ደንግጸሎም

እቲ ጸገም

ኣብቲ ሰባት ካባና ዘለዎም ፍልልይ እንተ ኣተኲርና፡ እዚ ነገር እዚ ጕድለት ወይ ኣበር ከም ዝዀነ ጌርና ኽንድምድም ንኽእል ኢና። በዚ ኸምዚ ድማ፡ ነቶም ካባና እተፈልዩ ሰባት ከም ዝተሓቱ ጌርና ኽንርእዮም ንኽእል ኢና። እዚ ኣሉታዊ ኣረኣእያ እዚ ምስ ኣማዕበልና፡ ክንድንግጸሎም ኣይንኽእልን ኢና። እዚ ዘይምድንጋጽ ከኣ፡ ምልክት ሓደ ሱር ዝሰደደ ጸገም፡ ማለት ምልክት ኣቐዲምካ ናይ ምፍራድ ባህርይ ኪኸውን ይኽእል እዩ።

ስርዓት መጽሓፍ ቅዱስ

“ምስቶም ዚሕጐሱ ተሓጐሱ፣ ምስቶም ዚበኽዩ ብኸዩ።”—ሮሜ 12:15።

እዚ እንታይ ማለት እዩ፧ እዚ ስርዓት እዚ፡ ደንግጸሎም ብእትብል ቃል ኪጠቓለል ይኽእል እዩ። ደንጋጺ ሰብ ንርእሱ ኣብ ቦታ ኻልኦት የእቱ፡ ስምዒቶም እውን ይስምዖ እዩ።

ድንጋጽ ብኸመይ ይሕግዝ፧

ንሰብ ንድንግጽ እንተ ዄንና፡ ምስቲ ሰብ ዜመሳስለና ብዙሕ ነገር ከም ዘሎ ንፈልጥ ኢና። ስምዒቱን ተግባሩን ከም ናትና ምዃኑ ንግንዘብ ኢና። ደንገጽቲ እንተ ዄንና፡ ድሕረ ባይታኦም ብዘየገድስ ኵሎም ሰባት ሓደ ስድራ ቤት ከም ዝዀኑ ንርዳእ ኢና። ምሳና ኣብ ዜመሳስሎም ነገር እንተ ኣተኲርና ድማ፡ ብኣሉታዊ ኣይንፈርዶምን ኢና።

ድንጋጽ ንሰብ ከነኽብር እውን ትሕግዘና እያ። ኣብ ሰነጋል እትነብር ኣን-ማሪ፡ ካብ ትሑት ማሕበራዊ ደርቢ ጌርካ ንዚርኣዩ ሰባት ትንዕቕ ነይራ እያ። ድንጋጽ ብኸመይ ከም ዝሓገዛ ኽትገልጽ ከላ ኸምዚ ትብል፦ “እቶም ካብ ትሑት ደርቢ ጌርካ ዚቝጸሩ ሰባት እንታይ ጸገማት ከም ዜሕልፉ ምስ ረኣኹ፡ ‘ኣብ ቦታኦም እንተ ዝኸውን ከመይ ምተሰምዓኒ፧’ ኢለ ገዛእ ርእሰይ ሓቲተ። እዚ ኸኣ ብሓቂ ዝለዓለ ደረጃ እንተ ኣልዩኒ ሕቶ ኸም ዚልዓለኒ ገይሩ—ነዚ እውን ኣነ ብምርጫይ ወይ ብጻዕረይ ዝረኸብክዎ ኣይኰነን።” እወ፡ ነቲ ሰብ ዜሕልፎ ቓልሲ ኽንርዳእ እንተ ጽዒርና፡ ኣብ ክንዲ እንነቅፍ፡ ክንድንግጽ ኢና።

ክትገብሮ እትኽእል

ነቲ ኣብ መንጎኻን ኣብ መንጎ እቶም ብኣሉታዊ እትርእዮም ጕጅለን ዘሎኩም ፍልልይ ሰጊርካ፡ ነቲ ምስስል ክትርኢ ጽዓር። ንኣብነት፡ እዚ ዚስዕብ ኪገብሩ ኸለዉ እንታይ ከም ዚስምዖም ሕሰብ፦

• ምስ ስድራ ቤቶም ኣብ መኣዲ ኪቐርቡ ኸለዉ

• ከቢድ ዕዮ ኪሰርሑ ውዒሎም ኪዛዝሙ ኸለዉ

• ምስ ፈተውቶም ግዜ ኼሕልፉ ኸለዉ

• ዚፈትውዎ ሙዚቃ ኺሰምዑ ኸለዉ

ድሕሪኡ፡ ገዛእ ርእስኻ ኣብ ኵነታቶም ጌርካ ስኣል። ከምዚ ኢልካ ሕተት፦

• ሓደ ሰብ ዋጋ ኸም ዘይብለይ ኰይነ ኸም ዚስምዓኒ እንተ ገይሩ እንታይ ምገበርኩ፧

• ሰባት ገና ኸይፈለጡኒ ምስ ዚፈርዱኒ፡ ከመይ ምተሰምዓኒ፧

• ካብቶም ጕጅለ እንተ ዝኸውን፡ ካልኦት ብኸመይ ኪሕዙኒ ምደለኹ፧