FAGNONTENEAGNE 3
Akore ty Hirehafako amy i Baba Naho i Nene?
INO TY HATAO’O?
Eretsereto hey ty tantara i Tovo, 17 taogne toy! Larobia hariva tamy izay. Fa nahavita ty asa’e iaby reke le nitofatofa. Nalefa’e i Teley sady nitsileralera amy i seza tea’ey eo reke.
Tamo o fotoagne iohoe, le niavy boake agne ty baba’e sady soresoregne.
Hoe reke tamy i Tovo: “Ato rehe miasa ty hente tele avao! Tsy ampea’o amy i devoara’ey i zai’oy! Sarotse rehafegne rehe!”
Nigneogneogne ty Tovo tie: “I baba zay!”
“Ino kahe hoe rehe?”, hoe ty baba’e.
“Nirehake raho?”, hoe reke nifoaigne sady nangareke.
Boseke ty rae’e, le hoe reke: “Izaho tsy anoa’o rehake hoe izay!”
Ino ty ho natao’o naho ihe ro Tovo?
MANDINEHA SOA HEY!
Hoe mandefa tognabile rehe naho fa mirehake amy ty rae aman-drene’o. Azo’o atao ty mipay lalan-kafa ndra tie misy raha misakagne ty an-dalagney.
DINEHO ZAO:
Hoe ty Lita: “Mahakamo ty mirehake amy i baba’ay! Fa ela ty nirehafantegna vaho izay reke taitse tie: ‘Hm? Akore hoe rehe?’ ”
MANAGNE SAFILY TELO TY LITA:
Mikazakazake an-drae’e tie:
“Magnino ty raha rehafeko Baba ie tsy dare’ò?”
Le lia’e tsy mifampirehake aman-drae’e.
Aleo’e tsy tantarae’e sasa ty olagne mahazo aze.
Mandigne fotoagne mete hirehafa’e ama’e indraike.
Mirehake mivantagne aman-drae’e ty Lita, ndra manoratse taratasy.
Aia amy ireo ty trea’o toko’e hanoe i Lita?
ERETSERETO ZAO: Tondregne ty baba i Lita, le tsy trea’e reke tie manahelo. Naho Safily 1 ro filie i Lita, le va’e tsy ho azon-drae’e ty anto’e mampikazakazake aze. Tsy magnaja an-drae’e ka reke naho manao izay, le tsy hitsanogne aze ty rae’e. (Efesianina 6:2) Tsy mete o safily iohoe.
Misy lalan-kafa azo’o ombagne, ndra tie misy sakagne. Misy fomba azo’o ifampirehafagne amy ty rae aman-drene’o ka ndra tie misy olagne
A naho Safily 2 ro filie i Lita? Tsotra io, faie tsy mete. Nagnino? Satria mila mirehake amy i baba’e ty Lita naho teà’e hilamigne i olagne mahazo azey. Tsy afake hagnampe aze ty baba’e naho tsy fanta’e i olagney. Tsy vahaolagne areke ty mitsigne avao.
A manao akore ty Safily 3? Tsy kivy reke ndra tie nisy sakagne, fa mbe hikezake hirehake aman-drae’e avao, faie mbe mandigne ty fotoagne mete. Azo’e atao ka ty manoratse taratasy hoahy i baba’e. Va’e haivagnivagne reke naho manao izay.
Ho hai’e soa ty hagnazava ty raha teà’e ho rehafegne naho manoratse taratasy reke sady ho fanta i baba’e i raha ho nirehafe’ey. Ho fanta’e i olagne mahazo azey. O safily iohoe ro soa, satria sady mahasoa i Lita ro mahasoa i baba’e. Mampihatse ty raha rehafe ty Baiboly reke naho manao izay satria ‘mikezake hampisy filongoagne.’—Romanina 14:19.
Ino ty raha hafa azo i Lita atao?
Sorato eto zay, naho mahatrea rehe. Sorato ka ty va’e ho voka’e.
FILIO SOA TY REHAKE HOREHAFEGNE
Ko haligno fa mete ho hafa ty andrambesa ty rae aman-drene’o ty raha rehafe’o.
OHATSE:
Agnontenea ty rae aman-drene’o rehe tie: “Nagnino rehe hoe malahelohelò?” Le hoe rehe: “Tsy magnino raho!”
Faie izao ty va’e ho fandrambesa i rae aman-drene’oy izay: “Tsy teàko ty hirehake izay ama’areo. Ndraleoko ty namako ro irehafako aze.”
Eretsereto ka tie misy raha mampivali-doha azo, le mba te hagnampe azo i rae aman-drene’oy. Faie izao ty reha’o: “Soa hinane zay fa ko mizilike amy izay nareo!”
Akore ty va’e handrambesa i rae aman-drene’oy izay?
Ino ty valen-drehake trea’o mete amy izay?