Inogne ty Hagnampe Azo Hahavita Hiatreke ty Raha Mampinekoneko Azo?

AZO ampitoviegne amy ty raha raike magnavesatse ty fontika o finekonekò. (Ohab. 12:25) Fa nisy fotoagne vao rehe nijale noho ty fiasan-doha? Fa nisy fotoagne ka vao rehe nahatsapa tie hoe tsy ho vita’o zay ty hiatreke i raha mampiasa loha azo rey? Tsy ihe raike avao ty fa nahatsapa hoe izay. Maro amantika, ohatse, ty mikarakara ty keleia’e marare, eo ka ty namoe longo tsy foen-troke, nisy ty nitratse ty loza arake ty natiora, ndra miatreke olagne hafa mahavy antika hahatsiaro ho rokake naho hinekoneko vaho ho kivy. Inogne ty hagnampe antika hahavita hiatreke ty raha mampinekoneko antika?a

Maro ty raha azontika ianaragne boake amy ty fomba niatreha i Davida Mpanjaka ty raha nampinekoneko aze. Ty anto’e, maro ty olagne natrehe’e tamy ty fiaigna’e. Fa ho namoeza’e ty fiai’e aza ze raha natrehe’e indraike zay. (1 Sam. 17:34, 35; 18:10, 11) Inogne ty nagnampe i Davida hahavita hiatreke o raha nampinekoneko aze rehoe? Akore ty hanahafantikagne aze?

NAHAVITA NIATREKE TY RAHA NAMPINEKONEKO AZE TY DAVIDA

Maro ty olagne natrehe i Davida indray miarake. Dineho ohatse ty raha nanjò aze tamy ireke nilay, satria nitea i Saoly Mpanjaka hovonoegney. Naho fa noly ta Ziklaga tagne ty Davida naho i lahilahy niarake tama’e rey, le nitaitse iareo naho fa niavy ao. Tsy nizoe iareo ao i fanagna iareo rey naho i valy iareo rey, fa nente ty fahavalo sady noroa iareo ka i tanàgney. Le akore ty natao i Davida? ‘Nangoihoy ty tagny reke naho i lahilahy niarake tama’e rey amparake ty tsy nanagna iareo hery hitagniagne sasa.’ Faie vao mainke nagnindra ty haorea i Davida ty raha natao i nama’e natokisa’e rey, satria nirehake iareo tie ‘hitora-bato aze.’ (1 Sam. 30:1-6) Telo areke ty olagne lahibey natrehe i Davida tamo o fotoagne iohoe: Ampelan-tagna o fahavalò agne i keleia’e rey le atahoragne hovonoe iareo, natahotse ka reke tie hovonoe i nama’e rey vao sa tsy hovonoe iareo, ie amy zao ty Saoly Mpanjaka manao aze pay hao foty. Mba alao sare an-tsaigne heike tie nanao akore ty finekoneko i Davida tamy izay!

Inogne ty raha natao i Davida tafara izay? Le avy le ‘niantehetse tamy i Jehovah Andrianagnahare’e reke, le nahazo hery.’ Akore ty va’e nanoa’e izay? Mateteke ty Davida ro nangatake fagnampeagne tamy i Jehovah naho nisaintsaigne ty fomba nagnampea’e aze taloha. (1 Sam. 17:37; Sal. 18:2, 6) Nitrea i Davida ka tie ilaegne ty mipay ty tari-dala i Jehovah. Izay ty nahavy aze nagnontane i Jehovah tie inogne ty toko’e hatao’e. Le avy le nanao raha ty Davida naho fa nahazo tari-dalagne boake amy i Jehovah. Ty voka’e, nitahie i Jehovah reke naho i lahilahy nama’e rey, le niazo iareo indraike i valy iareo rey naho i fanagna iareo rey. (1 Sam. 30:7-9, 18, 19) Voamare’o vao tie nisy raha telo natao i Davida? Nivavake tamy i Jehovah reke mba hahazo fagnampeagne, nisaintsaigne ty fomba nagnampea’e aze taloha, sady nanao raha nifagnarake amy ty tari-dala i Jehovah. Akore ty hanahafantikagne i Davida? Dineho ty fomba telo retoa.

TSIKOMBEO TY DAVIDA NAHO FA IREHE MINEKONEKO

1. Mivavake. Mangataha fagnampeagne naho hilala amy i Jehovah naho vaho manomboke mahatsapa ho minekoneko rehe. Hagnampe antika hahatsiaro ho maivankivagne ty firehafantikagne amy i Jehovah amy ty alala ty vavake ze raha am-pontikagne ao. Azo atao aza ty manao vavake fohe sady am-pò ao avao naho ohatse tsy magnenga antika hampiboake feo ty raha misy. Isake tie mangatake fagnampeagne amy i Jehovah tika, le atorontikagne amy izay tie matoky aze manahake i Davida tika, i nirehake tihoey: “Vatoharagne naho manda fiarovagne ho ahy ty Jehovah sady Mpandrombake ahy. I Andrianagnaharekoy ro lamilamiko, le hitsoloke ama’e raho.” (Sal. 18:2) Fa tena magnampe vata’e vao o vavakeo? Hoe ty Kahlia, rahavave raike mpisava lalagne zay: “Mahatsiaro ho milamin-tsaigne raho naho fa boake mivavake. Ty anto’e, magnampe ahy hagnitsy ty toe-tsaiko io mba hahavy aze hitovy amy ty fomba fiheve i Jehovah ro sady mampitombo ty fatokisako aze ka.” Le vata’e misy heri’e lahibey areke ty vavake, i fagnomezagne boake amy i Jehovah-y, satria magnampe antikagne hiatreke ty raha mampinekoneko antika.

2. Misaintsaigne. Naho fa mandineke ty fiaigna’o taloha rehe, le azo’o atao ty mametsevetse tie inogne iaby ty raha sarotse natrehe’o, faie nivita’o ty niaretse aze noho ty fagnampea i Jehovah. Naho itika mametsevetse ty fomba nagnampea i Jehovah antika naho ty mpanompo’e taloha, le vao mainke hiadan-tsaigne naho hatoky aze. (Sal. 18:17-19) Hoe ty Joshua, androanavi-pagnahy: “Ataoko lisita ty vale ty vavake nanoeko. Irey ty magnampe ahy hahatsiaro i fotoagne nagnomea i Jehovah ahike i raha nangataheko tama’e tamy izaỳ. Tena nataoko voafaritse soa manko ty raha nangataheko tama’e.” Naho saintsaignentikagne mateteke vata’e ty raha fa natao i Jehovah ho antika taloha, le hahazo hery hoentegne mialy amo o finekonekò tikagne.

3. Manao raha. Aloha ty handrambesagne fanapahan-kevetse miomba ty raha hatao amy ty raha raike, le azontika atao ty mikaroke tari-dalagne azo antoke amy ty Saontsin’Agnahare ao. (Sal. 19:7, 11) Maro ty mahatrea tie naho fa nanao fikarohagne manokagne miomba ty andinin-teny raike iareo, le nanjare nitombo ty fahatakara iareo ty fomba hampiharagne aze amy ty fiaigna’e. Izao ty nihazavae i Jarrod, androanavi-pagnahy: “Nagnampe ahy hahatakatse soa ty tea i andinin-tenỳ horehafegne naho ty raha tea i Jehovah hosaontsiegne amako ty fanoagne fikarohagne. Nagnampe ahy hino tanterake ze raha nivakieko ka ty fanoako io, hafarako manao raha mifagnarake amy ty tari-dala’e.” Naho itika mipay ty tari-dala i Jehovah boake amy ty Soratse Masigne ao sady magnorike izay, le hohaintikagne ty hiatrehagne o finekonekò.

HAGNAMPE AZO HAHAVITA HIATREKE TY RAHA MAMPINEKONEKO AZO TY JEHOVAH

Nitaka i Davida fa nipay ty fagnampea i Jehovah reke naho te hahavita hiatreke ty raha mampinekoneko aze. Tena nankasitraha’e ty fagnampea i Jehovah aze, le izao ty nirehafe’e: “Noho ty herin’Andrianagnahare, le nivitako ty nanganike manda. I Andrianagnahare maregney ro mampiakanjo hery ahy.” (Sal. 18:29, 32) Va’e mahatsapa tika tie hoe mitovy amo o manda abo bey sady tsy hay anganihagneo ty olagne mahazo antikagne. Faie naho fa ampea i Jehovah tika, le ho vitantikagne avao ty hiatreke i olagne rey ndra manao akore ndra manao akore ty hasaro’e. Ie, tena afake matoky tika tie hagnomey hery antika naho hilala ilaentika mba hiatrehagne ty raha mampinekoneko antikagne ty Jehovah naho itika mivavake ama’e, misaintsaigne ze raha fa natao’e ho antika taloha, sady manao raha mifagnarake amy ty tari-dala’e.