Agnisa ty ana-dahy i Jakoba fara’e ty Josefa. Trea o zoke’e reo tie nanjare teà i Jakoba mandikoatse iareo ty Josefa, le nialogne naho nalaigne aze iareo. Nagninofy ty Josefa tafara tatoy. Naho fa nitantarae’e tamo o rahalahi’e reo ze raha zay, le nieretseretse iareo tie hiankohoke ama’e naho fa indraike andro agne. Izay ty nahavy iareo nalaigne i Josefa.

Niarak’agnondry narine ty tanà i Sekema tagne o rahalahi’e reo tie indraike. Nirahen-dra’e hagnente iareo agne ty Josefa. Ie naho fa nahatalake i Josefa mbe lavitse avao iareo, le nanao tihoe: ‘Indroy i mpagninofỳ lahireo! Andao hovonoentikagne!’ Tsinepa iareo amy izay reke, le natora iareo agnate ty lavake laleke. Faie hoe ty Joda rahalahy iareo: ‘Tsy vonoegne reke ry kiahe fa andao havarontika ho ondevo.’ Nisy midianita mpivarotse handeha Ejipta agne nandalo, le navaro iareo volafotsy 20 tama’e ty Josefa.

Najobo iareo amy ty lion’ose i akanjo i Josefay, le nandese iareo mbaman-drae’e mbeo sady hoe iareo: ‘Tsy i akanjo i Josefay vao itoio?’ Nieretseretse ty Jakoba tie nihane ty biby hako i ana’ey. Nanahelo mafe reke, le tsy nimete nampionognegne.

Navarotse tamy ty lahilahy manam- pahefagne raike atao tihoe Potifara ty Josefa ta Ejipta agne. Faie nagnampe aze avao ty Jehovah ty tagne. Trea i Potifara tie nanao soa ty asa’e ty Josefa, le natokisa’e. Tsy ela ty Josefa le nagnankina’e ty fanagna’e iaby.

Trea i valy i Potifaray fa tovolahy sady natanjake ty Josefa, le nirehafa’e isan’andro tie: ‘Avia handre amako.’ Faie tsy nimete ty Josefa sady hoe reke: ‘Raha loza an’izao! I Potifara matoky ahy. Ihe ka vali’e, sady manota aman’ Andrianagnahare raho naho manao izay!’

Sinere i valy i Potifaray handre ama’e ty Josefa tie indraike. Tsinepa’e tamy i akanjo’ey reke faie nilay. Naho fa niavy an-tragno ao ty Potifara, le navandeza i vali’e tie nao ho nagnisy raty aze ndra ho namahotse aze ty Josefa. Niboseke loatse ty Potifara, le ginadra’e ty Josefa. Faie tsy nagnaligno i Josefa ty Jehovah.

Tamy i Josefa tam-pigadragne aoy, le nagninofy ty Farao mpanjaka i Ejipta. Tsy nisy nahay ty dika i nofỳ. Nirehake tama’e ty mpanompo’e raike tie i Josefa ty mahay magnazava aze. Nampagalae i Farao tsiela ty Josefa.

Hoe ty Farao tama’e: ‘Hazavao amako ty nofiko toy.’ Le hoe ty Josefa: ‘Hisy hanegne agnate ty fito taogne ty Ejipta, faie hisy keré agnate ty fito taogne ka ty afara izay. Mifiliana ndaty hendre raike rehe hamory hanegne, amy izay tsy ho mate ty keré o ndatio.’ Hoe ty Farao: ‘I rehe ty filieko. Ihe ty hataoko manam-pahefagne magnarakarake ahy.’ Akore ty nahafantara i Josefa ty dika i nofy i Faraoy? I Jehovah ty nagnampe aze.

Namory hanegne ty Josefa tagnate ty fito taogne. Tafara izay, le nisy keré tagnate ty fito taogne. Nivily hanegne tamy i Josefa iaby ty ndaty tamy izay. Fanta i Jakoba tie misy hanegne ty Ejipta agne, le nagnirake folo lahy tamo o ana’eo reke hivily hanegne.

Nimbamy i Josefa mbeo amy izay i zoke’e rey. Le avy le nifanta i Josefa iareo, fa iareo ro tsy nahafantatse aze. Niankohoke tama’e iareo, fa toe izay ty nofy i Josefa tamy ie mbe nikedey. Teà i Josefa ho fantatse tie fa niova i rahalahi’e rey. Le hoe reke: ‘Mpitsikilo nareo! Te hanafike ty tane’ay toy nareo.’ Le hoe iareo: ‘Tsy mpitsikilo zao zahay. Boake a Kanana agne zahay sady 12 mirahalahy. Fa nimate ty raike ama’ay, fa ty faralahi’ay aman-drae’ay agne.’ Hoe indraike ty Josefa: ‘Andese’areo atoy ze faralahi’areo zay mba hinoako anareo.’ Nandeha noly amy izay iareo.

Lany indraike i hanegney, le nagnirake o ana-dahi’e reo ty Jakoba hiheregne a Ejipta agne. Nindese iareo ty Benjamina tamy izay. Nitsapa hevetse iareo ty Josefa, le naeta’e tamy ty enta i Benjamina ao i kopy volafotsi’ey soa tie atao nangalare iareo. Taitse iareo naho fa nitrea i mpanompo i Josefa rey tamy i enta i Benjaminay ao i kopỳ. Nihalalea iareo mafe ty Josefa tie ndraleo izahay ro sazeagne fa tsy i Benjamina.

Fanta’e amy izay tie fa niova i zoke’e rey. Tsy ta’e ty ranomaso’e, le nitagny reke sady nirehake tie: ‘Izaho i Josefa rahalahi’areoy. Mbe velogne vao ty Baba?’ Gaga iareo. Rineha’e iareo tie: ‘Ko manahelo amy ty raha natao’areo ahy, fa Andrianagnahare ty nagnirake ahy atoy mba hagnavotagne anareo. Molia malaky nareo, le andese’areo atoy ty Baba.’

Noly iareo hitantara ze vaovao soa zay taman-drae’e sady hangalake aze hoe Ejipta agne. Ela ty ela ta nifankatrea indraike ty Josefa naho i rae’e.