ኢሳይያስ

35 በረኻን ምድሪ ኣጻምእን ኪፍሳህ፡+

ጐልጐል ምድረ በዳ ኺሕጐስ፡ ከም ሳፍሮን ድማ ኪዕምብብ እዩ።+

 2 ብርግጽ ኪዕምብብ እዩ፣+

ኪሕጐስን እልል ኪብልን እዩ።

ክብሪ ሊባኖስ፡+

ግርማ ቀርሜሎስን+ ሳሮንን+ ኪውሃቦ እዩ።

 3 ንዝደኸማ ኣእዳው ኣበርትዑ፣

ወለል ንዝበላ ኣብራኽ ድማ ኣደልድሉ።+

 4 ነቶም ጭኑቕ ዝልቦም፡

“በርትዑ። ኣይትፍርሁ።

እንሆ፡ ኣምላኽኩም ምስ ሕነ ኺመጽእ፡

ምስ ፍዳ እውን ኪመጽእ እዩ።+

 5 ሽዑ፡ ኣዒንቲ ዕዉራት ኪኽፈታ፡+

ኣእዛን ጸማማት ከኣ ጋህ ኪብላ እየን።+

 6 ሽዑ፡ ሓንካስ ከም እራብ ኪሰራሰር፡+

ልሳን ዓባስ ድማ እልል ኪብል እዩ።+

ከመይሲ፡ ማያት ኣብ በረኻ፡

ወሓይዝ እውን ኣብ ጐልጐል ምድረ በዳ ኺፍልፍል እዩ።

 7 ምድሪ ረመጽሲ ሻምብቆ ዝመልኦ ራህያ፡

ምድሪ ኣጻምእ ከኣ ዓይኒ ማያት ኪኸውን እዩ።+

ኣብ ሰፈር ወኻሩ፡*+

ሳዕርን ሻምብቆን ጳጲሮስን ኪኸውን እዩ።

 8 ጐደና ድማ ኣብኣ ኽትከውን፡+

እወ፡ መገዲ ቕድስና እትብሃል መገዲ ኽትህሉ እያ።

ነቶም በታ መገዲ ዚመላለሱ እተሓዝአት እያ፣

ዓሻ ኸኣ ስሒቱ ናብኣ ኣይኬብልን እዩ።

 9 ኣንበሳ ኣብኣ ኣይኪህሉን፡

ሕሱም ኣራዊት ድማ ኣይኪድይባን እዩ።

ኣብኣ እውን ኣይኪርከብን እዩ፣+

ብጁዋት ጥራይ ደኣ ኣብኣ ኺመላለሱ እዮም።+

ፍስሃን ሓጐስን ኪረኽቡ እዮም፣

ጓህን እህህታን ከኣ ኪሃድም እዩ።+