ሓደ ሓለቓ ሚእቲ ዓባይ እምነት ኣርኣየ

የሱስ ነቲ ኣብ ከረን ዝሃቦ ስብከት ምስ ወድአ፡ ናብ ከተማ ቅፍርናሆም ከደ። ኣብኡ ድማ ዓበይቲ ኣይሁድ ናብኡ ቐረቡ። ናብኡ ኪኸዱ ዝለኣኾም ከኣ፡ ሓደ ኣይሁዳዊ ዘይኰነ ሮማዊ ሓለቓ ሚእቲ እዩ ነይሩ።

እቲ ሓለቓ ሚእቲ፡ ዚፈትዎ ባርያኡ ኣመና ሓሚሙ፡ ኪመውት ቀሪቡ ነበረ። እቲ ሓለቓ ሚእቲ ኻብ ኣህዛብ እኳ እንተ ነበረ፡ ካብ የሱስ ግና ሓገዝ ደለየ። እቶም ኣይሁድ ድማ፡ “ጊልያይ ለሚሱ ኣብ ቤተይ ደቂሱ ኣሎ፣ ብርቱዕ ቃንዛ እውን ኣለዎ” ኢሎም ኪነግርዎ ኸም እተላእኩ ንየሱስ ነገርዎ። (ማቴዎስ 8:6) ኣስዕብ ኣቢሎም ከኣ፡ እቲ ሓለቓ ሚእቲ “ንህዝብና ይፈቱ፡ ምኵራብ እውን ሃኒጹልና እዩ” ብምባል ሓገዝ ከም ዚግብኦ ንየሱስ ገለጹሉ።—ሉቃስ 7:4, 5።

የሱስ ከኣ ምስቶም ዓበይቲ ናብ ቤት እቲ ሓለቓ ሚእቲ ኸደ። ምስ ቀረቡ ግና፡ እቲ ሓለቓ ሚእቲ ኣዕሩኹ ልኢኹ፡ “ጐይታይ፡ ንስኻ ናብ ትሕቲ ናሕሰይ ክትኣቱ፡ ኣነ ብቑዕ ኣይኰንኩን እሞ፡ ኣይትድከም። ስለዚ ድማ እየ ናባኻ ንምምጻእ፡ ንርእሰይ ብቕዕቲ ገይረ ዘይቈጸርክዋ” በሎ። (ሉቃስ 7:6, 7) እዚ ትእዛዝ ምሃብ ዝለመደ ሰብ እዝስ ከመይ ዝበለ ትሕትና ዝመልኦ ዘረባ ዀን እዩ ተዛሪቡ! ብዘይካዚ ድማ፡ እዚ ዘረባኡ ኻብቶም ንባሮቶም ብጭካነ ዚሕዙ ሮማውያን እተፈልየ ምዃኑ ዜርኢ እዩ።—ማቴዎስ 8:9።

እቲ ሓለቓ ሚእቲ፡ ኣይሁድ ምስ ካልእ ዝዓሌቱ ኸም ዘይሕወሱ ይፈልጥ ነይሩ ኪኸውን ኣለዎ። (ግብሪ ሃዋርያት 10:28) ምናልባት ነዚ ኣብ ግምት ብምእታው እዩ ብኣዕሩኹ ገይሩ ንየሱስ፡ “ሓንቲ ቓል በል እምበር፡ ጊልያይ ኪሓዊ እዩ” ዝበሎ።—ሉቃስ 7:7።

የሱስ እዚ ምስ ሰምዐ፡ ተገረመ እሞ፡ “ከምዚኣ ዝበለት ዓባይ እምነትሲ፡ ኣብ እስራኤል እኳ ኣይረኸብኩን፡ እብለኩም ኣለኹ” በለ። (ሉቃስ 7:9) እቶም ኣዕሩኽ እቲ ሓለቓ ሚእቲ፡ ናብ ቤት ምስ ተመልሱ፡ እቲ ኸቢድ ሕማም ሓሚሙ ዝነበረ ባርያ ጥዕዩ ረኸብዎ።

የሱስ ነቲ ባርያ ምስ ኣሕወዮ፡ በቲ ኣጋጣሚ እቲ ተጠቒሙ ኣይሁድ ዘይኰኑ ሰብ እምነት ከም ዚባረኹ ኺገልጽ ከሎ፡ “ብዙሓት ካብ ምብራቕን ካብ ምዕራብን ኪመጹ፡ ኣብ መንግስተ ሰማያት ከኣ ምስ ኣብርሃምን ይስሃቅን ያእቆብን ኣብ መኣዲ ኪቕመጡ እዮም” በለ። እቶም እምነት ዘይነበሮም ኣይሁድከ፧ የሱስ ብዛዕባኦም፡ “ናብቲ ኣብ ወጻኢ ዘሎ ጸልማት ኪድርበዩ እዮም። ኣብኡ ድማ ኪበኽዩን ኣስናኖም ኪሕርቅሙን እዮም” በለ።—ማቴዎስ 8:11, 12።

ስለዚ፡ እቶም ነቲ ምስ ክርስቶስ ክፍሊ እታ መንግስቲ ኪዀኑ መጀመርታ ኣጋጣሚ ተኸፊቱሎምሲ ዘይተቐበልዎ ብስጋ ኣይሁድ፡ ተቐባልነት ኣይረኽቡን እዮም። ኣህዛብ ግና ብምሳልያዊ ኣዘራርባ “ኣብ መንግስተ ሰማያት” ኣብ መኣዲ ኪቕመጡ እዮም።