Mihamaro ty Tanora Voa ty Areten-tsaigne: Ino ty raha rehafe ty Baiboly?

Nanao tatetse miomba ty areten-tsaigne mahazo o tanora amerikanao ty Foibey Mialy amy ty Aretegne Etazonia agne, tamy ty Tinainy 13 Fevrie 2023. Rehafe i tatetsey fa mahery ty 40 isan-jato ty mpianatse amy i lisé ey ro malahelo agnate ty fotoagne lava sady mieretseretse tie tsy misy hazavagne sasa ty fiaigna’e.

Izao ty nirehafe i Pr. Kathleen Ethier, talè ty sampan-draharaha miandraikitse ty fahasalama o tanorao naho ty mpianatse amy ty lakilasy amo o foibey iohoe ao: “Trea’ay fa miharaty ty areten-tsaigne mahazo o tanorao tagnate ty folo taogne. Vao mainke niharaty tsy nanahake ty taloha ty mahazo o ajaja ampelao. Mihamaro ty ajaja ampela te hamono tegna, misy aza ty fa nagnandragne nanao izay.”

Izao ty rehafe i tatetsey:

Efatse amby folo isan-jato ty somondrara ndra 1 agnate ty 10 ro seregne hifampila ndra mihoatse izay. Izao ty rehafe i Pr. Ethier: “Tena mampatahotse ty mieretseretse izay satria naho mahafantatse ajaja folo rehe, le va’e ty raike amy iareo farafahakede’e ro fa nisy namahotse.”
Telopolo isan-jato ty somondrara ndra 1 agnate ty 3 ro tapa-kevetse ty hamono tegna
Fito amby dimampolo isan-jato ty somondrara ndra 3 agnate ty 5 ro malahelo agnate ty fotoagne lava sady mieretseretse tie tsy misy hazavagne sasa ty fiaigna’e

Tena mampalahelo o tatetse rehoe satria fotoagne toko’e hahafale sady hahafinaritse ty fahatanoragne. Ino ty hagnampe o tanorao hahavita hiatreke ty olagne mahazo iareo? Ino ty raha rehafe ty Baiboly?

Afake magnampe o tanorao ty Baiboly

Maregne i raha rehafe ty Baiboly tihoey tie: “fotoan-tsarotse tsy mora atrehegne” o andro iaignantikagne zao. (2 Timoty 3:1-5) Misy torohevetse azo ampiharegne soa ty agnate’e ao, sady afake magnampe tanora an-tapetrisa’e magneneke ty tane toy mba ho fale ndra tie miatreke raha sarotse aza. Dineho ty lahatsoratse retoa fa ahatreavagne torohevetse boake agnate Baiboly ao:

Naho mieretseretse ty hamono tegna ty tanora raike

Naho malahelo ndra lava kivy avao ty tanora raike

Naho misy mampijale ty tanora raike ndra misy ndaty raty fagnahy ama’e ty amy Internet ao

Naho misy mitsibore ty tanora raike ndra nisy namahotse

Afake magnampe o rae aman-dreneo ty Baiboly

Misy torohevetse hoahy ty rae aman-drene ka ty agnate Baiboly ao mba hahavita’e magnampe ty ana’e hiatreke olagne amy ty fiaignagne. Dineho ty lahatsoratse retoa: