LESOGNE 52
Nagnino ro Tena Lahibey ty Fiakanjontikagne Naho ty Pozintikagne?
Sambe managne ty akanjo teantikagne naho ty pozy teantikagne tika. Misy toro lalagne tsiampeampe sady tsotra ty amy Baiboly ao. Naho magnorike irey tikagne, le ho soa ty akanjo agnisiantikagne naho ty pozintikagne sady hampifale i Jehovah. Andao hodinehentikagne o toro lalagne rehoe.
1. Inogne iaby ty toro lalagne magnampe antikagne hahay hifily ty akanjo hagnisiantikagne naho ty pozintikagne?
Toko’e hagnisy akanjo “milamigne soa, naho magneva vaho aman-kilala” tikagne. Toko’e ho trea amy ty pozintikagne ka tie “mpivavake aman’Andrianagnahare” tikagne. (1 Timoty 2:9, 10) Dineho ty toro lalagne efatse retoagne: 1) Toko’e ‘hilamigne soa’ ty akanjontikagne. Va’e tsikari’o tam-pivoriagne agne fa sambe hafa ty fomba fiakanjo naho ty pozy ty vahoa i Jehovah. Faie sambe magnomey voninahitse i Andrianagnahare tompoentikagney ty fomba fiakanjo’ay naho ty pozi’ay. 2) Toko’e hagnisy akanjo “magneva” tikagne. Ty dika izay akanjo tsy manaitaitse ndra misarike maso o ndaty. 3) Toko’e hagnisy akanjo “aman-kilala” tikagne. Ty dika izay, dinehentikagne soa ze akanjo hagnisiantikagne fa tsy ze lamody miboake le horihentikagne iaby. 4) Toko’e ho trea amy ty pozintikagne tie “mpivavake aman’Andrianagnahare” tikagne. Amy izay le avy le ho fanta o ndatio tie manompo i Andrianagnahare maregney tikagne.—1 Korintianina 10:31.
2. Misy voka’e amo o mpiharo finoagne amantikagneo vao ty pozintikagne?
Maregne fa afake mifily ze akanjo naho ze pozy teantikagne tika. Faie mila eretseretentikagne ka tie, ino ty ho voka izay amy ty hafa. Toko’e hikezake mafe tikagne mba tsy hanao raha hahaboseke ty hafa, fa “hanao ze mahafale ty [namantikagne] amy ze soa, le ze mampahery aze.”—Vakio ty Romanina 15:1, 2.
3. Nagnino ty pozintikagne ro va’e hahavy ty hafa hagnorike ty fivavahagne maregne?
Maregne fa mikezake manao akanjo milamigne soa avao tikagne isan’andro. Faie vao mainke toko’e hambenantikagne soa ty fiakanjontikagne naho ty pozintikagne naho fa hivory vaho hanompo tikagne. Tsy teantikagne naho io ka ro hahavy ty hafa tsy hitsanogne i hafatse torientikagney. Teantikagne ty fiakanjontikagne vaho ty pozintikagne naho hahavy o ndatio hagnorike ty fivavahagne maregne sady “hagnamigne ty fampianara i Andrianagnahare Mpandrombake antikagney.”—Titosy 2:10.
ANDAO HANDINEKE TY PITSOPITSO’E
Hodinehentikagne ato tie, ino ty hagnampe antikagne hagnisy akanjo naho pozy mete amy ty Kristiana.
Trea amy ty pozintikagne tie magnaja o ndaty managne fahefagneo tikagne. Ndra tie mahafantatse ty am-pontikagne agne aza ty Jehovah, le toko’e ho trea amy ty fiakanjontikagne naho ty pozintikagne tie magnaja aze tika
4. Magnaja i Jehovah tikagne naho fa milamigne soa ty pozintikagne
Nagnino tikagne ro toko’e hitao soa amy ty pozintikagne? Vakio ty Salamo 47:2, sady iharò midineke ty fagnonteneagne retoa:
Misolo tegna i Jehovah tikagne. Nagnino ro magnampe antikagne hagnisy akanjo milamigne soa ty fitadidiagne izay?
Naho ty heve’o, nagnino ty pozintikagne ro toko’e hambenagne soa naho fa mandeha mivory naho manompo? Ino ty anto’e?
5. Ino ty hagnampe antikagne hahay hifily ty akanjo hagnisiantikagne naho ty pozintikagne?
Toko’e halio sady hifagnentagne amy ze raha ataontikagne ty akanjo agnisiantikagne ndra mora ty vili’e ndra sarotse. Vakio ty 1 Korintianina 10:24 naho ty 1 Timoty 2:9, 10. Iharò midineke naho fa avy eo tihoe, nagnino tikagne ro tsy toko’e hagnisy akanjo...
maloto ndra misavoritake?
mititìtse, mangarakarake sady manaitaitse?
Maregne fa tsy ambane ty lalà i Mosesy ty Kristiana. Faie magnampe ty Kristiana hahafantatse ty fomba fiheve i Jehovah i lalàna rey. Vakio ty Deoteronomia 22:5, sady iharò midineke ty fagnonteneagne toy:
Naho lahilahy rehe, nagnino ro tsy toko’e hagnisy akanjo hahavy azo hoe sare ampela, ndra naho ampela rehe, nagnino ro tsy toko’e hagnisy akanjo hahavy azo hoe sare lahy?
Vakio ty 1 Korintianina 10:32, 33 naho ty 1 Jaona 2:15, 16, sady iharò midineke ty fagnonteneagne retoa:
Nagnino ty pozintikagne ro tsy toko’e hahavy ty mpiharo tanàgne amantikagne ndra ty mpiharo finoagne amantikagne ho boseke amantika?
Manao akore ty fiakanjo naho ty pozy ty ndaty amy ty misy anareo ey?
Naho ty heve’o, mete amy ty Kristiana vao rey? Ino ty anto’e?
Tsy voatere hitovy ty fiakanjontikagne naho ty pozintikagne faie sambe afake mampifale i Jehovah iaby
MISY TY MIREHAKE TIE: “Ze akanjo teako ro agnisiako.”
Mitovy hevetse amy izay ka vao rehe? Ino ty anto’e?
FAMINTIGNAGNE
Magnaja i Jehovah naho ty ndaty hafa tikagne naho milamigne soa ty fiakanjontikagne naho ty pozintikagne.
Fameregnagne
Nagnino ro lahibey amy i Jehovah ty fiakanjontikagne naho ty pozintikagne?
Inogne iaby ty toro lalagne hagnampe antikagne mba hahay hifily ty akanjo agnisiantikagne naho ty pozintikagne?
Nagnino ro misy voka’e amy ty fomba fihevera ty hafa ty fivavahagne maregne ty akanjo agnisiantikagne naho ty pozintikagne?
FAGNAZAVAGNE FAGNAMPE’E
Hanao akore ty fieretsereta o ndatio azo naho mahatrea ty akanjo agnisia’o iareo?
Nagnino rehe ro toko’e handineke soa hey aloha ty hanoa’o tombon-kalama?
“Ino ty Rehafe ty Baiboly Miomba ty Fanoagne Tombon-kalama?” (Lahatsoratse amy jw.org ao)
Ho trea’o ato ty toro lalagne hagnampe azo hahay hifily ty akanjo agnisia’o naho ty pozi’o.
“Magnomey Voninahitse An’Andrianagnahare vao ty Fiakanjo’o?” (Fitalakesan-davitse Septambra 2016)
Sarotse amy ty ampela raike toy ty nagneke ty safidy ty hafa miomba ty akanjo naho ty pozy iareo. Ino ty nagnampe aze hiova?
“Fiakanjo Naho Pozy ty Nisakagne Ahy” (Mifohaza! 22 Desambra 2003)