Nampirehafen’Andrianagnahare tamy i Farao ty Mosesy naho i Arona tie: ‘Naho tsy enga’o handeha o vahoakò, le handefasako laletse ninìke ty tane’areo toy.’ Nanjare feno laletse ty tragno o Ejipsianao ndra ty mpagnarivo zay ndra ty mahantra. Feno laletse iaby ty tane iareo fa ty ta Gosena tao avao ro tsy nisy, satria tao ty nitoboha o Israelitao. O Ejipsianao avao ty niazo i lozay nanomboke tamy i loza fahefatsey. Nangatake ty Farao tie: ‘Ampagnafaho i Jehovah ty laletse toa, amy izay alefako o vahoa’e reo.’ Naho fa nafaha i Jehovah i laletse rey, le niova hevetse indraike ty Farao. Nandrambe lesogne vao ty Farao?

Hoe ty Jehovah: ‘Naho tsy alefa’o avao o vahoakò, le harare naho ho mate iaby ty bibi’areo.’ Ie nimaray igne, le nimate iaby ze biby iareo, fa ty ahy o Israelitao avao ro tsy nimate. Faie le mbe nizizo avao ty Farao.

Nirahe i Jehovah ho amy i Farao mbeo indraike ty Mosesy hanorake lavenoke magnambone. Nanjare lemboke amboney i lavenokey, le nameno o Ejipsianao. Niterake bae mangirifiry nahazo iareo naho ty biby tao i lembokey. Faie mbe tsy nimete nandefa iareo avao ty Farao.

Nampiheregne i Jehovah tamy i Farao mbeo ty Mosesy hirehake tie: ‘Mbe tsy alefa’o avao o vahoakò? Hisy havandra hirarake amy ty tane toy eto naho maray.’ Maray igne amy izay, le nagnavandra naho nangotroke sady nisy afo napò i Jehovah. Io ty loza samba’e nitrea o Ejipsianao amparak’izay. Simba iaby i voley naho ty hatae mitiry, fa ty ta Gosena tao nilamigne avao. Hoe ty Farao: ‘Ampijanogno i Jehovah ty havandra toy, fa halefako amy izay nareo.’ Naho fa nijanogne i oragney naho i havandray, le mbe tsy nimete ty Farao.

Hoe ty Mosesy: ‘Ho hane ty valala ze vole mbe tsy nisimba tamy i havandray.’ Nisy valala maro nihinagne ze raha mbe nisisa tan-tetekey naho ze hatae mbe nisy. Nangatake ty Farao tie: ‘Ampandroaho i Jehovah o valalao.’ Mbe nizizo avao ty Farao ndra tie fa najano i Jehovah i valalay.

Nisaontsia i Jehovah ty Mosesy tie: ‘Atsangano magnambone i tagna’oy.’ Naiegne tampoke i lagnitsey. Telo andro naiem-bey avao sady tsy nahatrea ndra inogn’ino o Ejipsianao, fa ty tamo o Israelitao agne avao ro nazava.

Hoe ty Farao tamy i Mosesy: ‘Mahazo mandeha nareo, fa o bibi’areò ro mijanogne eto.’ Hoe ty Mosesy: ‘Tsy maintsy mandeha o bibi’aio, fa hanoa’ay fagnatetse hoahy i Jehovah.’ Boseke ty Farao sady nikorake tie: ‘Mandehana nareo kahe! Fa naho mbe miheregne atoy rehe le hovonoeko!’

Nirehake tamy i Farao ty Mosesy fa tsy hiheregne ama’e agne sasa. Faie taloha ty handehana’e, le hoe reke tamy i Farao: ‘Naho fa sasakalembey, le ho mate iaby ze ana-dahy o Ejipsianao voaloha’e, agnisa’e ty ana-dahy i Farao naho ty ana ty ndevo.’

Nampanoe i Jehovah hanegne manokagne o Israelitao. Hoe reke: ‘Mamonoa agnondry lahy ndra ose lahy tao’e raike nareo, le asio amy ty lio’e ty lala’areo. Atonò ty hena’e, le hano reketse ty mofo tsy misy karbonate. Miakanjoa naho magnisia kapa sady mivognona handeha, fa halefako nareo ty androany halegne.’ Nifale o Israelitao tamy izay.

Ie sasakalembey, le nisy anjely i Jehovah nitsoeke ty tragno o Ejipsianao. Ze tragno tsy nisy lio ty ambone ty lala’ey, le nimate ty ana’e voaloha’e. Fa ze tragno nisy lio ty lala’e, le niriogna i anjelỳ avao. Mate iaby ndra ty ana ty mahantra ndra ty ana ty mpagnarivo. Ndra raike tsy nimate amy ty ana o Israelitao.

Nimate ka i ana-dahy i Faraoy, le ndra hanegne tsy nitendre’e tamy izay. Nirehake tamy i Mosesy naho i Arona malaky reke tie: ‘Akia mialà ty eto nareo! Tompò o Andrianagnahare’ areo zao, le ento ka ndra o bibi’areò!’

Zava volagne ty nialà o Israelitao boake Ejipta agne. Nilamigne iareo, satria niharo lia ze keleian-draike. Nisy lahilahy 600 000, sady nisy ajaja aman’ampela maro. Maro ty ndaty tsy israelita niarake tamy iareo mba hanompo i Jehovah ka. Avotse o Israelitao tamy ty fara’e!

Mba hahatsiarova iareo ty fagnavota i Jehovah, le manao hanegne manokagne iareo isan-taogne. Pasake ty firehafagne aze.