ክፍሊ 1

ኣብ ገዛ ዘሎ ጕዳያት:- ምስ ኣባላት ስድራ​ቤት ዕዉት ርክብ ምግባር

“ከም ገዛኻ ዝመስልዎ የለን።” እዚ ልሙድ ዝዀነ ኣገላልጻ እዚ ንሓደ ሎሚ ብዘሕዝን መገዲ እናጠፍአ ዝኸይድ ዘሎ ስምዒት ዘንጸባርቕ ኢዩ። ኣብ መንጎ ኣባላት ስድራ​ቤት ዝፍጠር መዕለቢ ዘይብሉ ግጭታት ንገዛ ዓውደ⁠-​ዂናት ኢዩ ዝገብራ ዘሎ። ሓሳብ ንሓሳብ ኣብ ምልውዋጥ ገፊሕ ዝዀነ ሃጓፍ ምህላዉ ኸኣ ነቲ ሽግራት ንምፍትሑ ዝግበር ጻዕሪ ተስፋ ዘቝርጽ ዝገብሮ ኢዩ።

ገዛኻ ኣብ ክንዲ ርሱን ባእሲ: ሰላም ዘለዋ ክትገብራ ትደሊዶ ኢኻ፧ ነዚ ንምግባሩ ካልኦት ኣባላት ስድራ​ቤት እውን ግዴኦም ከበርክቱ ከም ዘለዎም ሓቂ ኢዩ። እንተ​ዀነ ግን ገለ ስርዓታት መጽሓፍ ቅዱስ ብምምርማር ኣብቲ ገዛ ሰላም ከም ዝህሉ ኣብ ምግባር ብዙሕ ክትሕግዝ ትኽእል ኢኻ።