Ndaty Nanoratse ty Tantara i Jesosy

Trea’o vao o ndaty amo sareo eo reo?... I Matio, Marika, Lioka, Jaona, Petera, Jakoba, Joda naho i Paoly ty agnara iareo. Niaigne tamy ty andro faha i Jesosy iareo sady nanoratse ty tantara’e. Andao tikagne hirehake ty miomba iareo.

Apositoly niharo fagnambara i talily soay tamy i Jesosy ty telo amy iareo. Fata’o vao ty agnara iareo telo?... I Matio naho i Jaona vaho i Petera ty agnara iareo. Nahafantatse soa i Jesosy ty Matio naho Jaona, le izay ty nahavy iareo nanoratse ty tantara i Jesosy. Nanoratse ty boke Apokalypsy naho taratasy telo atao tihoeke tie Jaona Voaloha’e, Jaona Faharoe, naho ty Jaona Fahatelo ty Jaona. Nanoratse taratasy roe agnate Baiboly ao ka ty Petera. Petera Voaloha’e naho Petera Faharoe ty anognonagne aze. Rehafe i Petera amy ty taratasi’e faharoe ao, fa nisy andro ty Jehovah nisaontsy boake an-dagnitse agne tamy i Jesosy nanao tihoeke tie: ‘Intoy ro anako. Teàko reke, fa mahafale ahy ty raha anoe’e.’

Nanoratse ty miomba i Jesosy ka ty ndaty ila’e amo sareo eo. Agnate izay ty Marika. Va’e teo reke tamy ty nitsepahagne i Jesosy sady va’e nahatrea ze raha niseho tao. I Lioka ka ty raike. Dokotera ty reke sady va’e tafara ty nahafate i Jesosy ty niova’e ho Kirisitianagne.

Rahalahy i Jesosy ty roe lahy amo o ndaty reo faie nanoratse Baiboly. Ia ty agnara iareo naho fanta’o?... I Jakoba naho i Joda. Tsy nino i Jesosy heike iareo tamy ty voaloha’e. Nieretseretse iareo fa nao nivalike gege ty Jesosy. Hasoan-draha fa niova iareo naho fa tafara atoy, le nanjary Kirisitianagne.

I Paoly ty mpanoratse Baiboly ho rehafentikagne fara’e. I Saoly ty niagnara’e tamy tie mbe tsy ni-Kirisitianagne. Niheje’e vitagne o Kirisitianagneo tamy izay. Fanta’o vao ty nahavy i Paoly ho Kirisitianagne?... Nandeha an-dalagney reke tamy tie indraike. Le nisy feo boake an-dagnitse agne nitoka aze. I Jesosy nitoka aze nanao tihokeo tie: ‘Inogne alaigna’o ze ndaty mino ahio?’ Izay ty nahavy i Paoly ho Kirisitianagne sady nanoratse boke 14 agnate Baiboly ao. Manomboke amy Romanina ty boke sinora’e hatrake amy Hebreo.

Toko’e hamaky Baiboly isan’andro tikagne, sa tsy maregne zay?... Naho mamaky Baiboly isan’andro tikagne, le ho maro ty raha fantantikagne miomba i Jesosy. Teà voa ty mianatse miomba ty tantara i Jesosy?...