Efapolo taogne ty Isaka tamy tie nanambaly i Rebeka. Le vata’e nitea’e reke. Tafara atoy iareo, le niterake hambagne roe lahy.

I Esao ty zoke’e, le i Jakoba ty zai’e. Tea mikariokarioke ty Esao sady mpitifi-borogne, faie i Jakoba tea mijanogne an-tragno.

Ty ana-dahy voaloha’e tamy izay ro nandova ty ankamaroa ty fanagnagne naho ty tane, naho fa mate ty rae’e. Izay ty atao tihoe lova. Faie mbe nahazo lova fagnampe’e ka ty ana Isaka. Le ty lova nampitamàe i Jehovah i Abrahama. Faie tsy nidarea i Esao ze lova zay, fa i Jakoba ro nahafantatse tie raha lahibey izay.

Ie tie indraike, rerake ty Esao fa boake namandrike biby. Nahandro hanegne mafiry ty Jakoba, le nirey i Esao ty hagni’e. Le hoe reke: ‘Meo amo o vagnemba’ò raho kahe fa keré!’ Le hoe ty Jakoba: ‘Homeiko azo toy naho mifanta hey rehe tie homei’o ahy i lova’oy.’ Hoe ty Esao: ‘Hataoko inogne ka ze o lova zao! Ndeso agne kahe. Faie meo hanegne raho fa keré.’ Fahendreagne vao ze raha natao i Esao zay? Tsy zay, satria natakalo’e vagnemba feno bole i lova sarobily nanagna’ey.

Naho fa antetse amy izay ty Isaka, le te hitsipe rano i ana-dahi’e zoke’ey reke. Faie nampea i Rebeka ty Jakoba, zay i Esao, mba hahazo i tsipe ranoy. Niboseke ty Esao naho fa nahay izay, le nikinia ty hamono i Jakoba. Te hiaro i Jakoba ty Isaka naho i Rebeka, le hoe iareo: ‘Mandehana ho amy i Labana renelahi’o agne, amparake ty hiafaha ty haboseha i Esao.’ Nankatò ty reha iareo ty Jakoba, le nilay nandrombake ty fiai’e.

Nisaontsia i Jehovah ty Jakoba fa hiaro aze manahake ty niarova’e i Abrahama naho Isaka reke. Nitoboke ta Harana agne ty Jakoba. Nanambaly reke sady nanagn’anake maro vaho nanam-panagnagne maro.

Tafara izay, le hoe ty Jehovah tama’e: ‘Molia amy izay rehe.’ Nandeha amy izay reke miharo i keleia’e rey. Nisy ndaty nifanalaka tamy i Jakoba ty tan-dalagney nanao tihoe: ‘Boake afarao ty Esao rahalahi’o, minday lahilahy 400 reke.’ Natahotse ty Jakoba fa atao’e hamono aze miharo o keleia’eo ty Esao. Nivavake tamy i Jehovah reke tie: ‘Avoto raho tsy hovonoe i Esao.’ Nimaray igne ty Jakoba le nandefa agnondry tsiefa, ose, agnombe, rameva naho birìke hoahy i Esao.

Nahatrea anjely ty Jakoba naho fa nitoboke irery tamy i halegney. Nanao ringa tama’e i anjelỳ. Nanao ringa iareo, le nimaraindraigne avao. Fa voa ty fe i Jakoba faie tsy navotso’e i anjelỳ. Hoe i anjelỳ: ‘Votsoro raho handenàko.’ Hoe ty Jakoba: ‘Tsy votsorako rehe naho tsy mea’o tsipe rano raho.’

Nimea’e tsipe rano amy izay ty Jakoba tamy ty fara’e. Fanta i Jakoba amy izay tie tsy hengà i Jehovah hovonoe i Esao reke.

Nahatalake i Esao naho i 400 lahy rey amy izay ty Jakoba naho fa nimaraindraigne. Nandeha taloha i keleia’ey ey ty Jakoba sady niankohoke impito tagnatreha i Esao eo. Nilay nanalaka an-drahalahi’e ty Esao, le nifamihigne iareo. Sambe nitagny iareo roe lahy, sady nilongo indraike. Ino ty nitsapa i Jehovah naho fa nanao ze hilongoa iareo ty Jakoba?

Fara’e, nandeha noly amy izay ty Esao, le nanohy i lia’ey ka ty Jakoba. Nanagn’anake 12 lahy ty Jakoba, le i Robena, Simeona, Levy, Joda, Dana, Naftaly, Gada, Asera, Isakara, Zebolona, Josefa naho i Benjamina. Nampiasa i Josefa hagnavotse ty vahoa’e ty Jehovah. Fanta’o vao ty anto’e? Andao fa hotreantikagne.