Miana-draha Boake Amy ty Ndaty Bey

INO TY DIKA IZAY?

Mipay ndaty bey hitari-dalagne naho hanoro hevetse aze o ajajao. Ty rae aman-drene ty toko’e hanao izay, faie afake magnampe avao ka ty ndaty bey hafa.

NAGNINO ZAY RO TENA ILAEGNE?

Tsy le mifandrambe amy ty ndaty bey ty ajaja amy ty tane maro agne. Eretsereto zao:

• Lany an-dakilasy agne ty ankamaroa ty fotoa o ajajao agnate i androy. Faie ajaja ty tena maro agne naho oharegne amy ty ramosé.

• Tsy mahatrea ty rae aman-drene’e ka ty ajaja ila’e naho fa rava nianatse satria sambe miasa iareo mirovaly.

• Mandany enen-dera eo ho eo isan’andro amo o fitaovagne elektronikeo ty ajaja 8 hatrake amy ty 12 taogne a Etazonia agne arake ty fagnadikadignagne raike.a

Hoe ty boke Ko Afoe ty Ana’o (angilé): “Tsy amy ty rae aman-drene’e ndra amy ty ramosé’e ndra amy ty ndaty bey hafa o tanorao ro mipay torohevetse fa amy ty tanora ... mitovy taogne ama’e. Irey ty atao’e modeli’e.”

INO TY AZO’O ATAO?

Manokàgna fotoagne hiarahagne ama’e.

TORO LALAGNE: “Zaro amy ze lalagne toko’e homba’e o ajajao, amy izay reke ndra tie fa antetse le tsy hiala amy izay.”​—Ohabolana 22:6.

Fa voajagnahare amy ty ajaja ao tihoe mipay ty tari-dala ty rae aman-drene’e. Ndra tie fa mihabey aza reke, le mbe ty toroheve ty rae aman-drene’e avao ty tea’e mihoatse ty ahy ty ndaty mitovy taogne ama’e. Hoe ty Pr. Laurence Steinberg, amy ty boke raike tihoe Irehe Naho ty Ana’o (angilé): “Tea o ajajao ho fantatse ty heve’o, le tsanogne’e ze rehafe’o ndra tie tsy heké’e iaby aza.”

Omeo tari-dalagne areke ty ana’o satria izay ty raha paliae’e. Manokàgna fotoagne hiarahagne ama’e, le rehafo ama’e ty heve’o naho ty raha lahibey ama’o vaho ty raha niaigna’o.

Mipaliava ndaty hanoro hevetse aze.

TORO LALAGNE: “Ho hendre ze miarake amy ty hendre.”​—Ohabolana 13:20.

Ia ty ndaty bey trea’o azo atokisagne ho modely hoahy ty ana’o? Magnino reke naho iangaviagne mba hanokagne fotoagne hiarahagne amy ty ana’o? Faie mbe andraiki’o avao ty miteza ty ana’o, fa magnampe avao i ndatỳ. Mirehake ty ohatse miomba i Timoty naho i apostoly Paoly ty Baiboly. Ndra tie fa ndaty bey aza ty Timoty, le tena nahasoa aze ty niarake tamy i Paoly. Ndra i Paoly ka aza nandrambe soa.​—Filipianina 2:20, 22.

Maro hinane zao ty keleiagne tsy miarake mitoboke fa mifankalavitse. Va’e ho lavitse ty ana’o areke ty dadabei’e naho ty bebei’e ndra ty dadatoa’e naho ty nenitoa’e. Inogne ty azo’o atao naho izay ty raha misy? Mipaliava ndaty bey hafa managne toetse soa tea’o hotsikombe i ana’oy.