Managne Toetse Soa

INO TY DIKA IZAY?

Mahay magnambake ty soa amy ty raty ty ndaty managne toetse soa. Tsy entem-po reke fa magnorike toro lalagne avao amy ze raha atao’e ndra tie tsy misy mahatrea aza reke.

NAGNINO ZAY RO TENA ILAEGNE?

Maharey hevetse diso maro miomba tihoe soa naho raty o ajajao, ndra am-pianaragne agne zay ndra amy ty hira ndra amy ty fandaharagne amy ty tele. Va’e hisalasala areke reke tie maregne sa diso ty raha ampianare ty rae aman-drene’e aze.

Tena sarotse hoahy o tanorao zay. Hoe ty boke tihoe Tsy Debà Bey Avao (angilé): “Toko’e ho fanta’e tie maro ty ndaty mamoresé aze hanao ty raha ila’e. Ho tea o ndatio zao reke naho manao izay. Mila mianatse mijoro amy ty heve’e reke, le hanao raha mifagnarake amy ty raha nampianaregne aze avao ndra tie tsy tea ty nama’e aza.” Mbe kede areke o ajajao, le fa mila ampianaregne ireo.

AKORE TY HAMPIANARAGNE AZE?

Ampeo reke hahay hagnambake ty soa amy ty raty.

TORO LALAGNE: “Ty ndaty matotse managne fahaiagne mandineke sady fa nampiofagnegne hagnambake ty soa amy ty raty, satria nampiasaegne.”​—Hebreo 5:14.

• Atorò amy ze raha atao’o zay. Naho misy ndaty tsy magnomey seza hoahy ty ndaty bey ohatse, le rehafo reke tie: “Toko’e ho soa fagnahy tika fa tsy hanao manahake io.” Naho misy mavande, le afake mirehake rehe tie: “Tsy mete zay.”

• Hazavao tie nagnino ty raha raike ro soa ndra raty. Agnonteneo ohatse reke tie: Nagnino ro mahasoa avao ty manao ty maregne? Nagnino ro va’e ho simba ty fifandrambesantikagne amy ty namantika naho mavande tika? Nagnino ro raty ty mangalatse? Mikezaha mampisaintsaigne aze hoe izay.

• Anò azo’e soa tie mahasoa ty manao ty maregne. Azo’o atao ty mirehake tihoe: “Naho manao ty maregne rehe, le hatoky azo o ndatio”, ndra tihoe: “Naho soa fagnahy rehe, le ho tea o ndatio.”

Anò fomba fiaigna ty keleia’areo tihoe manao ty maregne.

TORO LALAGNE: ‘Mikezaha handinen-tegna lognandro.’​—2 Korintianina 13:5.

• Toko’e ho fomba fiaigna’areo tihoe manao ty maregne. Amy izay nareo afake mirehake tihoe:

  • “Izahay tsy mba mavande zao.”

  • “Tsy mikasi-tagnagne ndra mifanointoigne ama o ndaty zahay.”

  • “Tsy magnompa ndra magnambanembane ndaty zahay”

Amy izay hotrea ty ana’o fa tsy tihoe magnorike fitsipike bey avao ty keleia’areo fa tena mampiambake anareo tihoe manao ty maregne.

• Rehafo mateteke amy ty ana’o ty raha hevere ty keleia’areo tie mete ndra tsy mete. Ampitahao amy ze rehafegne am-pivoriagne agne ndra rehafegne amo o tele eo zay. Naho fa misy raha miseho, ohatse, le agnonteneo reke tie: “Inogne zao ty ho natao’o naho ihe ty teo?” “Akore zao ty ho nataontikagne naho ty keleiantika ty nitratse izay?”

Ampeo reke ho tapa-kevetse hanao ty maregne lognandro.

TORO LALAGNE: “Manàgna feo ty fieretseretagne malio.” ​—1 Petera 3:16.

• Derao reke naho fa manao raha soa. Hazavao ka ty anto’e idera’o ty ana’o. Afake mirehake ohatse, rehe tie: “Tena fale raho fa nirehake ty maregne rehe.” Naho mieke ka reke tie nanao raha tsy mete, le derao reke satria nirehake ty maregne, vaho izay rehe magnitsy aze.

• Ahitsio reke naho fa manao raha tsy mete. Ampeo reke hahatsapa tie tompon’andraikitse amy ze raha atao’e reke. Hazavao ama’e tie inogne i raha tsy mete natao’ey, sady magnino i rahay ro mifanohetse amy ze hevere ty keleia’areo ho mete. Tsy manao izay ty rae aman-drene ila’e, satria tsy tea iareo ho kivy ty ana’e. Faie naho rehafe’o amy ty ana’o ty tsy mete natao’e, le hagnampe aze hahay hagnambake ty soa naho ty raty zay.