Fagnazavagne

1. Ty Fomba Amantaragne i Babilona Lahibey

2. Ombia ty Nisehoa i Mesia?

3. Fitsaboagne Ampiasagne Lio

4. Fandehanagne Lefa

5. Fete Naho Fankalazagne

6. Naho Voa ty Aretegne Mifindra

7. Fifagnarahagne Ara-barotse Naho ze Raha Toko’e Handesegne amo o Fitsaràgneo Ey

1. Ty Fomba Amantaragne i Babilona Lahibey

Nagnino tikagne ro mirehake fa manondro ze fivavahan-diso iaby tihoe “Babilona Lahibey”? (Apokalypsy 17:5) Dineho ty anto’e retoa:

• Manjaka magneran-tane reke. Rehafe ty Baiboly fa mitoboke ambone o ‘vahoakeo eo naho o firenenao eo’ ty Babilona Lahibey. “Mifehe ze mpanjaka an-tane etoy” ka reke.​—Apokalypsy 17:15, 18.

• Tsy fikambanagne ara-politike ndra ara-barotse reke. Naho fa horavagne reke, le mbe ho eo “o mpanjaka ty tane toy io” naho “o mpivaro-mandehao.”​—Apokalypsy 18:9, 15.

• Magnafa-baraka an’Andrianagnahare reke. Atao tihoe makorely reke satria miara-miasa amo o fitondram-panjakagneo mba hahazoa’e vola ndra raha hafa. (Apokalypsy 17:1, 2) Mamitake ze ndaty amy ty firenena iaby reke. Tompon’andraikitse amy ty famonoagne ndaty maro ka reke.​—Apokalypsy 18:23, 24.

Hiheregne amy ty Lesogne 13 hevetse faha-6

2. Ombia ty Nisehoa i Mesia?

Fa nirehafe ty Baiboly mialoha fa hisy 69 heregnandro amparake ty hisehoa i Mesia.​—Vakio ty Daniela 9:25.

• Ombia i 69 heregnandroy ro nanomboke? Tamy ty taogne 455 T.K. Niavy ta Jerosalema ao ty Nehemia Governora tamo o fotoagne iohoe mba “hagnoregne indraike” i tanàgney.​—Daniela 9:25; Nehemia 2:1, 5-8.

• Naharetse fire taogne i 69 heregnandroy? Amy ty faminaniagne ila’e amy Baiboly ao, tihoe andro raike, le midika tihoe tao’e raike. (Nomery 14:34; Ezekiela 4:6) Manondro fito taogne areke ty heregnandro tsikiraidraike. I 69 heregnandro tamy i faminaniagneỳ magnomey 483 taogne (69 x 7).

• Ombia ty nifaragna i 69 heregnandroy? Naho magnisake 483 taogne boake amy ty taogne 455 T.K. eo tikagne, le avy amy ty taogne 29.a Tamo o taogne iohoe ty Jesosy ro natao badisa sady nanjare Mesia!​—Lioka 3:1, 2, 21, 22.

Hiheregne amy ty Lesogne 15 hevetse faha-5

3. Fitsaboagne Ampiasagne Lio

Misy fitsaboagne ila’e ampiasagne lio. Misy amy irey ndaty hafa ro magnomey ty lio’e ndra i rehe ro magnomey ty lio’o. Misy ka i lion-tegnagney avao ro alaegne mialoha, le avy eo hajariegne aloha ty handrasàgne an-tegnagne. Tena tsy mete amy ty Kristiana ty fitsaboagne ampiasagne lio hoe izay.​—Deoteronomia 15:23.

Va’e ho azo ekegne ty fitsaboagne ila’e. Agnisa izay ohatse ty dializy ndra teknike fanampohagne lio ndra fampihegnagne ze lio montso ndra fampiasagne masìna anoloagne fo ndra rabo.b Faie anjara ty tsikiraidraike ty hanapa-kevetse amy ty fitsaboagne ila’e ampiasagne lio. Agnisa izay retoa: Ampiasaegne ty lio’e agnate i fandrasagney, atao analizy ty lio’e ndra tampohagne fagnafoly. Va’e tsy tena hitovy ty fomba agnatanteraha o dokoterao o fitsaboagne rehoe. Aloha ty hitsaboagne ndra handrasàgne ty Kristiana raike, le mila fantare’e mialoha ty fomba hampiasagne i lio’ey. Dineho ty fagnonteneagne retoa:

• Akore naho alaegne boake amy ty vatako ao ty lioko, le ajanogne hey agnate ty fotoagne fohe? Mbe heké ty feo ty fieretseretako ho agnisa ty vatako vao io naho aheregne ao indraike, ndra tie tsy nategne “an-tane” eo aza?​—Deoteronomia 12:23, 24.

• Akore naho alaegne sady tampohagne fagnafoly vaho aheregne agnate ty vatako ao indraike ty lioko agnate ty fitsaboagne raike? Heké ty feo ty fieretseretako niofagne ty Baiboly vao zay, ndra hagneke ty fitsaboagne hoe izay vao raho?

Hiheregne amy ty Lesogne 39 hevetse faha-3

4. Fandehanagne Lefa

Tsy risihe ty Baiboly handeha lefa ze ndaty manambaly. Naho ohatse mandeha lefa i ampelay, le tsy midika zay tie sambe afake manambaly hafa iareo. (1 Korintianina 7:10, 11) Faie ndra tie eo zay, le misy raha ila’e va’e hahavy ty Kristiana handeha lefa.

• Tena tsy mamelogne aze ty vali’e: Tsy mipaoke hagnomey ze raha ilae ty keleia’e ara-nofo i lahilahỳ.​—1 Timoty 5:8.

• Mijera aze ty vali’e: Va’e hisy voka’e raty amy ty fahasalama’e ndra magnoho-doza ty fiai’e ty fijerà i vali’e aze.​—Galatianina 5:19-21.

• Sakana i vali’e tsy hanompo i Jehovah reke: Atao i vali’e ze hahavy aze tsy hanompo i Jehovah ndra tsy hankatò ty fitsipi’e.​—Asan’ny Apostoly 5:29.

Hiheregne amy ty Lesogne 42 hevetse faha-3

5. Fete Naho Fankalazagne

Tsy mandrambe anjara amy ty fete tsy mampifale i Jehovah ty tena Kristiana. Faie anjara ty tsikiraidraike ty mampiasa ty feo ty fieretsereta’e voaofa ty Baiboly amy ty raha va’e hiseho amy ty fete ila’e. Dineho ty ohatse tsiampeampe retoa.

• Va’e hisy hiarahaba azo tratse i fetey. Azo atao ohatse ty mirehake tihoe: “Misaotse.” Naho te hahafantatse soa ty anto’e mahavy azo tsy manao i fetey i ndatỳ, le azo’o atao ty magnazava aze.

• Naho mitaogne azo hiarake hihinagne miarake amy ty longo’e amy i fetey ty vali’o tsy Vavolombelogne. Naho mamela azo handeha ty feo ty fieretsereta’o, le azo’o hazavaegne amy i vali’o mialoha tie naho misy fombafomba mifandrambe amy ty fanompoan-tsampy ty amy i fihinanagney, le tsy handrambe anjara amy izay rehe.

• Naho magnomey raha azo amy i fetey i sefo’oy. Tsy toko’e handrambe irey vao rehe? Tsy voatere. Akore ty fihevera i sefo’oy i raha nimei’e azoy? Mihevetse vao reke fa agnisa ty fankalazagne i fetey ty anto’e agnomea’e i rahay, sa mba hampisehoa’e tie ankasitraha’e ty asa soa natao’o?

• Naho misy ndaty magnomey fagnomezagne azo amy i fetey. Va’e hirehake i ndaty magnomeỳ tie: “Fantako fa tsy mankalaza i fetey rehe, faie mba teako homeigne azo avao toy.” Magnomey igne azo reke satria soa fagnahy ama’o avao. Faie eretsereto tie, hitsapagne ty finoa’o vao ty mahavy aze magnomey igne sa mba hanjilihagne azo hankalaza i fetey? Naho fa boake nandineke ireo rehe, le anjara’o ty manapa-kevetse tie handrambe i fagnomezagney sa tsy handrambe. Toko’e halio avao ty feo ty fieretseretantikagne sady hampiseho tikagne tie, tsy mivalike amy i Jehovah amy ze fanapahan-kevetse rambesentikagne.​—Asan’ny Apostoly 23:1.

Hiheregne amy ty Lesogne 44 hevetse faha-1

6. Naho Voa ty Aretegne Mifindra

Mikezake mitao soa tikagne naho voa ty aretegne mifindra satria teantikagne o ndatio. Izay ty toko’e hataontikagne naho voa ty aretegne mifindra tikagne ndra marikarike kera voa’e. Ty anto’e, magnorike ty lily amy Baiboly ao tihoe toy tikagne: “Teao manahake ty tegna’o ty nama’o.”​—Romanina 13:8-10.

Akore ty agnoriha ty ndaty raike voa ty aretegne mifindra o lily iohoe? Tsy toko’e hifampikasike ama o ndaty reke, ohatse, manalama, mamihigne ndra magnoroke. Tsy toko’e ho boseke reke naho tsy ampizilihe o ndaty an-tragno’e ao satria va’e miaro ty keleia’e reke. Toko’e hirehake amy ty androanavi-pagnahy mpandrindra reke aloha ty hanoagne aze badisa mba hiarovagne ty hafa. Toko’e hanao analizy lio heike reke aloha ty hiaraha’e amy ty ndaty raike eretserete’e ho valiegne. Naho manao izay rehe, le izay ty ampisehoa’o fa ‘mipay ze hahasoa ty hafa fa tsy ze hahasoa ty tegna’o avao.’​—Filipianina 2:4.

Hiheregne amy ty Lesogne 56 hevetse faha-2

7. Fifagnarahagne Ara-barotse Naho ze Raha Toko’e Handesegne amo o Fitsaràgneo Ey

Naho manao fifagnarahagne ara-barotse ndra ara-bola tikagne, le toko’e hatao an-tsoratse ara-dalàna ndra tie itikagne sambe Kristiana aza. Misoroke olagne maro ty fanoagne izay. (Jeremia 32:9-12) Faie kindraike, le va’e hisy olagne ara-bola ndra raha hafa ty amo o sambe Kristianao. Naho misy ty raha hoe izay, le toko’e halamigne malaky. Mila mikezake mifagnarake iareo sady iareo sambe iareo avao ty toko’e handamigne aze.

Ino ty toko’e hatao’o naho misy Kristiana raike mamitake azo ndra magnaratiraty azo? (Vakio ty Matio 18:15-17.) Nagnomey ty dingagne telo toko’e horihentikagne retoa ty Jesosy:

1. Kezaho’areo alamigne i olagne misy ama’areo eoy.​—Henteo ty andine’e 15.

2. Naho mbe tsy vita’areo, le mirehafa amy ty Kristiana raike ndra roe matotse amy i fiangonagney eo.​—Henteo ty andine’e 16.

3. Naho mbe tsy vita avao, le mirehafa amo o androanavi-pagnahio.​—Henteo ty andine’e 17.

Ndra tie maro aza ty raha va’e tsy hampifagnarake antikagne amo o mpiara-manompò, le tsy soa ty mitory iareo amo o fitsaràgneo ey. Ty anto’e, hagnafa-baraka i Jehovah naho o fiangonagneo zay. (1 Korintianina 6:1-8) Faie misy raha ila’e tsy maintsy andesegne amo o fitsaràgneo ey. Agnisa izay retoa: Fikarakaragne fisaraham-panambaliagne, fanagnagne zo hiteza i ajajay naho nisarake ty rae aman-drene’e, vola toko’e ho meigne i ampelay naho nisarake iareo, fiantohagne, tsy ombia ho voaloa o ndaty i trosay, ndra taratasy fagnomezagne alalagne ze ho mpandova. Tsy mandika ty toro lala ty Baiboly ty Kristiana raike naho ente’e amo o fitsaràgneo ey ty fikarakaragne ty raike amo o raha rehoe.

Akore ty atao naho ohatse misy mamahotse, manimba ajaja, mamono, halatse bey? Tsy mandika ty toro lala ty Baiboly ty Kristiana raike naho ampahafantare’e o manam-pahefagneo ty raike amo o raha rehoe.

Hiheregne amy ty Lesogne 56 hevetse faha-3