Tsy misy mpitarike fivavahagne karamagne ty ama’ay ao. Manahake ty fiangonagne taloha, le misy mpiandraikitse mahay tendregne ‘hiarake o fiangonagneo.’ (Asan’ny Apostoly 20:28) Androanavi-pagnahy ty anognonagne iareo sady mifandoetse soa aman’Andrianagnahare. Miandraikitse naho miarake o fiangonagneo ty asa iareo. ‘Tsy nisy nanao foresé iareo sady tsy tie hipaliam-panagnagne’ ty anoa iareo izay fa ‘zoto-trò’e.’ (1 Petera 5:1-3) Inogne iaby ty andraikitse anoe iareo?

Miatrake naho miaro anay iareo. Manoro lalagne naho magnampe o fiangonagneo hifandoetse amy i Jehovah o androanavi-pagnahio. Fanta iareo fa andraikitse lahibey nakignen’Andrianagnahare amy iareo ty fanoagne izay. Tsy mikomandy iareo fa magnampe anay ho fale sady mipay ze hahasoa anay. (2 Korintianina 1:24) Hambagne amy ty mpiarake agnondry miambegne soa ty agnondri’e ty atao o androanavi-pagnahio naho fa mamolily anay tsikiraikiraike agnate o fiangonagneo ao.—Ohabolana 27:23.

Magnanatse anay hanao ze zoton’arofon’Andrianagnahare iareo. Mitarike fivoriagne isake heregnandro o androanavi-pagnahio, hagnamafe ty finoa’ay. (Asan’ny Apostoly 15:32) Mazoto ka iareo naho fa mitarike ty asa fagnambaragne. Miharo fagnambara ama’ay iareo sady mampiofagne anay hahay hagnambara naho hagnanatse.

Mampionogne anay iareo. Mampionogne anay amo o Soratse Masigneo iareo ndra amy i Anjomba i Fanjakagney agne ndra an-tragno’ay agne. Amy izay zahay mifandoetse amy i Jehovah.—Jakoba 5:14, 15.

Managne ty asa’e ka iareo hamelomagne ty keleia’e. Fagneva ty hiasiagne iareo fa miasa mafe.—1 Tesalonianina 5:12, 13.

• Inogne ty andraikitse anoe ty androanavi-pagnahy?

• Inogne ty raha anoe’e hampionognagne antikagne?

Mirehake ty Baiboly fa lahilahy tsiampe atao tihoeke ‘mpiandraikitse naho mpagnampe amy ty fanompoagne’ ro tendregne hiatrake ty fiangonagne. (Filipianina 1:1) Maro ty fiangonagne ahatreavagne iareo. Inogne ty asa anoe ty mpagnampe amy ty fanompoagne?

Magnampe o androanavi-pagnahio iareo. Mifandoetse amy i Jehovah o mpagnampe amy ty fanompoagne reo. Ndaty vagnogne naho manao soa ty asa’e iareo, ndra mbe ajalahy ndra fa rangahe. Iareo ty manao ze asa hasaegne agnate o fiangonagneo ao, amy izay o androanavi-pagnahio mimane fagnanaragne naho fitilihagne o mpiharo finoagne ama’aio.

Magnampe o fiangonagneo iareo. Ty ila’e amy iareo ampandrambesegne ze ambahiny avy hagnatreke fivoriagne. Ty ila’e ka manao ze hampandeha soa ty raha magneno alefa am-pivoriagne ao haharezagne i fianaragney. Iareo ka ty mizara boke naho gazete, mikonte ty drala i fiangonagney, mandamigne ty faritane hiasà i fiangonagney sady mamboaboatse ze simba amy i Anjomba i Fanjakagney. Va’e ho tendregne hagnampe ndaty antetse ka iareo. Fagneva ty hiasiagne o mpagnampe amy ty fanompoagneo fa miasa mafe.—1 Timoty 3:13.

Ohatse soa ho tsikombegne iareo. Tendregne ho mpagnampe amy ty fanompoagne ty rahalahy raike naho fa trea tie managne toetoetse Kirisitianagne. Magnamafe finoagne ty lahajaka ndra ty anjara ila’e anoe iareo. Fagneva ty ho tsikombentikagne iareo fa mazoto manao fagnambaragne. Miharo asa amo o androanavi-pagnahio ka iareo, hafara’e falefale iaby ze agnate fiangonagne ao sady tsy mivibìke. (Efesianina 4:16) Naho fa ela ty ela va’e ho androanavi-pagnahy ka iareo.

• Ndaty manao akore ro toko’e ho mpagnampe amy ty fanompoagne?

• Inogne ty asa anoe’e hagnasoagne i fiangonagney?

Miherekeregne amy ty Baiboly Soratse Girike Kirisitianagne ao ty agnara i Barinabasy naho i apositoly Paoly. Mpiandraikitse mpitilike faritse ty irehafagne iareo fa mitilike fiangonagne. Te hagnampe ty mpiharo finoagne ama’e iareo. Tihoeke ty reha i Paoly tie te ‘hiheregne hitilike’ o rahalahy reo indraike raho hahatreavako tie manao akore iareo. Vogno’e handeha an-jato’e kilometatse reke hampionogne iareo. (Asan’ny Apostoly 15:36) Izay ka ty anoe ty mpiandraikitse mpitilike faritse amy izao.

Mampionogne anay iareo. Fa ho 20 ty fiangonagne tilihe ty mpiandraikitse faritse tsikiraikiraike. Ty fiharoa o fiangonagne rehoeke ro atao tihoeke faritse. Tilihe’e agnate ty heregnandro raike naho in-droe isan-taogne ty fiangonagne raike. Maro ty raha soa ianara’ay boake amy iareo mirovaly (naho manambaly). Mikezake mifakafantatse naho miharo manompo ama’ay ka iareo. Mitilike anay an-tragno’ay agne ka iareo naho o androanavi-pagnahio. Tsy izay avao fa mbe manao lahajaka mampionogne anay ka iareo amo fivoriagneo naho o havoriambeio.—Asan’ny Apostoly 15:35.

Magnampe anay iareo. Teà o Mpiandraikitse Faritse hifandoetse amy i Jehovah zahay. Miharo fivoriagne amo androanavi-pagnahio naho o mpagnampe amy ty fanompoagneo ka iareo sady magnomey torohevetse hahavità iareo soa ty asa’e. Magnente ty fandrosoagne vita i fiangonagney sady magnampe ze mpisava lalagne hahay magnambara naho hahay magnanatse iareo. Tea iareo ka ty mifakafantatse amy ze ndaty vaovao amy i fiangonagney eo sady fantare’e ka ty ezake anoe i ndatỳ hiharoa’e amy i Jehovah naho ty fandamina’e. Mahafoe ty vata’e o mpiandraikitse mpitilike faritseo hagnasoagne ze mpiharo finoagne ama’e. (2 Korintianina 8:23) Toko’e hahafoe ty vatantikagne naho hanagne finoagne manahake iareo ka tikagne.—Hebreo 13:7.

• Inogne ty mahavy ty mpiandraikitse faritse mitilike fiangonagne?

• Inogne ty toko’e hatao’o naho te handrae soa rehe naho fa mitilike iareo?

Le avy le magnampe zahay Vavaolombelo i Jehovah naho fa misy mpiharo finoagne ama’ay azon-doza. Izay ty ahatreavagne fa mifampikoko vata’e zahay. (Jaona 13:34, 35; 1 Jaona 3:17, 18) Akore ty atao’ay?

Magnomey drala. Nisy kerè bey tamy ty tanàgne atao tihoeke Jodia zao agne tie taloha. Nandefa drala hoahy ze Kirisitianagne tagne ty mpiharo finoagne amy iareo tamy ty tanàgne atao tihoeke Antiokia. (Asan’ny Apostoly 11:27-30) Naho fa rei’ay ka tie misy loza mahazo ty mpiharo finoagne ama’ay amy ty tanàgne hafa agne, le mandefa fagnampeagne hoahy iareo zahay. Avory heike ze fagnampeagne boake amo o fiangonagneo, vaho izay alefa.—2 Korintianina 8:13-15.

Magnampe ka ty vatan-tegna’ay. Mamolily ze ndaty agnate i fiangonagne amy i tanàgne misy lozay eo ty androanavi-pagnahy. Izay ty hahatreava’e tie tsy nisy raha nahazo aze iareo. Ty komity vonje meke ro miandraikitse ze fagnampeagne atao. Ohatse, rano malio, hanegne, akanjo, tragno naho fagnafoly. Misy ka ty mianto-batagne mandeha amy i tanàgne zoem-boigney agne. Va’e ho ndaty mahay raha iareo, ohatse dokotera ndra mpamboatse tragno hamboatse ze simba amy i Anjomba i Fanjakagney. Tsy karamagne iareo naho fa manao izay. Tsy mivibìke zahay, le izay ty mahavy ty fagnampeagne mei’ay ho tsy ela. Miharo asa zahay, hafara’e ampe ty fahaian-draha’ay. Magnampe ty “mpiharo finoagne” ama’ay zahay, faie magnampe ty ndaty ila’e ka ndra tie tsy miharo fivavahagne ama’ay.—Galatianina 6:10.

Mioregne agnate Baiboly ao ty fampionognagne anoe’ay. Mipay fampionognagne ze ndaty niazom-boigne, faie i Jehovah ty toko’e hanao izay. Mirehake ty 2 Korintianina 1:3, 4 fa “Andrianagnahare ty fampionognagne” reke. Ambara’ay iareo fa mampitamà ty Jehovah tie fa kidikidy ty sisa, le hafaha i Fanjakà’ey o lozao, le tsy hisy sasa o fijaleagneo.—Apokalypsy 21:4.

• Inogne ty anto’e mahavy ty Vavaolombelo i Jehovah le avy le mahavita magnampe naho fa misy loza?

• Inogne ty ho rehafentikagne naho fa mampionogne ze ndaty niazom-boigne?

Nirehake ty famantaragne hiseho amy ty andro fara’e tamy i Petera, Jakoba, Jaona naho i Anderea ty Jesosy taloha ty nahafate aze. Hoe reke: “Ia o mpanompo mahihitse naho mahimbagne tinendre i tompo’e hiatrake sady hagnomey hanegne ty mpanompo’e tsy tapakeo?” (Matio 24:3, 45; Marka 13:3, 4) Nampitamà ze mpanonjohy ty lia’e ty Jesosy fa hisy ndaty ho tendre’e hagnomey hanegne am-pagnahy iareo amy ty andro fara’e. I Jesosy ty tompo iareo, le ia o mpanompo hagnomey hanegne iareo zao?

Rahalahy tsiampe noriza i fagnahy masigney o mpanompo iohoeke. Ty Filan-keve-pitantana ty Vavaolombelo i Jehovah o mpanompo mahihitse naho mahimbagne zao. Io ty magnomey hanegne am-pagnahy tsy tapake ze borizà i Jehovah. Tsy ho nisy o hanegne am-pagnahio naho tsy teo iareo.—Lioka 12:42.

Miatrake o fiangonan’Andrianagnahareo ty mpanompo mahihitse. (1 Timoty 3:15) Io ty tinendre i Jesosy hiandraikitse ty fandamina i Jehovah an-tane etoy. Andraikitse lahibey ty nampanoegne o mpanompo iohoeke fa manao ty hahasoa ze fanagna i fandaminagne. Agnate izay ty asa fagnambaragne naho ty fagnanaragne antikagne agnate o fiangonagneo ao. Mea’e hanegne am-pagnahy amo bokeo, gazeteo, fivoriagneo naho o havoriambeio tikagne. Paliaentikagne amo o andro hinaneke zao o raha rehoeke.

Mahihitse vata’e o mpanompo iohoeke kanao magnanatse antikagne ze raha rehafe ty Baiboly sady magnambara i talily soay. Mahimbagne reke fa mitao soa naho fa miatrake ze fanagna i Kirisity an-tane etoy. (Asan’ny Apostoly 10:42) Tahie i Jehovah reke kanao mahavita magnomey hanegne am-pagnahy tsiefa. Mihamaro ka ty borizà i Jehovah.—Isaia 60:22; 65:13.

• Ia ty tinendre i Jesosy hagnomey hanegne am-pagnahy ze mpanonjohy ty lia’e?

• Inogne ty anto’e anoagne iareo mahihitse naho mahimbagne?

Ze ‘apositoly naho ze androanavi-pagnahy ta Jerosalema ao’ ro filan-keve-pitantanagne tamy ty taonjato voaloha’e. Naho fa misy fanapahan-kevetse lahibey ho rambesegne, le iareo ty manao izay fa iareo ty nisolo o Kirisitianagne norizagneo. (Asan’ny Apostoly 15:2) Nandineke soa o Soratse Masigneo naho nangatake i fagnahy masigney heike iareo vaho izay nanapan-kevetse. (Asan’ny Apostoly 15:25) Manao izay ka ty Filan-keve-pitantanagne amy hinane zao.

Ampanoen’Andrianagnahare ze zoton’arofo’e iareo. Lahilahy tsiampe norizagne o Filan-keve-pitantanagne zao. Tea ty Saontsin’Andrianagnahare iareo, le izay ty mahavy iareo mahay mandamigne ty asa fagnambaragne sady mahay mamale fagnonteneagne agnate Baiboly ao. Mivory isake heregnandro iareo handineke ze hahasoa ty borizà i Jehovah. Magnomey torohevetse boake agnate Baiboly ao manahake ty filan-keve-pitantanagne tamy taonjato voaloha’e ka iareo. Alefa iareo an-taratasy naho amo mpiandraikitse faritseo ty torohevetse mei’e, le izay ty mahavy ty mpanompo i Jehovah tsy hivibìke. (Asan’ny Apostoly 16:4, 5) Magnomey hanegne am-pagnahy naho mandrisike o ndatio hazoto hagnambara ty Filan-keve-pitantanagne sady manapa-kevetse tie ho meagne sa tsy ho meagne andraikitse ty ndaty raike.

Magnorike ze itariha i fagnahy masigney aze iareo. Magneke iareo fa Mpanjaka ze Kila Raha Iaby ty Jehovah sady i Jesosy ty Loha o fiangonagneo. (1 Korintianina 11:3; Efesianina 5:23) Tsy misenge tie mitarike ty borizàn’Andrianagnahare iareo fa mipay torohevetse amy i Jehovah naho i Jesosy. ‘Mitsikombe ze raha nanoe i Jesosy’ ty Filan-keve-pitantanagne naho ze ndaty ila’e norizagne. (Apokalypsy 14:4) Fale o Filan-keve-pitantanagneo naho mivavake hoahy iareo tikagne.

• Ia ty filan-keve-pitantanagne tamy ty taonjato voaloha’e?

• Akore ty atao o Filan-keve-pitantanagneo naho fa mipay ty tari-dalan’Andrianagnahare?

Namboatse tragno amy ty tane toy iaby hiatrahagne ty asa fagnambaragne ty Vavaolombelo i Jehovah. Betela ty anognonagne o tragno rehoeke. “Anjomban’Andrianagnahare” ty dika o Betela zao. (Genesisy 28:17, 19, fagnamarenagne ambane peje) Ty Betela Etazonia agne ty misy ty foto ty Vavaolombelo i Jehovah. Agne ro misy Filan-keve-pitantanagne sady iareo ty miandraikitse ze asa atao ty Betela (ndra birò i sampagne) amy ty tane toy iaby. Keleia i Betela ty anognonagne ze ndaty manompo amy Betela ao, fa miharo avao iareo ndra homagne ndra manompo ndra mianatse Baiboly.—Salamo 133:1.

Ndaty tsy kamo miasa ze mitoboke ao. Misy lahilahy naho ampela mazoto manompo ty Betela tsikiraikiraike. Manompo i Jehovah marain-tsy hariva iareo sady manao ze zoton’arofo’e naho manao anton’asa i Fanjakà’ey. (Matio 6:33) Tsy karamagne iareo faie meagne tragno hitoboha’e, hanegne ho hane’e, drala kedekedeke hivilia’e ze raha manahiragne aze. Sambe managne ty asa asae’e iareo. Ty ila’e mahandro, miasa birò, mamboatse boke, mamafa naho manasa tragno, manasa lamba naho mamboatse ze raha simba.

Tanàgne nanoegne hampandrosoagne i asa fagnambaragney ty ao. Inogne ty kendré ze ndaty manompo ao? Ty hahamaro ty ndaty mahafantatse ze raha rehafe ty Baiboly ty kendré iareo. Agnate ty fiasagne anoagne izay ty bokekele toy. O Filan-keve-pitantanagneo ty miandraikitse ty fanoratagne aze. Internet ty andefasa iareo aze amy ty mpandika rehake agnarivo’e amy ty tane toy iaby. Naho vita ty dika aze vaho izay aboake boke. Misy Betela managne lamasina mahavita mamboatse boke maro agnate ty lera tsiampe. Naho fa vita i bokey, le aondragne sambo mbamy ty fiangonagne losotse ty 110 000. Mampandroso ty asa fagnambaragne o Betelitao naho fa manao izay, fa meke ty fanoagne o asa rehoeke.—Marka 13:10.

• Ndaty manao akore ro manompo amy Betela ao? Akore ty agnomeagne ze raha paliae’e?

• Inogne ty asa meke anoe ty Betela tsikiraikiraike?

Ty birò i sampagne ro miandraikitse ty asa fagnambaragne amy ty tane raike ndra tane maro. Misy tsepan’asa maro ty ao. Ao ty Tsepan’asa ty Fandikan-drehake, Mpanao An-taratasy, Mpapipiteke Boke, Fandefasagne Entagne, Fangalam-peo naho Famboaragne vidio.

O Komity i Sampagneo ty miandraikitse ze asa anoegne. Iareo ty tinendre i Filan-keve-pitantanagne hiandraikitse ty birò i sampagne. Androanavi-pagnahy za-draha telo fara fahatsiampea’e ty agnate o komity iohoeke ao. Atalily iareo o Filan-keve-pitantanagneo ty fandrosoa i asay naho ty raha manahiragne amy ty tane nanendreagne aze. Izay ty ahafantara o Filan-keve-pitantanagneo ty fagnanaragne hatao agnate boke naho gazete ndra am-pivoriagne agne ndra amy ty havoriambey. Magnirake solontegna ka o Filan-keve-pitantanagneo hitilike o sampagneo tsy tapake sady hagnomey torohevetse o komitio hahavita’e soa ty andraiki’e. (Ohabolana 11:14) Manao lahajaka ka o solontegna boake am-poto’e agne iohoeke mba hampionognagne ze Vavaolombelo i Jehovah amy i tane tilihe’ey.

Magnampe o fiangonagneo ty birò i sampagne. Rahalahy tsiampe amy i sampagne ao ty magnente tie fa mete atao fiangonagne ty antoko-mpagnambara raike. Ty ila’e ka miandraikitse ty asa anoe ty mpisava lalagne naho ty asa misionera vaho ty mpiandraikitse faritse. Mandamigne havoriambey ka iareo sady miandraikitse ty famboaragne ty Anjomba i Fanjakagney naho ty fandefasagne boke amo o fiangonagneo agne. Ty asa anoegne amo o sampagneo ty mampilamigne naho ahavitagne soa ty asa fagnambaragne.—1 Korintianina 14:33, 40.

• Inogne ty agnampea o Komity i Sampagneo ty Filan-keve-pitantanagne?

• Inogne iaby ty asa anoegne amo o birò i sampagneo agne?

Mampiboake boke aman-gazete amy ty firehake fa ho 750 zahay, hagnambaragne i talily soay amy ‘ze kila tane naho amy ty ndaty sambe managne ty fireha’e naho ty karaza’e.’ (Apokalypsy 14:6) Akore ty ahavita’ay mampiboake boke tsiefa? Misy Vavaolombelo i Jehovah mpanoratse naho mpandika rehake mahafoe tegna ty amy ty tane toy iaby.

Rehake angilé heike ty anoratagne i lahatsoratsey. Miandraikitse ty Tsepan’asa Fanoratagne amy ty foto o Vavaolombelo i Jehovah-o agne ty Filan-keve-pitantanagne. O tsepan’asa iohoeke ty mandamigne ze asa fanoratagne ampoto’ao naho amy ty birò i sampagne ila’e. Boake amy ty tane sambe hafa o mpanoratse rehoeke, le izay ty mahavy ty raha rehafe o boke naho gazeteo ho sankaraza’e. Hafara’e maro tea.

Alefa amo o mpandika rehakeo agne i lahatsoratsey. Amboaregne soa naho atoro o Filan-keve-pitantanagneo heike i lahatsoratsey vaho izay alefa amy Internet mbamy mpandika rehakey mbeo. Ndaty telo ty miharo asa naho fa mandika rehake. Naho fa mandika lahatsoratse iareo, le magnamaregne tie tsy misy poke naho maregne iaby vao i hevetsey. Mipay rehake mete soa handikagne i lahatsoratsey amy ty fireha’e iareo.—Mpitoriteny 12:10.

Tsy ela vita ty asa anoegne amo o oridinaterao. Tsy mahasolo ndaty oridinaterao, faie mampasika ty asa anoe ty mpanoratse naho ty mpandika rehake. Misy dikisionera fipaliagne dikan-drehake ty agnate oridinatera iareo ao. Namboatse porogirama atao tihoeke MEPS ty Vavaolombelo i Jehovah hampiboahagne boke naho gazete amy ty firehake maro. Ze lahatsoratse amy ty firehake iaby mete azilike ao. Aloha ty hanoagne boke, le aharo ao heike i lahatsoratsey naho i sarey.

Zoton’arofon’Andrianagnahare ‘ty hagnavotagne ze kila ndaty iaby naho ty hahafantara’e soa ty hamarenagne.’ (1 Timoty 2:3, 4) Izay ty mahavy anay mampiboake boke naho gazete amy ty firehake raike ndra tie tsy ampe ty ndaty mampiasa aze.

• Akore ty anoratagne boke naho gazete?

• Inogne ty mahavy anay mandika boke amy ty firehake tsiefa?

Mampiboake boke naho gazete anjato tapetrisa’e sataogne zahay, faie zaraegne avao fa tsy avily. Mamboatse Betela naho ty Anjomba i Fanjakagney ka zahay. Tsy izay avao fa mbe magnampe ze niazon-doza naho o misionerao amo o Betelitao ka zahay. Va’e hieretseretse rehe tie aia ty ahatreava’ay drala anoagne izao iaby.

Tsy mitake raketse naho tsy mampanao andidy zahay. Tsy mitake drala amo o ndatio zahay ndra tie mipay drala bey ty asa fagnambaragne anoe’ay. Mirehake ty Tilikambo Fiambenana tamy ty taogne 1879, fa i Jehovah ty ‘mpanohagne anay fa tsy hitavandra ndaty hanohagne’ zahay. Toe tsy mba mangatake ama o ndaty vata’e zahay.—Matio 10:8.

Magnomey ze drala foe’ay zahay. Maro ty ndaty tea ty asa fagnanaragne Baiboly anoe’ay, le izay ty mahavy iareo hagnomey ze drala foe’e. Faie ndra tie eo zay, le izahay Vavaolombelo i Jehovah ro mampiasa ty drala’ay, ty andro’ay, ty herim-bata’ay naho ty fanagna’ay hiasagne aze. (1 Tantara 29:9) Misy boate hisiagne ze drala foe-troke ty amy i Anjomba i Fanjakagney ao naho ty amy ty Anjomba Fanoagne Havoriambey. Tsy ndaty mpagnarivo ty nihirifa ty akababà o drala rehoeke fa vantotse naho ndaty rarake manahake i rineha i Jesosy amy Lioka 21:1-4. Mahazo ‘magnambake ze drala’ foe-troke tikagne tsikiraikiraike hajogne agnate boate ao.—1 Korintianina 16:2; 2 Korintianina 9:7.

Maro ty ndaty te hagnomey “engegne i Jehovah amy ze raha fanjaka anagna’e.” (Ohabolana 3:9) Izay ty mahavy anay matoky fa handrisike o ndatio hanohagne ty asa i Fanjakagney ty Jehovah hagnatò ze zoton’arofo’e.

• Inogne ty tsy maha hambagne anay amy ty fivavahagne ila’e?

• Ampiasaegne amy ty inogne ze drala meintikagne?

Tragno fianara ty Vavaolombelo i Jehovah Baiboly o Anjomba i Fanjakagney zao. Ty Fanjakàn’Andrianagnahare ty rehafegne agne sady toe izay ka ty nitseize i Jesosy.—Lioka 8:1.

Ao ty ivavahagne amy i Jehovah. Ao ty anoroagne hevetse anay hahavita soa i asa fagnambaragney. (Matio 24:14) Tsy mira ty habey ty Anjomba i Fanjakagney naho ty hengo’e, faie sambe tsy bey fihaminagne loatse. Fiangonagne raike ndra maromaro ty mivory agnate’e ao. Mihamaro ty isa o fiangonagneo, le agnale’e (eo amy ty dime sanandro) ty Anjomba i Fanjakagney namboaregne. Akore ty nahavitagne izao?—Matio 19:26.

Ze drala foe-troke ro amboaragne aze. Alefa amy i sampagne agne o drala iohoeke mba homeigne ze fiangonagne toko’e hagnoregnagne anjomba ndra hamboaragne indraike ze fa nisimba.

Sambe managne ty karaza’e naho tsy karamagne ty mpamboatse aze. Fa managne Toropy Mpamboatse ty Anjomba i Fanjakagney amy ty tane maro zahay. Misy Vavaolombelo i Jehovah tsy karamagne ka magnampe iareo. Mifindrafindra amy ze tanàgne amboaragne i anjombay iareo, le hatrake ambanevolo agne iaby. Magnampe o fiangonagneo hamboatse ty Anjomba i Fanjakagney. Misy rahalahy fa za-draha ka tendregne hagnara-maso ty famboaragne anjomba ty tane ila’e. I fiangonagney ty tompon’asa ndra tie misy Vavaolombelogne mahay raha magnampe avao fa tsy karamagne. Amy ty fo’e ty iasa iareo aze sady magnampe ka i fagnahy masigney, le izay ty ahavitagne aze.—Salamo 127:1; Kolosianina 3:23.

• Inogne ty anto’e anoagne i tragno fivavahagney tihoeke Anjomba i Fanjakagney?

• Akore ty ahavitagne mamboatse ty Anjomba i Fanjakagney?

Ahatreavagne ty tahinan’Andrianagnahare ty Anjomba ivoria ty Vavaolombelo i Jehovah. Fanompoagne masigne ty famafagne naho fanasagne sady ty fikolokoloagne aze, le tsy toko’e hifagnandragne ty fanoagne aze.

Fafao naho sasao i anjombay naho fa vita i fivoriagney. Mahafale anay ty mamafa naho manasa i Anjombay naho fa vita i fivoriagney. Fafa’ay naho sasa’y malio soa ka o anjomba iohoeke isake heregnandro. Androanavi-pagnahy ndra mpagnampe amy ty fanompoagne ty mandamigne aze. Fa vita iareo soratse ty raha hanoegne, le igne avao ro orihegne. Misy ty mamafa naho manasa tragno, mamafa ze raha misy lemboke, mamafa kaboné, mamafa lafinete, mandraoke akata, mamafa kiririsa naho lakoro. Indraike sataogne ty amafagne naho anasagne i anjombay iaby. Ndra ty ajaja ka ampanoegne, soa tie ho trea’e tie toko’e ho kolokoloegne soa ty anjomba fivavahantikagne.—Mpitoriteny 5:1.

Amboaregne ze simba. Henteagne tsikiraikiraike sataogne ty agnate’e ao naho ty amboho’e ao hahatreavagne ze simba. Naho fa trea zay, le kolokoloegne soa tsy handany drala bey ty famboaragne aze. (2 Tantara 24:13; 34:10) Anjomba malio naho soa kolokolo ty magneva anompoagne an’Andrianagnahare. Ty fanoantikagne o asa iohoeke ty ahatreavagne tie tea i Jehovah naho ty anjomba ivavahagne ama’e tikagne. (Salamo 122:1) Mahavoatarike ndaty ty fahatreava’e izay.—2 Korintianina 6:3.

• Inogne ty anto’e ikolokoloagne soa ty anjomba fivavahantikagne?

• Inogne iaby ty raha anoegne hampalio soa ty Anjomba i Fanjakagney?

Te hampitombo ty fahaia’o Baiboly vao rehe? Misy ndaty ndra tanàgne ndra raha hafa rehafe ty Baiboly tea’o ho fantatse soa vao? Sa misy raha manahiragne azo, le tea’o ho fantatse ty hagnampea o Saontsin’Andrianagnahareo azo? Izay ty ampiasagne ty fagnajariam-boke amy i Anjomba i Fanjakagney ao.

Misy raha fipalian-kevetse ty ao. Va’e tsy hanagna’o iaby amy ty fireha’o ze boke naho gazete ty Vavaolombelo i Jehovah. Misy boke vaho naboake tafara ka ty ao. Va’e hisy Baiboly porotesita ndra Baiboly hafa ka ty ao. Fa misy boke manoro ze fagnazavagne paliae’o ty ao. Mipalià hevetse ao rehe aloha ndra afara i fivoriagney. Naho misy oridinatera ty amy i fagnajariam-bokey ao, le va’e hisy Watchtower Library ty agnate’e ao. Porogirama atao agnate oridinatera ahatreavagne boke naho gazete tsiefa o raha iohoeke sady tsy magnore ampiasaegne. Trea agnate ao iaby ze raha paliaegne ndra rehake ndra hevetse ndra andalan-teny.

Magnampe ze hanao Sekoly amy ty Fiaignantika Naho ty Tari-dalagne Hoahy ty Fivoriana. Azo’o atao ty mampiasa ty fagnajariam-boke amy Anjomba i Fanjakagney ao naho fa hagnomagne ty anjara’o. Ty mpiandraikitse amy ty Fiaignantika Naho ty Tari-dalagne Hoahy ty Fivoriagne ro miandraikitse aze. Azili’e ao ze boke naho gazete vaovao sady ambine’e soa. Agnonteneo aze ndra ty mpagnanatse baiboly azo ze boke paliae’o. Faie ao tsy hindesegne moly naho tsy ho soratsorategne.

Mirehake ty Baiboly fa toko’e hikodebe manahake ty ‘fikodebeagne o safirao’ tikagne naho te ‘hahafantatse an’Andrianagnahare.’ (Ohabolana 2:1-5) O fagnajariam-bokeo ty magnampe antikagne amy ty fanoagne izay.

• Inogne iaby ty raha fipaliagne hevetse misy amy ty fagnajariam-boke ty fiangonagne?

• Ia ty hagnontenea’o naho misy hevetse tea’o ho paliagne?

Nirehake ty Jesosy tie: “Ampamilepilero agnatreha o ndatio eo hoe izay ka ty hazavà’areo, hahaonigna’e ty asa fanjaka anoe’areo mba hagnomea iareo engegne i Rae’areo an-dagnitsagney.” (Matio 5:16) Mampiasa Internet zahay hanoagne izay. Ty adiresy jw.org ty ahatreavagne ty raha inoa’ay naho ty asa anoe’ay Vavaolombelo i Jehovah.

Trea ao ze vale ty fagnontenea o ndatio. Misy taratasy milimpy mamale fagnonteneagne enegne ty ao. Ty lohan-dreha’e manao tihoe: Ombiagne o Fijaleagneo Vaho Hoafake? naho tihoe Ho Velogne Indraike vao o Ndaty Nimateo? Fa misy amy ty firehake losotse ty 600 o taratasy milimpy iohoe. Misy Baiboly Dikan-drehake Tontolo Vaovao amy ty firehake losotse ty 130 ka ty ao sady misy boke naho gazete fianaragne Baiboly. Agnate izay ty Tilikambo Fiambenana naho Mifohaza! niboake fara’⁠e sady ty boke Inogne Vata’e ty Raha Ampianare ty Baiboly? (malagasy) Vakio ao ndra tsanogno ndra sintono o boke naho gazete rehoeke. Ty ila’⁠e natao MP3, PDF, ndra EPUB. Lahatsoratse miharo amy ty sare ty agnate o raha rehoeke ao. Naho misy ndaty tea’​o ho meagne boke amy ty fireha’⁠e, le anò an-taratasy homeigne aze. Misy boke naho gazete natao agnate vidio amy ty baiko moagne ka ty ao. Ahatreavagne baiko moagne sambe karaza’⁠e ty ao. Mangalà hira ndra tantara tsanognagne ndra tantara hisaegne boake agnate Baiboly ao ka rehe.

Ahatreavagne ty maregne miomba ty Vavaolombelo i Jehovah. Agnate izay ty vaovao niboake fara’e miomba anay. Atoro an-tsare ao ka ty asa anoe’ay amy ty tane toy iaby naho ty raha manjò anay sady ty raha anoe’ay hagnampeagne ze ndaty zoem-boigne. Trea ao ka ty date naho ze tanàgne hanoagne havoriambey. Ahatreavagne ty adiresy ty birò i sampagne ka ty ao.

Inogne ty mahavy anay manao o raha rehoeke iaby? Amy izay mahafantatse ty maregne agnate Baiboly ao ze kila ndaty. Lonike abey hameno tane ty saontsy i Jehovah, soa tie hagnomeagne engegne aze.—2 Tesalonianina 3:1.

• Inogne ty anto’e mahavy ty jw.org magnampe ndaty maro hahafantatse ty hamarenagne agnate Baiboly ao?

• Inogne ty raha tea’o ho trea amy ty tragnom-poraro’ay ao?