Nandeha Nialy o Israelitao tie Taloha. Faie Nagnino Tika amy Izao ro Tsy Engagne Hialy?

“NAHO misy raike ama’areo tsy mete handeha hialy amo o Frantsay naho o Anglisio le tsy maintsy hovonoegne nareo.” Izay ty raha nirehafe ty maramila Nazia raike tamo o Vavolombelo i Jehovah-o tamy i Aly Lahibey Faharoey. Tsy nisy tamo o rahalahintikao nagneke handika ty fitsipy i Jehovah ndra tie nisy maramila Nazia aza ty nagnodidigne teo. Tena nanagne herim-po iareo! Hoe izay ty fomba fihevera o Vavolombelo i Jehovah-o o alio. Tsy mandrambe anjara amy ty aly amy ty tontolo toy eto tika ndra tie va’e hamonoagne antikagne aza zay. Tsy manohagne ty aly amy ty tontolo toy eto tika.

Maro ty ndaty mirehake ty vata’e tie Kristiana faie mbe mandeha mialy avao. Misy ty mieretseretse tie afake mialy ty Kristiana sady toko’e hiaro ty tanendraza’e iareo. Izao ty raha va’e eretserete iareo: ‘Toe vahoan’Agnahare o Israelita talohao faie nandeha nialy. Le nagnino ty Kristiana ro tsy mahazo mialy?’ Akore ty hamalea’o izay? Mila hazavaentikagne tie tsy mitovy tamo o Israelita talohao ty mpanompon’Agnahare amy izao. Intoa misy raha dime tsy mampitovy antika amo o Israelitao.

1. TAMY TY FIRENENA RAIKE AVAO TY NISY O VAHOAN’ANDRIANAGNAHAREO

Taloha, le napetra i Jehovah tamy ty toeragne raike o Israelitao. Natao’e tihoe “fanagnako manokagne filieko boake amo o firenenao” iareo. (Eks. 19:5) Naho fa nagnirake o Israelitao hialy amy ty firenena hafa areke ty Andrianagnahare le tsy nialy ndra namono ty mpiharo finoagne ama’e iareo.a

Amy izao, le “boake amy ty firenena sambe hafa, naho foko, naho vahoake, vaho firehake iaby” o mpanompo i Jehovah-o. (Apok. 7:9) Naho mandrambe anjara amy ty aly areke iareo le azo antoke fa hialy naho hamono ty mpiharo finoagne ama’e.

2. I JEHOVAH TY NAGNIRAKE O ISRAELITAO HANDEHA HIALY

Taloha, le i Jehovah ty namaritse ty fotoagne toko’e hialia o Israelitao naho ty anto’e anoa iareo izay. Nagnirake o Israelitao zao, ohatse, ty Jehovah mba hampihatse ty lilim-pitsara’e tamo o Kananitao satria nalaza ho nanompo sampy, nijangajanga, naho nanao sorogne ajaja iareo. Mba hiarovagne o Israelitao le nampandringane i Jehovah ze ndaty manao o raha rehoe tamy i tane nampitamaegney teo. (Lev. 18:24, 25) Naho fa nipetrake tamy i tane nampitamaegney teo o Israelitao le nandily iareo hialy amy ty fahavalo iareo ty Jehovah. (2 Sam. 5:17-25) Faie tsy nenga i Jehovah hanao izay iareo naho tsy nahazo alalagne boake ama’e. Raty ty voka’e naho nialy avao iareo faie tsy nahazo alalagne boake amy i Jehovah.—Nom. 14:41-45; 2 Tan. 35:20-24.

Amy izao, le tsy enga i Jehovah hialy sasa o ndatio. Mandietse ty saontsy i Jehovah areke iareo naho fa mandeha mialy. Va’e ho anto’e ara-politike ndra ty mba hahazoagne tane maro naho harena maro ty anto’e mahavy iareo mandeha mialy. Faie akore ty amy i ndaty mialy mba hamonoagne ty fahavalon’Agnahare naho hiarovagne ty fanompoagne aze rey? Ty aly Aramagedona avao ty aly natoka i Jehovah mba hiarova’e ty fivavahagne maregne naho handringana’e ty fahavalo’e. (Apok. 16:14, 16) Amo o aly iohoe le ty tafin’Andrianagnahare an-dagnitse agne ty hampiasae’e fa tsy o mpanompo’e an-tane etoio.—Apok. 19:11-15.

3. TSY NAMONO ZE NDATY NANEHO FINOAGNE I JEHOVAH O ISRAELITAO

I Rahaba mamihigne rakemba raike agnisa ty keleia’e le miala i Jeriko, i tanàgne niravagney iareo. Ndaty hafa agnisa ty keleia’e magnorike iareo. — Misy amy ty firenena amy izao vao tohagna i Jehovah manahake ty nanohagna’e o Israelitao tamy i aly ta Jeriko agney?

Taloha, le tsy vinono o maramila Israelitao ze ndaty naneho finoagne an’Andrianagnahare fa ze ndaty fagneva ty hovonoegne avao ro vinono iareo. Mareho ty ohatse roe retoa: Ndra tie nisaontsy aza ty Jehovah tie toko’e ho ravagne ty Jeriko le tsy vinono o Israelitao ty Rahaba naho ty keleia’e satria naneho finoagne i Jehovah iareo. (Jos. 2:9-16; 6:16, 17) Tafara tatoy ka, le tsy niringanegne o Gibeonitao satria natahotse an’Andrianagnahare iareo.—Jos. 9:3-9, 17-19.

Amy izao, le maro amy ty ndaty maneho finoagne an’Andrianagnahare ro vonoe o fanjakagneo. Maro ty ndaty tsy manan-tsiny mate naho fa misy firenena mialy.

4. MILA MAGNORIKE TY TOROMAREKE OMEY I JEHOVAH O ISRAELITAO NAHO FA HANDEHA HIALY

Taloha, le tsy maintsy magnorike ty toromareke omey i Jehovah o Israelitao naho fa nandeha nialy. Nandily o Israelitao zao ohatse ty Jehovah mba hirehake amy i firenena hotafihegney ty “raha toko’e hatao iareo mba tsy hisia ty aly.” (Deot. 20:10) Nandily o maramila Israelitao naho ty tobe iareo ka reke mba halio avao sady hagnorike ty fitsipi’e miomba ty findesam-batagne. (Deot. 23:9-14) Nisy tamy ty firenena nagnodidigne iareo ohatse namahotse ty ampela amy i tane nirese iareo rey faie nirarà i Jehovah tsy hanao izay iareo. Afake vola’e raike iareo vaho afake manambaly ty ampela niazo iareo tamy ty aly.—Deot. 21:10-13.

Amy izao, le maro ty firenena mifagnarake tie toko’e hisy anto’e marem-pototse vaho izay ty firenena raike mahazo manafike ty firenena hafa. Natao o raha rehoe mba hiarovagne o vahoakeo faie maro ty firenena tsy mankatò o fifagnarahagne iohoe.

5. MIALY HOAHY O VAHOA’EO TY JEHOVAH

Nihomake i manda i Jeriko-y naho fa boake nandily o Israelitao hikorakorake naho i mpisorogney hitioke i antsivay ty Josoa. Misy sisa i manday tavela ty teo, le misy taly mena mitsiraviravy ty amy lafinetey eo. — Tsy mamono ty ndaty maneho finoagne i Jehovah manahake ty natao i Jehovah tamy i Rahaba naho ty keleia’e tamy i aly ta Jeriko agney vao ty firenena amy izao naho fa mialy?

Taloha, le nialy hoahy o Israelitao ty Jehovah sady mateteke reke ro manao fahagagagne mba hahavy iareo handrese. Izay zao ty natao i Jehovah naho fa iareo nanafike ty tanà i Jeriko. Nisaontsy ty Jehovah tie naho “manao korakora o ndaty hialy iareo le hihomake i manday” sady ho mora amy iareo ty hanafike i tanàgney. (Jos. 6:20) Akore ka ty nandresea iareo o Amoritao? “Nampipoha i Jehovah havandra iareo le nimaro ty ndaty nivonoe i havandray naho ampitahaegne amy ty nivonoe o Israelitao tamy ty mesabey.”—Jos. 10:6-11.

Amy izao, le tsy mialy amy ty firenena ambone tane etoy sasa ty Jehovah. ‘Tsy agnisa ty tontolo toy ty Fanjakà’e.’ (Jaona 18:36) Naho ty maregne, le i Satana ty mifehe ty mpitondra amy ty tontolo toy eto. O aly misy ambone tane etoao, le mampiseho i toetse’e raty rey.—Lioka 4:5, 6; 1 Jaona 5:19.

TEA FILONGOAGNE TY TENA KRISTIANA

Arake ty nitreantika le tsy mitovy amo o Israelita talohao ty raha iaignantika amy izao. Tsy o tsy fitoviagne rehoe avao ty anto’e mahavy antika tsy mandeha mialy. Intoagne misy anto’e hafa: Nisaontsy ty Jehovah tie amy ty andro fara’e ze ndaty ampianare’e, le “tsy hianatse aly sasa.” Azo antoke areke fa tsy handrambe anjara amy ty aly iareo. (Isaia 2:2-4) Fagnampe izay le nirehake ty Jesosy tie “tsy agnisa ty tontolo toy” o mpiana’eo sady tsy manohagne ndra ia ndra ia iareo naho fa misy firenena mialy.—Jaona 15:19.

Nisy raha hafa ka nampanoe i Jesosy o mpanonjohy ty lia’eo. Nampianare’e iareo mba hagnalavitse ze raha va’e hahavy iareo ho boseke, hialy ndra halaigne ndaty. (Mat. 5:21, 22) Nampianare’e ka iareo mba ho “mpampilongo” naho ho tea ty fahavalo’e.—Mat. 5:9, 44.

Akore ty hampiharantika izay? Azo antoke fa tsy te handrambe anjara amy ty aly rehe faie misy ndaty amo o fiangonagneo eo vao rambese’o ho fahavalo’o? Andao tika hikezake avao mba hagnafake ze toetse raty agnatentikagne ao zay.—Jak. 4:1, 11.

Tsy mandrambe anjara amy ty aly tika fa mikezake avao ty ho mpampilongo naho ho tea ty ndaty hafa. (Jaona 13:34, 35) Lonike abey tika tsy hanohagne ndra ia ndra ia amy ty aly o firenenao amparake ty hamoagna i Jehovah o alio.—Sal. 46:9.

a Nifanafike ty foko amo o Israelio eo tie taloha faie tsy nahafale i Jehovah ty fanoa iareo izay. (1 Mpanj. 12:24) Faie nisy fotoagne nenga i Jehovah hialy tamy foko Israelita hafa o Israelitao naho misy amy i fokoy nivalike tama’e ndra manao fahotagne lahibey.—Mpits. 20:3-35; 2 Tan. 13:3-18; 25:14-22; 28:1-8.