Akore ty Fiheveran’Andrianagnahare o Liò?

Tena ilaegne o liò satria iankigna ty aigne. I Jehovah ro Mpamorogne, le i reke avao ty afake misaontsy tie akore ty ampiasagne o liò. Inogne areke ty nisaontsie’e miomba o liò? Azo hanegne ndra azo ampidiregne amy ty vatantikagne vao io? Ino ty hagnampe azo hahay hanapa-kevetse miomba izay?

1. Akore ty fihevera i Jehovah o liò?

Nisaontsy tamy i mpanompo’e taloha rey ty Jehovah tie: “Ty lio’e ro ay ze karazan-draha misy nofotse iaby.” (Levitikosy 17:14) Aigne o liò tie amy i Jehovah. Fagnomezagne boake ama’e o aigneo sady masigne, le masigne ka o liò.

2. Tsy engàn’Andrianagnahare hatao akore o liò?

Taloha ty nioregna ty fiangonagne Kristiana, le nandily ze mpanompo’e ty Jehovah mba tsy hihinagne lio. (Vakio ty Genesisy 9:4 naho ty Levitikosy 17:10.) Mbe nahere i Jehovah avao o lily iohoe naho fa tafara tatoy. Nagnamafe o lily iohoe o filan-keve-pitantanagneo naho fa nagnomey toromareke o Kristianao tie toko’e ‘hifaly lio’ iareo.​—Vakio ty Asan’ny Apostoly 15:28, 29.

Ino ty dika izay? Akore ze o mifaly lio zao? Naho ampifalie o dokoterao toake ohatse rehe, le azo antoke fa tsy hinon-toake. Faie mbe hihinagne hanegne misy toake avao vao rehe ndra hampilitse toake amy ty lalan-dra’o? Azo antoke fa tsy hanao izay rehe. Naho fa misaontsy areke ty Andrianagnahare tie, falio o liò, le midika zay fa tsy toko’e hihinagne lio ndra hena tsy milenta tikagne. Tsy mete ka ty mihinagne hanegne nisiagne lio.

A manao akore ka naho ampiasaegne mba hitsaboagne o liò? Misy fitsaboagne le avy le fantatse tie, tsy mifagnarake amy ty lalàn’Andrianagnahare. Agnisa izay ty fampidiragne lio ndra o liò iaby zay ndra o raha mahaforogne o liò retoa: Liomena, liofoty, plakety, naho plasma. Ty fitsaboagne ila’e ka tsy le avy le mibaribary tie mifanohetse amy ty lalàn’Andrianagnahare sa tsy mifanohetse. Misy karazam-pitsaboagne ila’e ohatse, ampiasagne i raha azo boake amy i raha mahaforogne o liò rey. Misy fotoagne ka ty lio i ndaty mararey avao ty ampiasaegne. Naho izay ty miseho, le anjarantikagne tsikiraidraike ty manapa-kevetse amy izay.a​—Galatianina 6:5.

ANDAO HANDINEKE TY PITSOPITSO’E

3. Ze mampifale i Jehovah ro anò naho fa mifily fitsaboagne

Toko’e hifagnarake amy ty fomba fiheve i Jehovah miomba ty lio ty fitsaboagne filientikagne. Ino ty hagnampe antikagne hanao izay? Alefaso i VIDEO oy, sady iharò midineke tie nagnino ro lahibey ty magnorike ty dingagne ambane eo retoa aloha ty handrambesagne fanapahan-kevetse.

VIDEO: Akore ty Atao Naho fa Handrambe Fanapahan-kevetse Miomba ty Lio? (5:47)

• Mivavaha mba hahazo fahendreagne. ​—Jakoba 1:5.

• Mikaroha toro lalagne amy Baiboly ao, le fantaro tie akore ty fomba hagnorihagne aze.​—Ohabolana 13:16.

• Fantaro tie inogne iaby ty fitsaboagne misy.

• Fantaro tie ty aia amy i fitsaboagne rey ty tsy mete ama’o.

• Anò azo antoke soa tie hampilamigne ty eretsere’o ty fanapahan-kevetse rambese’o.​—Asan’ny Apostoly 24:16.b

• Ko haligno fa tsy misy ndaty toko’e hanoro azo ty fanapahan-kevetse ho rambese’o, amy ty raha miankigne amy ty feo ty fieretseretagne ndra i vali’o aza, ndra o androanavi-pagnahio, ndra ty ndaty mampianatse Baiboly azo.​—Romanina 14:12.

• Sorato ze fanapahan-kevetse rambese’o.

4. Mipay ze fitsaboagne fara’e soa o Vavolombelo i Jehovah-o

Azo atao soa tihoe sady magnorike ty lalà i Jehovah miomba ty lio ro mahazo fitsaboagne fara’e soa. Alefaso i VIDEO oy.

VIDEO: Fagnadikadignagne i Profesora Massimo P. Franchi, M.D. (1:36)

Vakio ty Titosy 3:2, sady iharò midineke ty fagnonteneagne toy:

• Nagnino tikagne ro toko’e ho soa fagnahy sady hagnaja o dokoterao naho fa mirehake amy iareo?

Tsy eké ty Kristiana	Safidy ty tsikiraidraike
A. Plasma	Raha boake amy ty plasma
B. Liofoty	Raha boake amy ty liofoty
D. Plakety	Raha boake amy ty plakety
E. Liomena	Raha boake amy ty liomena

5. Mete vao i raha boake amy i raha mahaforogne o liò rey?

Misy efatse i raha mahaforogne o liò rey: Liomena, liofoty, plakety naho plasma. Ty agnate ireo ao ka misy raha kedekede maro, le irey ro atao tihoe raha boake amy i raha mahaforogne o liò rey.c Ampiasaegne i raha rey mba hitsaboagne aretegne ila’e ndra hampijanognagne ze lio montso.

Ty Kristiana tsikiraidraike ka ro manapa-kevetse tie hagneke i raha boake amo o raha mahaforogne o liò rey ndra tsy hagneke. Toko’e hampiasa ty feo ty fieretsereta’e reke. Va’e tsy hagneke ze fitsaboagne ampiasagne i raha boake amo o raha mahaforogne o liò rey ty Kristiana ila’e. Ty ila’e ka va’e hagneke izay.

Naho fa hanapa-kevetse rehe, le eretsereto retoa:

• Nagnino raho ro magneke ndra tsy magneke i raha boake amo o raha mahaforogne o liò rey? Akore ty hagnazavako izay amo o dokoterao?

FAMINTIGNAGNE

Tea i Jehovah hihevetse o liò ho masigne tikagne.

Fameregnagne

• Nagnino o liò ro masigne tie amy i Jehovah?

• Nandily antikagne ty Jehovah mba hifaly lio. Nagnino ro tafilitse amy izay tihoe tsy ampidiragne lio?

• Ino ty hagnampe azo hahay hifily ze fitsaboagne hatao’o?

FAGNAZAVAGNE FAGNAMPE’E

Inogne iaby ty mila dinehe’o naho fa hanapa-kevetse rehe tie, hagneke ty fitsaboagne ampiasagne ty lio’o vao sa tsy hagneke?

“Fagnonteneagne Boake amo o Mpamakio” (Fitalakesan-davitse 15 Oktobra 2000)

Ino ty toko’e ho dinehe’o naho fa hanapa-kevetse rehe tie, hagneke i raha mahaforogne o liò rey vao sa tsy hagneke?

“Fagnonteneagne Boake amo o Mpamakio” (Fitalakesan-davitse 15 Jona 2004)

Ino ty nahavy ty dokotera raike toy hagneke ty fomba fihevera i Jehovah o liò?

“Nagneke ty Fomba Fiheveran’Andrianagnahare o Liò Raho” (Mifohaza! 8 Desambra 2003)

Ino ty atao o androanavi-pagnahy agnisa ty Komity Mifandrae amy ty Lapotalio, mba hagnampeagne o rahalahy naho o rahavaveo?

Manohagne ze Marare ty Jehovah (10:23)