LESOGNE 26
Ino ty Mahavy o Haratiagneo Naho o Fijaleagneo?
Naho fa misy raha raty miseho, le mateteke o ndatio ro mirehake tie: “Le nagnino loatse?” Fale tikagne satria tena mamale o fagnonteneagne iohoe ty Baiboly.
1. Ino ty natao i Satana, le nahavy o raha ratio hiseho?
Nigoreve taman’Andrianagnahare ty Satana Devoly. Te hifehe o ndatio reke, le nitaogne i Adama naho i Eva higoreve manahake aze ka. Nirehake vande tamy i Eva ty Satana. (Genesisy 3:1-5) Natao’e ty hahavy i Eva hieretseretse fa misy raha soa tsy tean’Andrianagnahare ho meigne aze. Naho henteagne ty raha nirehafe’e, le te hirehake reke fa ho sambatse o ndatio naho tsy mankatò an’Andrianagnahare. Nirehake ty Satana tie tsy ho mate ty Eva ndra tie homagne i voan-kataey aza. Faie vande’e zay. Izay ty mahavy ty Baiboly manao i Satana tihoe “mpavande sady rae ty vande.”—Jaona 8:44.
2. Nifily ty hanao ino ty Adama naho i Eva?
Nimea i Jehovah i Adama naho i Eva ze kila raha nilae iareo. Nisaontsy reke fa afake mihinagne amy ze voan-katae tamy i tonda i Edenay ao iareo. Ty raike ama’e avao ty tsy azo iareo nihanegne. (Genesisy 2:15-17) Faie nanapa-kevetse hihinagne tamo o voan-katae rinara iohoe iareo. ‘Nampipototse amy ty voa i hataey ty [Eva] le nihane’e.’ Naho fa tafara izay, le nihinagne tamy i hataey ka ty Adama. (Genesisy 3:6) Sambe tsy nankatò an’Andrianagnahare iareo mirovaly. Voririke ty Adama naho i Eva, ty dika izay, tsy nisy fagniriagne hanao raha raty ty tam-po iareo ao. Faie nisatry raha tsy nankatò i Jehovah iareo. Nanota iareo sady tsy nagneke i Jehovah ho mpitondra. Izay ty nahavy iareo nijale.—Genesisy 3:16-19.
3. Ino ty voka i fanapahan-keve i Adama naho i Evay amantikagne?
Nanjare tsy voririke ty Adama naho i Eva naho fa nanota. Nanjare tsy voririke iaby ka ze tarana’e. Izao ty rehafe ty Baiboly miomba i Adama: “Boake amy ty ndaty raike [ty niziliha i hakeoy] ho amy ty tontolo toy, le boake amy ty hakeo ty niziliha o fateo, le niparitake amy ze kila ndaty o fateo.”—Romanina 5:12.
Ino areke ty anto’e mahavy o fijaleagneo? Maro ty anto’e mampijale antikagne. Va’e hijale tikagne satria tsy nahay nandrambe fanapahan-kevetse. Eo ka ty fanapahan-kevetse raty atao ty hafa. Mijale ka tika satria va’e ho tratse ty loza tampoke.—Vakio ty Mpitoriteny 9:11.
ANDAO HANDINEKE TY PITSOPITSO’E
Hodinehentikagne ato tie, nagnino ro tsy boake aman’Andrianagnahare o raha ratio naho o fijaleagneo. Ho treantikagne ato ka ty raha tsapa’e naho fa mijale tika.
4. Ia ty mahavy antikagne hijale?
Maro ty ndaty mino fa Andrianagnahare ty mifehe ty tontolo toy. Maregne vao zay? Alefaso i VIDEO oy.
Vakio ty Jakoba 1:13 naho ty 1 Jaona 5:19, sady iharò midineke ty fagnonteneagne toy:
Boake aman’Andrianagnahare vao o fijaleagneo naho o haratiagneo?
5. Ino ty voka ty fitondra i Satana?
Vakio ty Genesisy 3:1-6, sady iharò midineke ty fagnonteneagne retoa:
Ino ty vande nirehafe i Satana?—Henteo ty andine’e 4, 5.
Nirehake ty Satana fa misy raha soa tsy mein’Andrianagnahare o ndatio. Akore ty fomba nirehafa’e izay?
Naho henteagne ty raha nirehafe i Satana, mipay i Jehovah ho Mpitondra aze vao o ndatio mba hahavy iareo ho sambatse?
Vakio ty Mpitoriteny 8:9, sady iharò midineke ty fagnonteneagne toy:
Ino ty raha niseho tagnate ze fotoagne nagnenga i Jehovah o ndatio hifampitondra zay?
A. Nivoririke ty Adama naho i Eva sady niaigne tamy i Paradisay ao. Faie nitsanogne i Satana iareo le nigoreve tamy i Jehovah
B. Nanjare mpanota o ndatio sady mijale naho mate
D. Hofoagna i Jehovah o fahotagneo, naho o fijaleagneo vaho o fateo. Ho voririke indraike o ndatio sady hiaigne amy i Paradisay ao
6. Malahelo ty Jehovah mivazoho antikagne mijale
Tsy midare o fijaleantikagneo vao ty Andrianagnahare? Dineho ty raha nisorate i Davida Mpanjaka naho i apostoly Petera. Vakio ty Salamo 31:7 naho ty 1 Petera 5:7, sady iharò midineke ty fagnonteneagne toy:
Ino ty tsapa’o naho fa fanta’o tie, vazoho i Jehovah o fijaleantikagneo sady midare antikagne reke?
7. Hofoagna i Jehovah ze kila raha mampijale antikagne
Vakio ty Isaia 65:17 naho ty Apokalypsy 21:3, 4, sady iharò midineke ty fagnonteneagne toy:
Hofoagna i Jehovah ze kila raha mampijale o ndatio naho ty voka izay amy iareo. Nagnino ro mampahery azo ty mahafantatse izay?
Raha mahaliagne
Nagnaratiraty i Jehovah ty Satana naho fa nirehake i vande voaloha’ey. Nanjare raty laza ty Jehovah satria natao i Satana ty hieretsereta o ndatio tie tsy manao ty rare’e reke sady tsy managne hatea. Faie hagnamasigne i tahina’ey ty Jehovah naho fa hamoagne o fijaleagneo amy ty hoavy. Hoporofoe’e fa i reke ty Mpitondra fara’e soa. Tena lahibey o fagnamasinagne ty tahina i Jehovah iohoe. —Matio 6:9, 10.
MISY TY MIREHAKE TIE: “Fa lahan’Agnahare o fijaleagneo.”
Akore ty havale’o izay?
FAMINTIGNAGNE
Ty raha natao i Adama naho i Eva vaho i Satana Devoly ty tena nahavy o raha ratio. Vazoho i Jehovah ty fijaleantikagne, sady kede sisa le hofoagna’e io.
Fameregnagne
Ino i vande nirehafe i Satana Devoly tamy i Evay?
Ino ty voka’e tamy ze kila ndaty naho fa tsy nankatò ty Adama naho i Eva?
Akore ty ahafantarantikagne fa midare ty fijaleantikagne ty Jehovah?
FAGNAZAVAGNE FAGNAMPE’E
Ino ty atao tihoe ota naho ty Baiboly ro henteagne?
Ino i alihevetse naboa i Satana Devoly tamy i tonda i Edenay aoy?
“Nagnino o Fijaleagneo Engàn’Andrianagnahare Hisio?” (Fitalakesan-davitse 1 Janvie 2014)
Ho trea’o ato ty vale i fagnonteneagne raike tena mampivali-dohay.
Nanjare fanta ty lahilahy raike toy tie magnino o ndatio ro mijale.