FAGNAJARIAM-BOKE TY Vavolombelo i Jehovah
FAGNAJARIAM-BOKE TY
Vavolombelo i Jehovah
Tandroy
  • BAIBOLY
  • BOKE AMAN-GAZETE
  • FIVORIAGNE
  • Ia o Vavaolombelo i Jehovah Zao?
    Ia ty Magnorike ze Zoton’arofo i Jehovah?
    • LESOGNE 1

      Ia o Vavaolombelo i Jehovah Zao?

      Fire ty Vavaolombelo i Jehovah fanta’o? Va’e ho mpiharo tanàgne ndra mpiharo miasa ndra mpiharo mianatse ama’o ty ila’e ama’ay. Kera varagne fa nagnambara ty raha rehafe o Baibolio ama’o ka zahay. Ndaty manao akore zahay Vavaolombelo i Jehovah sady inogne ty mahavy anay mirehake ty raha inoa’ay amo o ndatio?

      Ndaty manahake azo avao zahay. Boake amy ty karazagne sambe hafa zahay. Fa nivavake tamy ty fivavahagne hafa agne ty ila’e ama’ay tie taloha. Ty ila’e ka tsy nino an’Andrianagnahare. Nandineke soa ty raha rehafe o Baibolio zahay, le izay ty nahavy anay ho Vavaolombelo i Jehovah. (Asan’ny Apostoly 17:11) Tsy nisy naneresere anay fa izahay avao ty nijobogne hanompo i Jehovah.

      Mahasoa anay ty mianatse Baiboly. Manan-draha manahiragne manahake o ndatio avao ka zahay sady va’e hanao hadisoagne. Faie mikezake mafe zahay hagnorike ty fanoroa o Baibolio amy ty fiaigna’ay sanandro. Magnasoa ty fiaigna’ay ty fanoa’ay izay. (Salamo 128:1, 2) Izay ty mahavy anay hagnambara ze raha nianara’ay agnate Baiboly ao amy ty ndaty hafa.

      Mianatse naho magnorike ty lilin’Andrianagnahare zahay. Izay ty mahavy anay hanao ty maregne, hiasy ndaty, ho soa fagnahy naho falefale lava sady sambatse. Mihasoa ty fiaigna’ay sady mihavagnogne zahay. Mifampikoko ka ty keleia’ay. Mino zahay fa “tsy mirihy ndaty ty Andrianagnahare.” Izay ty mahavy anay hoe niharo troke ndra tie sambe managne ty karaza’ay fa tsy mifampirihy. Miharo hevetse ka zahay fa tsy manao polotike. Ndra tie manahake o ndatio zahay, le misy raha mampiambake anay.—Asan’ny Apostoly 4:13; 10:34, 35.

      • Inogne ty maha hambagne ty Vavaolombelo i Jehovah amy ze kila ndaty?

      • Inogne ty raha ianara ty Vavaolombelo i Jehovah agnate Baiboly ao?

  • Inogne ty Anto’e Anoagne Anay Vavaolombelo i Jehovah?
    Ia ty Magnorike ze Zoton’arofo i Jehovah?
    • LESOGNE 2

      Inogne ty Anto’e Anoagne Anay Vavaolombelo i Jehovah?

      Maro ty mieretseretse fa agnaram-pivavahagne vaovao o Vavaolombelo i Jehovah zao. Fa losotse ty 2 700 taogne zay ty nanognonagne ze mpanompon’Andrianagnahare tie ‘vavaolombelo’e.’ (Isaia 43:10-12) Mpianatse Baiboly ty nahafantaragne anay taloha ty taogne 1931. Inogne ty anto’e nagnovàgne ty agnara’ay tihoeke Vavaolombelo i Jehovah?

      Soa tie hahafantaragne ty Andrianagnahare ivavaha’ay. Naho vaho sinoratse o Baibolio, le niherekeregne ao fa ho im-7 000 ty tahinan’Andrianagnahare atao tihoeke Jehovah. Maro ty mpandika Baiboly nanolo o tahinagne iohoeke tie Andriatompo ndra Andrianagnahare. Nisaontsy tamy i Mosesy ty Andrianagnahare tie Jehovah ‘ty agnara’e nainai’e.’ (Eksodosy 3:15) Tea’e hatoro fa tsy mira amy ty andrianagnahare hafa reke. Fale zahay fa minday ty tahinan’Andrianagnahare!

      Soa tie hahafantaragne ty asa anoe’ay. Fa nisy “vavaolombelogne tsiefa” nanoro ty finoa’e i Jehovah ty taloha. I Abela ty voaloha’e, nanonjohy aze ty Noa, i Abarahama, i Saraha, i Mosesy naho i Davida. (Hebreo 11:4–12:1) Vavaolombelo i Jehovah manahake iareo ka zahay. Manahake ty vavaolombelogne miaro ty ndaty maren-tane atao ankety zahay. Mikezake mampahafantatse ty maregne miomba an’Andrianagnahare ka zahay.

      Manahake i Jesosy zahay. “Vavaolombelogne mahimbagne naho maregne” ty anognona o Baibolio i Jesosy. (Apokalypsy 3:14) Ty vatantegna i Jesosy ka ro nirehake tie ‘nagnambara ty maregne’ miomba an’Andrianagnahare naho ‘nampahafantatse ty tahina’e’ reke. (Jaona 17:26; 18:37) Ze mpanonjohy ty lia i Kirisity ka toko’e hinday naho hampahafantatse ty tahinan’Andrianagnahare. Izay ty kezahe’ay Vavaolombelo i Jehovah hanoegne.

      • Inogne ty anto’e nagnovàgne ty agnara’ay tihoeke Vavaolombelo i Jehovah?

      • Fa fire taogne zay ty nanagna i Jehovah vavaolombelogne?

      • Ia ty Vavaolombelo i Jehovah lahibey?

      ANÒ RETOAGNE

      Anò ty hahafantara’o ze Vavaolombelo i Jehovah trea’o. Agnonteneo reke tie: “Inogne ty nahavy azo ho Vavaolombelo i Jehovah?”

  • Akore ty Nahatreavagne Indraike ty Hamarenagne?
    Ia ty Magnorike ze Zoton’arofo i Jehovah?
    • LESOGNE 3

      Akore ty Nahatreavagne Indraike ty Hamarenagne?

      Fa nirehafe ty Baiboly fa hisy mpagnanatse saretsare’e ty amo o Kirisitianagne voaloha’eo, naho fa mate ty Kirisity naho ty apositoly ila’e. (Asan’ny Apostoly 20:29, 30) Le niavy eo vata’e zay. Naharo iareo tamy ty fagnanara o mpanao masimasio ty fagnanara i Jesosy. Izay ty niatomboha ty Fivavahagne Kirisitianagne saretsare’e. (2 Timoty 4:3, 4) Inogne ty mahavy antikagne matoky fa maregne ze raha ampianare ty Vavaolombelo i Jehovah agnate Baiboly ao?

      Nampahafantare i Jehovah ty maregne. Fa nambara’e fa “hitombo ty fahafantaragne ty maregne” amy ty “andro fara’e.” (Daniela 12:4) Nisy ndaty tsy ampe nipay ty hamarenagne agnate Baiboly ao tamy ty taogne 1870. Fanta iareo fa tsy mifanandrife amy ty fampianara ty Baiboly ty raha agnanara o fivavahagneo. Nampea i Jehovah hahafantatse ty hamarenagne ampianare ty Baiboly iareo naho fa nikezake mafe.

      Nimane fianatse ty Soratse Masigne o Mpianatse Baibolio. Mitsikombe ty raha nanoe iareo ka ty Vavaolombelo i Jehovah naho fa mianatse Baiboly mandrake androany. Nianara iareo tsikiraikiraike ze foto-kevetse agnate Baiboly ao. Naho fa nisy andalan-teny raike tsy hay iareo, le mipay andalan-teny hafa hahazoa’e aze iareo. Sorate iareo ty dika i andalan-teny tsy nihai’ey naho fa trea tie tsy mifanipake amy ty raha rehafe ty andalan-teny ila’e. Ty Baiboly avao ro nampagnazavae iareo ty vata’e, le izay ty nahafantara iareo ty hamarenagne. Izay ka ty nahafantara iareo ty tahinan’Andrianagnahare, ty Fanjakà’e, ty vetsovetson’arofo’e miomba o ndatio naho ty tane toy. Nifanta iareo tie tsy misy raha rendre’e o ndatio naho fa mate sady mbe ho velomegne indraike. Votsotse amy ty fampianaran-diso iareo.—Jaona 8:31, 32.

      Tamy ty taogne 1879 ty nahafantara o Mpianatse Baibolio fa toko’e ho tseizegne amy ty tane toy ty hamarenagne. Tamo o taogne iohoeke ty nampiboaha iareo ty gazete Ny Tilikambo Fiambenana Manambara ny Fanjakan’i Jehovah. Mbe mampiboake aze avao zahay mandrake androany. Tane 240 naho firehake fa ho 750 ty agnambara’ay ty hamarenagne. Mbe tsy nisy raha hoe izay indraike!

      • Inogne ty raha niseho tafara ty nahafate i Kirisity?

      • Inogne ty nanoe o Mpianatse Baibolio hahafantara iareo ty hamarenagne?

  • Inogne ty Anto’e Nampiboaha’ay Baiboly?
    Ia ty Magnorike ze Zoton’arofo i Jehovah?
    • LESOGNE 4

      Inogne ty Anto’e Nampiboaha’ay Baiboly?

      Maro ty ndaty nampiboake Baiboly. Natao’ay an-taratasy naho zinara’ay Vavaolombelo i Jehovah tagnate ty taogne maro o Baiboly rehoeke. Faie nitrea’ay tie toko’e hampiboake Baiboly zahay soa tie “hahafantatse soa ty hamarenagne” o ndatio. Fa izay ro zoton’arofon’Andrianagnahare. (1 Timoty 2:3, 4) Naboa’ay tamy ty taogne 1950 ty agnila’e amy ty Baiboly Dikan-drehake Tontolo Vaovao sady fa vita dika amy ty firehake losotse ty 130.

      Mipay Baiboly tsy sarotse ty raha rehafe’e o ndatio. Mampiasa rehake fa haehae ty Baiboly ila’e, hafara’e sarotse amy ty ndaty amy zao ty mahafantatse ty raha rehafe’e. Nisy ndaty mahay raha, nahatrea Baiboly mbe sinoratse tagnagne. Maregne sady nihambagne tamy ty Baiboly voaloha’e o raha nitrea iareo iohoeke. Izay ty nagnampe o mpandika Baibolio hahazo ty heve ty Baiboly amy ty firehake hebereo, aramiana naho girike. Izay ty nahavy anay nandika Baiboly.

      Baiboly ahatreavagne ze raha saontsien’Andrianagnahare ty paliae o ndatio. Tsy toko’e hitsile amy ty nanoratagne o Saontsin’Andrianagnahareo tamy ty voaloha’e ty mpandika Baiboly. Faie ndra maro amy iareo ty nagnafake ty tahinan’Andrianagnahare tihoeke Jehovah.

      Baiboly magnomey asigne i nagnomey azey ro paliaegne. (2 Samoela 23:2) Niherekeregne fa ho im-7 000 tagnate i Baiboly sinoratse tagnagney ao ty tahinagne tihoeke Jehovah. (Henteo ty sare ambaney roagne.) Nahere ty Baiboly Dikan-drehake Tontolo Vaovao tamy ty nisy aze iaby o tahinagne iohoeke. (Salamo 83:18) Nikodebe tagnate ty taogne maro ze nandika o Baiboly iohoeke. Fanjaka ty mamaky aze fa ahatreavagne ty heven’Andrianagnahare. Mamakia Baiboly sanandro rehe ndra managne aze amy ty fireha’o ndra tsy managne.—Josoa 1:8; Salamo 1:2, 3.

      • Inogne ty anto’e nampiboaha’ay Baiboly?

      • Inogne ty toko’e hatao’o sanandro, naho te hahafantatse ty zoton’arofon’Andrianagnahare?

      ANÒ RETOAGNE

      Vakio ty rehake mampizilike ty Baiboly Dikan-drehake Tontolo Vaovao, sady fantaro tie inogne ty andraikitse hoahy ze nandika o Baiboly iohoeke. Henteo naho ampihambagno amy ze Baiboly anagna’o ka ty raha rehafe ty andalan-teny retoagne: Genesisy 25:29; Isaia 14:23; Matio 5:3; 11:12; 1 Korintianina 10:24, 25; Filipianina 1:8.

Fagnajariam-boke Tandroy (2008-2025)
Hiboake
Hizilike
  • Tandroy
  • Hizara
  • Firafitse
  • Copyright © 2025 Watch Tower Bible and Tract Society of Pennsylvania
  • Fifagnekeagne
  • Fifagnekeagne Miomba ty Tsiambaratelo
  • Fanapahan-kevetse Miomba i Fifagnekeagney
  • JW.ORG
  • Hizilike
Hizara