ክልተ ተብዓት ኣንስቲ

እስራኤላውያን ኣብ ሽግር ምስ ወደቑ ናብ የሆዋ ኣእወዩ። የሆዋ ኸኣ ተብዓት መራ​ሕቲ ብምሃብ ይምልሰሎም። መጽ​ሓፍ ቅዱስ ነዞም መራሕቲ እዚኣቶም መሳፍንቲ ኢሉ ይጽውዖም። እያሱ እቲ ናይ መጀመርታ መስ​ፍን ኢዩ ነይሩ: ብድሕሪኡ ኸኣ ዖትኒኤል: ኤሁድ: ከምኡውን ሻምጋር መሳፍንቲ ነበሩ። ካብቶም ንእስራኤል ዝሓገዙ ግን ክልተ ኣንስቲ ኢየን ነይረን: ስመን ከኣ ዴቦራን ያዔልን ኢዩ።

ዴቦራ ነብዪት ኢያ። የሆዋ ብዛ​ዕባ መጻኢ ሓበሬታ ይህባ እሞ: ንሳ ኸኣ ነቶም ህዝቢ እቲ የሆዋ ዝበሎ ትነግሮም ነበረት። ዴቦራ ፈራዲት እውን ነይራ ኢያ። ኣብ ትሕቲ ሓደ ውሱን ኦም ተምሪ ትቕመጥ ነበረት: ሰባት ከኣ ሽግራቶም ንምፍታሕ ናብኣ ይመጹ ነበሩ።

ኣብቲ እዋን እቲ ንጉስ ናይ ከነኣን ያቢን ኢዩ ነይሩ። ያቢን 900 ዝዀና ናይ ውግእ ሰረገላታት ነበራኦ። ሰራዊቱ ኣዝዩ ብር​ቱዕ ስለ ዝነበረ ብዙሓት ካብ እስራኤላውያን ኣገልገልቲ ናይ ያቢን ክዀኑ ተገደዱ። ናይ ንጉስ ያቢን ሓለቓ ሰራዊት ሲሰራ ኢዩ ዝብሃል ነይሩ።

ሓደ መዓልቲ ዴቦራ ንመስፍን ባራቅ ልኢኻ ከምዚ በለቶ:⁠- ‘የሆዋ ከምዚ ይብል ኣሎ: “10,000 ሰባት ውሰድ እሞ ናብ ከረን ታቦር ተጓዓዝ። ኣብኡ ኸኣ ንሲሰራ ናባኻ ከምጽኦ ኢየ። ንዕኡን ንሰራዊቱን ከኣ ኣብ ኢድካ ክህበካ እየ።”

ባራቅ ከኣ ንዴቦራ ከምዚ በላ:⁠-‘ምሳይ እንተ ኬድኪ ክኸይድ እየ።’ ዴቦራ ምስኡ ኸደት: ንባራቅ ግን ከምዚ በለቶ:⁠-‘እቲ ዓወት ናትካ ኣይከውንን ኢዩ: ከመይሲ የሆዋ ንሲሰራ ኣብ ኢድ ሰበይቲ ክህቦ ኢዩ።’ ከምኡ ኸኣ ኰነ።

ባራቅ ካብ ከረን ታቦር ወሪዱ ንሰራዊት ሲሰራ ክጋጠሞም ይኸይድ። የሆዋ ኸኣ ብሃንደበት ውሒዝ ኣውሓዘ: ብዙሓት ካብ ሰራዊት ጸላኢ ኸኣ ጠሓሉ። ሲሰራ ግን ካብ ሰረገልኡ ወሪዱ ሃደመ።

ድሕሪ ቑሩብ ሲሰራ ናብ ድንኳን ያዔል መጸ። ንሳ ኸኣ እቶ በለቶ: ጸባ እውን ሃበቶ። እዚ ኸአ ከም ዝድቅስ ገበሮ: ኣብ ሓጺር ግዜ ኸኣ ዓሚቝ ድቃስ ወሰዶ። ድሕርዚ ያዔል ሽኻል ድንኳን ወሲዳ ኣብ ርእሲ ናይዚ እኩይ ሰብኣይ ሸኸለቶ። ጸኒሑ ባራቅ መጸ እሞ ነቲ ዝሞተ ሲሰራ ኣርኣየቶ! ስለዚ እቲ ዴቦራ ዝበለቶ: ናይ ሓቂ ከም እተፈጸመ ክትርኢ ትኽእል ኢኻ።

ኣብ መወዳእታ ንጉስ ያቢን እውን ተቐትለ: እስራኤላውያን ከኣ ንቑሩብ ግዜ እንደገና ሰላም ረኸቡ።