Boke Samoela Faharoe
9:1, 6, 7. Nagnatanterake ty raha nampitamae’e ty Davida. Toko’e hikezake hagnatanterake ty raha nampitamaentikagne ka tika.
w02 15/2 14 § 10
Niaretse Fatike Tamy ty Nofo’e Iareo
10 Nikarakara i Mefiboseta ty Davida Mpanjaka, taogne tsiampeampe tafara tatoy, noho ty hatea’e i Jonatana. Ze tane i Saoly iaby le nimea’e i Mefiboseta, sady tinendre’e hikarakara o tane iohoe ty Ziba, mpanompo i Saoly. Nirehake hoe izao tamy i Mefiboseta ka ty Davida: “Hihinagne an-databako eo lognandro rehe.” (2 Samoela 9:6-10) Azo antoke fa sady nampionogne i Mefiboseta i fikarakara i Davida aze ro nagnamaivagne ty haoreagne nanjò aze noho i handra’ey. Lesogne tena fanjaka zay! Toko’e ho soa fagnahy amy ty ndaty miaretse fatike amy ty nofo’e ka tikagne.
Vatosoa Ara-pagnahy
it “Volombava” § 2
Volombava
Tea nagnisy volombava o Israelitao naho ty ndaty maro hafa Tantignanagne agne taloha, satria izay ty porofo fa nanagne ty naha ie aze ty lahilahy raike. Tsy azo o Israelitao nihitsifegne bory loatse ty ‘volombava iareoy.’ (Le 19:27; 21:5) Fomba ty mpanompo sampy ila’e zay.
13-19 JONA
HARENA AMY TY SAONTSIN’ANDRIANAGNAHARE | 2 SAMOELA 11-12
“Ko Engagne Hifehe Azo o Fagnirian-dratio”
Mitaoa mba Tsy ho Voafandry i Satana
10 Maro ty raha nimey i Jehovah i Davida Mpanjaka, agnisa izay ty harena, voninahitse naho ty fandresea’e o fahavalo’eo. Tena nankasitrake i Jehovah reke noho irey, le nirehake tie “lako loatse” ty fagnomezagne nimein’Andrianagnahare sady “tsy hay iahegne.” (Sal. 40:5) Faie nanjare nanagne fagniriagne tsy mete afa-po ty Davida, le nagniry raha hafa ankoatse i raha fa nimey i Jehovah aze rey. Ndra tie fa nanagne valy maro aza ty Davida, le mbe nagniry hila i Batseba, i valy i Oria Hetitay avao reke. Nengà’e hitombo tam-po’e tao avao ze fagnirian-drati’e zay. Ty voka’e, nilae’e ty Batseba le nivesatse. Tena raty ze raha natao i Davida zay, faie mbe nanao raha raty ambone izay reke satria natao’e ze hahafate i Oria. (2 Sam. 11:2-15) Faie ino ty raha tan-tsay i Davida tao? Nieretseretse vao reke tie tsy vazoho i Jehovah ty raha natao’e? Ndra tie fa nanompo i Jehovah tagnate ty taogne maro aza ty Davida, le mbe nanagne fagniriagne tsy mete afa-po avao, sady nivilie’e lafo zay. Faie nagneke reke fa diso naho fa tafara izay, sady nisoloho taman’Agnahare. Tena nifale reke fa nahazo ty fankasitraha i Jehovah indraike.—2 Sam. 12:7-13.
Ekeo An-tsitrapo ty Fahefà i Jehovah
15 Tsy tinendre i Jehovah hiandraikitse ty keleia’e avao ty Davida, fa hiandraikitse ty firene o Israelio ka. Mpanjaka reke le nanagne fahefagne bey. Nisy fotoagne reke nagnampatse ty fahefa’e, ndra tie nanao fahotagne lahibey aza. (2 Sam. 11:14, 15) Faie nengà’e hagnitsy aze ty Jehovah, le trea fa nagneke fahefagne reke. Nivorahe’e tamy i Jehovah ze tam-po’e tao, sady nanao ze fara heri’e reke mba hankatoavagne aze. (Sal. 51:1-4) Tsy izay avao fa tena niambane reke, le nagneke torohevetse, ndra tie ampela aza ty nagnomey izay. (1 Sam. 19:11, 12; 25:32, 33) Nandrambe lesogne boake amy ty hadisoagne natao’e ty Davida, sady nifantoke tamy ty fanompoagne i Jehovah.
w18.06 17 § 7
Engao Hampiofagne ty Feo ty Fieretsereta’o ty Toro Lala i Jehovah
7 Tsy voatere mandika ty lalàn’Andrianagnahare naho mibabe ty voka izay tikagne vaho izay hahafantatse tie ino ty soa ndra ino ty raty. Afake mianatse boake amy ty hadisoagne natao o ndaty rehafegne amy Baiboly ao reo tikagne. Hoe ty Ohabolana 1:5: “Mitsanogne ty ndaty hendre le mitombo ty raha hai’e.” Ty raha ampahafantare i Jehovah ro tena fanjaka. Boake ama’e ohatse i tantara tena nisy amy Baiboly ao rey, le hitombo ty raha fantantikagne naho mamaky sady misaintsaigne irey tikagne. Agnisa izay ty tantara i Davida Mpanjaka. Nijale reke naho fa tsy nankatò i Jehovah fa nijangajanga tamy i Batseba. (2 Sam. 12:7-14) Dineho zao naho fa mamaky naho misaintsaigne o tantara iohoe rehe: ‘Ino ty azo i Davida natao mba hialagne ze fijaleagne zay? Akore naho iraho ro zoe ty tsapa hevetse hoe izay? Hilay manahake i Josefa vao raho sa hagneke ho rese manahake i Davida?’ (Gen. 39:11-15) Ho tapa-kevetse ‘halaigne ty raty’ tikagne naho misaintsaigne ty voka-draty o fahotagneo.
Vatosoa Ara-pagnahy
it “Davida”: “Lasa mpanjaka” § 9
Davida
Nivazoho ze raha zay iaby ty Jehovah, sady nibaribary i rahay. Naho mpitsara ndaty ty nengà’e hitsara i Davida naho i Batseba arake ty Lalà i Mosesy, le fa vinono iareo, sady ho niara-mate aman-drene’e i ajaja azo boake amy i fijangajangagneỳ. (De 5:18; 22:22) Faie i Jehovah ro nitsara i raharahay, le namindra fo tamy i Davida reke, satria: 1) Fa nanao fifagnekeagne miomba i Fanjakagney tama’e reke (2Sa 7:11-16); 2) azo antoke fa noho ireke mba fa namindra fo tamy ty hafay (1Sa 24:4-7; ampit. Jk 2:13); sady 3) vazohon’Andrianagnahare tie nibebake iareo amy i Batseba. (Sl 51:1-4) Nililovegne avao reke ndra tie teo zay. Nampirehafe i Jehovah hoe izao tamy i Davida ty Natana mpaminany: “Hampiavy loza boake amy ty keleia’o raho mba hagnisiagne azo.”—2Sa 12:1-12.
20-26 JONA
HARENA AMY TY SAONTSIN’ANDRIANAGNAHARE | 2 SAMOELA 13-14
“Loza ty Voka ty Hatea Tegna i Amnona”
it “Absaloma”: “Novonoina i Amnona” § 1
Absaloma
Vinono ty Amnona. Zoke i Absaloma ty Amnona faie hafa rene. Nitea’e ty Tamara, rahavave i Absaloma, satria ampela soa. Nanao somare narare ty Amnona sady natao’e ty hahavy i Tamara handeha mbamy i efitragno’ey mbeo amy izay hanao mofo ho aze. Nivahora i Amnona ty Tamara naho fa niavy eo. Faie te hila aze avao reke fa tsy tihoe tena tea aze. Nanjare tena niheje’e areke ty Tamara naho fa boake nila’e sady niroahe’e. Nandeha ty Tamara sady nandriatse i akanjo lava mitsipitsipike nagnisia’ey, naho nahafantaragne aze tie anak’ampela i mpanjakay rekey, sady mbe tsy mahavany lahy. Nasia’e lavenoke ka ty loha’e. Nifanalaka tamy i Absaloma reke, sady le avy le nifanta i Absaloma ty raha niseho, le narikariha’e ty Amnona. Trea boake amy izay fa fanta’e ty fagniriagne mafe nanagna i Amnona rahalahi’e. Faie nirehake tamy i Tamara rahavave’e reke mba tsy hanao kitomboke i Amnona. Nampitobohe’e tama’e tao ty Tamara.—2Sa 13:1-20.
w17.09 5 § 11
Mikezaha Hifehe Tegna
11 Mirehake ty ndaty tsy nahavita nifehe ty fagniria’e hila ndaty ka ty Baiboly. Agnisa izay i ajalahy minegne rehafegne amy Ohabolana toko faha-7 aoy naho i Amnona. Nisy voka’e tena raty ty raha natao iareo. (2 Sam. 13:1, 2, 10-15, 28-32) Naho nanahake ty nanjò i Kim areke ty manjò azo, le eretsereto o ohatse rehoe. Azo ty rae aman-drene ampiasaegne reo, mba hagnampeagne ty ana’e hanagne fahendreagne naho hahay hifehe tegna amo o hateao. Azo atao ohatse ty mandineke ireo amy ty Fotoam-pivavaha ty Keleiagne.
it “Absaloma”: “Novonoina i Amnona” § 4
Absaloma
Roe taogne tafara izay, le avy i fotoagne fagnitsifagne agnondrỳ. Fete bey zay! Nanao fete ta Bala-hazora, 22 km teo ho eo, avaratse agne avaratse antignana i Jerosalema areke ty Absaloma. Nasae’e ze ana i mpanjakay iaby naho i Davida mpanjaka. Faie tsy nimete nandeha ty Davida baba’e, le nihalale ama’e ty Absaloma mba handefa i Amnona talén’ana’e ho solo’e. (Oh 10:18) Hoe ty Absaloma tamy i mpanompo’ey tamy i fetey agne: ‘Naho fa falefale noho ty amy i divaỳ ty fo i Amnona, le vonò reke himateza’e agne.’ Naho fa nimate ty Amnona le niheregne ta Jerosalema agne i ana-dahy i mpanjakay rey, fa i Absaloma nilay amy i dadabei’e syriana ta Gesora tanàgne atignana i Riake Galiliay agne. (2Sa 13:23-38) Nanomboke teo le niazo i ‘mesa beỳ ty keleia i Davida’, arake ty nirehafe i Natana mpaminany, tsy nitofa zay amparake ty nahafate i Davida.—2Sa 12:10
Vatosoa Ara-pagnahy
MISY RAHA SOA AZO’O ATAO!
Ty toetse’o ro iteà o ndaty azo fa tsy ty vata’o. Dineho ohatse ty Absaloma, ana i Davida Mpanjaka. Hoe ty Baiboly:“Tsy nisy tovolahy nanahake i Absaloma. ... Tsy nisy tsiko’e reke.”—2 Samoela 14:25.Faie tsy soa ty raha tantarae ty Baiboly miomba o ajalahy iohoe ndra tie soa fitsanganagne reke. Rehafegne ao fa nagnambone tegna naho namitapitake ndaty reke sady te halaza. Raty fagnahy naho tsy megnatse mivalike ka reke sady mpamono ndaty.Izay ty mahavy ty Baiboly magnomey toro hevetse hoe izao:“Iakanjò ty toetse vaovao.”—Kolosianina 3:10.
“Ao ty fihamina’areo tsy ho raha ambalike atoagne avao ..., fa ho toetse mietake am-po ao.”—1 Petera 3:3, 4.Tsy raty tihoe te ho soa vatagne. Faie ty toetse’o ro lahibey naho oharegne amy ty vata’o. Naho soa toetse rehe vaho izay ho teà o ndaty, fa tsy tihoe bôgôsy ndra ampela soa. Hoe ty somondrara atao tihoe Phylicia: “Va’e ho taitse kedekede o ndatio naho fa mahatrea azo tie ampela soa. Faie ty toetse soa anagna’o ro tsy ho haligno’e ama’o.”
27 JONA–3 JOLAY
HARENA AMY TY SAONTSIN’ANDRIANAGNAHARE | 2 SAMOELA 15-17
“Nagnambone Tegna ty Absaloma le Nanjare Mpanohetse”
it “Mpialoha Lalana” § 2
Mpialoha Lalagne
Nisy ndaty mpilay taloha ty sovalan-tsarete ty mpanjaka tantignanagne, mba hagnomanagne naho hagnambara ty fiavia’e sady hagnampe aze. (1Sa 8:11) Nitsikombe o fomba iohoe ty Absaloma naho i Adonia, le sambe nanagne mpilay 50 nandeha taloha i sovalan-tsarete’ey ey. Tea iareo hatoro tie ndaty managne ty maha ie aze iareo sady ara-dalàna ty goreve atao iareo.—2Sa 15:1; 1Mp 1:5; henteo MPIHAZAKAZAKA.
w12 15/7 13 § 5
Manompoa i Andrianagnahare Magnomey Fahafahagney
5 Mirehake ndaty maro nitaogne ty hafa hanao raha raty ty Baiboly. Agnisa izay ty Absaloma, ana i Davida Mpanjaka. Tena nitovolahy reke, faie nanagne toe-tsaigne raty manahake i Satana. Nagniry i sezan-droandria i baba’ey reke, ndra tie tsy nanan-jò ho mpanjaka aza. Nenga’e hameno ty fo’e ze fagniriagne zay, le nipay fomba reke hahazoagne i fanjakagney. Somare niseho ho mitretré i vahoakey reke, sady nirehake fa tsy midare iareo i mpanjakay. Mitovy amy ty natao i Devoly ta Edena tagne ty natao’e. Niseho ho mpanao soa ty Absaloma, sady nagnaraty i baba’e.—2 Sam. 15:1-5.
it “Hebrona” § 8
Hebrona
Niheregne ta Hebrona tagne ty Absaloma ana i Davida naho fa afake taogne maromaro, sady nipay fomba higoreveagne mba handravagne i fanjakà i baba’ey faie tsy nitanterake zay. (2Sa 15:7-10) Nifily i Hebrona ho toeragne hanombohagne i fagnonganam-panjakagney ty Absaloma, va’e io varagne ty rovabey i Joda taloha, ndra noho io tanàgne niterahagne aze. Naho fa tafara tatoy, le nagnoregne i Hebrona indraike ty Rehoboama Mpanjaka, zafe i Davida. (2Ta 11:5-10) Nipetrake ta Hebrona (Kiriata-arba) ao indraike ty Jiosy ila’e boake an-tsese tane agne, naho fa tsinisia o Babilonianao raha tagnate ty fotoagne ela ty tane i Joda.—Ne 11:25.
Vatosoa Ara-pagnahy
Mamantatse Soa ty Raha Tena Misy vao Rehe?
11 Va’e hisy ndaty hampiparitake rehake miomba antikagne, faie ty ampaha’e ama’e avao ro maregne, ndra ty raha misy ila’e avao ro rehafe’e. Va’e hihara ty tsy rare’e tikagne voka izay. Izay ty nanjò i Mefiboseta, zafe i Saoly. Soa fagnahy tama’e ty Davida Mpanjaka, le nimei’e aze iaby ze tane i Saoly. (2 Sam. 9:6, 7) Faie nisy ndaty nagnaraty i Mefiboseta tamy i Davida agne naho fa tafara tatoy, le avy le nimei’e i ndatỳ i fanagna i Mefibosetay iaby. Tsy mba nihadihadie’e tie maregne vao sa tsy maregne i raha nirei’ey. (2 Sam. 16:1-4) Faie naho fa nifampirehake tamy i Mefiboseta ty Davida, le nahatsapa fa diso reke le nahere’e tama’e ty antsasa i fanagna’ey. (2 Sam. 19:24-29) Tsy ho nisy ze tsy rare’e zay naho namotopototse ty raha tena nisy ty Davida fa tsy memeke nanapa-kevetse.