Loharanon-kevetse amy ty Tari-dalagne Hoahy ty Fiaignantika Naho ty Fanompoagne
© 2022 Christian Congregation of Jehovah’s Witnesses
2-8 JANVIE
HARENA AMY TY SAONTSIN’ANDRIANAGNAHARE | 2 MPANJAKA 22-23
“Nagnino Tikagne ro Mila Miambane?”
w00 15/9 29-30
Nahazo Sitrake tamy i Jehovah ty Josia Satria Niambane
Vaho maraindray bey, le fa nazoto niasa i mpamboatse tempolỳ rey. Azo antoke fa nankasitrake i Jehovah ty Josia, satria namboare i mpiasa rey ty simba tamy i anjomban’Andrianagnahare natao i razambei’e ila’e raty fagnahy rey. Naho fa nandroso i asay, le niavy mba hanao tatetse ty Safana. Faie inogne ty raha tan-tagna’e tey? Ninday horognam-boke reke! Nihazavae’e fa nahatrea “ty boke i lalà i Jehovah-y, i nampirehafegne i Mosesỳ”, ty Hilkia mpisorom-bey. (2 Tantara 34:12-18) Azo antoke fa i boke ty Lalàna tam-boaloha’e tagney o nitrea iohoe!
Tena te haharey ze voasoratse tamy i bokey tao ty Josia. Naho fa namaky ty Safana, le nifantare i Josia mpanjaka tie nagnino ro mihatse ama’e naho amy i vahoakey ty lily tsikiraidraike. Tena nahalatsa aze, ty nagnamafesa i bokey ty fanompoam-pivavahagne maregne naho ty nagnambara’e mialoha ty loza hiseho naho ty ho fanoagne sese-tane i vahoakey naho magnorike fivavahan-diso iareo. Nifanta i Josia tamy izay fa tsy norihegne iaby i lilin’Andrianagnaharey, le nandriatse i akanjo’ey reke sady nagnomey baiko hoe izao i Hilkia naho i Safana vaho ty hafa: ‘Agnonteneo i Jehovah ty miomba o saontsy amy i boke vaho nitrea io ao. Vignetse mafe ty Jehovah satria tsy nankatò ty raha rehafegne amo o boke iohoe ao i razambeintikagne rey.’—2 Mpanjaka 22:11-13; 2 Tantara 34:19-21.
w00 15/9 30 §2
Nahazo Sitrake tamy i Jehovah ty Josia Satria Niambane
Nandeha ta Jerosalema tagne, tamy i Holda mpaminanivave tagne i ndaty nirahe i Josia rey sady niheregne ninday tatetse. Nagnambara ty saontsy i Jehovah ty Holda, le nirehake fa hihatse amy i firenena nivalim-pinoagney i loza rehafegne amy i boke vaho nitreay ao. Faie noho i Josia niambane tagnatreha i Jehovah eo, le tsy hihatse ama’e i lozay. Havory hiharo aman-draza’e agne reke sady halevegne amy ty kibori’e agne amy ty fotoagne mampilamigne ty tane toy.—2 Mpanjaka 22:14-20; 2 Tantara 34:22-28.
Vatosoa Ara-pagnahy
w01 15/4 26 §3-4
Afake ty Ho Tomombagne ty Raha Atao’o Ndra Nanao Akore Akore ty Fomba Nitezagne Azo
Nanao ty soa lognandro tagnatreha i Jehovah eo ty Josia, ndra tie niraty aza ty raha nisy tamy ty fiaigna’e tamy ireke mbe nikede. Nitomombagne ka ty fanjaka’e, kanao ty Baiboly mirehake hoe izao tie: “Tsy nisy mpanjaka nanahake aze ty taloha’e, niheregne tamy i Jehovah tamy ty fo’e naho ty tegna’e vaho ty heri’e, arake ty Lalà i Mosesy iaby. Sady tsy nisy nanahake aze sasa ka ty tafara’e.”—2 Mpanjaka 23:19-25.
Ohatse mampahery hoahy ze niaretse raha sarotse tamy tie reke mbe nikede vata’e ty Josia. Ino ty azontikagne ianaragne boake amy i ohatse nengà’ey? Ino ty nagnampe i Josia hifily ty hagnorike findesam-batagne malio sady hagnorike io lognandro avao?
9-15 JANVIE
HARENA AMY TY SAONTSIN’ANDRIANAGNAHARE | 2 MPANJAKA 24-25
“Izao ty Fotoagne Toko’e Hanoagne Raha Malaky”
w01 15/2 12 §2
Fa Marine i Andro Fitsarà i Jehovah-y
2 Noho i faminania i Zefaniay, le tsy isalasalagne fa vao mainke tsapa i Josia tie toko’e ho liovegne mba tsy hisy fanompoam-pivavahagne maloto ty Joda. Nanao raha mba hagnaliovagne i taney tsy hisy fivavahan-diso areke i mpanjakay. Faie tsy nagnafake ze haratiagne tamy i firenenay zay, ro mbe tsy nahaonetse ty fahota i Manase Mpanjaka, i dadabei’ey, i ‘nameno ty lio o ndaty tsy manan-tsiny i Jerosalemay.’ (2 Mpanjaka 24:3, 4; 2 Tantara 34:3) Azo antoke areke ty hiavia i andro fitsarà i Jehovah-y.
w07 15/3 11 §10
Hevetse Miambake amy ty Boke i Jeremia
Tamy ty faha-11 taogne nanjakà i Zedekia, tamy 607 T.K., le nanao arikobogne i Jerosalema tagnate ty 18 volagne ty Nebokadnezara, mpanjaka i Babilona. Tamy ty andro fahafito tamy ty volagne fahadime tamy ty taogne faha-19 nanjaka i Nebokadnezara, le “niavy” ta Jerosalema tao ty Nebozaradana, lahibey i mpiambegney. (2 Mpanjaka 25:8) Va’e tamy i tobe’e ivela i manda i tanàgney egne varagne ty Nebozaradana ro nagnara-maso ty raha miseho, sady nandineke soa i raha hatao’ey. Telo andro tafara tatoy, tamy ty volagne fahafolo, le nizilike ta Jerosalema tao reke. Sady noroa’e i tanàgney.—Jeremia 52:12, 13.
Vatosoa Ara-pagnahy
w05 1/8 12 §1
Hevetse Miambake amy ty Boke Mpanjaka Faharoe
24:3, 4. “Tsy nimete namela ty helo” i Joda ty Jehovah, noho ty trosan-dio i Manase. Sarobily aman’Andrianagnahare ty lio ty ndaty tsy manan-tsiny. Afake matoky areke tikagne fa hamale ze nampipoke ty lio ze ndaty tsy manan-tsiny reke, le hovonovonoe’e iareo.—Salamo 37:9-11; 145:20.
16-22 JANVIE
HARENA AMY TY SAONTSIN’ANDRIANAGNAHARE | 1 TANTARA 1-3
“Tena Maregne ty Raha Rehafe o Baibolio fa Tsy Vande”
w09 1/9 14 §2
Tena Nisy vao ty Adama Naho i Eva?
Dineho ohatse ty fitaliliagne ty razambey naho tariratse amy ty 1 Tantara toko voaloha’e hatrake amy faha-9 ao, naho ty Lioka toko faha-3 ao. Mirehake taranake 48 nifandimbe ty 1 Tantara, ahatreavagne ty fitaliliagne ty razambey naho ty tarira i mpanjaka naho i mpisorogne tamo o Israelio eoy. Mirehake taranake 74, razambey i Jesosy Kristy ty Lioka. Sambe trea amo o lista rehoe ty ndaty malaza retoagne, ohatse i Solomona, i Davida, i Jakoba, Isaka, i Abrahama, i Noa vaho i Adama. Tena nisy iaby i ndaty rehafegne ao rey. Tena nisy areke ty Adama, razambey niboaha iareoy.
w08 1/6 3 §4
Tena Nisy fa Tsy Talily Avao ty Noa Naho i Safodranoy
Misy fitaliliagne ty razambey naho tariratse roe ahatreavagne ty agnara i Noa ty amy Baiboly ao. Izay ty porofo fa tena nisy reke. (1 Tantara 1:4; Lioka 3:36) I Ezra naho i Lioka ty nanoratse iareo. Zatse namotopototse soa iareo roe lahy, vaho izay nanoratse. Nirehake ty Lioka fa agnisa ty razambey i Jesosy Kristy ty Noa.
w09 1/9 14-15
Tena Nisy vao ty Adama Naho i Eva?
Akore ohatse ty amy i sorogne sarobily ama o ndaty maro nanoe i Jesosỳ? Nagnomey ty fiai’e reke hagnafahagne o ndatio amy ty ota. (Matio 20:28; Jaona 3:16) Rehafe ty Baiboly fa “solovoigne mifandanja” ty Jesosy. (1 Timoty 2:6) Mifandanja amy ty inogne? Hoe ty Baiboly: “Manahake ty imateza o ndatio amy i Adama ao, ro hamelomagne o ndatio ka amy i Kristy.” (1 Korintianina 15:22) Mifandanja amy i aigne voririke nafoe i Adama tamy ireke nanotay, ty aigne voririke natao i Jesosy sorogne mba hagnavotagne ze ndaty mpankatò. (Romanina 5:12) Naho tsy nisy areke ty Adama, le tsy ho nilaegne i solovoigne natao i Kristỳ.
Vatosoa Ara-pagnahy
it “Tetirazana”: “Anaram-behivavy” § 1-2
Tetirazana
Agnaran’ampela. Sinoratse agnate i fitaliliagne ty razambey naho tariratsey ao ty agnara o ampelao kindraike, naho fa nilaegne amy ty tantara. Rehafegne amy Genesisy 11:29, 30 ao ohatse ty Saray (Saraha) satria ho boake ama’e, fa tsy ho boake amy ty ampela hafa valy i Abrahama, i Taranake nampitamaegney. Nirehafegne tao ka ty Milka, va’e noho ireke bebey i Rebeka valy Isakay varagne, mba hahatreavagne fa longo i Abrahama ty razambey i Rebeka. Toe tsy toko’e hanambaly ampela hafa firenena ty Isaka. (Ge 22:20-23; 24:2-4) Rehafegne amy Genesisy 25:1 ao ka ty Ketora, valy i Abrahama faharoe. Nanambaly indraike ty Abrahama tafara ty nimateza i Saraha, sady mbe niterake reke, 40 taogne mahery tafara ty nanoa i Jehovah fahagagagne mba hahafaha’e hiterakey. (Ro 4:19; Ge 24:67; 25:20) Aseho o fitaliliagne ty razambey naho tariratse iohoe ka ty fifandrambesa o Midianinao naho ty foko arabo hafa tamo o Israelio.
Rehafegne agnate i fitaliliagne ty razambey naho tariratsey ao ka ty Lea, i Rahely, i valy masay i Jakobay vaho ty ana-dahy iareo iaby. (Ge 35:21-26) Azontikagne areke tie nagnino ty Andrianagnahare ro nifandrambe tamy i ana-dahy i Jakoba rey naho fa tafara tatoy. Noho o anto’e reo ka ty nanjilihagne agnara ty ampela hafa tamy i fitaliliagne ty razambey naho tariratsey ao. Va’e ho sinoratse ty agnara iareo, naho fa tamy ty alala’e ty nifindra ty lova ty keleia’e. (No 26:33) Nalaza ty Tamara naho i Rahaba vaho i Rota, satria nanjare razambey i Mesia ndra i Jesosy Kristy iareo noho ty raha niambake natao iareo. (Ge 38; Rt 1:3-5; 4:13-15; Mt 1:1-5) Ahatreavagne agnaran’ampela hafa ka i fitaliliagne ty razambey naho tariratse amy 1 Tantara 2:35, 48, 49; 3:1-3, 5 aoy.
23-29 JANVIE
HARENA AMY TY SAONTSIN’ANDRIANAGNAHARE | 1 TANTARA 4-6
“Ino ty Raha Trea Miomba Ahy Naho ty Vavake Ataoko ro Henteagne?”
I “Mpijanjigne Vavakey”
Tea nivavake ty Jabeza. Nihalale ty fitahian’Andrianagnahare heike reke. Nisy raha telo nangatahe’e naho fa niavy eo, sady trea boake amy izay fa tena nanam-pinoagne reke.
Voaloha’e, nihalale taman’Andrianagnahare ty Jabeza mba ‘hagnitatse i faritane’ey.’ (Andine’e 10) Tsy mpisenge hery tane o ndaty ndra mpagniry fanagna o ndaty o lahilahy nihajaegne iohoe. Tsy le mahakasike tane loatse ty tan-tsai’e tao. Va’e ho nangatake ty hitara i faritane’ey reke faie tsy hialy, mba ho maro ty mpanompo i tena Andrianagnaharey hitoboke ao.
Faharoe, nihalale ty Jabeza mba ‘hanohagne aze ty fitàn’Andrianagnahare.’ Ty hery ampiasaen’Andrianagnahare hagnampeagne ty mpivavake ama’e, o tagnagne ndra fità rehafegne iohoe. (1 Tantara 29:12) Niantehetse taman’Andrianagnahare ty Jabeza mba hahazoagne ze raha nirie ty fo’e, satria tsy fohe ty fitàn’Andrianagnahare naho mino aze o mpanompo’eo.—Isaia 59:1.
Fahatelo, nivavake ty Jabeza mba ‘harovagne tsy ho voa ty loza.’ Hoe te hirehake o rehake rehoe fa tsy ty hagnafahagne ze loza manjò aze ty nangatahe’e. Faie nangatake reke mba tsy halahelo ndra ho kivy noho o haratiagneo.
Trea boake amy ty vavake natao i Jabeza fa nieretseretse lognandro miomba ty fivavahagne maregne reke, sady nino ro natoky i Mpijanjigne vavakey. Akore ty natao i Jehovah? Hoe izao ty fifaragna i tantara fohey: “Le nimean’Andrianagnahare aze iaby ze raha nangatahe’e.”
Vatosoa Ara-pagnahy
w05 1/10 9 §7
Hevetse Miambake amy ty Boke Tantara Voaloha’e
5:10, 18-22. Nirese o foko nitoboke tan-tignana i Jordana agne reo o Hagaritao, tamy ty andro i Saoly Mpanjaka. Ie amy izao miheregne indroe ty isa iareo ty isa o Hagaritao. Natoky i Jehovah sady nipay ty fagnampea’e o lahilahy israelita bey herim-po rehoe. Lonike ka tikagne hatoky i Jehovah, amy ty aly ara-pagnahy ataontikagne, ndra tie maro noho itikagne aza ty fahavalontikagne.—Efesianina 6:10-17.
30 JANVIE–5 FEVRIE
HARENA AMY TY SAONTSIN’ANDRIANAGNAHARE | 1 TANTARA 7-9
“Afake Magnampe Azo Hahavita Andraikitse Sarotse ty Jehovah”
w05 1/10 9 §8
Hevetse Miambake amy ty Boke Tantara Voaloha’e
9:26, 27. Nanagne andraikitse lahibey i Levita mpiambegne lalagne rey. Nimeagne iareo ty lakilé nahafahagne nilitse tamy i toeragne masigne tamy i tempolỳ aoy. Natokisagne iareo satria vinoha iareo isan’andro i lalagney. Nankinegne tamantikagne ka ty hipay ndaty amy ty faritanentikagne, sady hagnampe iareo hanjare mpanompo i Jehovah. Tsy toko’e hatorontikagne ka vao tie azo ianteheragne naho azo atokisagne tika, manahake i Levita mpiambegne lalagne rey?
Ry Androanavi-pagnahy, Tsikombeo ty Finehasa
Tena nitao naho bey herim-po sady natoky i Jehovah ty Finehasa le nivita’e soa i andraiki’ey, ndra tie maro sady sarotse aza. Tea i Jehovah reke satria tena nikarakara o vahoa’eo. Hoe ty Ezra, 1000 taogne teo ho eo tafara tatoy: “I Finehasa ana i Eleazara ty mpitarike tamy iareo teo tie taloha, sady nampea i Jehovah reke.” (1 Tan. 9:20) Lonike abey hanohagne o androanavi-pagnahio ka ty Jehovah, sady tsy iareo avao fa o vahoa’e tsy mivalikeo iaby.
Vatosoa Ara-pagnahy
w10 15/12 21 §6
Mihirà Hoahy i Jehovah!
6 I Jehovah areke ty nagnirake o mpaminani’eo handily ty mpivavake ama’e hidera Aze amy ty alala ty hira. Tsy nimeagne andraikitse hafa sasa i Levita mpihira rey, ndra tie agnisa ty mpisorogne aza. Amy izay iareo nanam-potoagne handrindràgne i feon-kiray naho hanoagne fameregnagne i hiray.—1 Tan. 9:33.
6-12 FEVRIE
HARENA AMY TY SAONTSIN’ANDRIANAGNAHARE | 1 TANTARA 10-12
“Ampitombò ty Fagniria’o Hanao ty Zoton’arofon’Andrianagnahare”
w12 15/11 6 §12-13
“Ampianaro Hanao ty Zoton’Arofo’o Raho”
12 Misy toro lalagne tea i Jehovah hampitaegne ty amy i Lalàna nimea’e rey. Ohatse soa ty Davida satria nahatakatse soa i toro lalagne rey reke sady nagniry ty hampihatse izay. Naeake ty aran-drano ohatse reke tie indraike zay, le te hinogne “rano boake amy i vovogne am-bavahady i Betlehema teoy.” O Filistinao ty mbe nifehe i Betlehema tamy izay. Nizilike avao ta Betlehema tao areke ty telo tamy i maramila’e rey, le nangalake rano hoahy i Davida. ‘Faie tsy nimete ninogne reke fa ndra naili’e hoahy i Jehovah i ranoy.’ Ino ty anto’e? Nagnazava reke tie: “Sagnatria ahy ty hanao izay! Matahotse an’Andrianagnahare anio raho! Iraho vao le hinogne ty lio o lahilahy fa namoe ty fiai’e rehoe? Iareo aza fa namoe ty fiai’e mba hindesagne i ranoy amako atoy.”—1 Tan. 11:15-19.
13 Fanta i Davida fa toko’e hailigne hoahy i Jehovah o liò fa tsy hohanegne. Fanta’e ka ty anto’e satria “agnate lio ao ty fiay o nofotseo.” Faie tsy lio ty nimeagne aze fa rano. Le ino areke ty anto’e nahavy aze tsy nimete ninogne? Satria taka’e ty toro lalagne tea i lalànay hampitaegne. Sarobily manahake ty lio i rano nalae o lahilahy fa ho namoe ty fiai’e rehoe. Nieretseretse areke reke fa tena tsy mete ty minogne i ranoy, fa toko’e hailigne amy ty tane i rahay.—Lev. 17:11; Deot. 12:23, 24.
w18.06 17 §5-6
Engao Hampiofagne ty Feo ty Fieretsereta’o ty Toro Lala i Jehovah
5 Tsy ampe ty mamaky ndra mahafantatse soa ty lalàn’Andrianagnahare, naho teantikagne hahasoa antikagne rey. Tsy maintsy mikezake tikagne mba ho tea sady hagnaja irey. Hoe ty Saontsin’Andrianagnahare: “Malaigna ze raha raty, le teao ze raha soa.” (Amosa 5:15) Faie akore ty hanoagne izay? Mila mikezake hitovy fomba fihevetse amy i Jehovah tikagne. Andao tikagne hangalake ohatse hagnazavagne izay. Naho mateteke tsy azon-droro rehe, le ampihinane o dokoterao hanegne mahasalama naho ampanoe’e sporo. Ampagnova’e azo ka ty fahazara’o. Norihe’o i reha’ey, le tena nandaitse vata’e i rahay. Azo antoke fa tena hankasitrake i dokoteray rehe.
6 Magnomey lalàna antikagne ka i Mpamorogne antikagney mba hiarovagne antikagne amy ty voka o otao sady hahavy ty fiaignantikagne hihasoa. Misy lalàna ohatse ty amy Baiboly ao tie tsy azo atao ty mavande, mamitake, mangalatse, mijangajanga, mamono ndaty sady mifandrambe amy ty fagnahy raty. (Vakio ty Ohabolana 6:16-19; Apok. 21:8) Eretsereto ty soa ho rambesentikagne naho fa mankatò izay tikagne. Ho tea naho hankasitrake i Jehovah naho i lalà’ey tikagne, naho fa mahatrea tie mahasoa antikagne ty mankatò aze.
Vatosoa Ara-pagnahy
it-1 “Fo”: “Manompo amin’ny ‘fo manontolo’” § 1, 2
Fo
Manompo amy ty “fo iaby.” Tsy velogne ty ndaty raike naho angalagne ty fo’e ara-bakiteny. Faie va’e ho voazarazara i fo agn’ohatsey. Hoe areke ty Davida: “Anò ze hatahorako ty tahina’o amy ty foko iaby.” (Sl 86:11) Va’e ‘hanagne fo voazarazara’ ty ndaty raike, le va’e ho mate ara-pagnahy. (Sl 119:113, f.a.p.; Ap 3:16) Va’e ‘hanagne fo roe’ ka reke, ty dika izay va’e hanompo tompo roe ndra hamitake, le hafa ty raha rehafe’e ie amy izao hafa ty an-tsai’e ao. (Sl 12:2, f.a.p.) Nimelohe i Jesosy ty mpanao soa miatreke hoe izay.—Mt 15:7, 8.
Tsy toko’e hanagne fo voazarazara ndra hanagne fo roe ty ndaty te hampifale an’Andrianagnahare, fa toko’e hanompo aze amy ty fo iaby. (1Ta 28:9) Ilaegne kezake mafe zay satria sarotse fehezegne o fò sady raha raty avao ty irie’e. (Je 17:9, 10; Ge 8:21) Magnampe antikagne hanompo an’Andrianagnahare amy ty fo iaby ty mivavake boake amy ty fo (Sl 119:145; Ft 3:41), mianatse tsy tapake ty Saontsi’e (Ezr 7:10; Oh 15:28), mazoto mitory i talily soay (ampit. Je 20:9), vaho miarake amy ze manompo i Jehovah amy ty fo’e iaby io.—Ampit. 2Mp 10:15, 16.
13-19 FEVRIE
HARENA AMY TY SAONTSIN’ANDRIANAGNAHARE | 1 TANTARA 13-16
“Magnoriha Tari-dalagne le ho Tomombagne ty Raha Atao’o”
Magnontane vao Rehe tie: “Aia ty Jehovah?”
12 Nagniry ty hamindra i vata ty fifagnekeagney ho a Jerosalema agne ty Davida Mpanjaka, naho fa niheregne ta Israely agne io sady nengagne ta Kiriata-jearima agne taogne maro. Nangalake toro hevetse tamy i mpifehe i vahoakey reke, sady nirehake fa hafindra i Vatay naho mete amy iareo zay, sady eké i Jehovah. Faie tsy nikaroke soa reke tie ino maregne ty zoton’arofon’Andrianagnahare miomba i raharahay. Naho nanao izay reke, le tsy ho nindesegne tamy ty sarete i Vatay. Ho nitarazoe o Levita Kehatitao igne, arake ty lily nimean’Andrianagnahare. Fa nagnontane i Jehovah mateteke avao ty Davida, faie tsy natao’e arake ty toko’e ho ie zay tamy itoy. Loza ty voka’e. Nagneke ty Davida naho fa tafara tatoy tie: “Nivignetse tamantikagne ty Jehovah Andrianagnaharentikagne. Tsy mba nifantarentikagne tie akore ty toko’e hatao.”—1 Tantara 13:1-3; 15:11-13; Nomery 4:4-6, 15; 7:1-9.
Magnontane vao Rehe tie: “Aia ty Jehovah?”
13 Tamy ty fara’e, le o Levitao ty ninday i Vatay boake an-tragno i Obeda-edoma ao ho a Jerosalema agne. Nisy hira finoro i Davida nihiraegne tamy izay, le izao ty faniahiagne rehafegne ao: “Mipaliava i Jehovah sady miantehera amy ty heri’e. Mipaliava sitrake ama’e lognandro. Tadidio ty raha mahaveregne natao’e, naho ty fahagagagne vita’e.”—1 Tantara 16:11, 12.
Vatosoa Ara-pagnahy
w14 15/1 10 §14
Manompoa i Jehovah, i Mpanjaka Nainai’ey
14 Nandese i Davida ta Jerosalema agne i Vata misy ty fifagnekeagney. Fotoagne mahafale ty tamy izay, le nihira fideragne o Levitao. Mareho ty raha rehafegne amy i hiray ao: “Rehafo amo o firenenao agne tie: ‘Nanjare Mpanjaka ty Jehovah.’” (1 Tan. 16:31) Va’e hisy hagnontane tihoe: ‘Tsy fa Mpanjaka nainai’e vao ty Jehovah?’ Manjare Mpanjaka ty Jehovah naho fa mampihatse ty fahefà’e, ndra manendre ndaty hisolon-tegna aze amy ty fotoagne raike ndra mba handaminagne raharaha raike. Tena ilaegne ty mahatakatse izay. Nampitamae i Jehovah ty Davida tie haharetse nainai’e ty fanjakà’e. Hoe reke: “Hotendreko handimbe azo ty tarana’o, le ty ana-dahi’o. Hataoko mafe oregne ty fanjakà’e.” (2 Sam. 7:12, 13) Niseho o ‘tarana’ i Davida iohoe 1000 taogne mahery tafara tatoy. Ia io sady ombia reke ro nanjare Mpanjaka?
20-26 FEVRIE
HARENA AMY TY SAONTSIN’ANDRIANAGNAHARE | 1 TANTARA 17-19
“Mikezaha ho Fale Avao Ndra tie Diso Tamà Aza”
w06 15/7 19 §1
Mifantoha amy ty Hasoa ty Fandamina i Jehovah
Agnisa ty ndaty tena miambake rehafegne amy ty Soratse Hebreo ao ty Davida, Israelita taloha. Mpiarak’agnondry reke, mpititike raha magneno, mpaminany, sady mpanjaka. Tena nitoky tamy i Jehovah Andrianagnahare reke. Nagniry hagnoregne anjomba ndra tempoly ho an’Andrianagnahare ty Davida, noho ireke tena tea aze vata’e. O tempoly iohoe ty ho foibey ty fivavahagne maregne amo o Israelio eo. Fanta i Davida fa hinday hafaleagne naho raha soa maro hoahy o vahoan’Andrianagnahareo ty asa hatao ao. Izay ty nahavy aze nihira tihoe: “Sambatse ze filie’o [Jehovah] naho ze ampiharinea’o azo mba hipetrake amy i tokotane’oy ao. Hahafa-po anay ze kila raha soa amy i anjomba’oy ao, le i tempoli’o masigney.”—Salamo 65:4.
Mifalea amy ze Tombotsoa Anagna’o
11 Hoe izay ka fa hitombo ty hafaleantika naho miasa mafe arake ze vitantikagne tika mba hanoagne ze andraikitse mey i Jehovah antika. Mikezaha ‘hifantoke soa’ amy ty asa fitoriagne naho hiara-hiasa amo o fiangonagneo. (Asa. 18:5; Heb. 10:24, 25) Omano soa ka ty fivoriagne iaby, amy izay rehe afake magnomey toin-drehake mampahery. Hevero ho lahibey ze anjara meigne azo amy i fivoriagne andavanandroy. Anò ara-potoagne ka ze asa ampanoegne azo amo o fiangonagneo eo, le mikezaha mba ho azo atokisagne. Ko mieretseretse tie tsy le tena raha lahibey i raha ampanoegne azoy, le tsy voatere mandany fotoagne hanoagne aze rehe. Mikezaha mafe mba hampitombo ty fahaia’o i asay. (Ohab. 22:29) Naho miasa mafe hoahy i Jehovah rehe, le hihasoa ty fifandrambesa’o ama’e, sady tena ho fale rehe. (Gal. 6:4) Naho ndaty hafa ka ro mahazo i andraikitse nirie’oy, le tsy ho boseke rehe fa hiarake hifale ama’e.—Rom. 12:15; Gal. 5:26.
Vatosoa Ara-pagnahy
w20.02 12, efajoro
Asehò fa Tea’o ty Jehovah, i Babantikagney
Mba Vazohoe i Jehovah Avao vao Raho?
Fa nisy fotoagne vao rehe nieretseretse tie ‘Mba mivazoho ahy avao vao ty Jehovah, ie amy izao misy ndaty agn’arivo’e tapetrisa ty ambone tane etoy?’ Tsy irehe raike avao ty fa nieretseretse hoe izay. Nametrake fagnonteneagne hambagne amy io ka ty Davida Mpanjaka. Hoe reke: “O Jehovah! Inogne moa o ndatio ro marehe’o, sady ino moa ze anaka ndaty mete mate zay ro trétréze’o?” (Sal. 144:3) Faie natoky ty Davida tie fanta i Jehovah soa reke. (1 Tan. 17:16-18) Magnomey toky azo amy ty alala ty Saontsi’e naho ty fandamina’e ka ty Jehovah fa vazoho’e rehe naho fa manoro ty hatea’o aze. Misy andinin-teny maromaro ty agnate ty Saontsin’Agnahare ao, mampiseho tie vazohoe i Jehovah vata’e rehe. Dineho moa retoa:
• Vaho niforogne tan-troke ao rehe le fa nivazoho i Jehovah.—Sal. 139:16.
• Fanta i Jehovah ze raha am-po’o ao naho ze raha eretserete’o.—1 Tan. 28:9.
• Mijanjigne azo ty Jehovah isake tie mivavake ama’e rehe.—Sal. 65:2.
• Misy voka’e amy i Jehovah ze raha atao’o. Ndra zay hampifale aze ndra hahavignetse aze.—Ohab. 27:11.
• I Jehovah ro nitaogne azo mba hagnarine aze.—Jaona 6:44.
• Fanta i Jehovah soa rehe, le vita’e ty mamelogne azo indraike ndra tie mate aza rehe. Hahere i Jehovah indraike ty vata’o naho ty eretsere’o naho ty fitadidia’o sady hahere’e ka ty toetse maha ie azo.—Jaona 11:21-26, 39-44; Asa. 24:15.
27 FEVRIE–5 MARSA
HARENA AMY TY SAONTSIN’ANDRIANAGNAHARE | 1 TANTARA 20-22
“Ampeo o Tanorao mba Handroso Ara-pagnahy”
w17.01 29 §8
“Omeo Andraikitse o Lahilahy Azo Atokisagneo”
8 Vakio ty 1 Tantara 22:5. Va’e nieretseretse varagne ty Davida tie tsy hahavita hiandraikitse ze asa lahibey zay ty Solomona. Toko’e ho “anjomba fara izay ty soa” i tempoly, ie amy izao ty Solomona “mbe tanora sady mbe tsy nahatrea fiaignagne.” Faie nino ty Davida fa hagnampe aze ty Jehovah. Nanao ze azo’e atao areke reke mba hagnampeagne i Solomona, le nagnomagne fitaovagne maro hagnoregnagne i tempolỳ.
w17.01 29 §7
“Omeo Andraikitse o Lahilahy Azo Atokisagneo”
7 Azo antoke fa diso tamà ty Davida. Faie tsy tihoe tsy nimete nagnampe i Solomona hagnoregne i tempoly reke. Fanta’e fa tsy ireke ty hahazo voninahitse naho fa vita i rahay. Natao tihoe tempoly i Solomona vata’e reke, fa tsy tihoe tempoly i Davida. Faie tsy nifantoke tamy izay ty Davida, fa nagnampe i Solomona tamy ty fo’e iaby. Nazoto nandamigne antoko mpiasa reke sady namory vigne, saba, volafotsy, volamena, vaho hatae sedera. Hoe ka reke tamy i Solomona: “Izao areke anake: ‘Lonike abey hagnampe azo ty Jehovah, le hotomombagne ty raha atao’o naho fa magnoregne i anjomba i Jehovah Andrianagnahare’oy, arake ty fa nisaontsie’e tama’o.”—1 Tan. 22:11, 14-16.
w18.03 11-12 §14-15
Ampeo ty Ana’o mba ho Vita Badisa
14 Afake magnampe o androanavi-pagnahio. Toko’e hotrea amy ty raha rehafe’e ohatse fa soa ty managne tanjogne ara-pagnahy. Tsiaro ze rahavave raike zay ohatse fa nagnontane ty tanjo’e ara-pagnahy ty Rahalahy Russell, tamy tie reke ni-enen-taogne. Hoe reke: “Antsasa-dera teo ho eo zahay ty nideba.” Ino ty voka izay? Nanao mpisava lalagne tagnate ty 70 taogne mahery o rahavave iohoe naho fa tafara tatoy. Treantikagne boake amy izay fa va’e hisy voka’e maharetse o rehake mampaherio. (Ohab. 25:11) Azo o androanavi-pagnahio ampandrambesagne anjara ka o rae aman-dreneo naho ty ana’e, naho fa misy asa atao ty amy i Anjomba i Fanjakagney ao. Azo omeagne asa mifagnentagne amy ty tao’e naho ty fahaiza’e o ajajao.
15 Afake magnampe ka tikagne iaby amo o fiangonagneo eo. Azontikagne atoro tie miahy o ajajao naho o tanorao tikagne. Henteo ohatse ty kezake atao iareo mba handrosoagne ara-pagnahy. Nisy ajaja nagnomey toin-drehake vokatse ty fo naho voaomagne soa vao, ndra nanao anjara amy ty fivoriagne andavanandro? Sa nisy ajaja sahy nagnararaotse nitory tan-dakilasy agne, ndra nahavita nahatohetse tsapa hevetse? Naho mahatrea ajaja hoe izay rehe, le ko misalasala ty midera aze. Nagnino naho mba atao tanjogne ty hirehake amy ty ajaja ndra tanora raike, aloha ndra afara i fivoriagney? Naho manao izay tikagne, le ho tsapa iareo fa tena agnisa ty fiangonagne reke.—Sal. 35:18.
Vatosoa Ara-pagnahy
w05 1/10 11 §5
Hevetse Miambake amy ty Boke Tantara Voaloha’e
21:13-15. Nampijanogne i Jehovah i anjelỳ i arete-manjamagney, satria tsy tante’e ty mahavazoho o mpanompo’eo mijale. “Tena bey famindram-po vata’e reke.”