Maregne Soa vao ty Fandikan-tenin’ny Tontolo Vaovao?

Tamy 1950 ro naboake ty tapa’e voaloha’e tamy ty Fandikan-tenin’ny Tontolo Vaovao.a Nanomboke tamy ty namoahagne aze, le misy ndaty mirehake fa tsy maregne ty raha ila’e rehafe’e ao. Misy ka ty mbe misalasala. Ty anto’e tsy mitovy amy ty fandikan-drehake hafa ty raha ila’e ao. Fa nagnino? Ty raike amy ty anto’e retoa ty mateteke mahavy izay:

• Azo itokisagne. Ty vokatse ty fikarohagne natao o manam-pahaiagneo naho ze azo antoke soa amo o sora-tagnagne fa ela bey reo ro nampiasaegne naho fa nandika ty Fandikan-tenin’ny Tontolo Vaovao. Faie tsy tena maregne soa sady vaho tafara ty ankamaroa ty sora-tagnagne nampiasaegne tamy ty Dikan-dreha i Mpanjaka Jacques (angilé), niboake tamy 1611.

• Tsy nisy novàgne. Nikezake mafe nampitaha ze nampanoraten’Andrianagnahare tamy Baiboly ao o namoake ty Fandikan-tenin’ny Tontolo Vaovao reo. (2 Timoty 3:16) Faie amy ty fandikan-drehake maro, le nisoloa iareo o fampianaran’olombelogneo ty hafatse boake aman’Agnahare. Novàgne agnaram-boninahitse manao tihoe Tompo ndra Andrianagnahare, ohatse, i tahinan’Andrianagnahare tihoe Jehovah-y.

• Ara-bakiteny. Misy fandikan-drehake ila’e mamintigne avao ty raha nirehafe ty Baiboly tam-boaloha’e tagne. Faie tsy manahake izay o Fandikan-tenin’ny Tontolo Vaovao io. Nadika ara-bakiteny io naho ohatse tsy manjare hafahafa i fehezantenỳ sady naho ohatse ka mbe tsy montso i hevetse tam-boaloha’e tagney. Va’e hampilitse heve o ndaty ndra hagnafake ty pitsopitso’e o mpandika rehakeo naho mamintigne avao ty raha nirehafe ty Baiboly tam-boaloha’e tagne.

Ino ty tsy mampitovy aze amy ty dikan-drehake hafa?

Misy boke tsy nampidiregne ao. Misy boke atao tihoe Apokrifa ty amy ty Baiboly naboa o Eglizy katolika naho ty Eglizy Ortodoksa ao. Tsy neké ty Jiosy taloha ho agnisa ty Soratse Masigne i boke rey. Sady o Jiosio ty rehafe ty Soratse Masigne tie “nagnankignagne ty fagnambaragne masin’Andrianagnahare.” (Romanina 3:1, 2) Mete soa areke naho tsy nisiagne o boke reo ty amy ty Fandikan-tenin’ny Tontolo Vaovao ao naho ty amy ty fandikan-drehake moderina maro.

Misy andinin-teny tsy nampidiregne ao. Misy andinin-teny ndra fehezanteny nampidiregne amy ty fandikan-drehake ila’e, faie tsy trea amo o Baiboly sora-tagnagne fa taloha bey reo ao. Tsy nampidiregne amy ty Fandikan-tenin’ny Tontolo Vaovao ao areke i andinin-teny rey naho i fehezanteny rey. Tsy trea amy ty dikan-drehake maro hafa ka i raha rey ndra nampidiregne ao avao fa nisiagne fagnamarehagne tie tsy misy loharanon-kevetse magnamaregne aze.b

Tsy mitovy ty fomba firehafagne raha. Misy fotoagne tsy le mazava ty fandikan-drehake ara-bakiteny ndra mete hanagne heve-diso. Mateteke ohatse, i reha i Jesosy amy Matio 5:3 aoy ro adika hoe izao: “Haha o miréke an-troke aoo” ndra “haha o rarake am-pañahio.” (Fandikan-teny Katolika; Fandikan-teny Protestanta) Faie tsy azo ty ndaty maro ty rehake tihoe “miréke an-troke aoo” ndra “rarake am-pañahy.” Misy ka ty mihevetse tie tea i Jesosy hiambane ndra ho rarake tikagne. Faie te hirehake ty Jesosy tamy izay fa sambatse ty ndaty raike naho fa mahatsapa fa mipay ty tari-dalan’Andrianagnahare. Mamoake soa o hevetse iohoe ty fomba irehafagne izay amy ty Fandikan-tenin’ny Tontolo Vaovao ao. Izao ty voarehake ao: “Sambatse ze mahatsiaro fa mipay an’Andrianagnahare fa aze ty Fanjakà i lagnitsey.”​—Matio 5:3.

Misy manam-pahaiagne tsy Vavolombelo i Jehovah mankasitrake ty Fandikan-tenin’ny Tontolo Vaovao

• Mpandika Baiboly sady manam-pahaiagne miomba ty Baiboly ty Edgar Goodspeed. Izao ty nisorate’e tamy 8 Desambra 1950, miomba Ny Soratra Grika Kristianina​—Fandikan-tenin’ny Tontolo Vaovao: ‘Mahaliagne ahy ty asa misionera atao’areo naho ty fiparitaha io magneran-tane. Tena teako ka i Baiboly naboa’areoy. Tsy nadika ara-bakiteny bey avao io fa natao mazava soa sady trea tie misy heri’e. Trea tie nandineke soa naho nikaroke soa ze nandika aze sady afake magnaporofo izay raho.’

  

• Manam-pahaiagne amy ty Oniverisite i Chicago ty Allen Wikgren. Nirehake reke fa mampiasa ty firehake ampiasaegne amy izao ty Fandikan-tenin’ny Tontolo Vaovao, faie tsy mitsikombe ty fandikan-drehake hafa fa magnorike ty Soratse Masigne tam-boaloha’e tagne.​—Baiboly ty Mpagnazava Rehake (angilé), Boke I, peje 99.

• Manam-pahaiagne angilé sady mpitsikera Baiboly ty Alexander Thomson. Hoe reke miomba Ny Soratra Grika Kristianina​—Fandikan-tenin’ny Tontolo Vaovao: “Trea tie asa ty manam-pahaiagne mahay naho mahira-tsaigne io. Nikezake nanao ze fara’e vita’e iareo mba hamoake amy ty rehake angilé ty tena heve ty rehake grike.”​—Mpampitaha (angilé), Avrily 1952, peje 52.

• Nisy fomba firehake tsy le mahazatse nivoamare i Charles Potter mpanoratse, ty tamy i fandikan-drehakey tao. Faie nagneke reke tie: “Tena mahay naho nandineke soa o mpandika Baiboly tsy manognogne agnaragne reo naho fa nandika ty sora-tagnagne hebreo naho grike tsy misy hoe’eo.”​—Ty Fivavahagne Orihe o Ndatio (angilé), peje 300.

• Nanoratse tatetse miomba ty Fandikan-tenin’ny Tontolo Vaovao, ty Robert McCoy. Nirehafe’e fa nisy raha hafahafa nitrea’e ty tao, faie nisy raha tena nahasoa aze ka. Izao ty rehake famaragnagne natao’e: “Naho fa henteagne ty Testamenta vaovao, le trea fa misy manam-pahaiagne ty amo o [Vavolombelo i Jehovah-o ao]. Hay iareo ty mamaha i olagne fitrea naho fa mandika Baiboly rey.”​—Gazete i Andover Newton (angilé), Janvie 1963, peje 31.

• Tsy nagneke ty fomba nandikagne ty andinin-teny ila’e amy ty Fandikan-tenin’ny Tontolo Vaovao ao ty manam-pahaiagne atao tihoe MacLean Gilmour. Faie nagneke reke, fa ‘mahalatsa ty fahaia o mpandika rehake rehoe ty rehake grike.’​—Gazety i Andover Newton (angilé), Septambra 1966, peje 26.

• Nanao tatetse miomba ty Fandikan-tenin’ny Tontolo Vaovao ty manam-pahaiagne atao tihoe Thomas Winter, amy ty Soratra Grika​—Fandikan-teny Isan’andalan’ilay Fanjakana (angilé). Hoe reke: ‘Mifagnarake amy ty vokam-pikarohagne fara’e naho mampiasa ty rehake fampiasa amo o fotoagne zao o fandikan-drehake natao o komity tsy nitognogne agnaragne rehoe.’​—Gazete Kilasike (angilé), Avrily-Mey 1974, peje 376.

• Manam-pahaiagne miomba ty rehake hebreo, mitoboke a Israely agne ty Benjamin Kedar. Hoe reke tamy 1989: ‘Manao fikarohagne miomba ty firehake raho, le misy ifandrambesa’e amy ty Baiboly hebreo naho ty fandikan-drehake io. Mateteke raho ro mampiasa Baiboly angilé tihoe Fandikan-tenin’ny Tontolo Vaovao. Mateteke raho mahatrea fa nikezake nanao ze niazo’e natao o mpandika rehake rehoe mba hahatakaragne ty tena heve ze raha voasoratse ao.’

• Nandineke o Baiboly sive fara izay maro mpampiasao ty Jason BeDuhn, mpampianatse miomba ty fivavahagne. Nagnatsoake hevetse reke fa “ty TV [Fandikan-tenin’ny Tontolo Vaovao] ro fara izay ty maregne amo o fandikan-drehake nampitahae’e reo.” Mihevetse ty ankamaroa o ndatio naho o manam-pahaiagneo fa nagnindrahindra ty fivavaha’e ty ndaty nandika ty Fandikan-tenin’ny Tontolo Vaovao, le izay ty mahavy aze tsy hitovy amy ty fandikan-drehake hafa. Faie hoe ty BeDuhn: ‘Tena maregne ty TV satria nadika ara-bakiteny naho ampitaoagne soa ty rehake nisorate ty mpanoratse ty Testamenta Vaovao tam-boaloha’e tagne, le izay ty maha sambe hafa aze amy ty fandikan-drehake hafa.’​—Ty Maregne Miomba ty Fandikan-drehake (angilé), peje 163, 165.