ጽውጽዋይ 6፦ ኣምላኽ ብምስልን ስእልን ዚግበር ኣምልኾ ይቕበሎ

መበቈል እዚ ጽውጽዋይ እንታይ እዩ፧

“ጥንታውያን ክርስትያናት ንምስልታት ኣብ ኣምልኾኦም ኣይጥቀሙሉን እዮም ነይሮም። . . . ኣብ 4ይን 5ይን ዘመን ምስልታት ናብ ቤተ-ክርስትያን ኪኣቱ ዝኸኣለ፡ ደናቝርቲ ሰባት ካብ ብስብከት ወይ ብመጻሕፍቲ ንላዕሊ፡ ብእኡ ገይሮም ብዛዕባ ክርስትና ኺመሃሩ ይኽእሉ ብዚብል ምኽንያት እዩ።”—ሳይክሎፔድያ ኦቭ ቢብሊካል፡ ቲኦሎጂካል፡ ኤንድ ኤክለሲያስቲካል ሊትረቸር፡ ብማክሊንቶክን ስቶሮንግን፡ 4ይ ጥራዝ፡ ገጽ 503, 504።

መጽሓፍ ቅዱስ እንታይ ይብል፧

“ኣብ ላዕሊ ኣብ ሰማይ ካብ ዘለዉ፡ ኣብ ታሕቲ ኣብ ምድሪ ኻብ ዘለዉ፡ ኣብ ማይ ከኣ ኣብ ትሕቲ ምድሪ ኻብ ዘለዉ፡ ምስልን ስእሊ ዘበለን ንኣኻ ኣይትግበር። ኣይትስገደሎምን ኣይተገልግሎምን ድማ።” (ዘጸኣት 20:4, 5) ሃዋርያ ዮሃንስ ኣብ ቀዳማይ ዘመን ንዝነበሩ ክርስትያናት፡ “ኣቱም ደቀየ፡ ካብ ጣኦታት ተሐለዉ” ኢሉ ጸሓፈሎም።—1 ዮሃንስ 5:21።

ከምቲ ኣብያተ-ክርስትያን ዚብላኦ፡ ምስልታት ነቲ ዚውክሎ ነገር ንኽትቀርቦን ንኸተኽብሮን ዚሕግዝ ጥራይ ድዩ፧ ዘ ኢንሳይክሎፔድያ ኦቭ ረሊጅን ከምዚ በለ፦ “ኣብ ፈለማ፡ ምስልታት ንትምህርትን ንምምልኻዕን ተባሂሉ ጥራይ የገልግል ነይሩ ይኸውን፣ እንተ ወሓደ፡ ንኸምኡ ጥራይ ከም ዜገልግል ይማጐቱሉ ነይሮም። ነዊሕ ከይጸንሐ ግን፡ ንኣምልኾ ኼገልግል ከም ዝጀመረ ዘይከሓድ እዩ። ብፍላይ እቲ ኣብ ምብራቓዊ ኦርቶዶክስ ብብዝሒ ዚዝውተር ስእልታት ንኸምዚ ዝኣመሰለ ዕላማ ኼገልግል ጀመረ።” ይኹን እምበር፡ ነብዪ ኢሳይያስ፡ “ንኣምላኽ ምስ መን ተማሳስልዎ፧ ምስ ኣየናይ መልክዕከ ኸተመዓራርይዎ ኢኹም፧” ዚብል ሕቶ ኣቕሪቡ ኣሎ።—ኢሳይያስ 40:18።

ነዚ ጥቕስታት መጽሓፍ ቅዱስ ኣረኣእዮ፦ ኢሳይያስ 44:13-19፣ ግብሪ ሃዋርያት 10:25, 26፣ 17:29፣ 2 ቈረንቶስ 5:7