Afake ty Hiaigne Nainai’e Tika

1. Ino ty ho voka’e naho fa misaintsaigne i fampitamà i Jehovah havelogne nainai’ey tikagne?

MAMPITAMÀ ty Jehovah tie hahazo “havelogne nainai’e” ze mankatò aze. (Rom. 6:23) Naho fa misaintsaigne ty raha mey i Jehovah antikagne tika, le mihamitombo ty hateantikagne aze. Vetsevetseo zao: Tena tea antikagne i Babantika an-dagnitse agney kanao nagnomey o fagnomezagne iohoe, amy izay tsy hisy raha hampisarake antika ama’e.

2. Magnampe antikagne hahavita inogne i fampitamà i Jehovah havelogne nainai’ey?

² Magnampe antika hiaretse ze raha sarotse atrehentika amy izao i fampitamà i Jehovah havelogne nainai’ey. Ndra tie magnorohoro ty hamono antikagne aza o fahavalontikagneo le hanohy hanompo i Jehovah avao tika. Fa nagnino? Satria ndra tie mate aza tika, le hovelome i Jehovah naho tsy mivalike sady afake mitamà ty tsy ho mate sasa. (Jaona 5:28, 29; 1 Kor. 15:55-58; Heb. 2:15) Nagnino tika ro matoky tie afake ty hiaigne nainai’e? Andao handineke anto’e tsiampeampe.

VELOGNE NAINAI’E TY JEHOVAH

3. Nagnino tika ro matoky fa vita i Jehovah ty hahavy antika ho velogne nainai’e? (Salamo 102:12, 24, 27)

³ Vita i Jehovah ty hahavy antika ho velogne nainai’e satria ireke ty nifotora o aigneo sady velogne nainai’e ka reke. (Sal. 36:9) Misy andinin-teny tsiampeampe amy Baiboly ao magnamaregne tie fa nisy avao ty Jehovah amparake izay sady hisy avao nainai’e. Rehafe ty Salamo 90:2 ohatse tie ‘fa ela bey ty naha Andrianagnahare i Jehovah sady tsy hisy fara’e.’ Hoe izay ka ty raha rehafe ty Salamo 102. (Vakio ty Salamo 102:12, 24, 27.) Hoe izao ka ty raha nirehafe i Habakoka mpaminany miomba i Raentikagne an-dagnitse agney: “Tsy fa nisy avao vao rehe Jehovah amparake izay? Tsy ho vilasy zao rehe.”​—Hab. 1:12.

4. Toko’e hampivali-doha antika vao ty tsy fahatakaragne tie nisy avao ty Jehovah amparake izay? Hazavao.

⁴ Sarotse ama’o vao ty mahatakatse tie fa nisy “nainai’e” ty Jehovah? (Isaia 40:28) Tsy irehe avao ty mahatsapa izay. Izao ty nirehafe i Eliho miomba an’Andrianagnahare: “Tsy hay iahegne ty taogne nisia’o.” (Joba 36:26) Naho fa tsy taka tika ty raha raike le tsy midika zay tie tsy maregne i rahay. Va’e tsy tena ho taka tikagne ohatse ty fomba fiasa o courant-ò. Faie midika vao zay tie tsy misy reke? Aha’a, tsy izay! Va’e tsy ho takantikagne tanterake ka tie akore ty hampitombegne tihoe fa nisy avao ty Jehovah amparake izay sady hisy avao nainai’e. Faie tsy midika zay tie tsy velogne nainai’e ty Andrianagnahare. Tsy ty raha taka tika ndra tsy taka tika ro mamaritse i Mpamboatse antikagney. (Rom. 11:33-36) Fa nisy reke taloha ty nisia ze hene raha iaby, agnisa izay o masoandro naho o vasiagneo. Matoky tika tie ‘niforogne i Jehovah tamy ty heri’e ty tane toy’, sady fa nisy reke taloha ty ‘namboara’e i lagnitsey.’ (Jer. 51:15; Asa. 17:24) Ino ka ty anto’e hafa mahavy antika hatoky tie afake ty hiaigne nainai’e tika?

NIFOROGNEGNE MBA HIAIGNE NAINAI’E TIKAGNE

5. Ino ty fanantenagne nanagna i mpivaly voaloha’e rey?

⁵ Voafetra avao ty fahareta ty fahaveloma ze kila raha niforogne i Jehovah ankoatse o ndatio. Iareo avao ro nampitamae’e tie ho velogne nainai’e. Faie nampitao i Adama ty Jehovah tie: “Ao tsy hohane’o ty voa i hatae fahafantaragne ty soa naho ty ratỳ, fa naho homagne aze rehe le ho mate.” (Gen. 2:17) Naho nankatò i Jehovah ty Adama naho i Eva le tsy ho nimate. Azo eretseretegne tie ho nengà i Jehovah hihinagne amy i “hatae-kavelogney” iareo. Ty fihinana iareo o hatae-kavelogne iohoe ty ho nahavy iareo hanagne toky tie “hovelogne nainai’e.”b​—Gen. 3:22.

6-7. a) Ino ty porofo magnamaregne tie niforognegne hiaigne nainai’e o ndatio? b) Ino ty raha tea’o hatao naho fa amy tontolo vaovao agne? (Henteo i sarey.)

⁶ Mahaliagne fa misy mpikaroke nahatrea tie afake mitamiry fagnazavagne mandikoatse ze azontikagne avory amparake ty ivelomantikagne o betrontikagneo. Tamy 2010 le nisy lahatsoratse niboake tamy ze gazete raike zay. Nirehake o gazete iohoe teie afake mitamiry fagnazavagne eo ho eo amy ty 2,5 tapetrisa zigà o betrontikagneo. Mitovy amy ty video maharetse 3 tapetrisa lera zay. Afake 300 taogne mahery vaho ho vita ty magnente izay. Faie mbe mihoatse lavitse izay ty raha azo o betrontikagneo tamiriegne. Izay ty mampiseho fa tsy tihoe namboare i Jehovah hitamiry ty raha iaignantika agnate ty 70 ndra 80 taogne avao o betrontikagneo fa mihoatse izay.​—Sal. 90:10.

⁷ Naho fa namorogne o ndatio ty Jehovah, le nasia’e fagniriagne tsy te ho mate ty agnate’e ao. Rehafe ty Baiboly fa nataon’Andrianagnahare tagnate o ndatio ao ty “fagniriagne hiaigne nainai’e.” (Mpito. 3:11) Agnisa ty anto’e mahavy o fateo ho fahavalontikagne zay. (1 Kor. 15:26) Naho fa itika zao marare mafe, le tsy mitoboke mandigne ho mate avao, fa mandeha mamonje dokotera mba hitsaboagne i aretegney. Manao ze fara’e vitantikagne tika mba hahavy antika tsy ho mate. Naho fa mate ka ty ndaty tsy foentikagne ndra bey ndra kede, le malahelo mafe tikagne. (Jaona 11:32, 33) Tsy ho natao i Jehovah hanagne ze fagniriagne zay tikagne naho tsy nisafirie’e ty hiaignantikagne nainai’e. Mbe misy porofo hafa ka ahafahantikagne matoky tie afake ty hiaigne nainai’e tikagne. Andao tika handineke ty raha natao i Jehovah taloha naho amy izao magnaporofo fa mbe tsy niova i fikasà’e tamboaloha’e tagney.

TSY NIOVA I FIKASÀ I JEHOVAH-Y

8. Ino ty ianarantika boake amy ty Isaia 55:11 miomba i fikasà i Jehovah ho antikagney?

⁸ Ndra tie nanota aza ty Adama naho i Eva, sady nanjare mate ka ty tarana iareo voka ze raha natao iareo zay, le tsy niova i fikasà i Jehovah-y. (Vakio ty Isaia 55:11.) Mbe irie’e ho velogne nainai’e o ndaty tsy mivalikeo. Magnamaregne izay ty raha nisaontsie i Jehovah naho natao’e mba hagnatanterahagne i fikasà’ey.

9. Ino ty raha nampitamae i Jehovah? (Daniela 12:2, 13)

⁹ Nampitamà ty Jehovah tie hamelogne ty mate sady homei’e fahafahagne hiaigne nainai’e iareo. (Asa. 24:15; Tit. 1:1, 2) Tena natoky ty Joba, lahilahy tsy nivalike tie magniry mafe hamelogne o ndaty nimateo ty Jehovah. (Joba 14:14, 15) Nihay i Daniela mpaminany ka tie hovelomegne o ndaty fa nimateo sady afake ty hiaigne nainai’e iareo. (Sal. 37:29; vakio ty Daniela 12:2, 13.) Nihay o Jiosy tamy ty andro i Jesosio ka fa hagnomey “havelogne nainai’e” o mpanompo’e tsy mivalikeo ty Jehovah. (Lioka 10:25; 18:18) Mateteke ty Jesosy ro nirehake ze fampitamagne zay, sady ndra ireke ka aza nivelomen-dRae’e tamy ty mate.​—Mat. 19:29; 22:31, 32; Lioka 18:30; Jaona 11:25.

10. Magnaporofo inogne i famelomagne ty mate taloha rey? (Henteo i sarey.)

¹⁰ I Jehovah ty nifotora o aigneo, le managne hery reke mba hamelomagne ty mate. Nimei’e hery ty Elia mpaminany mba hamelogne amy ty mate i ana-dahy i ampela vantotse ta Zarefata tagney. (1 Mpanj. 17:21-23) Nampea’e ka ty Elisa mpaminany tafara izay, mba hamelogne i ana-dahy i ampela Sonemitay. (2 Mpanj. 4:18-20, 34-37) O ndaty nivelomegne tamy ty mate rehoe naho ty ndaty hafa nivelomegne amy ty mate, le magnaporofo fa managne hery hamelomagne ty mate ty Jehovah. Natoro i Jesosy tamy ireke tan-tane itoỳ fa nimein-dRae’e ze hery zay ka reke. (Jaona 11:23-25, 43, 44) An-dagnitse agne zao ty Jesosy sady “fa nimeigne aze iaby ty fahefagne an-dagnitse agne naho an-tane etoy.” Midika zay tie ho vita’e ty hagnatanterake i fampitamà’e tihoey tie hovelomegne amy ty mate ‘ze an-kibory agne’ sady afake mitamà ty hovelogne nainai’e.​—Mat. 28:18; Jaona 5:25-29.

11. Nagnino i solovoigney ro mahavy antika ho afake hiaigne nainai’e?

¹¹ Nagnino ro nengà i Jehovah hijale naho ho mate i Ana-dahi’e ikokoa’ey? Ahatreavagne ty anto’e ty raha nirehafe i Jesosy toy. Hoe reke: “Tena tean’Andrianagnahare vata’e ty tontolo toy kanao nimei’e i Ana’e bakotokagney, amy izay tsy ho ringagne ze maneho finoagne aze fa hahazo havelogne nainai’e.” (Jaona 3:16) Manjare afake ty hahazo havelogne nainai’e tika, satria nimein’Andrianagnahare hisolovoigne antikagne i Ana-dahi’ey. (Mat. 20:28) Nagnazava o ampaha’e amy ty fikasàn’Andrianagnahare iohoe ty apostoly Paoly naho fa nanoratse tie: “Satria hirike amy ty ndaty raike o fateo, le hirike amy ty ndaty raike ka ty famelomagne ty mate. Fa manahake ty imateza ty ndaty iaby noho ty natao i Adama ro hamelomagne ty ndaty iaby noho ty natao i Kristy.”​—1 Kor. 15:21, 22.

12. Akore ty hagnatanteraha i Jehovah i fikasà’e ho antikagney?

¹² Nampianatse o mpanonjohy ty lia’eo ty Jesosy mba hivavake ty hiavia i Fanjakàn’Andrianagnaharey naho ty hanoagne ty zoton’arofo’e an-tane etoa. (Mat. 6:9, 10) Agnisa ty fikasà i Jehovah tihoe hiaigne nainai’e an-tane etoy o ndatio. Mba hagnatanterahagne izay, le tinendre i Jehovah ho Mpanjaka i Fanjakà i Mesiay i Ana-dahi’ey. Nijobogne ndaty miiake 144 000 boake an-tane etoy ka reke mba hiara-hiasa amy i Jesosy hagnatanterake i fikasà’ey.​—Apok. 5:9, 10.

13. Ino ty raha atao i Jehovah amy izao, le ino ty toko’e hatao’o?

¹³ Mamory i “vahoake tsy vatse isahegney” ty Jehovah amy izao. Ampiofagne’e o ndaty rehoe mba hanjare vahoa i Fanjakà’ey. (Apok. 7:9, 10; Jak. 2:8) Tsy miharo saigne ty tontolo toy satria mifankalaigne naho mialy. Faie o “vahoake tsy vatse isahegneo” mikezake mafe mba tsy hifankalaigne. Hoe fa nanefe ty mesabei’e mba hanjare lasarỳ iareo. (Mika 4:3) Tsy mandrambe anjara amy ty aly iareo fa mikezake magnampe ndaty hahatrea i “tena fiaignagney.” Manao izay iareo naho fa mampianatse ty miomba i Jehovah naho ty fikasà’e. (1 Tim. 6:19) Va’e hanohetse iareo ty keleia iareo, ndra tsy hanam-bola iareo satria manohagne i Fanjakàn’Andrianagnaharey, faie atao i Jehovah azo antoke fa managne ty raha paliave’e iareo. (Mat. 6:25, 30-33; Lioka 18:29, 30) Ireo ty magnaporofo fa tena misy i Fanjakàn’Andrianagnaharey sady hagnatanterake ty fikasà i Jehovah.

HO SOA TY HOAVY

14-15. Akore ty hahatanterake i fampitamà i Jehovah hamoagne o fateoy?

¹⁴ Fa Mpanjaka an-dagnitse agne ty Jesosy amy izao, le hotanterahe’e iaby i fampitamagne natao i Jehovah rey. (2 Kor. 1:20) Fa nanjaka amo o fahavalo’eo ty Jesosy nanomboke tamy 1914. (Sal. 110:1, 2) Kede sisa le hamita ty fandresea iareo ty Jesosy naho i hiarake hanjaka ama’e rey, le hampibaibay ze ndaty raty fagnahy.​—Apok. 6:2.

¹⁵ Hovelome i Jesosy o ndaty nimateo amy i Fanjakagne Arivo Taogney, le hampea’e ho voririke ze mankatò i Jehovah. Ze ndaty hatao i Jehovah tihoe maregne afara i fitsapagne fara’ey ro “handova ty tane toy, sady hitoboke etoy nainai’e.” (Sal. 37:10, 11, 29) Fa ty tena hahafale, le “ho foagne o fateo, i fahavalo fara’ey.”​—1 Kor. 15:26.

16. Ino ty anto’e lahibey anompoantikagne i Jehovah?

¹⁶ Nianarantika tamy ty lahatsoratse toy fa mioregne amy ty Saontsin’Agnahare i fanantenantika hiaigne nainai’ey. Magnampe antika tsy hivalike amo ze o andro fara’e, sarotse atrehegne zao o fanantenagne iohoe. Faie naho te hampifale i Jehovah tika, le tsy ampe naho ty fagniriantika te ho velogne avao ty mandrisike antika hanao izay. Tena teantika ty Jehovah naho i Jesosy, le izay ty anto’e lahibey mahavy antika tsy hivalike amy iareo. (2 Kor. 5:14, 15) Ze hateantika iareo zay ka ty mahavy antika te hitsikombe iareo naho hagnambara i fanantenantikagney amy ty hafa. (Rom. 10:13-15) Naho fa mikezake tsy ho tea tegna naho hatarike tika, le ho agnisa ty ndaty tea i Jehovah ho ragne’e nainai’e.​—Heb. 13:16.

17. Ino ty andraikentika tsikiraidraike? (Matio 7:13, 14)

¹⁷ Ho agnisa ty ndaty hahazo i havelogne nainai’ey vao rehe? Fa nanao raha ty Jehovah mba hahafahantika mahazo izay. Ty raha mila ataontika sisa, le ty mijanogne amy i lalagne mbamy i havelogney mbeoy. (Vakio ty Matio 7:13, 14.) Hianarantika amy ty lahatsoratse magnarake tie hanao akore ze o hiaigne nainai’e zao.