ህውከት ዝመልኣ ዓለም

4 | ተስፋኻ ሓሉ

ኣገዳሲ ዝዀነ ስለምንታይ እዩ፧

ኣብዛ ዓለም ዘሎ ህውከት ዜጨንቕ ብምዃኑ፡ ንሰባት ብኣካላውን ብስምዒታውን መዳይ ይጐድኦም እዩ። ብዙሓት እተጐድኡ ሰባት ተስፋ ዚብሃል ኣይረኣዮምን እዩ። እሞኸ እንታይ ይገብሩ፧

ገሊኦም ብዛዕባ መጻኢ ኺሓስቡ ኣይደልዩን እዮም።
ካልኦት ከኣ ካብ ጭንቀቶም ንምህዳም፡ ኣልኮላዊ መስተ ወይ ሓሽሽ ይጥቀሙ እዮም።
ሒደት ከኣ ካብ ምንባር ሞት ይመርጹ። “ምንባር እንታይ ይዓብሰለይ፧” ኢሎም እውን ይሓትቱ እዮም።

ክትፈልጦ ዘሎካ

ገሊኡ ዜጋጥመካ ጸገም ግዜያውን ዝሓሸ ኣጋጣሚ ኼምጽኣልካ ይኽእልን እዩ።
ዋላ እኳ እቲ ዅነታትካ እንተ ዘይተቐየረ ኽትዋጽኣሉ ኺሕግዘካ ዚኽእል ነገራት ኪህሉ ይኽእል እዩ።
መጽሓፍ ቅዱስ ንጸገማት ደቂ ሰብ ንሓዋሩ ፍታሕ ኪኸውን ዚኽእል ናይ ሓቂ ተስፋ ይህብ እዩ።

ሕጂ ኽትገብሮ እትኽእል ነገራት

መጽሓፍ ቅዱስ ከምዚ ይብል፦ “ጽባሕ ናይ ርእሳ ጭንቀት ኣለዋ እሞ፡ ብዛዕባ ጽባሕ ኣይትጨነቑ። ዝዀነት መዓልቲ ናታ ጭንቂ ኣለዋ።”—ማቴዎስ 6:34።

ብዛዕባ ሓንቲ መዓልቲ ጥራይ ሕሰብ። ብዛዕባ ጽባሕ ብምጭናቕ ናይ ሎሚ መዓልቲ ሓላፍነታትካ ኻብ ምፍጻም ኣይዕገትካ።

ብዛዕባ ኼጋጥም ዚኽእል ኣሉታዊ ነገራት ምሕሳብ ንጭንቀትካ ኼጋድዶ፡ ንመጻኢ ዘሎካ ዝሓሸ ተስፋ ድማ ኬዳኽሞ ይኽእል እዩ።

ብኸመይ ትዋጽኣሉ፧ ጠቓሚ ምኽርታት

ኣብ ኣወንታዊ ነገራት ኣተኵር

መጽሓፍ ቅዱስ ከምዚ ይብል፦ “ኵለን መዓልትታት ውጹዓት ክፉኣት እየን፣ ሕጉስ ልቢ ዘለዎ ግና ብቐጻሊ ድግስ ኣለዎ።” (ምሳሌ 15:15) ኣሉታዊ ኣተሓሳስባ፡ ንመፍትሕ እቲ ጸገማት፡ ከይትርእዮ ኺገብረካ ይኽእል እዩ። ብኣንጻሩ ግና፡ ኣወንታዊ ኣመለኻኽታ ነቲ ዅነታት ክትዋጽኣሉ እትኽእል መገዲ ምእንቲ ኽትሓስብ ኪሕግዘካ ይኽእል እዩ።

ነቲ ዜና ብምርኣይ እተሕልፎ ግዜ ደረት ግበረሉ።
ኣብ መወዳእታ ነፍሲ ወከፍ መዓልቲ፡ ከተመስግነሉ ዚግባእ ክልተ ወይ ሰለስተ ነገራት ጽሓፍ።
ንሎሚ ኽትገብሮ ዘሎካ ዝርዝር ኣዳሉ። ኣብ መወዳእታ መዓልቲ ፍረ ጻማኻ ምእንቲ ኽትርኢ፡ ነቲ ዓበይቲ ስራሕ ናብ ናእሽቱ መቓቕሎ።

ሓገዝ ተቐበል

መጽሓፍ ቅዱስ ከምዚ ይብል፦ “ንርእሱ ዚፈሊ፡ . . . ንዅሉ ግብራዊ ጥበብ ከኣ ይነጽጎ።” (ምሳሌ 18:1) ካብ ዓሚቝ ጕድጓድ ብዘይ ሓገዝ ክትወጽእ ዘይከኣል እዩ፣ ሓግዝ እንተ ረኺብካ ግና ክትወጽእ ትኽእል ኢኻ።

ካብ ኣባላት ስድራ ቤትካ ወይ ፈተውትኻ ሓገዝ ሕተት።
ንስኻ እውን ንዓታቶም እትሕግዘሉ መገድታት ኣናዲ። ከምኡ ምግባርካ ብዛዕባ ጸገማትካ ሚዛናዊ ኣረኣእያ ኺህልወካ ኺሕግዘካ ይኽእል እዩ።
ተስፋ እንተ ቘሪጽካን ምንባር እንተ ሰልክዩካን ናብ ሓኪም ኪድ። ሓድሓደ ግዜ ዚስምዓካ ጸቕጢ ኸም ሕዱር ጭንቀት ዝኣመሰለ ናይ ጥዕና ጸገም ኪኸውን ይኽእል እዩ። ብዙሓት ሰባት ናብ ሕክምና ብምኻዶም ሓገዝ ረኺቦም እዮም።a

a ንቕሑ! ንዝዀነ ይኹን ሕክምና ፍሉይ ደገፍ ኣይትህብን እያ።

መጽሓፍ ቅዱስ ናይ ሓቂ ተስፋ ይህብ

ሓደ ጥንታዊ ዘማሪ ናብ ኣምላኽ ከምዚ ዚስዕብ ኢሉ ጸልዩ ነይሩ። “ቃልካ ንእግረይ መብራህቲ፡ ንመገደይ ከኣ ብርሃን እዩ።” (መዝሙር 119:105) መጽሓፍ ቅዱስ፡ ማለት ቃል ኣምላኽ ብኸመይ ከምኡ ኸም ዚዀነ መርምር።

ኣብ ጸልማት ለይቲ፡ መብራህቲ ናበይ ከም እንኸይድ ክንውስን ይሕግዘና እዩ። ብተመሳሳሊ፡ መጽሓፍ ቅዱስ ከቢድ ውሳነታት ክንገብር ኪመርሓና ዚኽእል ግብራዊ ጥበብ ዝሓዘ እዩ።

ብርሃን ኣብ ቅድሜና ዘሎ መገዲ ኽንርኢ ይሕግዘና እዩ። ብተመሳሳሊ መገዲ፡ መጽሓፍ ቅዱስ ብዛዕባ መጻኢ ሒዙልና ዘሎ ነገራት ክንርኢ የብርሃልና እዩ።

መጽሓፍ ቅዱስ፡ ታሪኽ ሰባት ዚገልጽ መጽሓፍ ጥራይ ዘይኰነስ፡ ብዛዕባ መጻኢ ናይ ሓቂ ተስፋ ዝሓዘ ቕዱስ መጽሓፍ እውን እዩ። ነዘን ስዒበን ዘለዋ ሕቶታት ድማ መልሲ ይህብ፦

ብኸመይ፧

መከራ ብኸመይ ከም ዝጀመረ መጽሓፍ ቅዱስ ከምዚ ይብል፦ “ከምቲ ብሓደ ሰብ ሓጢኣት ናብ ዓለም ዝኣተወ፡ ብሓጢኣት እውን ሞት፡ ኵላቶም ስለ ዝሓጥኡ ድማ ሞት ናብ ኵሉ ሰብ ሓሊፉ ኣሎ።”—ሮሜ 5:12።

ስለምንታይ፧

ሰብኣውያን ገዛእቲ ንጸገማትና ምፍታሕ ስለምንታይ ከም ዘይከኣሉ መጽሓፍ ቅዱስ ከምዚ ይብል፦ “ዚመላለስ ሰብ እውን ስጕምቱ ኬቕንዕ ናቱ ኣይኰነን።” (ኤርምያስ 10:23) ኣብ ዓለም ዘሎ ዅነታት፡ ነዚ ሓቂ እዚ የረጋግጸልና እዩ።

እንታይ፧

ኣምላኽ ነዚ ዅነታት እዚ ንምፍታሕ እንታይ ከም ዚገብር መጽሓፍ ቅዱስ ከምዚ ይብል፦ “ንብዘሎ ንብዓት ካብ ኣዒንቶም ኪደርዝ እዩ፣ ደጊም ሞት ኣይኪኸውንን፡ ደጊም እውን ሓዘን ወይ ኣውያት ወይ ስቓይ ኣይኪኸውንን እዩ።”—ራእይ 21:4።