Tsy magnanatse ty raha paliae o ndatio amy ty fiaigna’e naho tsy mampionogne aze ty raha ampianare o mpitarike fivavahagneo, hafara’e maro ty ndaty tsy mandeha mivavake sasa. Faie naho miharo mivory ama’ay Vavaolombelo i Jehovah rehe, inogne ty soa ho rambese’o?

Hahatrea ndaty mifampikoko rehe naho fa avy agne. Fanjaka ty fivoria’ay fa mitsikombe ty raha nanoe o Kirisitianagne voaloha’eo. Zinara ho fiangonagne maro iareo. Isake fiangonagne niharo fivoriagne, amy izay hanompo an’Andrianagnahare naho hianatse ty Soratse Masigne sady hifampionogne. (Hebreo 10:24, 25) Nisoa ty fiharoa iareo nivory fa mpiragnetse manahake ty ndaty niharo troke iareo.—2 Tesalonianina 1:3; 3 Jaona 14.

Hianatse ty hagnorihagne ze fanoroagne rehafe o Baibolio rehe naho avy agne. Miharo mivory manahake o mpanompon’Andrianagnahare talohao ka zahay. Mivory ao iaby ndra lahilahy ndra ampela ndra bey ndra kede. Misy ndaty mahay Baiboly magnanatse ty hagnorihagne ze fanoroa o Soratse Masigneo amy ty fiaignagne ty agne. (Deoteronomia 31:12; Nehemia 8:8) Mirehake ty fampitaman’Andrianagnahare ze magnatreke naho fa misy fiharoagne dineke. Manao rodobey ka zahay naho fa mihira.—Hebreo 10:23.

Hino rehe tie misy vata’e ty Andrianagnahare naho avy agne. Hitombo ty finoa’o naho fa maloetse ty mpiharo finoagne ama’o rehe. Izay ka ty handrisike azo hagnorike ze raha rehafe ty Baiboly. Nirehake tamy ty fiangonagne raike taloha ty apositoly Paoly tie: “Misalala hahatrea anareo raho, hibanabanako raha hampionogne anareo. Le songa hifampandrisike amo finoagneo tikagne.”—Romanina 1:11, 12.

Nagninogne rehe naho mba magnatreke o fivoriagne iohoeke! Ho trea’o amy izay tie tsy vande i raha rinehake ama’oy. Handrambe azo soa zahay naho fa avy agne rehe sady tsy misy fitakean-draketse naho tsy misy drala aloa ty agne.

• Ia o tsikombe’ay mahavy anay mivorio?

• Inogne ty soa ho rambese’o naho miharo fivory ama’ay?

Ndra magnereke ndra mitioke ndra manarignandroke ty andro ndra tie lavitse ty tanàgne misy anay, le mandeha mivory avao zahay. Tsy izay avao fa ndra tie manan-draha manahiragne naho rokake zahay, le tsy atao’ay ambanen-draha ty fiharoagne amo o mpiharo mivavake ama’aio. Inogne ty anto’e?

Magnampe amy ty fiaignagne ty fiharoagne amy iareo. Nirehake ty Paoly fa toko’e ‘hifampagnosike’ ty mpiharo mivory. (Hebreo 10:24) Inogne ty tea izay ho rehafegne? Toko’e ‘hamantatse soa’ ty mpiharo mivory amantikagne tikagne. Va’e fa nisy raha manahiragne o mpiharo mivory amantikagneo manjò antikagne ka. Naho mamantatse iareo tikagne, le hotoroa’e hevetse.

Mahazo ragnetse soa rehe naho fa mivory. Tsy ndaty mifakafantatse avao ty mpiharo mivory fa mpiragnetse vata’e. Misy andro ka zahay miharo fihisagne. Manjary trea’ay ka ty hasoa fagnahy o ragne’ay reo, le izay ty mahavy anay mifampikoko. Mifagnampe ka zahay naho fa misy raha manahiragne. (Ohabolana 17:17) Miharo amy ze kila ndaty amo o fiangona’aio ao zahay fa ‘mifampitretré.’—1 Korintianina 12:25, 26.

Mandrisike azo zahay hiragnetse amy ty ndaty magnorike ze zoton’arofon’Andrianagnahare, tsy ia zay fa ty Vavaolombelo i Jehovah. Ko mete rehe naho oveove o ndaty tsy hilongo anay.

• Inogne ty soa ho rambese’o naho miharo fivory ama’ay?

• Ombiagne rehe hivory ama’ay agne?

Tsy nanao fombafomba o Kirisitianagne voaloha’eo naho fa nivory fa nihira, nivavake, namaky naho nandineke Baiboly. (1 Korintianina 14:26) Izay ka ty anoe’ay.

Mahazo fagnanaragne boake agnate Baiboly ao zahay naho fa mivory. Mitsanogne lahajaka mioregne agnate Baiboly (30 minitra) ty fiangonagne tsikiraikiraike isake heregnandro. Mirehake ty fiaignagne amy hinaneke zao naho manoro hevetse o lahajaka iohoeke. Naho fa misy andalan-teny vakiegne, le sambe magnorike agnate ty Baiboli’ay ao zahay. Naho fa vita i lahajakay, le mianatse lahatsoratse raike amy ty “Tilikambo Fiambenana” Fianaragne (lera’e raike) zahay. Naho fa magnontane i mpitarikey, le misy amy i mpagnatrekey mamale. Izay ty magnampe anay hagnorike ty torohevetse agnate Baiboly ao. Fa losotse ty 110 000 ty fiangona’ay amy ty tane toy, faie hambagne avao ty lahatsoratse ianaragne isake heregnandro.

Ampianaregne hahay hampianatse Baiboly zahay. Mivory indraike isake heregnandro ka zahay faie harivariva. Fanompoagne Naho ty Fiaignantika Kristiana: Tari-dalagne Hoahy ty Fivoriagne ty agnara o fivoriagne iohoe. Misy fizarà’e telo reke: Voaloha’e, ty Harena Amy ty Saontsin’Andrianagnahare. Magnampe anay hiomagne mialoha amy ty famakiagne Baiboly natao hoahy ty fiangonagne o raha iohoe. Faharoe, ty Fampiofagnagne amy ty Fanompoagne. Ty fampisehoagne atao amo o fandaharagne iohoe ty mampiofagne anay hizara ty talily soa agnate Baiboly ao amo o ndatio. Afara izay, le misy rahalahy raike magnomey torohevetse anay mba hagnasoa’ay ty fahaia’ay mamaky rehake naho ty fahaia’ay mirehake. (1 Timoty 4:13) Ty Fiaignantika Kristiana ty fizaràgne fara’e. Magnampe anay io mba hahafantatse ty fanoroa ty Baiboly toko’e hampihare’ay amy ty fiaigna’ay. Misy fiharoagne midineke misy fagnonteneagne naho vale’e magnampe anay hahatakatse ty raha ampianare ty Baiboly ty amy io.

Ho latsa rehe naho fa mivory ama’ay agne fa misy raha soa hianara’o ty agne.—Isaia 54:13.

• Inogne ty raha anoe ty Vavaolombelo i Jehovah naho fa mivory?

• Ty aia amo fivoriagne rehoeke ty tea’o hatrehegne?

Henteo amy ty bokekele toy atoagne fa mihamigne ty Vavaolombelo i Jehovah naho fa mivory. Inogne ty anto’e ihamina’ay?

Te hagnomey engegne an’Andrianagnahare zahay. Maregne fa tsy ty fihaminantikagne ro paliaen’Andrianagnahare. (1 Samoela 16:7) Faie amboare’ay soa ty volo’ay naho ty akanjo’ay soa tie magnomey engegne aze naho ty mpiharo finoagne ama’ay. Naho ohatse zao rehe handeha mbamy ty ndaty manam-boninahitse mbeo, tsy hihamigne soa vao rehe hagnomeagne engegne aze! Toko’e ho meantikagne engegne ka ty Jehovah naho ty anjomba ivavahagne ama’e fa “Mpanjaka nainai’e” reke.—1 Timoty 1:17.

Tea’ay hatoro fa magnorike ty lilin’Andrianagnahare zahay. Mirehake ty 1 Timoty 2:9, 10 tie toko’e “hisarogne lamba magneva naho aman-kilala” ze Kirisitianagne. O misarogne lamba “magneva” zao tsy manao akanjo hilatsà o ndaty. Ohatse akanjo mimilemiletse ndra akanjo mititìtse ndra mangarakarake. Inogne ka ty dika o “aman-kilala” zao? Mahay mijobogne akanjo soa fa tsy manao akanjo tsy fantatse angòke. Ndra tie maro ty akanjo miboake henane, le mikezake mafe zahay hagnisy akanjo fanjaka. Ndra tie mbe tsy magnambara i talily soay zahay, le fa “mandravake ty fagnanaran’Andrianagnahare” naho ‘magnomey engegne aze’ ty akanjo agnisia’ay. (Titosy 2:10; 1 Petera 2:12) Ty akanjo agnisia’ay ty ahafantara o ndatio tie mpanompo i Jehovah vata’e zahay.

Ndra tie tsy managne akanjo soa rehe, le ko matahotse fa mivoria avao. Tsy tihoe tie mivily akanjo sarobily ty dika izay, fa manao akanjo malio naho milamigne.

• Inogne ty anto’e ihaminantikagne naho fa mivory?

• Inogne ty andalan-teny toko’e ho tiahientikagne naho fa hipay fihaminagne?

Naho fa mianatse Baiboly amy ty Vavaolombelo i Jehovah rehe, va’e fa mahay tie omanegne heike ty boke hianaragne. Soa ka naho omane’o an-tragno agne ze raha hianaragne ampivoriagne agne soa tie handrae soa rehe.

Fantaro soa tie aia naho ombiagne ty soa agnomanagne. Naho fa inogne rehe vaho tsy miriorio ty sai’o? Maraindray tsikiake amy ihe mbe tsy mitolon-drahay sa naho fa hariva miroro ty ajajay? Mipalià lera hianaragne ndra tie maro ty raha manahiragne sady ko isian-draha hafa hanembatsembagne i lera fa natoka’oy. Mamonjea aloke ndra tragno bangigne naho fa mianatse sady vonò iaby ze raha magneno agnila’o eo, ndra radio ndra telé ndra talifonegne. Mivavaha heike naho fa hianatse soa tie tsy miriorio ty sai’o.—Filipianina 4:6, 7.

Tsipiho ty vale’e agnate i bokey ao sady dineho ty hovalea’o. Henteo ty ambangovango i lahatsoratsey ndra i toko ianaragney. Akore ty fanoagne aze? Vakio i lohan-drehakey sady dineho ty ifandrambesa’e amy ze lohan-drehake kedekede iaby. Dineho ka o sareo naho ze fagnonteneagne fameregnagne soa tie fanta’o ty hevetse lahibey agnate’e ao. Vaho izay vakio tsikiraikiraike i fehentsoratsey, le paliao ty vale i fagnonteneagney. Ze rehake hahatiahia’o ty vale’e avao ro tsipiho. Vakio ze andalan-teny ao, le dineho ty ifandrambesa’e amy i fehentsoratsey. (Asan’ny Apostoly 17:11) Naho fa avy am-pivoriagne agne rehe, le manangàna tagnagne hamale i fagnonteneagney amy ty fireha’o. Ko bey rehake naho fa mamale.

Hoe managne “riha fagnajagne” hilala ty ndaty mianatse Baiboly. (Matio 13:51, 52) Hihamaro ty raha fanta’o naho imanea’o ty fagnomanagne fivoriagne.

• Toko’e hanao inogne heike rehe naho fa hivory?

• Inogne ty toko’e hatao’o naho fa magnomagne, amy izay manoin-drehake naho fa avy am-pivoriagne agne?

Fa ela bey ty nitea i Jehovah o keleiagneo hanokagne andro hiharoa’e mianatse ty saontsi’e. Mifampikoko naho mifandoetse ama’e iareo naho manao izay. (Deoteronomia 6:6, 7) Izay ty mahavy ty keleiagne Vavaolombelo i Jehovah hiharo mianatse Baiboly indraike isake heregnandro. Iharoa iareo dineke ze hevetse paliae i keleiagney sady falefale iareo naho fa manao aze. Naho tsy managne keleiagne miharo toboke ama’e reke, le ie avao ty mijobogne ty foto-kevetse tea’e hianaragne. Toko’e ho andro iharoa’e amy i Jehovah ty fieretsereta’e o andro iohoeke.

Mifankarine amy i Jehovah i keleiagney naho manao izay. Hahafantatse soa i Jehovah nareo naho ianara’areo soa agnate Baiboly ao ty toetoe’e naho ty raha nanoe’e. Mirehake ty Jakoba 4:8 tie: “Magnarinea an’Andrianagnahare, le hagnarine azo ka reke.” Naho fa manao andro fivavaha ty keleiagne nareo, inogne ty raha toko’e hatao’areo? Iharò’areo vaky ze toko agnate Baiboly ao hatao amy ty Fiaignantika Kristiana Naho ty Fanompoagne. Ifandimbezo’areo ty vaky aze sady sambe mirehafa ze hevetse soa trea’areo nareo.

Hifampikoko o keleiagneo naho manao izay. Mampifankatea ty mpirovaly, ty rae amy ty rene naho ty ana’e ty fiharoagne mianatse Baiboly. Toko’e ho andro mahafalefale ty Andro Fivavaha ty Keleiagne. Ze hevetse mifanandrife amy ty tao ty ana’areo naho tsy sarotse ama’e ro jobogno. Mangalà hevetse amy ty lahatsoratse agnate ty Tilikambo Fiambenana ndra Mifohaza! ndra www.jw.org/tdx ndra azo’areo atao ka ty magnente Tele JW (tv.jw.org). Ohatse, torò iareo hahay miatreke ze raha manahiragne aze an-dakilasy agne. Soa ka naho mihira ze hira hanoegne am-pivoriagne agne nareo sady homan-kanegne naho fa vita i fianaragney.

Ho tahie i Jehovah nareo sady ho tea mianatse Baiboly naho fa manokagne andro hiharoagne mianatse ty miomba aze isake heregnandro.—Salamo 1:1-3.

• Inogne ty anto’e anokanantikagne andro hanoagne Andro Fivavaha ty Keleiagne?

• Inogne ty toko’e hatao ty rae amy ty rene soa tie hahafale ty keleiagne o andro iohoeke?

Falefale avao o ndaty amo o sareo eo reo fa magnatreke havoriambey. Mitsikombe ty raha nanoe o mpanompon’Andrianagnahare talohao zahay, le izay ty mahavy anay manao havoriambey intelo sataogne. (Deoteronomia 16:16) Intoagne iaby o havoriambei’ay zao: ty havoriambey faritse indroe isataogne agnate ty andro raike isa’e naho ty havoriambey vondrom-paritse telo andro. Inogne ty soa azo’ay amo o havoriambey rehoeke?

Mahavy anay hifampikoko. Falefale o Isiraelita talohao naho fa nivory hagnomey asigne i Jehovah. Miharo mivory manahake iareo ka zahay amy hinaneke zao. (Salamo 26:12; 111:1) Amo havoriambeio agne zahay vaho mifankatrea amy ty Vavaolombelo i Jehovah mbe tsy nitrea’ay. Homagne agnate i tragno anoagne havoriambeỳ ao avao zahay naho fa atoandro soa tie miharo hafaleagne amo o longo’aio. (Asan’ny Apostoly 2:42) Agne ty ahatreavagne anay tie mifampikoko vata’e sady hoe niharo rae niharo rene.—1 Petera 2:17.

Mahasoa ty filongoa’ay amy i Jehovah o havoriambeio. Nahasoa o Isiraelitao ty fiharoagne mivory kanao ‘niazo iareo soa’ iaby ze nambara iareo tagnate Soratse Masigne ao. (Nehemia 8:8, 12) Tea’ay ka ze raha agnanaragne anay amo o havoriambeio agne. Misy lohahevetse nalaegne boake agnate Baiboly hoahy ty andro tsikiraikiraike naho fa havoriambey. Mifandrambe amo o lohahevetse iohoeke ze lahajaka anoegne. Misy lahajaka riri’e, lahajaka mifanohy naho lahajaka misy fampisehoagne ty agne. Sambe magnampe anay hanao ze zoton’arofon’Andrianagnahare ze anoe agne. Rei’ay agne ka ty tantara o Kirisitianagne longo’aio fa ndra tie misy raha manahiragne iareo, le tsy mivalike aman’Andrianagnahare. Ianara’ay raha maro ka ty tantara hisaegne anoegne naho fa havoriambey vondrom-paritse. Isake havoriambey ka vaho atao badisa ze te hanoro tie nanolotse ty vata’e fa hanompo an’Andrianagnahare.

• Inogne ty anto’e mahafale antikagne naho fa magnatreke havoriambey?

• Inogne ty soa ho azo’o naho ihe ro magnatreke havoriambey?

Izao ty reha i Jesosy taloha ty ho nahafate aze: “Le ho tseizegne mbeombeo amy ty tane toy ty talily soa i fanjakagney ho fitaliliagne amy ze kilakila o ndaty; vaho izay ho avy i farataogney.” (Matio 24:14) Akore ty hahavitagne ze i fitseizagne mbeombeo zay? Ty fitsikombeagne i Jesosy ty hahavitagne izay.—Lioka 8:1.

Mikezake mitilike o ndatio an-tragno’e agne zahay. Nampiofagnegne hagnambara i talily soa isake tragno i Kirisitianagne voaloha’e rey. (Matio 10:11-13; Asan’ny Apostoly 5:42; 20:20) Natoro iareo ze tanàgne handehana’e. (Matio 10:5, 6; 2 Korintianina 10:13) Milamigne soa ka ty fagnambaragne anoe’ay amy hinaneke zao. Fa vita zara iaby ze tanàgne hiasà ty fiangonagne tsikiraikiraike. Izay ty mahavy anay hahavita magnorike i lily i Jesosy manao tihoekey tie ‘italilio o ndatio.’—Asan’ny Apostoly 10:42.

Agnambara’ay ze ndaty trea’ay. Izay ka ty natao i Jesosy. Ndra tagnolon-driakey ndra tam-bovogney, le sambe nagnambarà i Jesosy iaby. (Marka 4:1; Jaona 4:5-15) Mitsikombe aze ka zahay, le mirehake amy ze ndaty trea’ay ty raha rehafe ty Baiboly. Agnambara’ay iaby ndra an-dalagney ndra an-tsena ey ndra amy ze fitobotoboha o ndaty. Magnambara an-talifonegne ka zahay. Talilia’ay iaby ndra ty mpiharo tanàgne, longo, mpiharo mianatse ndra ty mpiharo miasa naho fa mifankatrea ama’ay. Ndaty an-tapetrisa’e ty maharey ty ‘talily soa miomba ty havotsoragne.’—Salamo 96:2.

Ia ty tea’o hagnambaragne ty talily soa i Fanjakàn’Andrianagnaharey? Naho fa mazoto rehe, le rehafo ama’e fa hanao raha soa ho aze o Fanjakagne iohoeke.

• Inogne o “talily soa” ampitseizegne antikagneo?

• Mitsikombe i Jesosy ty Vavaolombelo i Jehovah naho fa magnambara. Inogne ty raha atao iareo?

O “mpisava lalagne” zao ndaty mandeha amy ty tane mbe lia’e naho nisy nandeha sady manatake lalagne handehanagne. Manahake o mpisava lalagne iohoeke ka ty Jesosy. Nirahegne ho an-tane etoy reke hagnambara naho hanao sorogne ty fiai’e handrombahagne ty ndaty toy iaby. (Matio 20:28) Mitsikombe ty raha natao’e ka o mpanonjohy ty lia i Jesosio sady mazoto mandeha ‘magnanatse’ Baiboly. (Matio 28:19, 20) Ty ila’e amy iareo manao mpisava lalagne ka.

Magnambara naho magnanatse i talily soay ty fotots’asa iareo. Sambe magnambara i talily soay iaby ze Vavaolombelo i Jehovah. Faie misy ty atao tihoeke mpisava lalagne maharetse, mandany 70 lera sambolagne. Tsy ampe avao ty andro iasa’iareo hameloma’e tegna. Ty ila’e ka mpisava lalagne manokagne ty firehafagne aze. Irahegne amy ty tane mbe tsy maro mpagnambara iareo sady mandany lera losotse ty 130 sambolagne. Tsy mpagnarivo iareo faie sambatse fa matoky tie hagnomey ze raha paliae’e ty Jehovah. (Matio 6:31-33; 1 Timoty 6:6-8) Ze tsy manao mpisava lalagne maharetse naho manokagne, le manao mpisava lalagne mpagnampe naho fa mazoto. Mandany 30 ndra 50 lera sambolagne ka iareo.

Tea an’Andrianagnahare naho tea ndaty iareo. Hambagne amy i heve i Jesosy manao tihoekey zahay tie, toko’e hampianaregne hahafantatse an’Andrianagnahare o ndatio. (Marka 6:34) Izay ty mahavy anay hikezake mafe hagnambara ze raha fanta’ay amo o ndatio soa tie mba misy raha tamaegne iareo amy ty ho avy. Ty hatea o mpisava lalagneo o ndatio ty agnomea’e ty andro’e naho ty oza’e hagnampeagne iareo. (Matio 22:39; 1 Tesalonianina 2:8) Manjary sambatse naho mifandoetse aman’Andrianagnahare iareo sady mihamafe ty finoa iareo.—Asan’ny Apostoly 20:35.

• Ty manao akore ty atao tihoeke mpisava lalagne?

• Inogne ty mahavy ty ndaty ila’e manao mpisava lalagne?

Mampiambake ty Vavaolombelo i Jehovah ampara izay ty fiofagnagne sambe karaza’e mioregne agnate Baiboly ao. Mahazo fiofagnagne ambata’e zao, ty Vavaolombelogne ila’e ‘hahavita’e soa ty fanompoa’e.’ (2 Timoty 4:5) Mahasoa iareo izay fa mandany lera maro hampandrosoagne ty fagnambaragne i talily soay iareo.

Sekoly Fanompoa ty Mpisava Lalagne. Naho fa nanao fanompoagne marain-tsy hariva agnate ty tao’e raike ty mpisava lalagne maharetse raike le fa mahazo magnatreke aze. Enegne andro ty anoagne o sekoly iohoeke amy ty Anjomba i Fanjakagney agne. Inogne ty raha kendregne ama’e? Mba hahasoa ty filongoa i mpisava lalagney amy i Jehovah sady hahaia’e soa ty fanompoagne sambe karaza’e naho hahavy aze hanohy avao ty asa mpisava lalagne.

Sekoly ty Mpagnambara i Fanjakagney. Anoegne agnate ty roe volagne o sekoly iohoeke sady mpisava lalana za-draha, ndra mpirovaly zay ndra rahalahy doga ndra rahavave ampelatovo ty magnatreke aze. Ampagnivoa ty 23 taogne naho 65 taogne ty mahazo manao aze. Toko’e ho vognogne hienga ty tanà’e iareo, fa hanompo amy ze anendreagne aze. Manahake i Jesosy, lahibey ty mpagnambara i talily soay iareo, le hoe mirehake tie “Intoy raho hirahe’o. (Isaia 6:8; Jaona 7:29) Va’e hizatse amy ty fiaignagne tsy bey karamatsa’e iareo. Va’e tsy hanahake ty andro naho ty hanegne vaho ty fomba tane nisy aze ty homba’e. Va’e hianatse ty rehake tsy fireha’e ka reke. Inogne heike ty raha kendregne amo o sekoly iohoeke? Voaloha’e, hagnampe o rahalahy naho rahavave reo ho soa toetse vata’e vaho hahavità’e soa ty fanompoa’e. Faharoe, amy izay iareo mahay soa, le hampiasae i Jehovah naho ty fandamina’e.

Sekoly Fianaragne Baiboly Gileada. Naho tsy aolakolake ty rehake hebereo adika tihoe “Gileada”, le “toborognam-bato Vavaolombelogne.” Nanomboke tamy ty taogne 1943 o sekoly iohoeke. Fa losotse ty 8 000 ty nahazo dipiloma tamo o sekoly iohoeke, le tinendre ho misionera. Nanjary Vavaolombelogne “amy ze kila tane” iareo. (Asan’ny Apostoly 13:47) Nisy voka’e soa o sekoly iohoeke. Misy tane raike atao tihoeke Peroa, mbe tsy nisy fiangonagne ty tagne tamy tie vaho nisy misionera. Amy itikagne mirehake zao fa misy fiangonagne losotse ty 1 000 ty agne. Manahake izay ka ty a Japon agne. Mbe tsy niampe folo ty mpagnambara tagne tamy tie vaho nisy misionera. Fa losotse 200 000 isake iareo hinaneke zao. Ia iaby ty mahazo magnatreke o sekoly iohoeke? Mpisava lalagne manokagne, misionera, ze manompo amy ty birò i sampagne, vaho ty mpiandraikitse faritse. Mianatse mafe agnate ty dime volagne iareo mba hahavita’e hampandroso ty asa amy ty tane toy iaby naho hagnamafe ty finoa ty ila’e.

• Inogne ty raha kendregne amy ty Sekoly Fanompoa ty Mpisava Lalagne?

• Ia ty mahazo manao ty Sekoly ty Mpagnambara i Fanjakagney?