Miambane

INO TY DIKA IZAY?

Magnaja ty hafa ty ndaty miambane. Tsy magnambone tegna reke sady tsy mitamà tie hohajaegne bey. Mipay ze hahasoa ty hafa ka reke sady vognogne hiana-draha boake amy iareo.

Misy ty mieretseretse tie votro ze ndaty miambane. Faie bey herim-po iareo kanao mahavita mieke ty fahadisoa’e sady magneke tie voafetra avao ty raha vita’e.

NAGNINO ZAY RO TENA ILAEGNE?

• Hifandrambe soa amy ty hafa rehe. “Mora mahazo namagne ty ndaty miambane” sady “mora mifandrambe amy ty hafa” arake ty boke tihoe Miparitake Manahake o Aretegneo o Hatea Tegnao (angilé).

• Hagnampe aze zay naho fa afara agne. Hagnampe ohatse o toetse iohoe naho fa mipay asa reke. Hoe ty Pr. Leonard Sax: “Ho sarotse amy ty tanora raike ty hahatrea asa naho magnambone tegna reke sady tsy mieke tie voafetra avao ty raha vita’e. Va’e ho voarae reke naho mikezake mamantatse soa ze raha také i sefoy ama’e.”a

AKORE TY HAMPIANARAGNE AZE?

Ampeo reke mba tsy hagnambone tegna.

TORO LALAGNE: “Faie naho misy ty mihevetse ty tegna’e ho ambone ie amy izao reke tsisy dika’e, le mamitake ty tegna’e reke.”​—Galatianina 6:3.

• Ko fitahegne reke. Te handrisike ty ana’e ty rae aman-drene ila’e, le mirehake ama’e tihoe “ho tanterake iaby ze raha nofinofise’o” ndra tihoe “ho vita’o iaby zay.” Faie tsy hoe izay o fiaignagneo. Ho tomombagne ty raha atao ty ana’o naho managne tanjogne azo tratraregne reke sady mikezake mafe magnatratse aze.

• Mitaoa naho fa midera aze. Tsy handrisike ty ana’o hiambane rehe naho mirehake ama’e tihoe “tena hafa” rehe. Rehafo ama’e tihoe inogne amy ty raha natao’e ty mahafale azo.

• Fero ty raha atao’e naho ty fotoagne lani’e amo o tragnom-porarotse iharoharoagneo. Mateteke mampideradera ty talenta’e naho ty raha vita’e o ndatio naho fa mampiasa tragnom-porarotse iharoharoagne. Faie tsy izay ty atao tihoe miambane.

• Risiho reke mba hiala tsiny malaky. Ampeo reke hahatrea ty raha tsy mete natao’e naho hieke ty hadisoa’e.

Ampeo reke hahay hankasitrake.

TORO LALAGNE: “Asehò fa mahay mankasitrake nareo.”​—Kolosianina 3:15.

• Mankasitrake o raha finorogneo. Toko’e hianatse hankasitrake o raha finorogneo o ajajao. Toko’e ho fanta’e ka fa tsy ho velogne tikagne naho tsy misy i raha rey. Agnisa izay o ranò naho o tiokeo vaho o hanegneo. Ampiasao o ohatse rehoe mba hagnampeagne aze ho tea naho hankasitrake o raha finorogneo.

• Mankasitrake o ndatio. Hazavao amy ty ana’o tihoe sambe managne ty mampiambake aze ty ndaty tsikiraidraike. Tsy toko’e hialogne areke reke naho misy mahay raha mihoatse aze ndra mahavita raha soa mihoatse aze. Toko’e hiana-draha boake amy iareo reke.

• Misaora amy ty fo. Ampeo reke mba tsy hanao tsianjere avao i tihoey “misaotse”, fa tena vokatse ty fo’e ty mirehake izay. Hahavita hiambane reke naho mahay mankasitrake.

Ampianaro reke tie mahasoa ty magnampe ty hafa.

TORO LALAGNE: “Amy ty fiambaneagne, le ao ty ndaty tsikiraidraike hihevetse ty hafa ho ambone noho ty tegna’e. Le manoa ze hahasoa ty hafa ty tsikiraidraike ama’areo fa tsy ze hahasoa ty vatan-tegna’e avao.”​—Filipianina 2:3, 4.

• Ampanò raha reke. Ino ty hiseho naho tsy ampanoe’o raha ty ana’o? Va’e hieretseretse reke tie ty raha atao’e ro tena lahibey fa tsy ty tolon-draha an-tragno ao. Faie ty fanoagne tolon-draha ty tena lahibey noho o fihisagneo. Hazavao ama’e fa magnampe ty hafa reke naho manao tolon-draha. Amy izay ka ho fale sady hagnaja ty hafa reke.

• Anò tsapa’e fa soa ty magnampe ty hafa. Hahavy ty ana’o ho matotse zay. Ampeo areke reke hamantatse tie ia ty mila fagnampeagne sady ino ty azo’e atao. Derao reke, le ampeo naho fa mikezake magnampe ty hafa.