Anò Avao ze Hahamafe i Fanantena’oy

1. Ino ty fanantenagne nimey i Jehovah antikagne?

NIMEY i Jehovah fanantenagne fanjaka tika, le ty hiaigne nainai’e. Misy amantika ty mitamà hiaigne nainai’e an-dagnitse agne sady tsy ho mete mate sasa. (1 Kor. 15:50, 53) Fa ty ankamaroantikagne mitamà hiaigne nainai’e an-tane etoa, le ho voririke sady tena ho sambatse. (Apok. 21:3, 4) Faie ndra mitamà hiaigne nainai’e an-dagnitse agne tika, ndra mitamà ty hiaigne nainai’e an-tane etoa le sarobily amantika ze fanantenantikagne zay.

2. Ino ty ioregna ty fanantenantika, le magnino tika ro afake mirehake izay?

² Ty rehake tihoe “fanantenagne” amy Baiboly ao, le azo adika tihoe “fandignisagne mafe ty raha soa hiseho.” Matoky tika tie ho tanterake i raha tamaentika amy ty hoavỳ, satria i Jehovah ty nisaontsy aze. (Rom. 15:13) Haintika fa nampitamà raha antika reke, le haintikagne ka fa lava tanterahe’e avao ze raha ampitamae’e. (Nom. 23:19) Haintika fa te hagnatanterake naho managne hery hagnatanterahagne ze raha nisaontsie’e fa hatao’e ty Jehovah. Tsy nofinofy avao areke i raha tamaentika rey fa mioregne amy ty porofo marem-pototse.

3. Ino ty hodinehentika amy ty lahatsoratse toy? (Salamo 27:14)

³ Tea antika i Raentikagne bey hatea an-dagnitse agney, sady tea’e tika naho matoky aze. (Vakio ty Salamo 27:14.) Naho mafe ty fanantenantikagne, le ho vitantikagne ty tsy hivalike sady ho bey herim-po naho ho falefale avao ndra inogn’ino raha sarotse va’e hatrehentikagne. Afake miaro antika areke ty fanantenagne. Amy ty fomba akore? Mba hamaleagne izay, le andao hodinehentikagne tie nagnino ty fanantenagne ro mitovy amo o vatofantsikeo naho amo o fiarovan-dohao. Afara izay tika handineke ty raha azontika atao mba hagnamafesagne i fanantenantikagney.

MITOVY AMO O VATOFANTSIKEO O FANANTENANTIKAGNEO

4. Nagnino ty fanantenagne ro mitovy amo o vatofantsikeo? (Hebreo 6:19)

⁴ Amy i taratasi’e hoahy o Hebreoy ty apostoly Paoly le nampitovy ty fanantenantikagne amy ty vatofantsike. (Vakio ty Hebreo 6:19.) Mateteke nandeha sambo ty Paoly, le izay ty nahaia’e tie nampiasaegne mba hiarovagne o sambò tsy haviovio o tiokeo ndra o onjao ty vatofantsike. Nandeha sambo ohatse reke tie indraike, le nisy tiobey ty tan-driake ey tamy izay. Tamy izay reke, le nahatrea i ndaty mpiantsambo rey nampipoke vatofantsike agnate rano ao mba hiarovagne i samboy tsy hipaike amo o vatò. (Asa. 27:29, 39-41) Manahake o vatofantsikeo ka ty fanantenantikagne, satria io ty magnampe antika tsy ho voaozongozogne, le hiala amy i Jehovah naho fa miatreke raha sarotse. Io ty magnampe antika ho tony naho fa miatreke olagne, satria matoky tika tie mbe hihasoa ty fiaignantikagne. Tsiarovo fa nirehake ty Jesosy tie henjehegne tika. (Jaona 15:20) Ty fisaintsaignagne i valesoa ho azontikagne amy ty hoavỳ areke le hagnampe antika tsy hivalike.

5. Nagnino ty fanantenagne ro nagnampe i Jesosy hahavita tsy hivalike ndra tie nihai’e aza tie hovonoegne reke?

⁵ Dineho tie nagnino ty fanantenagne ro nagnampe i Jesosy tsy hivalike ndra tie nihai’e aza tie hampijalegne naho ho vonoegne reke. Tamy Pentekosta taogne 33 ty apostoly Petera, le nirehake faminaniagne raike boake amy ty boke Salamo ao. Trea amo o andine’e io fa tena nitony naho nanagne fatokisagne ty Jesosy. Izao ty voarehake ao: “Hanagne fanantenagne avao raho, satria tsy ho foe’o hijanogne an-kibory ao raho sady tsy henga’o ho lo i mpanompo’o tsy mivalikey. ... Hatao’o ze tena hampifale ahy agnatreha’o eo.” (Asa. 2:25-28; Sal. 16:8-11) Ndra tie fa nihay i Jesosy areke tie ho mate reke, le tena natoky reke fa hovelomen’Andrianagnahare sady tena ho falefale naho fa hiarake aman-dRae’e an-dagnitse agne indraike.​—Heb. 12:2, 3.

6. Ino ty raha nirehafe ty rahalahy raike miomba o fanantenagneo?

⁶ Nagnampe o rahalahy naho o rahavaventikagneo hahavita hiaretse i raha tamaentikagne rey. Dineho ohatse ty raha niaigna i Leonard Chinn, rahalahy raike tsy nivalike nitoboke ta Angletera tagne. Nigadraegne reke tamy i Aly Lahibey Voaloha’ey, satria tsy nimete nanao maramila. Tsy naharo toboke tamy ty gadra hafa reke tagnate ty roe volagne, le tafara izay reke nampanoegne asa mafe. Hoe ty Leonard: “Tsapako tamy ty raha niaignako fa tena ilaegne ty fanantenagne satria magnampe antika hiaretse. Managne modely tika, agnisa izay ty Jesosy, o apostolio naho o mpaminanio, le eo ka ty fampitamaegne fanjaka amy Baiboly ao. Ireo ty mahavy antika tena hatoky i raha tamaentika rey naho magnampe antika hahavita hiaretse.” Le vata’e nivatofantsike hoahy i Leonard ty fanantenagne, le afake ty hanahake aze ka tika.

7. Nagnino o fitsapagneo ro magnamafe ty fanantenantikagne? (Romanina 5:3-5; Jakoba 1:12)

⁷ Mihamafe ty fanantenantikagne naho fa itika mahavita miaretse fitsapagne sady mahatsapa tie ampea i Jehovah naho ankasitraha’e. (Vakio ty Romanina 5:3-5; Jakoba 1:12.) Tena mafe ty fanantenantikagne amy izao naho ampitahaegne tamy itika nagneke i talily soay voaloha’ey. Maro ty raha atao i Satana mba hitsapagne antika. Faie ho vitantika ty hiaretse irey naho fa itika ampea i Jehovah.

MITOVY AMO O FIAROVAN-DOHAO O FANANTENANTIKAGNEO

8. Nagnino ty fanantenagne ro mitovy amo o fiarovan-dohao? (1 Tesalonianina 5:8)

⁸ Ampitovie ty Baiboly amy ty fiarovan-doha ka o raha tamaentikagneo. (Vakio ty 1 Tesalonianina 5:8.) Magnisy fiarovan-doha o maramilao mba hiarovagne ty loha’e amy ty bala filesidoro naho ty fitaovagne fialiagne hafa alefa ty fahavalo iareo. Manao aly ara-pagnahy tika. Mila arovantikagne amy ty fanafiha i Satana ka areke ty fomba fisaignantikagne. Mampiasa tsapa hevetse maro naho heve-diso reke mba hanimbagne ty fomba fisaignantikagne. Faie i raha tamaentika rey le afake miaro ty fomba fisaignantikagne, manahake o fiarovan-doha o maramilao, amy izay tika tsy hivalike amy i Jehovah.

9. Ino ty voka’e naho fa tsy managne fanantenagne ty ndaty raike?

⁹ Ty fanantenantikagne hiaigne nainai’e le hagnampe antika hanao raha aman-kilala naho hahay handrambe fanapahan-kevetse. Faie naho maleme ty fanantenantikagne sady raha ara-nofo avao ro lava eretseretentikagne, le ho halignontikagne i fanantenantika hiaigne nainai’ey. Hoe izay zao ty raha nahazo ty Kristiana ila’e ta Korinto tagne. Misy fampitamàn’Andrianagnahare raike lahibey zay tsy ninoa iareo, le ty famelomagne ty mate. (1 Kor. 15:12) Nirehafe i Paoly tie naho fa tsy mino izay ty ndaty raike, le ze hagnomeagne fahafaham-po ty fagniria ty nofo iareo avao ro atao’e. (1 Kor. 15:32) Maro amy ty ndaty tsy mino ty fampitamàn’Andrianagnahare amy izao ka ro tsy mieretseretse ty hanao afa-tsy ze raha hampifalefale aze avao. Faie itika tsy hoe izay, satria matoky i raha nampitamaen’Andrianagnahare antika rey. Manahake o fiarovan-dohao areke i raha tamaentika rey, satria miaro ty saintika io sady magnampe antika tsy hanao ze hampifalefale antika avao. Ty anto’e, hanimba ty fifandrambesantika amy i Jehovah zay.​—1 Kor. 15:33, 34.

10. Nagnino o fanantenagneo ro miaro antika amo o heve-disò?

¹⁰ Miaro antika tsy hino ty heve-diso toy o fanantenagneo: Tsy hahavita hampifale i Jehovah zao rehe ndra inogn’inogne raha atao’o. Va’e hisy ndaty ohatse hirehake hoe izao: ‘Tsy hiaigne nainai’e zao raho, satria tsy fagneva izay. Tsy ho vitako ka ty hagnorike ty lilin’Andrianagnahare.’ Tsiaro’o vao fa nirehake raha mitovy amy izay tamy i Joba ty Elifaza, i mpampionogne sandokey? Hoe reke: “Ty inogne amo o ndaty mete mateo ro halio?” Hoe ka reke miomba an’Agnahare: “Henteo fa ndra o anjeli’eo tsy atokisa’e, sady ndra i lagnitsey aza tsy malio agnatreha’eo.” (Joba 15:14, 15) Faie vande iaby reo! Ko haligno fa boake amy i Satana o hevetse rehoe. Hai’e fa naho ihe lava mieretseretse hoe izay avao, le hihegne ty fanantena’o. Ko mino ty heve-diso hoe ireo, fa mifantoha amy ty raha ampitamae i Jehovah. Matokisa rehe fa tea i Jehovah hiaigne nainai’e, sady hagnampe azo reke mba hahatratse ze tanjogne zay.​—1 Tim. 2:3, 4.

HAMAFESO LOGNANDRO TY FANANTENA’O

11. Nagnino tika ro mila manam-paharetagne amy itika mandigne ty hahatanteraha i raha tamaentikagney rey?

¹¹ Tsy mora avao ze ho bey fanantenagne zao. Va’e tsy ho lignentika ty hagnantanteraha i Jehovah ty fampitamae’e. Faie ko haligno fa Andrianagnahare nainai’e reke, le tsy mitovy amy ty aze ty fomba fiheverantika o fotoagneo. (2 Pet. 3:8, 9) Hotanterahe’e amy ty fomba tena soa ty raha ampitamae’e, faie va’e tsy ho amy ty fotoagne eretseretantikagne aze ty hanoa’e izay. Ino ty hagnampe antika hagnamafe ty fanantenantikagne avao amparake ty andignisantika ty fotoagne hagnatanteraha i Jehovah i fampitamae’e rey?​—Jak. 5:7, 8.

12. Ino ty ifandrambesa ty fanantenagne naho ty finoagne, arake ty Hebreo 11:1, 6?

¹² Ho bey fanantenagne avao tika naho mikezake hifandrambe marine amy i Jehovah avao, i magnomey toky antika tie hagnatanterake i raha tamaentikagneỳ. Toe naho ty maregne, o fanantenagneo le ampifandrambese ty Baiboly amy ty finoagne tie misy ty Jehovah sady “mpamale soa ze mipay aze mafe.” (Vakio ty Hebreo 11:1, 6.) Arakarake ty inoantika i Jehovah, ty vao mainke hahavy antika hatoky tie ho tanterahe’e i raha nampitamae’e rey. Andao tika handineke raha efatse azontika atao mba hagnamafesagne ty fifandrambesantika amy i Jehovah. Hagnamafe ty fanantenantikagne ka ty fanoagne izay.

13. Akore ty hahavy antika hifandrambe maifitse aman’Andrianagnahare?

¹³ Mivavaha amy i Jehovah, le vakio ka ty Saontsi’e. Maregne fa tsy afake mahatrea i Jehovah tika faie afake mifandrambe maifitse ama’e. Afake mirehake ama’e amy ty alala ty vavake tika, le matoky fa hijanjigne antika reke. (Jer. 29:11, 12) Mitsanogne an’Andrianagnahare tika naho fa mamaky ty Saontsi’e sady misaintsaigne ze raha vakientikagne ao. Vao mainke hihamafe ty fanantenantikagne naho fa itika mahatrea ty fomba nikarakarà i Jehovah i mpanompo’e tsy nivalike taloha rey. Ze raha voasoratse agnate ty Saontsin’Andrianagnahare ao le ‘sinoratse mba hampianaragne antika. Amy izay tika hanagne raha tamaegne, satria magnampe antika hiaretse ty Soratse Masigne.’​—Rom. 15:4.

14. Nagnino tika ro toko’e hisaintsaigne ty raha natao i Jehovah hoahy ty ndaty hafa?

¹⁴ Saintsaigno ty fomba fa nagnatanteraha i Jehovah ty raha nampitamae’e. Dineho ohatse ty raha natao’e tamy i Abrahama naho i Saraha. Nampitamà iareo ty Jehovah tie hanagne anake iareo. Ie amy izao fa sambe fa antetse iareo tamy izay, sady i Saraha fa tsy afake niterake. (Gen. 18:10) Le akore ty natao i Abrahama? Hoe ty Baiboly: “Nino reke tie hanjare ho rae ty firenena maro.” (Rom. 4:18) Hoe sarotse inoagne zay tie i Abrahama mirovaly ro mbe hiterake, faie tena natoky ty Abrahama tie hotanterahe i Jehovah i fampitamae’e zay. Tsy nidiso tamà o lahilahy nanam-pinoagne iohoe. (Rom. 4:19-21) Ty tantara hoe io le mampianatse antika fa ndra tie hoe fa tsy misy fanantenagne sasa aza ty raha iaignantika, le afake matoky avao tika tie hotanterahe i Jehovah ze raha ampitamae’e.

15. Nagnino tika ro toko’e hisaintsaigne ty raha fa natao i Jehovah ho antikagne?

¹⁵ Saintsaigno ty raha fa natao i Jehovah ho azo. Dineho tie ino ty soa nirambese’o manokagne naho fa nitanterake tama’o ty fampitamaegne agnate ty Saontsin’Agnahare ao. Nampitamà ohatse ty Jesosy tie hagnomey azo ze raha paliae’o ty Baba’e. (Mat. 6:32, 33) Nagnomey toky azo ka reke tie homey i Jehovah fagnahy masigne rehe naho fa mangatake ama’e. (Lioka 11:13) Nitanterahe i Jehovah o fampitamae’e rehoe. Azo’o atao ka ty misaintsaigne ty fampitamagne hafa fa nitanterahe i Jehovah tama’o manokagne. Ohatse, nampitamà azo reke tie hamela heloke azo, hampionogne azo naho hagnomey azo hanegne ara-pagnahy. (Mat. 6:14; 24:45; 2 Kor. 1:3) Naho ihe misaintsaigne ty raha fa natao i Jehovah ho azo, le vao mainke rehe hatoky i raha ampitamae’e amy ty hoavy rey.

MIFALEA AMY TY FANANTENAGNE

16. Nagnino o fanantenagneo ro fagnomezagne sarobily?

¹⁶ Fagnomezagne sarobily boake aman’Andrianagnahare ty fanantenagne hiaigne nainai’e. Tena fa tsy lignentika ty hiavia ze raha fanjaka amy ty hoavy zay, sady matoky tika fa tsy maintsy ho avy eo zay. Io ty vatofantsintikagne, satria io ty magnampe antika tsy ho voaozongozogne. Ty voka’e, hahavita hiaretse fitsapagne, fagnenjehagne, naho tsy hatahotse ty ho mate tika. Io ka ty fiarovan-dohantikagne, satria io ty miaro ty fomba fisaignantikagne. Ty voka’e, tsy hino o heve-disò tika sady hanao ty soa avao. I raha ampitamae ty Baiboly rey ty magnampe antika hifandrambe maifitse aman’Agnahare, sady manoro ty halale ty hatea’e antika. Tena handrambe soa areke tika naho mikezake magnamafe ty fanantenantika lognandro.

17. Nagnino o fanantenantikagneo ro mahavy antika ho fale?

¹⁷ Izao ty raha nirehafe i apostoly Paoly amy i taratasi’e hoahy o Romanao aoy: “Mifalea amy ty fanantenagne.” (Rom. 12:12) Nifale avao ty Paoly, satria natoky reke tie naho tsy mivalike hatrake ampara’e, le hahazo i havelogne nainai’e an-dagnitse agney. Afake mifale amy i fanantenantikagney ka tika, satria matoky tika fa ho tanterahe i Jehovah i fampitamae’ey. Ty anto’e, hoe ty mpanao salamo raike toy: “Sambatse ... ze mitamà i Jehovah Andrianagnahare’e, ... i tsy ombia hivalikey.”​—Sal. 146:5, 6.