Te Hampifale i Jehovah ty Rebeka

Ampela tea i Jehovah ty Rebeka. Isaka ty agnara ty vali’e. Tea i Jehovah ka ty Isaka. Akore ty nahavy iareo ho mpivaly? Akore ty nanoroa i Rebeka fa te hampifale i Jehovah reke? Andao tikagne hagnente ty raha nanoe’e.

Ana i Abarahama naho i Saraha ty Isaka. Nitoboke tamy ty tane atao tihoeke Kanana iareo. Tsy nanompo i Jehovah ty ndaty tamo o tane iohoeke ao. Faie teà i Abarahama hanambaly ndaty manompo i Jehovah i ana-dahi’ey. Nagnirake ty mpiasa’e hipay valy hoahy i ana-dahi’ey ty Abarahama. Va’e i Eliezera varagne ty nirahe’ ho a Harana agne. O tanàgne iohoeke ty nisy ty longo i Abarahama.

Nisy mpiasa i Abarahama ila’e niharo lia tamy i Eliezera. Nanday rameva folo iareo hinday ty enta’e fa lavitse ty lalagne handehana’e. Akore ty hahafantara i Eliezera ty ampela ho valy Isaka? Nitofa tamy ty vovogne raike a Harana agne iareo naho fa niavy. Fanta’e tie fa marine hatsaka iaby ty ndaty. Nivavake tamy i Jehovah reke tie: ‘Naho misy somondrara angatahako rano, le magnomey rano ahy naho o ramevakò, le izay ty ampela jinobo’o.’

Naho fa nitapetse zay, le niavy ty Rebeka. Mirehake ty Baiboly fa ampela soa reke. Naho fa nangatake rano tama’e ty Eliezera le hoe reke: ‘Mikamà rano aba. Ao fa hitaonako rano ka o rameva’o reo hinome’e.’ Mahalany rano maro o ramevao naho fa marandrano. Niherekeregne nitaogne rano boake am-bovogne ao ty Rebeka. Trea’o amo o sareo eo vao fa miasa mafe ty Rebeka?... Tampoke amy i Eliezera ty namalea i Jehovah i vavake nanoe’ey.

Maro ty raha soa nimey i Eliezera i Rebeka. Nandese i Rebeka mban-tragno iareo mbeo ty ry Eliezera. Nirehafe i Eliezera ty anto’e nagniraha i Abarahama aze naho ty namalea i Jehovah ty vavake nanoe’e. Nimein-droae’e ho valy Isaka ty Rebeka.

Ho mete hanambaly Isaka vao ty Rebeka?... Fanta’e fa i Jehovah ro nagnirake i Eliezera. Naho fa nagnontenean-droae’e reke tie handeha vao iheo? Le nanao tihoeke reke tie: ‘Eka. Handeha raho.’ Le avy le nagnorike i Eliezera reke. Naho fa niavy a Kanana agne reke, le nivalie Isaka.

Nampea i Jehovah ty Rebeka fa nanao ze zoton’arofo’e. Boake amy ty foko’e ty niterake i Jesosy naho fa niela ty ela. Hampea i Jehovah ka tikagne naho mampifale aze manahake i Rebeka.