LESOGNE 17
Ndaty Nanao Akore ty Jesosy?
Naho fa mianatse ty raha nirehafe i Jesosy naho ty raha natao’e tamy i reke tambone tane etoỳ tikagne, le hahafantatse ty toetse’e. Hagnampe antikagne hiharine aze naho hiharine an-dRae’e, le i Jehovah zay. Inogne iaby i toetse’e rezay? Akore ty azontikagne anahafagne i Jesosy?
1. Ino ty itoviza i Jesosy aman-dRae’e?
Tamy i Jesosy tan-dagnitse agney, le nahatrea an-dRae’e mivantagne reke. Nitrea’e ka tie bey hatea ty Rae’e sady niana-draha boake ama’e reke tagnate ty agn’arivo’e tapetrisa taogne. Ty voka izay, nanjare nitovy ty eretsere iareo, ty fihetseham-po iareo naho ty raha natao iareo. (Vakio ty Jaona 5:19.) Naho ty maregne, le tena nanahake ty toetsen-dRae’e ty Jesosy. Izay ty nahavy aze nanao tihoe: “Ze nahatrea ahy, le nahatrea an-dRaeko ka.” (Jaona 14:9) Hahafantatse soa i Jehovah rehe naho fa mianatse ty miomba ty toetse i Jesosy. Niferenaigne o ndatio ohatse ty Jesosy tamy i reke tan-tane etoỳ. Trea boake amy izay fa miferenaigne o ndatio ka ty Jehovah.
2. Akore ty nampisehoa i Jesosy fa tea’e ty Jehovah?
Hoe ty Jesosy: “Mba hahafantara ty tontolo toy fa teako ty Rae, le ze nandilia i Rae ahy ro ataoko.” (Jaona 14:31) Naseho i Jesosy tie tea’e ty Rae’e tamy i reke tan-tane etoỳ satria nankatò Aze avao reke ndra tie niatreke raha sarotse aza. Tea i Jesosy ka ty nirehake amo o ndatio ty miomba an-dRae’e naho ty nagnampe iareo mba hanjare ho nama i Jehovah.—Jaona 14:23.
3. Akore ty nampisehoa i Jesosy fa tea’e o ndatio?
Rehafe ty Baiboly fa ‘tea i [Jesosy] ze raha miomba o ndatio.’ (Ohabolana 8:31) Naseho’e ze hatea’e zay naho fa nampahery sady nagnampe o ndatio reke. Trea amy i fahagagagne natao’e rey ka fa tsy tihoe managne hery avao reke fa miferenaigne o ndatio ka. (Marka 1:40-42) Soa fagnahy ka reke sady tsy magnavakavake. Nampionogne naho nagnomey fanantenagne ze ndaty nitsanogne aze ty raha nirehafe’e. Vognogne hijale naho ho mate ka reke noho ty hatea’e o ndatio. Faie ze magnorike ty fampianara’e ro tena tea’e.—Vakio ty Jaona 15:13, 14.
ANDAO HANDINEKE TY PITSOPITSO’E
Hodinehentikagne amy ty pitsopitso’e ty toetse i Jesosy. Hotreantikagne ato ka ty fomba nanehoa’e hatea naho ty nampisehoa’e tie matarike reke.
4. Teà i Jesosy ty Baba’e
Trea amy ty ohatse nenga i Jesosy tie akore ty fomba hampisehoantikagne ty hateantikagne i Jehovah. Vakio ty Lioka 6:12 naho ty Jaona 15:10; 17:26. Naho fa vita vaky ty andinin-teny raike, le iharò midineke ty fagnonteneagne toy:
Akore ty ampisehoantikagne ty hateantikagne i Jehovah, manahake ty natao i Jesosy?
Teà i Jesosy i Rae’e an-dagnitse agney, le nivavake ama’e mateteke reke
5. Niferenaigne ze ndaty sahiragne ty Jesosy
Ty raha nilae o ndatio heike ty natao i Jesosy vaho izay ty aze. Ndra tie nirokake aza reke, le nahafoe ty fotoa’e naho ty heri’e mba hagnampeagne o ndatio. Vakio ty Marka 6:30-44, sady iharò midineke ty fagnonteneagne retoa:
Amo o fitantaragne iohoe, inogne iaby ty raha ila’e nampisehoa i Jesosy fa niferenaigne i ndaty rey reke?—Henteo ty andine’e 31, 34, 41 naho 42.
Ino ty nahavy i Jesosy nagnampe i ndaty rey?—Henteo ty andine’e 34.
Nanahake ty toetse i Jehovah ty Jesosy. Ino ty ampianare izay azo miomba i Jehovah?
Tena niferenaigne ndaty ty Jesosy. Akore ty azontikagne anahafagne aze?
6. Natarike ty Jesosy
Natarike ty Jesosy ndra tie tsy nanan-draha fire aza. Nandrisike antikagne hatarike ka reke. Vakio ty Asan’ny Apostoly 20:35, sady iharò midineke ty fagnonteneagne toy:
Akore ty hahavy antikagne ho sambatse naho henteagne o reha i Jesosy iohoe?
Alefaso i VIDEO oy, sady iharò midineke ty fagnonteneagne toy.
Ino iaby ty raha azontikagne meigne, ndra tie tsy manan-draha fire aza tikagne?
Raha mahaliagne
Ampianare ty Baiboly fa i Jehovah ro toko’e hivavahantikagne faie mila atao amy ty agnara i Jesosy. (Vakio ty Jaona 16:23, 24.) Naho manao izay tikagne naho fa mivavake, le izay ty ampisehoantikagne fa magneke ty raha natao i Jesosy mba hagnampeagne antika hanjare ho nama i Jehovah.
MISY TY MIREHAKE FA: “Tsy midare ty fijaleantikagne ty Andrianagnahare.”
Tena mitovy toetse aman-dRae’e ty Jesosy. Ino amy ty raha natao’e ty magnaporofo fa mikarakara antikagne ty Jehovah?
FAMINTIGNAGNE
Teà i Jesosy ty Jehovah, sady tea’e ka o ndatio. Arakarake ty ahafantara’o i Jesosy ty hahafantara’o soa i Jehovah satria tena nanahake ty toetsen-dRae’e reke.
Fameregnagne
Akore ty ampisehoantikagne tie tena teantikagne ty Jehovah, manahake ty natao i Jesosy?
Akore ty ampisehoantikagne tie tena teantikagne o ndatio, manahake ty natao i Jesosy?
Ino amy ty toetse i Jesosy ty tena tea’o?
FAGNAZAVAGNE FAGNAMPE’E
Azontikagne tsikombegne i toetse i Jesosy rey. Inogne ty ila’e amy izay?
Ho trea’o ato tie nagnino ro toko’e hatao amy ty agnara i Jesosy ty vavake ataontikagne.
“Nagnino ro Atao amy ty Agnara i Jesosy ty Vavake Ataontikagne?” (Fitalakesan-davitse 1 Fevrie 2008)
Mirehake miomba ty pozipozy i Jesosy vao ty Baiboly?
“Manao Akore ty Pozipozy i Jesosy?” (Lahatsoratse amy jw.org ao)
Ino ty ianarantikagne boake amy ty fomba nindesa i Jesosy o ampelao?
“Mihevetse o Ampelao ho Sarobily ty Andrianagnahare” (Fitalakesan-davitse 1 Septambra 2012)